Tuk 19
19
Di̱t dueeri ji̱ Thɔ-dɔm
1Ɛn wanɛ mɔ min ci wutni da̱ŋ rɛw tin kɔŋ cop kä Thɔ-dɔm kɛ thiaŋ, cukɛ Lɔt ben jek nyuurä thok rɛ̈ɛ̈k Thɔ-dɔm. Kä min ci Lɔt kɛ nɛn cuɛ rɔ jiɛc wee kɛ ne̱r kä cuɛ rɔ ben goŋ nhiamdiɛn. 2Kä cuɛ kɛ jiök i̱, “Kua̱rkä, kua mal ben nyuur dhɔrä, bia ciökun ben lak thi̱n kä dërɛ cu niɛɛn. Kä iruun dërɛ ja̱lun cu cuɔ̱p.” Kä cukɛ jɛ loc i̱, “/Cakɔ jɛ go̱r. Kɔn bakɔ niɛɛn raar ɛn wanɛ.” 3Kä cu Lɔt kɛ gil ɛlɔ̱ŋ amäni mëë cukɛ jɛ nhɔk. Mëë cikɛ wä cieŋ kɛ jɛ kɛɛl, cuɛ kɛ tha̱l mi̱eth cuɛ kɛ buɔ̱l jurayni ti thilɛ rɛydiɛn thuɔp, kä cukɛ mi̱th. 4Kä mëë ŋotkɛ a /ke̱nkɛ ni wä tɔ̱a̱cni, cu wutni diaal kä Thɔ-dɔm cieŋ ben göl piny, cukɛ ben kɛn diaal a thil ruec, ni kä ŋuɛ̈tnikiɛn amäni dɔŋkiɛn bä. 5Cukɛ ciöt, cɔalkɛ Lɔt kä jiökɛ jɛ i̱, “Kɛn a ni kɛn wutni da̱ŋ rɛw tin ci ben dhɔru ɛn thiaaŋni? Akɛ bëë raar bakɔ kɛ ben ka̱n.” 6Min ci Lɔt rɔaliɛn liŋ, cuɛ ben kä kɛ thok thi̱ek raar kä cuɛ thi̱i̱k nyɔk kɛ lek thi̱n. Min cɛ käny raar duëël, 7cuɛ kɛ jiök i̱, “Kua̱ lip ni yɛ, mäthnikä, /cuarɛ duer ɛ jiääk ɛmɛ lät. 8Nɛ̈nɛ jɛ, ɣän ta̱a̱ kɛ nyi̱er da̱ŋ rɛw ti juut ti /ken me̱t niɛɛn kɛ wutni, akɛ nöŋä yɛ, kä bia min go̱rɛ kɛ lo̱ckun lät kä kɛ. Kä /cuarɛ wutni ti̱ti̱ lät kä duɔ̱ɔ̱r, kɛ ɣöö kɛn kɛ ja̱a̱l dhɔaarä.” 9Cukɛ jɛ loc i̱, “Guɛny rɔɔdu, kiɛ ba̱kɔ ji̱ lät kä mi bɛc ni jɛn kä kɛ.” Kä cukɛ wee i̱, “Gatdi, ɛn ram ɛmɛ duundɛ ben kɛ ciaŋ ɛn wanɛ, kä bëë ben kok ni ɣöö de̱ra rue̱e̱cdan.” Ɛ jɛn kɛ kui̱ kä nɔmɔ cukɛ go̱r ni mi näk kɛn Lɔt, kä cukɛ wee kɛ mi ti̱eckɛ rɔ̱ nhiam kɛ ɣöö bikɛ thi̱i̱k thuɔk duëël wä töl piny. 10Kuɛ la ɣöö kɛn wutni da̱ŋ rɛw tin te rɛy duëël cukɛ Lɔt lɔ̱m kä cukɛ jɛ yɔ̱a̱c due̱e̱l kä cukɛ thi̱i̱k lëk thi̱n. 11Kä cukɛ nɛy diaal tin te thok thiek raar moc mi cɔɔrkɛ, kɛn diaal ŋuɛ̈tni amäni dɔŋkiɛn. Kɛ kui̱ kä nɔmɔ kɛn /ke̱nkɛ thi̱i̱k thuɔk duëël lɛ jek.
Jiɛɛn Lɔt kä Thɔ-dɔm
12Niɛ wa̱nɔ, cu wutni da̱ŋ rɛw tɔ̱tɔ̱ Lɔt ku thi̱ec i̱, “Ti̱i̱ kɛ radɔ̱diɛn ɛn wanɛ? Mi ti̱i̱ kɛ cɔnyiëët, gaat, män gan kiɛ nyi̱er, nɛy diaal tin maar kɛ ji̱ ɛn rɛy rɛ̈ɛ̈k, naŋ kɛ kä wuɔcɛ rɔ̱ ɛn guäth ɛmɛ, 13kɛ ɣöö kɔn görkɔ ɣöö bakɔ gua̱a̱th ɛmɛ däk. Yɔal kɛ kui̱ rɛ̈ɛ̈k ɛmɛ cɛ cop ni kä Kuoth Nhial jɛn cɛ di̱t ɛlɔ̱ŋ a cɛ kɔ cu ja̱k kɛ ɣöö bakɔ jɛ ben däk.” 14Ɛ jɛn, min ci Lɔt mɛmɛ guic, cuɛ wutni tëë ca nyieekɛ la̱r kuën wä jiök i̱, “Yɛn jiacɛ rɔ̱ kä wuɔcɛ rɔ̱ ɛn wanɛ, kɛ ɣöö bi Kuoth Nhial rɛk ɛmɛ ben däk niɛ täämɛ.” Kä cu cɔw nyiëëtkɛ ruacdɛ jak kä muɔŋ.
15Ni bakä ɣɔaa, cu ja̱a̱k Kuɔth Lɔt jiök i̱, “Jiɛcni, bar rɔɔdu yɛnɛ ciekdu kɛ nyieeku kɛ ɣöö /cia bi lɛ li̱w rɛy li̱eth dueeri rɛ̈ɛ̈k ɛmɛ.” 16Kä kɛ kɔ̱a̱c lɔaac Kuɔth Nhial, mëë cɛ dëë gääl, cu wutni tɔ̱tɔ̱ tetdɛ kɛnɛ tet ciekdɛ kɛ te̱t nyiëëtkɛ käp kä cukɛ jɛ buath raar, kä cukɛ jɛ naŋ ni jɔk wec. 17Kä mëë cikɛ kɛ cu naŋ raar, cu Kuoth kɛ jiök i̱, “Lënyɛ rɔ̱, /cuarɛ jɔkdun liɛc, kä /cuarɛ jak kä mi bia tekɛ gua̱a̱th mi cuɔ̱ŋɛ thi̱n rɛy täpä wec ɛmɛ. Lënyɛ rɔ̱ ni rɛy päämni, kɛ ɣöö /cia bi lɛ li̱w.” 18Kä cu Lɔt ɛ loc i̱, “Aɣ kuäär, /ci ɛ jɛn inɔ. 19Guicɛ täämɛ ɣän cä tɛ̈th lɔaac jek kä ji̱, kä cä kɔ̱a̱c lɔaacdu nɛn min ci nyuɔ̱th ɣä kɛ ka̱ndu kɛ ɣä li̱th. Ɣän /cä rɛk mi tekɛ päm bi cop, amäni mi dëë riɛk ɣä mom ɛn kam ɛ mɔ, kä dëë cu li̱w. 20Nɛn ɛ, rɛk mi thia̱k ɔn, dëë rɔ leny thi̱n. Ɛ rɛk mi tɔt. A kua̱ wä thi̱n, bä cu kään.” 21Cu Kuoth ɛ jiök i̱, “Nɛn ɛ, ɣän cä mɛmɛ lɛni nhök ji̱ bä, a /cä rɛk ɛ latdi mɔ bi däk. 22Pɛ̈thni, lenyni rɔ thi̱n, thilɛ mi bä lɛl amäni mi wi̱i̱ cop thi̱n.” Kɛ kui̱ kä nɔmɔ cua rɛk ɛmɔ ciötdɛ cɔl i̱ Dho-ar (mi lot ni ɣöö duŋ tiit).
Da̱k Thɔ-dɔm kɛnɛ Go-mo-ra
23Ɛn wanɛ mɔ Lɔt cuɛ cop kä Dho-ar känyä ca̱ŋ. 24Kä cu Kuoth Nhial macdɛ mi bëë ni nhial wuɔc wi̱c Thɔ-dɔm kɛnɛ Go-mo-ra. 25Kä cuɛ wi̱i̱ tɔ̱tɔ̱ dup, amäni ta̱p dho̱ri tɔ̱tɔ̱ kɛɛliw, amäni ji̱ rɛ̈kni tɔ̱tɔ̱ diaal, amäni wal diaal tin ci do̱ny. 26Duundɛ ɣöö cu ciek Lɔt jɔkdɛ liɛc, kä cua jɛ loc ni päm mik kä. 27Ni kɛ runwaŋ cu A-bɛ-ram loc guäth ëë cikɛ kɔŋ cuɔ̱ŋ thi̱n kɛnɛ Kuoth Nhial. 28Cuɛ wec Thɔ-dɔm kɛnɛ Go-mo-ra kɛ rɛy lo̱o̱lä nɔmɔ cu guic kɛɛliw, cuɛ nɛn ni wec mi ci tolɛ kac ni pua̱a̱r ce̱tdɛ nikɛ tol waŋä mi di̱i̱t. 29Inɔ cu Kuoth wi̱i̱ lo̱o̱lä tëë cieŋ Lɔt thi̱n däk. Cuɛ A-bɛ-ram tim, cuɛ Lɔt jak kä barɛ rɔ kɛ ɣöö bɛ kään rɛy däkä.
Tuk ji̱ Mo-ab kɛnɛ ji̱ Am-on
30Täämɛ cu Lɔt kɛnɛ nyieekɛ da̱ŋ rɛw jiɛɛn kä Dho-ar, kä cukɛ wä cieŋ rɛy päämni kɛ ɣöö luthɛ ɣöö de̱rɛ te kä Dho-ar. Jɛn kɛnɛ nyieekɛ da̱ŋ rɛw cukɛ ben cieŋ kɔ̱kä mi ca guaŋ puɔ̱ɔ̱ny pa̱a̱m. 31Kä kɛ cäŋ kɛl cu nyam in kɛ̱̈ɛ̱̈ nyiman in tɔt jiök i̱, “Gua̱ndan cɛ dɔŋ, kä thilɛ wutni ti ba kɔn di̱eth gaat wi̱i̱ muɔ̱ɔ̱n ɛmɛ. 32Bër, kɔn ban gua̱ndan dhi̱em kɔaŋ mi maathɛ, kä dëë kɔn cu tɔ̱ɔ̱c kɛ gua̱ndan, dëë kɔn rɔ̱ cu jëk gaat kɛ gua̱ndan.” 33Ɛ jɛ nɔ, kɛ jɛn wäär ëë cukɛ gua̱ndiɛn dhi̱em kɔaŋ mi cuɛ math. Kä cu nyam in kɛ̱̈ɛ̱̈ ben niɛɛn kɛnɛ gua̱n kɛɛl. Kä /ke̱n gua̱n tɔ̱ɔ̱cdiɛn kɛnɛ nyaadɛ nyäk kɛ ŋäc. 34Kä mëë ruɔ̱n cu nyam in di̱i̱t nyam in tɔt jiök i̱, “Ɣän cä niɛɛn kɛɛl kɛ gua̱ndan min wa̱r. Banɛ nyɔk kɛ dhim kɔaŋ ɛn thiaaŋni, kä bia cu wä niɛɛn kɛɛl yɛnɛ jɛ, kä ban gaat cu jek kä gua̱ndan.” 35Ɛ jɛ nɔ, kɛn cukɛ gua̱ndiɛn cu nyɔk kɛ dhim kɔaŋ ɛn wäär ëë, kä cu nyam in tɔt ben niɛɛn kɛɛl kɛ jɛ, kä /ke̱n gua̱ndiɛn ben nyaadɛ tɔ̱ɔ̱c kɛnɛ jiɛɛndɛ köli nyäk kɛ ŋäc. 36Ɛ jɛn, cu Lɔt nyieekɛ da̱ŋ rɛw cu ruët. 37Cu nyam in di̱i̱t dap kɛ gat mi dho̱o̱l, kä cuɛ ciötdɛ cɔl i̱ Mo-ab. Ɛ jɛn gua̱ndɔɔŋ nɛɛni tin cɔalkɛ täämɛ i̱ gaat Mo-ab. 38Kä cu nyam in tɔt lɛni dap bä kɛ gat mi dho̱o̱l, kä cuɛ ciötdɛ cɔl i̱ Bɛn-ami. Ɛ jɛn gua̱ndɔɔŋ nɛɛni tin cɔalkɛ täämɛ i̱ gaat Am-on.
Nuer Bible © Bible Society in South Sudan 1998,2012.