Matiu 12
12
Yisọs ado Abọọñ Sabad
1Ke ini ado, Yisọs amaasaña aboiyo ke inwañ mfịd ke usen Sabad. Ndin abiọñ adọñ mbed amọ, anam ammọ etọọñọ adikịppe usʌk mfịd nta. 2Ke ini mme Farisi ekịtte ami ammọ ete, “Amekịt! Mbed mfo esʌk enam se ibed akpan ke Sabad.”
3Ndin Yisọs amaabọọrọ ate: “Nte ndufo ikoodo se Defid akenam ke ini abiọñ akedọññọ anye ye mme nsaña amọ? 4Anye amaadʌk ufọk Abasi itie uwa ndin anye ye mme nsaña amọ emaekoono adisana udia Abọọñ eta, ñkpọ a-ibed akpanna ñkaña awo adinam, ibọhọke mme aku Abasi ikpọọñ. 5Awuọ ndufo inyʌññọ ikood ke ibed nte ebo ke mme aku ke tembịd esappa usen Sabad, ado inieeghe ubiomikpe? 6Ami ntañ inọ ndufo mbo ke anye a-akponno akan tembịd mmọ mi. 7Akpedo mme ñke ami, ‘Nyem mbọm, idooho uwa,’ inwaña ndufo, ndufo ikpibiommo awo a-mmiidueehe ikpe. 8Sia Ayịn Awo ado Abọọñ Sabad.”
9Yisọs amaakekpọñ itie ado, amaaka itie ubọñ akam ammọ keed, 10anyʌñ akekịt awo keed do a-akedọñọke akpaubeñ. Ke adiyem usʌñ adibọ anye uyo, ammọ ebịp anye ete, “Nte ibed anyịmme ekọk awo udọñọ ke usen Sabad?”
11Anye amaabọọrọ ammọ ate, “Adieke awo ndufo ake adodo anieeghe edọñ keed, ndin edọñ ado aduọ adʌk ube ke usen Sabad, nte anye ikpidʌttọ edọñ ado isio ke ube ado? 12Nte awo inieeghe ekọmudua ikan edọñ! Ke ntodo ibed ikpanna adinam eti ñkpọ ke usen Sabad.”
13Ndin anye abo awo ado, “Nyan ubọk mfo.” Awo ado anyʌñ anyan ubọk, ndin ubọk amọ atịmme afọn ukem-ukem nte ubọk anye ako. 14Ado mme Farisi emaekekpọñ itie ado, ammọ emaekedioomo naña ediida iwot Yisọs.
Isʌñutom a-Abasi amekke
15Ado Yisọs amaakediọọñọ se ammọ ekedioomo, anye amaakpọñ itie ado, uwak awo emaekeene anye, anye anyʌñ akọk afịd mbio e-ekedọñọke. 16Ado adʌt ammọ utọñ ate ammọ ekuuyaara me imọ ido anie awo. 17Ke ntom se Abasi amaake atañ ato brọfed Aisaya amaasu:
18“Ami ado ayịnufọk mmi a-ami mmekke,
anye a-ami mmaaha, a-nnyʌñọ nnem esịd mbaña;
Ñyaasịn anye Sịbidịd mmi ke idem,
ndin anye ayaatañ unen añwa-añwa anọ afịd idịd.
19Anye idiitọhọke, idiinyʌññọ ibọñ ñkpo;
awo idiinyʌññọ ikop uyo amọ ke añwa.
20Anye idiibuuño nnyʌkkọ ñnyanyaaha,
idiinyʌññọ inịme adeduek ifia ikañ,
anye ayaakaiso tutu unen anie adikan.
21Ke anyịñ amọ ekondo eyaenie idodanyen.”
Yisọs ye Bedsibọb
22Akem emaeben awo ñkpọnsọb a-akedooho nnan ye imuum keed ebịne anye; Yisọs anyʌñ akọk anye udọñọ, ndin anye akan atañ ikọ anyʌñ amọọnọ usʌñ. 23Ami amaakpa afịd awo idem eti-eti; ammọ enyʌñ ebo, “Nte anye ami ado Ayịn Defid?”
24Ado mme Farisi ekekop ami, ammọ ebo, “Awo ami adat adudu Bedsibọb, abọọñ mme ndiọi sịbidịd, abịn ndiọi sịbidịd asiooño awo ke idem.”
25Yisọs amaadiọọñọ akikere ammọ; anye abo ammọ ate, “Abio Ubọọñ ake adodo a-abakkake ada, ayaawuuro, ñko abio me ufọk ake adodo a-anwanake ye idem amọ, idiisọñọke ida. 26Setan akpebịn Setan asio, anye añwana ye idem amọ. Abio ubọọñ amọ akeme die isọọñọ nda? 27Ndin adieke ami ndatta Bedsibọb mbịn ndiọi sịbidịd nsio, nso-o ke mbio ndufo edat ebịn dimọn? Yak ammọ ndin edo mme abiireikpe ndufo. 28Ado adieke ndatta Sịbidịd Abasi mbịn ndiọi sịbidịd nsiooño, abio ubọọñ Abasi adisịm ndufo.
29 “Awo ndomokeed ikemeke idʌk ufọk akpọsọñ awo ñkoono ñkpọ amọ ibọhọke anye abem iso abọp anye anịm, ndin anye akan adiyịp ñkpọ ke ufọk amọ.
30 “Awo ake adodo a-mmiidaaha ye ami idooho ake mmi. Awo mmiinyʌññọ ibək ñkpọ ye ami asuasuan. 31Ndin ami ntan inọ ndufo, eyaefeen afịd idiọọkñkpọ ye usappa ñkpọ enọ mme awo, ado idiifeene usappa Adisana Sịbidịd. 32Eyaefeen enọ awo keed ake adodo a-atañña idiọọk ikọ adian Ayịn Awo, ado Abasi idiifeene inọ awo keed ake adodo atañña idiọọk ñkpọ abaña Adisana Sịbidịd, ke emana ami, me ke ini iso.
33 “Nam eto afọn ndin mfịd amọ ayaafọn, akpenam eto abu, mfịd amọ ayaabu, sia ediọọñọ eto ekeene mfịd amọ. 34Ndufo mme nditọ udʌkikọd, ndufo nte mme ndiọi ibon ekeme die aditañ se ifọn, sia se awo atañ ke inua ato ke se iyọhọ anye ke esịd. 35Eti awo adat nti ñkpọ ato ise nti ñkpọ amọ, idiọọk awo anyʌñ adat ndiọiñkpọ ato ise ndiọiñkpọ amọ. 36Ado idọkọ ndufo mbo ke usen ikpe, afịd awo eyaetañ ikọ idem ammọ ebaña abịd-abịd ikọ ammọ ekesitañña. 37Sia ediidat ikọ ndufo ifakka ndufo, kpa nte ediidat ikọ ndufo ibiom ndufo ikpe.”
Idiọọñọ Yọna
38Ndin usʌk mme Farisi ye mme andikpeeb ibed ebo anye, “Andikpeeb, ñnyịn iyem adikịt idiọọñọ utịbe ñkpọuto fiin.”
39Anye abọọrọ. “Ndubịk ye mme akpara-akpara emana eyem idiọọñọ utịbe ñkpọ! Ado awo idiinọọhọ ammo ndomokeed ibọhọke idiọọñọ brọfed Yọna 40Sia naña Yọna akesịne ke idịb abahakak ke usen ita ye akoneyo ita, ntodo ke Ayịn Awo adisịne ke esịd isọñ usen ita ye akoneyo ita. 41Ke usen ikpe, mbio Ninife eyaedaaña eda ekpe ikpe ye emana ami enyʌñ ebiom ammọ ikpe; sia ammọ emaekappa esịd ke ntak ukwọrọ ikọ Yọna. Idahami andikpon ñkan Yọna mmọ mi. 42Abọọñanwan Usuuk ñko ayaadakka ada anyʌñ abiom emana ami ikpe ke usen ikpe, sia anye amaato ata utịd ederimbod adi adikpañ utọñ akop ifiọk Sọdọmọn, ndin andikpon ñkan Sọdọmọn mmọ mi.
43 “Idiọọk sịbidịd amaawuọ awo ke idem anye asaña ayọọn ke mme itie unana mmọọñ ayem itie nte aduọk udu, ado ikịtte. 44Ndin anye abo, ‘Ñyaatịmme ñka ufọk a-ñkekpọññọ.’ Anye amaadisịm anyʌñ akịt nte ufọk ana ñkaña, awo idʌññọ, emaekwuọk asana ama, 45anye atịmme aka akedat sịbidịd itiaba ebakka ibak ekan anye adidʌñ keed. Idahami itie awo ado adidiọọk akan naña akedo akpa. Naña adiiba adodo ye idiọọk emana ami.”
Eka ye nditọeka Yisọs
46Ke ini Yisọs asʌkkọ atañ ikọ ye atu awo, eka ye nditọeka amọ ekesʌk ebet ke añwa eyem aditañ ikọ ye anye. 47Ndin awo adọkkọ anye ate: “Eka ye nditọeka mfo mmọdo ke añwa esʌk eyem aditañ ikọ ye Afo.”
48Ke ibọọrọ anye abo, “Anie awo ido eka mmi, mme anie awo inyʌñ idoñño mme nditọeka mmi?” 49Ndin anye anyan ubọk awọt mme mbed amọ ate, “Eka mmi ye nditọeka mmi edoñño ami. 50Sia awo keed ake adodo anamma uduak Ete mmi ke anyọñ ado ayịneka mmi awodeen ye ayịneka mmi awonwaan ye eka mmi.”
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.