Génesis 1
1
Tayta Dios lapanta kamashqan
1Imapis manaraq kaptinmi Tayta Dios kamarqan jana patsatapis y kay patsatapis.#Juan 1.1-3. 2Kay patsaqa manami kanan kaykashqannötsu karqan, sinöqa yanawyaykaq yakulami karqan. Tsay yaku jananchömi Tayta Diospa Espïritun kuyuykarqan.
3Tsawraqa Tayta Dios kayno nirqan: <<¡Atsikyaq katsun!>>#2Cor. 4.6.
Niptinmi atsikyarqan. 4Atsikyaqta kamarkurmi Tayta Dios rikarqan ali kashqanta. Tsaymi kamakätsirqan tsakaypis atsikyaqpis kananpaq. 5Tsaypitana atsikyaqpa jutinta churarqan junaq kananpaq y yanawyaykaqtana tsakay kananpaq. Tsaykunatami kamarqan punta kaq junaqcho.
6Tsaypitami Tayta Dios kayno nirqan: <<Ishkayman yaku rakiränanpaq yaku chawpincho azulyaraykaq katsun>>.#1.6 Tsay witsanmi runakuna yarparqan azulyaraykaq chukru kashqanta. Tsaynöpis yarparqan uchku uchku kaptin tamyamushqanta.
7Nishqannölami azulyaraykämuqta kamarqan. Tsaynöpami wakin kaq yaku quëdarqan kay patsacho y wakin kaqnami azulyaraykämuqpa janancho. Nishqannölami lapanpis karqan. 8Azulyaraykämuqpa jutintami Tayta Dios churaparqan jana patsa jutin kananpaq. Tsaytami kamarqan ishkay kaq junaqcho.
9Tsaypitanami Tayta Dios kayno nirqan: <<Ura kaq yaku juk patsalaman juntakätsun tsaki patsa rikakänanpaq>>.#2Ped. 3.5.
Tsay nishqannölami lapanpis kamakarqan. 10Tsaki kaqpa jutintami Tayta Dios churaparqan patsa jutin kananpaq. Y juntakashqa kaq yakutami lamar nirqan. Tsayno kamarkurmi Tayta Dios rikarqan ali kashqanta.
11Nirkur kayno nirqan: <<Alpapita winamutsun tukuy casta jachakuna. Tsay jachakuna kanqa muruyuq qewakuna y tukuy niraq wayuq yörakunapis>>.
Nishqannölami lapanpis karqan. 12Tsaymi winamurqan tukuy niraq jachakuna y tukuy niraq wayuq yörakunapis. Tsaykunata kamarkurmi Tayta Dios rikarqan ali kashqanta. 13Tsaykunatami kamarqan kimsa kaq junaqcho.
14Tsaypitanami Tayta Dios kayno nirqan: <<Jana patsacho atsikyaqkuna katsun junaqpis tsakaypis kananpaq, junaqkunata watakunata yupapäkunanpaq y murunanpaq cosechananpaq imay kashqantapis musyapäkunanpaq. 15Tsaynöla atsikyaqkuna ciëlucho katsun patsata atsikyapänanpaq>>.
Nishqannölami lapanpis kamakarqan.
16Tsaynömi kamarqan intita, killata y qoylarkunatapis. Intita kamarqan junaqpa atsikyänanpaq y killatana kamarqan tsakaypa atsikyänanpaq. 17Tsaykunata Tayta Dios jana patsaman churarqan kay patsaman atsikyamuptin 18tsakaypis junaqpis kananpaqmi. Tsaykunata kamarkurmi Tayta Dios rikarqan ali kashqanta. 19Tsaykunatami kamarqan chusku kaq junaqcho.
20Tsaypitana Tayta Dios kayno nirqan: <<Yakucho lapan casta kawaqkuna y patsa jananpa päriqkunapis atska katsun>>.
21Tsayno nirmi Tayta Dios kamarqan lamarcho jatusaq mantsariypaq uywakunata. Tsaynöpis kamarqan lamarcho, qochakunacho y mayukunacho tukuy niraq pescädukunata. Tsaynömi kamarqan tukuy niraq päriqkunatapis. Tsaykunata kamarkurmi Tayta Dios rikarqan ali kashqanta. 22Nirkurnami bendicionninta qor kayno nirqan: <<Lamarcho kawaqkuna y patsa jananpa päriqkunapis, atskaman mirapäkuy>>.
23Tsaykunatami pitsqa kaq junaqcho kamarqan.
24Tsaypitanami Tayta Dios kayno nirqan: <<Tukuy niraq uywakuna katsun: ashmana kaq y mana ashmana kaqpis. Tsayno katsun pachalanpa y lätaypa puriqkunapis>>.
Nishqannölami lapanpis kamakarqan. 25Tsaynöpami Tayta Dios kamarqan tukuy niraq ashmana kaq y mana ashmana kaq uywakunata y pachalanpa y lätaypa puriqkunatapis. Tsaykunata kamarkurmi Tayta Dios rikarqan ali kashqanta.
26Nirkurnami kayno nirqan: <<Kananqa runata kamashun kikintsi niraqta.#Gén. 9.6; 1Cor. 11.7. Noqantsino kananpaqmi payta kamashun.#1.26 Unay reykuna nipäkurqan paykunala Dios niraq kashqantami. Tsaynöpis nipäkurqan Dios niraq kar paypa jutincho runakunata mandashqantami. Kay textuchömi itsanqa niykan lapan runakunapis Dios niraq kashqanta. Pay niraqta runata kamashqanta nirqa Tayta Diosta mandäshir kay patsacho kaqkunata shumaq rikanantsipaq kashqantami niykan. Paypa munayninchömi kanqa pescädukuna, päriqkuna, ashmana kaq y mana ashmana kaq uywakuna y pachalanpa y lätaypa puriqkunapis>>.
27Kikin niraqtami runata Tayta Dios kamarqan.
Payno kananpaqmi kamarqan.
Olqutapis warmitapis paymi kamarqan.#Mat. 19.4; Mar. 10.6.
28Nirkurnami bendicionninta qorqan kayno nir:
<<Kay patsa juntananyaq mirapäkuy.
Munaynikicho katsun pescädukuna, päriqkuna y kay patsacho lapan kawaqkunapis>>.#Gén. 5.1-2; 9.1.
29Tsaypitana kayno nirqan: <<Mikupäkunaykipaqmi kamashqä kay patsacho lapan mikuna kaq jachakunata y wayuq kaq yörakunatapis. 30Uywakuna, päriqkuna y pachalanpa y lätaypa puriqkuna mikupäkunanpaqmi jachakunatawan qewakunata kamashqä>>.
Nishqannölami lapanpis kamakarqan. 31Lapan kamashqankuna pasaypa ali kashqantami Tayta Dios rikarqan. Tsaykunatami kamarqan soqta kaq junaqcho.
© 2003, Wycliffe Bible Translators, Inc. All rights reserved.