Matiu 16
16
Mme Farisi eyem idiọọñọ
1Mme Farisi ye mme Sadusi emaedi adidomo Yisọs ke adibo anye yak iwọt mmimọ idiọọñọ atooho anyọñ.
2Yisọs amaabọọrọ, “Ndubi ndufo esibo, ‘ikpaanyọñ ayaiya, usen ayaafọn’ 3ndin ke ubakusen ndufo ebo, ‘ikpaanyọñ adat anyʌñ afʌhọ, ayobio ayaaba mfịn.’ Ndufo emediọọñọ ebaña idiọọñọ ikpaanyọñ, ado idiọọñọke adikood idiọọñọ ini ami. 4Ado ndiọi mme ntịme emana esibịp idiọọñọ, ado ukweeñe idiọọñọ e-ediinọ ndufo ado idiọọñọ Yọna.” Ndin anye amaakpọñ ammọ aboiyo anyọñ.
Yis ake mme Farisi ye mme Sadusi
5Mme mbed Yisọs, ke ammọ adikanna ñka edem ibiok uko, emaefre adiben uyo. 6Yisọs abo ammọ, “Itaad anyen, inyʌñ ikpeme idem ndufo mbaak yis ake mme Farisi ye mme Sadusi.”
7Ammọ eneme ke ufọọd ammọ ebo, “Ato adooho ñnyịn ikibenne uyo nte keed.”
8Yisọs akediọọñọ se ammọ ekere, anye abo ammọ, “Ndufo mbon ntək mbuọdidem, ntaha etañña ke atu ndufo ebo ke ikamake uyo-o? 9Isʌkkọ inwaanwaña ndufo? Ndufo itoiyoke uyo ition e-ekenọọhọ tọsịn awo ition ye ibad akpasa se ndufo ekekoono? 10Me uyo itiaba e-ekenọọhọ tọsịn awo inaañ ye ibad akpasa se ndufo ekekoono? 11Anam die nọ idiiñwañake ndufo ke ñketañña mbaña uyo? Ado ikpeme idem ndufo ke abaña yis mme Farisi ye Sadusi.” 12Do ndin amaanwaña ammọ ke anye akebo ammọ ekpeme idem ebaña ukpeebñkpọ mme Farisi, idooho yis asinamma uyo atịt.
Bita atañ ke Yisọs ado Mesaya
13Ke ini Yisọs amaakedi utịd Siseria Fidibai, anye amaabịp mme mbed amọ mbịme ami: “Anie ke mme awo ebo ke Ayịn Awo ado?”
14Ndin ammọ ebọọrọ, “Ubaak ebo Yọọn Aduọkmmọọñ, ubaak ebo Edaiya, ubaak ete Yerimaya, me keed ke atu mme brọfed.”
15Ndin anye abịp ammọ ate, “Ado ndufo ebo ke ami ndo anie?”
16Ndin Saimọn Bita asio atañ, “Afo ado Krais, Ayịn ndu-ndu Abasi.”
17Yisọs amaabọọrọ, “Saimọn ayịn Yọna, afo ado awo e-emaedọdiọñ sia ikidooho abʌk mme iyiib akeyaara ami unọ, ado aketo Ete mmi ke anyọñ. 18Ke ntodo, idahami ami udọkkọ fiin nte afo ado Bita, ndin ke anyọñ itiad ami, ami nyaabọp ufọkabasi mmi, ndin inuaatob Abioekpo idiikanna anye. 19Ami ñyaunọ fiin mme ukpọhọde abio ubọọñ Abasi: se adodo afo abọppọ ke isọñ, eyaebọp ke abio ubọọñ, ñko se afo atat ke isọñ eyaetat ke abio ubọọñ.” 20Ndin anye amaakpan mme mbed amọ ate ekuudọkkọ awo ndomokeed ke imọ ido Krais.
Yisọs atañ abaña ñkpa amọ
21Tọọñọ ke ini ado Yisọs amaakaiso atañ añwa-añwa anọ mme mbed amọ ke imọ ana ika Yerusedem ikibọ ata akpọsọñ ufen ke ubọk mme ñkpisọñ, mme ikpọ aku ye mme Skraib, ke ana ewot imọ, ndin enam imọ iset ke ayọhọ usen ita.
22Ndin Bita akood anye asio anyʌñ atọọñọ adisua nnọ anye ate, “Abasi akan, Abọọñ! Inaaha ami atịppe unọ fiin.”
23Ado anye amaakanna anyʌñ abo Bita, “Ndakka ke idem, Setan! Afo ado ñkpọiduọ ke usʌñ mmi, sia afo ukereke ñkpọ Abasi, ado akere ñkpọ awo.”
24Ndin Yisọs abo mme mbed amọ, “Adieke awo nte keed ayemme iñkeene miin yak anye akañ idem amọ, aben krọs amọ anyʌñ añkeene miin. 25Awo a-ayemme adinyaaña uwem amọ ayaaduọk anye. Ado awo a-aduọọkkọ uwem amọ ke ntak mmi, ayaakịt anye. 26Nso-o ndin idiido udoro awo adinie afịd ederimbod ado aduọk ukpọñ amọ? Me nso-o ke awo akemme adinọ nte ukpʌghọ ñkpọ ke ukpọñ amọ? 27Sia Ayịn Awo adidi ke ubọọñ Ete amọ ye mme enyere amọ, do ndin anye ayaanọ awo keed-e-keed utịb a-akemme ye se anye anam.
28 “Ke akpanikọ ke idọkkọ ndufo, aba ubaak awo e-ebaaha a-mmiidiikitte ñkpa tutu ammọ ekịt Ayịn Awo nte adi ke abio ubọọñ amọ.”
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.