ମାତିଉ 24
24
ମନ୍ଦିର୍ ଦ୍ୱଂସଆନି ବିସୟ୍ତାନ୍ ଜିସୁ ୱେର୍ତାନ୍
(ମାର୍କ ୧୩:୧-୨; ଲୁକ ୨୧:୫-୬)
1ଜିସୁ ମନ୍ଦିର୍ତାନ୍ ସସି ସନିୱାଲେ ସିସୁର୍ ମନ୍ଦିର୍ତି ମେଡ଼େଇଲୁକୁ ୱିଜୁ ତର୍ନି ଉଣ୍ତିଙ୍ଗ୍ ୱାନି ଲାକ୍ତୁ ୱାତାର୍ । 2ଜିସୁ ଇର୍ହାନ୍, “ଇଲେଇ ଗିଦେ ଇୟାୱିଜୁ ସୁଡ଼ୁଜିନିଦେର୍ । ନାନ୍ ମିଙ୍ଗିଁ ସତ୍ ଇଜିନା, ଇୟା ମନ୍ଦିର୍ତି ଉନ୍ଡ୍ରି କାଲୁ ଆଇ କାଲୁ ମୁସ୍କୁ ତେବାଉ, ୱିଜୁ ବୁମିଦୁମିସାନେ ।”
ଦୁଃକ୍ ନି କାସ୍ଟୁ ପୟ୍ନିକା
(ମାର୍କ ୧୩:୩-୧୩; ଲୁକ ୨୧:୭-୧୯)
3ଜିସୁ ଜିତ ଗରନ୍ ମୁସ୍କୁ ବାସ୍ତି ମାରିଇୱାଲେ ସିସୁର୍ ୱାନି ଲାକ୍ତୁ ନେସ୍ଇୱାଜା ୱାଜି ୱେନ୍ବାତାର୍, “ଇୟାୱିଜୁ ଏସ୍କାଙ୍ଗ୍ ଗଟାନାତ୍, ଆକା ମାଙ୍ଗିଁ ଇନିଆ । ଇନିକା ଗଟାତିଙ୍ଗ୍ ମାପ୍ ନେସ୍ନାପ୍ ଜେ ନିନ୍ ୱାନି ବେଡ଼ା ଆତାତ୍ନି ମାରି ଇୟା ଜୁଗ୍ସେସ୍ ଆନାତ୍ ।”
4ଜିସୁ ୱାରିଙ୍ଗ୍ ଇର୍ଆନ୍, ଜାଗାର୍ତା ମାନ୍ଡ୍ରୁ । ଏନ୍ ଏଣ୍ତେସ୍ ମିଙ୍ଗିଁ ବାୟା କିଏନ୍ । 5ଗାଦିଲୋକ୍ ନା ଦର୍ ଆସ୍ସି ୱାଜି ଇନାର୍, ନାନ୍ ନେ କ୍ରିସ୍ତ ଅର୍ତ ମସିହ । ଇକା ଇନ୍ଞ୍ଜି ୱାର୍ ଗାଦିଲୋକାଙ୍ଗ୍ ବାୟାକିନାର୍ । 6ମିର୍ ଲାକ୍ତୁ ସାଲାତିମାନି ଜୁଦ୍ତି ଆଉଲି ୱେନିଦେର୍ ମାରି ଆକ ସାଲାତିମାନି ଜୁଦ୍ତି କାବୁର୍ ୱେନିଦେର୍ । ମାତର୍ ତିଲାମାଟ୍ । ଇୟାୱିଜୁ ପୁରା ଗଟାନାତ୍, ମାତର୍ ଇୟାତାନି ଅର୍ତ ଆଏତ୍ ଜେ ଜୁଗ୍ ସେସ୍ଆନି ଦିନ୍ ଲାକ୍ତୁ । 7ଦେସ୍ ଦେସ୍ତି ଲୋଇ ଜୁଦ୍ ସାଲାନାତ୍, ଉନ୍ଡ୍ରି ରାଜି ଆଇ ରାଜି ମୁସ୍କୁ ଡାକ୍ନାତ୍ । ୱିଜୁ ତରିନ୍ ଉନ୍ଣ୍ତେ ତିନ୍ଡ୍ରେଙ୍ଗ୍ ପୁଟ୍ଏତ୍ ମାରି ବୁମିକମ୍ପ ଆନାତ୍ । 8ମାତର୍ ଇୟାୱିଜୁ ଜନମ୍କିନି କାସ୍ଟୁଦି ଆରାମ୍ ମାତର୍ ।
9 #
ମାତିଉ ୧୦:୨୨. ମିର୍ ଆସାୟ୍ଆଜି ଦୁଃକ୍କାସ୍ଟୁ କିନି ଉଣ୍ତିଙ୍ଗ୍ ସର୍ପେ କିନାର୍ ମାରି ମିଙ୍ଗିଁ ସାୟାମାର୍ଗା ଡାକ୍ନାର୍, ନାବାନ୍ ବିସ୍ବାସ୍ କିତିମାନି ଉଣ୍ତିଙ୍ଗ୍ ମିର୍ ୱିଜେରି ଲୋକାଦି ମାଣାନ୍ କାଡ଼ାଇଆନିଦେର୍ । 10ନାସ୍ତିୱାଲେ ଗାଦିଲୋକ୍ ୱାରି ବିସ୍ବାସ୍ ଆରାକିନାର୍, ନିଜେନିଜେଦିଙ୍ଗ୍ କାଡ଼ାଜିସାଜି ନିଜେନିଜେଦି ଉଣ୍ତିଙ୍ଗ୍ ଆସିସ୍କିଆୟ୍ଆନାର୍ । 11ନାସ୍ତିୱାଲେ ଗାଦିଲୋକ୍ ବଣ୍ତ ବାବବାଦିଦିର୍ ୱାଜି ଲୋକାଙ୍ଗ୍ ବାୟାକିନାର୍ । 12ମାରି ଅଦାର୍ମୁ ନାଣ୍ତ ଆତାତ୍ଆକା ଏସାଲୋକା ମାପୁରୁଙ୍ଗ୍ଁ ଜିବନ୍ନୋନିକା ସିତିଡ଼ିଆନାତ୍ । 13#ମାତିଉ ୧୦:୨୨.ମାତର୍ ଏନ୍ ସାରାସାରି ୱେନ୍କା ସାନ୍ଦି ସାସ୍ଆସ୍ସି ତେବାନାନ୍, ୱାନ୍ ରକିୟା ପଇନାନ୍ । 14ମାପୁରୁଦି ରାଜିଦି ବିସୟ୍ତାନ୍ ନେଗିକାବୁର୍ ୱିଜୁ ଲୋକାଦି ଲାକ୍ତୁ ସାକି ସିଦେଙ୍ଗ୍ ଇୟା କାବୁର୍ ସାରାଦୁନିଆଦି ୱିଜୁ ତରିନ୍ ପ୍ରଚାର୍ ଆନାତ୍ । ତାନେୱେନ୍କା ଜୁଗ୍ସେସ୍ ଆନାତ୍ ।
ନାସ୍ଟୁକିନି କାଡ଼୍ନି ବିସୟ୍
(ମାର୍କ ୧୩:୧୪-୨୩; ଲୁକ ୨୧:୨୦-୨୪)
15ମିର୍ ଏସ୍ତିୱାଲେ ବାବବାଦି ଦାନିୟେଲ୍ ମାଣାନ୍ ୱେର୍ଇଆତି ନାସ୍ଟୁକିନି କାଡ଼୍ନି ତାନେଙ୍ଗ୍ ମନ୍ଦିର୍ ପବିତ୍ର ବାଡିଦୁ ନିନିମାନିକା ସୁଣିଦେର୍ । ଇୟାତାନି ଅର୍ତ ଇନିକା, ପଡ଼ାଜ ବୁଜାଦୁ । 16ନାସ୍ତିୱାଲେ ଆମାଲୋକ୍ ୱିଜେରେ ଜିହୁଦା ଗାଡ଼୍ତୁ ମାନାର୍, ୱାର୍ ଗରନ୍ ମୁସ୍କୁ ଉରୁକ୍ସି ସଲିର୍ । 17#ଲୁକ ୧୭:୩୧.ଆମାକାର୍ ସାତ୍ ମୁସ୍କୁ ମାନାର୍, ୱାର୍ ଇଲୁ ଲୋଇ ସାମାନ୍ପତର୍ ଅତେଙ୍ଗ୍ ଇଜି ଆଡ୍ଗି ୱାଜି ୱେଡ଼ା ନାସ୍ଟୁ କିମାକିନ୍ । 18ଆମାକାର୍ କିଡ଼ିଇଦୁ ସୋଲ୍ସି ମାନାର୍, ନିଜେଦି ସାଦର୍ ତାତେଙ୍ଗ୍ ଇଜି ଡ଼େସି ସଲ୍ମାକିନ୍ । 19ନାସ୍ତିୱାଲେ ପଟାଦୁମାନି ଆଇମାଲୋକ୍ ମାରି ଇସ୍ରି କଡ଼ରିଙ୍ଗ୍ ଆସ୍ସି ପାଲ୍ ଉଟ୍ପିସ୍କିନି ଆଇସିକା ଅବସ୍ତା ଏସ ତାଗ୍ଇକା ଆନାତ୍ । 20ମାପୁରୁଙ୍ଗ୍ ପାରାତାନା କିଜିମାନ୍ଡ୍ରୁ, ପିନିକାଡ଼ାଦୁ ସିଲିତିଙ୍ଗ୍ ରମ୍ନିନାଣ୍ତିଆଙ୍ଗାଁ ମିଙ୍ଗିଁ ଏଣ୍ତେସ୍ ଉରୁକ୍ସି ସନ୍ଡ଼୍ରେଙ୍ଗ୍ ପଡ଼ାଏତ୍ । 21#ପ୍ରକାଶିତ ୭:୧୪.ନାସ୍ତିୱାଲେ ଇୟାୱାଜା ନାଣ୍ତକାସ୍ଟୁ ଗଟ୍ନା ଜେ, ଦୁନିଆଦି ତିଆର୍ଆତିମାଣାନ୍ ନେର୍ ସାନ୍ଦି ଗଟାଏତ୍, ମାରି ଏସ୍କାଙ୍ଗ୍ବା ଗଟାଏତ୍ । 22ମାତର୍ ଇୟା ଦୁଃକ୍ତି ବେଡ଼ାଦିଙ୍ଗ୍ ମାପୁରୁ ଉଣା କିତାମାନାନ୍, ଆକା ଆଇତିମାରିଙ୍ଗ୍, ମାରି ଏନ୍ ଜିଜ ମାନ୍ଏତାନ୍ମାନ୍ଦି । ମାତର୍ ୱାନି ଆସ୍କିତିମାନି ଲୋକାଙ୍ଗ୍ ରକିୟା କିଦେଙ୍ଗ୍ ଇଜି ମାପୁରୁ ଆୟା ସମୟ୍ତିଙ୍ଗ୍ ଉଣା କିତାମାନାନ୍ ।
23ନାସ୍ତିୱାଲେ ଜଦି ଏନ୍ ମିଙ୍ଗିଁ ଇନ୍ନାନ୍, ଇବେନୁ କ୍ରିସ୍ତ ମାନାନ୍ ସିଲିତିଙ୍ଗ୍ ଆବେନ୍ ୱାନ୍ ମାନାନ୍; ଆକା ବିସ୍ବାସ୍ କିମାଟ୍ । 24ଇରିଙ୍ଗ୍ ଆପ୍ଣାଦିଙ୍ଗ୍ କ୍ରିସ୍ତ ସିଲିତିଙ୍ଗ୍ ବାବବାଦି ଇନାୟ୍ଆଜିମାନି ବଣ୍ତବାବବାଦିର୍ ନାସ୍ତିୱାଲେ ତର୍ଆୟାଆନାର୍ । ୱାର୍ କାବାଆନିକା ମାରି ତିଲାନିପାଣି ତର୍ସି ମାପୁରୁଦି ଆସ୍କିତିମାନି ଲୋକାଙ୍ଗ୍ ବାୟାକିନାର୍ । 25ୱେନ୍ଡ୍ରୁ ! ଆୟା ସମୟ୍ ୱାନି ଆଗ୍ଡ଼ିନେ ନାନ୍ ମିଙ୍ଗିଁ ଇୟାୱିଜୁ ମାଟା ୱେର୍ତା ସିଜିନା ।
26 #
ଲୁକ ୧୭:୨୩,୨୪. ମାରି, ସୁଡ଼ୁଦୁ, ୱାନ୍ ବାଲିରାଜିଦୁ ମାନାନ୍, ଲୋକୁ ଜଦି ମିଙ୍ଗିଁ ଇୟା ମାଟା ଇନାର୍, ଆବେନୁ ସୋଲ୍ମାଟ୍ । ମାରି ସୁଡ଼ୁଦୁ, ଇବେନୁ ୱାନ୍ ବାକ୍ରା ଲୋଇ ମାର୍ଗିତାମାନାନ୍, ଜଦି ଇକା ଇନାର୍, ୱାରିଙ୍ଗ୍ ବିସ୍ବାସ୍ କିମାଟ୍ । 27ମିର୍ସିନିକା ଏଣ୍ତେସ୍ ୱେଡ଼ାସନି ତରିଟାନ୍ ନି ୱେଡ଼ାଆର୍ନିତର୍ନି ସାନ୍ଦି ବାଦଡ଼୍ତିଙ୍ଗ୍ ଜାୟ୍ କିନାତ୍, ଆୟାୱାଜା ମନୁସ୍ୟପୁତ୍ରଦି ୱାନିକା ଗଟାନାତ୍ ।
28 #
ଲୁକ ୧୭:୩୭. “ଏମେମାନୁ ସାତିମାଡ଼ା ମାନାତ୍, ଆୟାବାନୁ ଡେଗେଙ୍ଗ୍ ଉନ୍ଡ୍ରେମାନୁ ଉଣ୍ତାନେ ।”
ମନୁସ୍ୟପୁତ୍ରଦି ୱାନିକା
(ମାର୍କ ୧୩:୨୪-୨୭; ଲୁକ ୨୧:୨୫-୨୮)
29 #
ପ୍ରକାଶିତ ୬:୧୨;
ପ୍ରକାଶିତ ୬:୧୩. “ଆୟା ଦୁଃକ୍କାସ୍ଟୁଦି ବେଡ଼ା ୱିଜିନି ବେଡ଼ାଦୁ ୱେଡ଼ା ସିକାଟି ଆନାତ୍ ମାରି ଲେଜୁ ମାରି ଜାୟ୍ ସିଏନ୍, ମାରି ସୁକେଙ୍ଗ୍ୱିଜୁ ବାଦଡ଼ତାନ୍ ଆର୍ନେ ମାରି ବାଦଡ଼ତି ସାକ୍ତିୱିଜୁ ଇନିଙ୍ଗାଁଆନିଆ ଆନେ । 30#ପ୍ରକାଶିତ ୧:୭.ତାନେୱେନ୍କା ମନୁସ୍ୟପୁତ୍ରଦି ସିନେଙ୍ଗ୍ ବାଦଡ଼ତୁ ତର୍ନେ ମାରି ମନୁସ୍ୟପୁତ୍ର ମେଗେମାଳାଦାନ୍ ପେରି ସାକ୍ତିଦାନ୍ ମାରି ଗୌରବ୍ଦାନ୍ ୱାଜିମାନିକା ସୁଡ଼ୁଜି ଦୁନିଆଦି ୱିଜୁ ବାସାଦି ଲୋକୁ ଆଡ଼ାବାନାର୍ । 31ବାଜାମରି ଆନାତ୍ ମାରି ପୃତିବିଦି ଉନ୍ଡ୍ରି କନାଦାନ୍ ଆଇ କନା ସାନ୍ଦି ସାରିବେଡ଼ିତିଦାନ୍ ୱାନି ଆସ୍କିତିମାନି ଲୋକାଙ୍ଗ୍ ଉଣ୍ତା କିଜ ତାନି ଉଣ୍ତିଙ୍ଗ୍ ମନୁସ୍ୟପୁତ୍ର ୱାନି ଦୁତ୍କାଙ୍ଗ୍ ପୋକ୍ନାନ୍ ।”
ତଗା ମାରାତାନ୍ ସିକିୟା
(ମାର୍କ ୧୩:୨୮-୩୧; ଲୁକ ୨୧:୨୯-୩୩)
32“ତଗା ମାରାନ୍ତାନ୍ କାତା ଅଜାଦୁ, ଏସ୍ତିୱାଲେ ତାନି କମେଆଙ୍ଗ୍ଁ ଆକୁ ପାସ୍ରିକା ମାରି କଡ଼୍କିକା ଆଜି ପୁନି ଆକୁ କାୟାନାତ୍, ନାସ୍ତିୱାଲେ ଜେଟାପ୍ ଲେଞ୍ଜୁ ଲାକ୍ତୁ ୱାତାନି ଇଜି ମିର୍ ନେସ୍ସିନିଦେର୍ । 33ଆୟାୱାଜା ମିର୍ ବା ଇୟାୱିଜୁ ଗଟ୍ନେଙ୍ଗ୍ ସୁଡ଼ୁତିଙ୍ଗ୍, ମନୁସ୍ୟପୁତ୍ର ସେର୍ଲା ଲାକ୍ତୁ ଇତାନ୍ ଇକା ଇଜି ମିର୍ ନେସ୍ତୁ । 34ନାନ୍ ମିଙ୍ଗିଁ ସତ୍ ଇଜିନା, ମାନ୍ତୁଇଡିଦୁ, ଇଲେଇ ଜିବନ୍ମାନି ଲୋକା ମାଣାନ୍ ୱିଜେରେ ସାନି ଆଗ୍ଡ଼ି ଇୟାୱିଜୁ ବିସୟ୍ ଗଟାଏତ୍ । 35ବାଦଡ଼ ନି ପୃତିବି ମାରାଗ୍ନାତ୍; ମାତର୍ ନା ବାକ୍ୟ ଏସ୍କାଙ୍ଗ୍ ମାର୍ଗେଏତ୍ ।”
ୱାନ୍ ୱାନିକା ଟିକ୍ ସମୟ୍ ଏନ୍ ନେସ୍ଏର୍
(ମାର୍କ ୧୩:୩୨-୩୭; ଲୁକ ୧୭:୨୬-୩୦,୩୪-୩୬)
36“ମାତର୍ ଆୟା ଦିନ୍ ବା, ଆୟା ବେଡ଼ା ଏସ୍କାଙ୍ଗ୍ ୱାନାତ୍, ଏନ୍ ୱେର୍ତେଙ୍ଗ୍ ଆଟ୍ଏନ୍ । ନିଜେ ମାପୁରୁଦି ମାରିନ୍ ନି ଦୁତ୍କୁ ବା ଆୟାମାଟା ନେସେଉ, କେବଲ୍ ବୁବା ମାପୁରୁ ନେସ୍ନାନ୍ । 37ନୋହଦି ବେଡ଼ାଦୁ ଏଣ୍ତେସ୍ ଗଟାତା ମାର୍ହାତ୍, ମନୁସ୍ୟପୁତ୍ରଦି ୱାନି ବେଡ଼ାଦୁ ଆୟାୱାଜା ଗଟାନାତ୍ । 38ଗାଲିପିରୁଦି ଆଗ୍ଡ଼ିରି ବେଡ଼ାଦୁ ନୋହଦି ଜାହାଜ୍ତୁ ଡ଼ୁଗୁନି ଦିନ୍ ସାନ୍ଦି ଲୋକୁ ଉଣିତିନିକା ମାରି ମେମାରି ନି ଆଇମା ପେଡ଼ିଆନି ୱିଜୁପାଣିଦୁ ଦାନ୍ଦା ଆତାମାର୍ହାତ୍ । 39ଗାଲିପିରୁଦୁ ୱାର୍ ଦେଲ୍ଜିସନି ସାନ୍ଦି ଇନିକା ଗଟାଜିନାତ୍ ନେସ୍ତେଙ୍ଗ୍ ଆଟ୍ଏଜି ମାର୍ହାର୍ । ମନୁସ୍ୟପୁତ୍ର ୱାଜିନି ଦିନ୍ତୁ ବା ଟିକ୍ ଆୟାୱାଜା ଆନାତ୍ । 40ଆୟା ସମୟ୍ତୁ କିଡ଼ିଇଦୁ ପାଣି କିଜିମାନି ରିଏରି ମେମାରିରି ମାଣ୍କୁ ଅରେନ୍ୱାନିଙ୍ଗ୍ ଅଆୟ୍ଆନାତ୍ ମାରି ଆଇ ଅରେନ୍ ୱାନିଙ୍ଗ୍ ଡ଼ିସ୍ନାସିନାର୍ । 41ରୁଣ୍ତି ଆଇମେକ୍ ଜାତାଦୁ ନୁର୍ଜିମାନେ, ଅରେତ୍ତାନିଙ୍ଗ୍ ଅଆୟ୍ଆନାତ୍ ମାରି ଆଇତାନିଙ୍ଗ୍ ଡ଼ିସ୍ନାସିନାର୍ ।”
42ମାରି, ଜାଗାର୍ତା ମାନ୍ଡ୍ରୁ, ଇରିଙ୍ଗ୍ ମି ପ୍ରବୁ ଆମା ନାଣ୍ତିଙ୍ଗ୍ ୱାନାନ୍, ଆକା ମିର୍ ନେସ୍ଇଦେର୍ । 43#ଲୁକ ୧୨:୩୯,୪୦.ମାତର୍ ଇକା ନେସ୍ସୋ ମାନ୍ଡ୍ରୁ, ଏସିୱାଲେ ଡଙ୍ଗାଁର୍ଏନ୍ ଡ଼ୁଗୁନାନ୍ ନେସ୍ତିମାରିଙ୍ଗ୍, ଇଲୁମାଲିକ୍ ଜାଗାର୍ତାଦାନ୍ ମାନ୍ଞ୍ଜି ଡଙ୍ଗାଁର୍ଏନ୍ତିଙ୍ଗ୍ ଇନ୍ଡ୍ର ଡ଼ୁଗିସିତେଙ୍ଗ୍ ସିଏନ୍ । 44ମିର୍ ବା ୱିଜୁଦିନ୍ ଜାଗାର୍ତା ଆଜମାନ୍ଡ୍ରୁ, ଇରିଙ୍ଗ୍ ଆମା ବେଡ଼ାଦୁ ମିର୍ ୱାନିଙ୍ଗ୍ କାପ୍କିଇ ମାନିଦେର୍ ଆୟା ବେଡ଼ାଦୁ ମନୁସ୍ୟପୁତ୍ର ୱାନାନ୍ ।
ବିସ୍ବାସ୍ ନି ଅବିସ୍ବାସ୍ ସାକର୍
(ଲୁକ ୧୨:୪୧-୪୮)
45“ଏନ୍ ଆର୍ତିଙ୍ଗ୍ ବିସ୍ବାସ୍ ନି ବୁଦିଦି ସାକର୍ ? ଆମାୱାରି ମୁସ୍କୁ ମାଲିକ୍ ଆଇ ସାକର୍କାଙ୍ଗ୍ ଟିକ୍ ବେଡ଼ାଦୁ କାଦି ସିନି ବଜୁ ସିନାମାନାନ୍ । 46ମାଲିକ୍ ଆଇଦେସ୍ତାନ୍ ଡ଼େସିୱାନିୱାଲେ ଆୟା ସାକର୍ ଜଦି ବିସ୍ବାସ୍ତାନ୍ ୱାନି ପାଣି ଟିକ୍ କିଜିମାନାନ୍, ସୁଡ଼୍ଜି ୱାନ୍ ଏସ ୱେଡ଼ିକା ଆନାନ୍, ୱାନ୍ ଦନ୍ୟ ! 47ନାନ୍ ମିଙ୍ଗିଁ ସତ୍ ଇଜିନା, ମାଲିକ୍ ନିଜେଦି ୱିଜୁ ସମ୍ପତିଦି ଦାଇତ୍, ସିନି ଉଣ୍ତିଙ୍ଗ୍ ଆୟାୱାଜା ସାକର୍ତିଙ୍ଗ୍ ଆସ୍ କିନାନ୍ । 48ମାତର୍ ଆୟା ତାଗ୍ଇ ସାକର୍ ଜଦି ଅବିସ୍ବାସ୍ କିଜି ମାଲିକ୍ ୱାନିକା ୱେଡ଼ା ଆନାତ୍ ଇଜି ଅଡ଼୍ବିନାନ୍ ମାରି 49ତଡ଼୍ ସାକର୍କାଙ୍ଗ୍ ଡାକ୍ତେଙ୍ଗ୍ଆସ୍ସି, ମାରି ମଦୁଆରି ୱାଲେ ଉନ୍ଣ୍ତେଙ୍ଗ୍ ତିନ୍ଡ୍ରେଙ୍ଗ୍ ବାସ୍ନାନ୍ । 50ସାକର୍ କାପ୍କିଇୱାଲେ ବେଡ଼ାଦୁ ଦାପ୍ରେ ଅର୍ଲେନ୍ ଏସ୍ତିୱାଲେ ମାଲିକ୍ ଡ଼େସି ୱାନାନ୍, ଆୟା ନାଣ୍ଡିଙ୍ଗ୍ ମାରି ୱେଡ଼ା ସାକର୍ ନେସ୍ଏନ୍ । 51ମାଲିକ୍ ୱାନିଙ୍ଗ୍ କୟ୍ଜି ମକା ମକା କିଜି କପଟିରିୱାଲେ ୱାନି ବାଗ୍ ଟିକ୍ କିନାନ୍, ଆବେନ୍ ଆଡ଼୍ବାନିକା ନି ପାଲୁକୁ କାତ୍ରେକିନାନ୍ ।
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020