Nya-mangaji Mirningiya Jujiba 42
42
Likili-baba ki-Jujiba kalu-wingka bajinju Yijiba
1Jinangu barra malbu Jikaba, marda Yijrayil na-wini, jinangu nyiki-biyi ki-Jujiba, nyala bajiwa lhungku ka-arri akarru, nyungkiku ki-awarala baji Kinin. Nya-mangaji barra, ka-wukanyi alunga liyikiliyi-arduwu nganinya, ka-arri nganinya, “Marrirru! Marnirru nyamba-wunkanantharra nirru-mi marnaji ngala minja jirrini marnaji winarrku. 2Nganhirra-nykarriya! Karna-nykarri awara jinangu Yijiba, bajawu barra ma-jakarda ma-ngarra. Aya kirru-wingkala bajinju, kirru-lhakanbala rdumanthalu ngambalanga. Marnaji marnaji kambalamba-mirranma wirndajku. Kirru-wingkala rdumanthalu ngambalanga wudurru, ngambala anmanthawu li-lhungku.”
3Kulu li-ja barra, likili-ardu li-10-bala, likili-baba ki-Jujiba, kalu-lhuwarri ngamaliya barra, rdumanthalu ma-ngarra, li-ja li-wulu. Kurdardi kalngi rralungarra-wibi rra-arrkula ngala ruthuruthu lalungali-wibi ngala jinangu nyalunga-biyi malbu Jikaba arrkula.
4Kulu jinangu nyarrku Binjamin kulu Jujiba, rri-ja barra kanymarda kawulamba-mirnirri rra-arrkula rrawulangarra-wibi. Ka-arri barra jinangu Binjamin wambu nyiki-biyila kangka ka-wardirri na-wurdu malbu barra Jikaba, nungka ka-wardirrinjima awara yiku ki-buringku, yiwa kurdardi waninjawu kariya, kulu kurdardi barra kili-janma aluwa jinangu ngulakaringu, ngala nalarrku li-wirdi kalili-ja bajinju Yijiba angula.
5Li-ja likili-ardu ki-Yijrayil, ki-malbuwu ki-Jikaba, alu kalu-wingka bajinju Yijiba. Kulu marda li-mbangu winkanda lukuluku baji ki-awarala ki-mayangka Kinin, marda barra alu wiji kalu-arri wirndajku. Kulu alu barra, li-ja li-wulu kalu-lhuwarri rdulurdumanthalu ma-ngarra. Marda likili-ardu ki-Jikaba, kalu-yibanda baji Yijiba, li-mangaji wiji.
6Baji angula barra ka-arri Jujiba, nyungku-ja ki-awarala Yijiba, yiwa barra ka-arri wirdiwalangu ngulakari yilaa ki-king. Yiwa barra, Jujiba, kilu-jilimanthaninya ma-ngarra alunga liyi-wuluwu liyi-nganjiyu wiji. Ngulakari barra kalu-rilirri li-ja likili-baba. Kalu-wingka barra yilalu, kulu kala-nba wajkaliya mududu yilalu, nganinya narnu-yuwa narnalunga liyi-Juwu.
7-8Kulu yiwa kalilu-lhaa likili-baba ngala alu, linjikulinji-babalu, kurdardi kalu-lhaanma jinangu Jujiba. Kulu kumba-wajkirra alunga. Ka-wukanyi aluwalu narnu-ladalada, ka-arri alunga, “Nganthingu marnirru?” Kalinyamba-ngarninyma, “Nganu nakaringu ki-awarala Kinin kanu-wingka bayimanthalu ma-ngarra.”
9Ngalalu mududu yilalu baji ngaliwa ki-Jujiba karnilu-lingilinginma bajarnaji wabarrangu wumba kilu-mawuranga awara alunga, alu anmanthawu mududu yilalu nganinya. Kulu ka-arri alunga Jujiba, “Yirru li-yinjatha! Kirru-wingka marnajinju wunkanantharra awara nya-nganunga, kulu kirru-wanila kariya nalinanthawu awara yiku ki-wirdiyu, nungka jumba-nykalanykarrinji wardimanthawu nya-nganunga awara.”
10Kalinyamba-ngarninyma yiku, “Wirdiwalangu! Kurdardi nganu li-wardi, kurdardi. Kurdardi kanu-wingkanma wunkanantharra nyirrunga awara. Winarrku li-buyi yinku janini barramarni linkungu li-jawina marnajinganu. Ngayamantharra rdumanthalu ma-ngarra kanu-wingka marnajinju. 11Marninganu, nganu wiji arrkula nyanganunga-biyi. Kalngiya yurlurr li-yabi nganu. Kurdardi kanu-wardimarru awara yinku.”
12Kumba-ngarninyma alunga, “Kurdardi! Jirru-wingkayi li-wardimbangu ngalanganthalu awara nya-nganunga.”
13Kulu yurrulu barra kalu-wukanyi yiku, “Wirdiwalangu, nganu minja li-12-bala bajinganu kaninyamba-mirnirri li-jibiya Kiniri, ngayamantharra arrkula kumba-kajakajama nganunga, nganu barra likili-ardu. Buri nganunga bajiwa wambu wunyathala yilaa, kulu nyarrku, kurdardi kiwima nganinyanga.”
14Ngala kumba-ngarninyma alunga, “Barranamba ambuliyalu karna-wukanyi yirrunga marnaji, yirru jirru-wingkayi wunkananthalu awara nganunga. Yirru li-yinjatha. 15Namba nya-mangaji nyirrunga-anyira ka-wingkala marnajinju, kulu kirrirna-lhaala barra yirru li-yabi, yurlurr wukanyinjawu kalngi wuka. Namba kurdardi ka-wingkarru, kulu bajingarna barra karna-lhaala yirru li-wardi, kirru-warndimanji. Nganinya kirrirna-lhaala wayi barra yirru. Kulu jirrirni-nanji kalngiya, kurdardi kirru-lhuwarriyu marnajingu, kirra-nmanthanama wambu marnaji namba kurdardi ka-wingkarru marnajinju nyirrunga-anyira. 16Nyirri-jaya arrkula wa-waniya rdumanthalu nyirrunga-anyira ngalirru nirrarrku anmantharra wambu arndaarnda ki-burijin. Namba ka-waninjima nayirdi ki-buriyu, kulu yamulu, kirrirna-lhaanjima kanhirri-nu kalngi, yirru. Namba kurdardi, kulu kirrirna-lhaanjima kalngiya li-yinj atha bawuji. Kirrirna-lhaala nganinya barra, nungka li-marringaya, nungka li-wardi.”
17Kulu bajingu barra kalilu-yibarra arndaarnda ki-barrawula rdirrirrantha, na-kanymarda arrkula na-wunbarr kalu-arri baji arndaarnda.
18Bajingu barra kalu-walanyma nakaringu ki-burijin, kalala-ka yilalu ki-Jujiba. Ka-wukanyi alunga nganinya, “Namba kirra-kala ngatha wuka kulu namba yirru li-ngayangaya, kulu kirra-nmala barra li-lhungku, kangka jama-lhaanji Yijan Kud kalngiya bajingarna barra jarna-walwardankayi yiku. Minja jirrirna-maramaramanji. 19Namba yirru li-yurlurr li-yabi, kulu ngayamantharra arrkula marnaji ka-nmala rdirrirrantha arndaarnda, kulu nirrarrku yamulu kirru-wanila barra kantharra ma-ngarra alunga liyirrungaliyi-nganjingku, bajalu wirndajku yukumantharra yirrunga. 20Baki nyirra-kaya nyirrunga-anyira marnajinju ngathangkalu kulu karna-ngayamala yirrunga yirru li-yurlurr wukanyinjawu, kulu kurdardi barra kirrirna-ramarru.”
Kulu alu barra, kalu-wukanyi yiku ki-Jujiba, nganinya kalu-arri, “Yiya, yamulu barra. Kanu-waninjangumala nyanganunga-anyira.”
21Bajingu barra kalinyamba-wukanyi, “Marningambala barra warriya, kangka kambala-wardimala awara yiku nyungambalanga-anyirawu. Kalngiya kambala-arri li-wardimbangu yiku. Kambala-kala rarrinjarra wakulamba na-wurdu, kambala-kala kumba-yiwama ngambalanga, ngambala marakamanthawu, ngala kambala-ngajbirri yiku, kurdardi kambala-nykarrinma, kambali-jala marnajinju ki-Yijiba. Bajungkarnu barra marningambala, marnarnaji narnu-dabudaburr ngambalanga, ki-Kud jilu-wardimanji awara ngambalanga kangka ngambala li-wardi kambala-arri.”
22Kulu wirdi Rubin ka-wukanyi alunga nuwalarrkulu, nganinya ka-arri, “Yiya. Karna-wukanyinjaninya yirrunga ndayawu yiku, barni-wardimantha, ngala yirru waraba kirra-nykarrinma. Li-yakayaka kirru-murdirri awara kurdandu. Nganinya jambalini marnaji nungkarnu-wardinja, wirangu barra nyangambalanga-anyira kumba-mirra. Bajuwarnu jambalilu-ramanji ki-Kud.”
23Ngala waraba kalu-lhaanma kalngiya nyalunga-anyira nganambaji baji ka-arri alunga kalila-nykarrinjaninya ngala yiwa kalilu-lhaa likili-baba. Ngala alu kalu-ngalnganda kangka jina wuka ka-wukanyi alunga Yijibangala kulu ngulakari ki-jawinalu nyungkiku kilu-yangama wuka alunga, ka-wukanyi Yiburungala kangka alu li-Yiburu, kulu kathiwa jibiya baji Yijiba nya-mangaji Jujiba wumba ka-wukanyi alunga.
24Kalila-nykarri baji nyamba-wukanyinjarra, ka-wirnirri nakaringu aluwa, ka-wingka nyamba-rarrinjarra kangka li-ja likili-baba wurrbi. Namba kumba-lumbuma na-wurdu kulu mili ka-wani aluwalu barra bajinju wukanyinjalu. Kulu kilu-ruthuruthuma ambuliyalu Jimiyan, nya-mangaji wirdi ngulakari yilaa ki-Rubin, kilu-ruthuruthuma, kulu kalili-jirrinyma li-mangaji likungu li-jawina kalu-rdirrirra jinangu barra Jimiyan ngalalu nganambaji nalarrku likili-baba nyala wunkanantharra. Kulu kalu-lhuwarri barra nakaringu yilaa, alu wiji likili-baba.
Likili-baba kalu-wani bajinju Kinin
25Bajingu barra kalili-jirrinyma likungu li-jawina, “Rru-yibalyibarraya wu-bayikilu rrungkalunga ma-ngarra a-murumulu! Kulu baji barra arndaarnda rru-waninjangumaya ma-mangaji ma-mani rrungkalunga rru-bayikila ruthuruthu! Kulu nuwarrku barra ma-ngarra rru-yibarraya alu nyamba-wudurrumanthawu wumbiji.” Nganinya barra ka-wukanyi alunga liyiku liyi-jawinawu. Kulu kalu-yibarra nganambaji barra alunga kangka yiwa Jujiba ka-wukanyi alunga liyi-jawinawu, ma-mangaji ma-ngarra barranamba ma-kingkirra kalu-yibarra.
26Kulu likili-baba ki-Jujiba, ankaya barra kalu-yibalyibarra ki-yirrikirrila kulu kalu-lhuwarri barra akarriya nyungkalunga ki-awaralu.
27Kalu-wingka...i nyala bajinju wumbiji, kalu-yibanda barra. Kulu nyungkarrku barra, ki-arrkulangku, karrili-nma a-birndawara nanda-mulu, yiwa wudurrumanthawu nyiku yirrikirri, kulu kila-kala barra mili arndaarnda mulungka wu-bimdawarala, kila-kala arndaarnda.
28“Marnawu ma-mani mikungu!” Ka-ruwama. “Marnawu ma-mani ngathangka, rrungku-ngatha rru-bayikila nungkandu-mulungka!” Kulu alu barra wiji kalu-wardirri nalu-wurdu, kalu-arrkama nalu-manka. “Ngalhiyu kalu-waninjanguma ma-ja ma-mani, ngalhiyu? Ngandarra ja-arrinji Kud ngambalanga, ngandarra?” Nganinya barra kalinyamba-yalbanga.
29Kulu kalu-lhuwarri bajingu yalibala. Kalu-wingka...i yurrngumantha nyala bajinju ki-awaralu nyungkalunga Kinin kulu nyungkalunga-biyilu ki-malbungku. Kalu-yibanda barra baji. Kulu yinarrambalulu barra kalinyambi-nu yiku, kalu-arri yiku, 30“Ngabinya biyi! Nya-mangaji barra wirdi angula, kanilu-rulama li-nganji, ka-wukanyi nganunga narnu-ladalada. Kathinganu kanu-wingka bajinju wunkananthalu awara, kathinganu li-yinjatha. 31Ngala kaninyambi-nu yiku, ‘Kurdardi kanu-wingkanma wunkananthalu awara. Waraba nganu li-yinjatha, waraba. Nganu kalngiya barra li-yurlurr.
32Nganu wiji li-12-bala, arrkula nyanganunga-biyi, kumba-kajakajarna nganunga. Arrkula kurdardi kiwima ngala buri bajiwa yilaa wunyathala, bajiwa akarru Kinin,’ nganinya kanu-arri yiku. 33Kulu kumba-ngarninyma nganunga nya-mangaji wirdi, ‘Kirrinyamba-mirnimala ngatha, namba yirru barra li-yurlurr li-yabi. Kirra-ndarra marnaji arrkula ngathangka, kirru-lhuwarrila nirrarrku kantharra ma-ngarra alunga liyi-mangaji liyirrunga liyi-wirndajkuwu. 34Kulu namba kirru-wanila mili marnajinju, kirra-kala nya-mangaji buri nyirrunga-anyira yirruwa, barni-murdirrinja karna-ngayamala barra yirrunga kulu karna-yabirrila yirrunga ngarna-wurdu, kirrirna-lhaala barra yirru karnirri-nu kalngi wuka, kurdardi li-yinjatha yirru. Kulu ngulakari barra karni-nma nyirrunga-baba, kulu kirru-wanila yankumantharra nya-mangaji, marda kirrirna-ngundarra barra ma-ngarra barra yurrulu,’ nganinya barra ka-wukanyi barra nganunga.” Kalu-arri nganinya yiku nyuwalunga-biyiyu ki-Jikaba.
35Bawuji barra kali-nmalinma ma-ngarra alunga wiji, kalu-yibalyibarra baji awarala. Kulu karrali-nma a-birndabirndawara wiji alunga nanda-mulu kulu kalu-wakarama barra ma-mani aluwa rrungku-ja rru-birndawarala nganambaji ku-wani. Kulu kala-kala wiji barra, wiji kala-kala ma-ja ma-mani rrungkalunga rru-birndawarala wiji ku-wani, kulu bawuji barra kalu-wardanka, kalu-ruwama kurdandu.
36Kulu malbu barra ka-wukanyi alunga, “Yirru wardimanthawu awara ngatha kulu liyingathaliyi-ardubirriyu wiji. Jujiba kurdardi kiwima, baki Jimiyan kurdardi kiwima, kulu mili yurrulu jarnirru-yalbanganji yirru kanthawu jinangu buri Binjamin nakaringu ngathangka. Kulu ngarna warriya luku, ngarna wardirrinjawu ngarna-wurdu.”
37Kulu Rubin barra ka-wukanyi yiku nyiki-biyiyu, “Namba kurdardi karna-waninjangumarru buri Binjamin yindalu, kulu kirna-ngundarra rringatharri-ardu mayaniwujara kawulinya-ramala. Ngarna-ngundarra ngarna! Karna-kunkunmala kulu karna-waninjangumala yindalu.”
38Ngala yiwa malbu ka-wukanyi, “Nyangathi-ardu kurdardi ka-wingkarru yindaa, wambu kiwa-nmala ngathangka. Bajiwa barra nyiki-baba kumba-mirra, kulu jinangu arrkula barra marniwa ngathangka. Ngarna warriya malbu. Namba jinangu kumba-mirranma ngatha yabayabala, nungka ngarna mili karnamba-rarrinma kulu nyamba-mirranthalu wirangu barra yiwa,” nganinya barra ka-arri yiku. Bawuji.
© 1981, Wycliffe Bible Translators, Inc. All rights reserved.