Лука 2
2
Хуная Ӏиса
1Те вахттуни Август агъа паччагьди буюрмиш акьуная, сан аркьай ликӀен пуна джалла учин джилил ешемиш веядегьен инсанар. 2Гиштти сан аркьаяф инсанарин садпегелай хьуная Сирия агъа хӀуькуматтин хӀаф Квириний идегуна. 3Джаллабур ушуная чаб учётариъ ихьас чиппин шагьурариди, хӀурариди, гьерф учин дадарин ватандилди.
4Юсуфра ушуная Галилея дерейин Назарет агъа хӀуриас Ягьудеяйиди, Вифлеем агъа Давудан хӀуриди, Юсуф уч Давудан тухумдиас идехӀела. 5Юсуфахъай ушуная гин фуни ая хьир Майрамра. 6Са чӀукь гагьдилас Вифлеемдиъ хъучадиная хьиран руха вахттар. 7Хуная Майрамас садпе шиниккв – кӀиркӀ. ГӀадиджина чаппаригӀ, икӀуная ги шиниккв тӀунаъ, гӀалашувар гъурзан хулаъ мукь ахьуна адава гебурис.
Малайикари хӀуьппехъенарис акьуна идже хабар
8Майрамна Юсуф ая мукьуйигьас Ӏайи варха давай хӀуьппехъенар алхьуная чӀирил Ӏуьшан къаравулдиъ. 9Сад пуна, заварин нур ичай, бадил хьуная гебурин удигьди малайик. ГучӀ хьуна тӀушас девей гъузуная хӀуьппехъенар.
10– Чвас гучӀ мева, – пуная гебурис малайикди. – Зун кӀилди инсанарис, идже хабар фай адинафе. 11ЯгӀа Давудан хӀуриъ Вифлеемдиъ хуная Месигь, инсанар УхӀаф. 12Чвас те Шиниккв магьмилди ягӀархьасе: чаппаригӀ гӀадиджина тӀунаъ ахьасе Те.
13Садпуна ге малайикдин багуливди бадил хьуная хъара ппара малайикар, дуьгӀебура аркьай:
14– Шукур варттал але Аллагьдис.
Дуьхьуьвелна нуьхӀуьбат Аллагь рази ая джилил аледегьен инсанарис.
15Малайикар уларигьас гулугуна, хӀуьппехъенари пуная:
– Див хьин, хьес Аллагьди акьуна хабарихъди Вифлеемдиди вес, агвас тисаъ хьунаеф.
16ТегӀди кей учӀуная хӀуьппехъенар рекъуьъ. Адегуна, джикӀиная гебури Юсуфна Майрам. ТӀунаъ икӀуна бицӀи шиникквра ахьуная. 17Шиниккв агуф, хӀуьппехъенари ахъакьуная чиппис малайикди Ге Шиникквдихъас петтар. 18Джалла юркӀв алийинаттар муьхӀтал хьуна гъузуная, хӀуьппехъенари файдина хабарил. 19Майрама кӀилди ге курар учин юркӀураъ икӀуна атуная. 20ХӀуьппехъенар адиная хаб алдаркуна, шукур аркьай Аллагьдисра, кӀилди чиппис агуттарисра унихьуттарисра. Малайикди гебурис пунагъилди хьуная.
21Муйе ягъалас суннат аркьа вахтт хьегуна, алихьуная шиникквдил ттур Ӏиса. Фуниъ хьастти алийина ттур хьуная ге малайикди.
Ӏиса Аллагьдис бахш акьуб
22Шиниккв хуна хумбеф мертт вере вахтт алттархьегуна, Юсуфана Майрама, Мусайин закунилди, файдиная Шиниккв Ерусалимдиди Аллагьдис бахш акьас, 23Аллагьдин закуниъ ликӀинагъилди: «Гьертти учин садпе кӀиркӀ бахш акьуна кканефе Аллагьдис», 24садакьара акьас, Аллагьдин закуниъ пунагъилди: «Ӏу гӀуд я луфуран Ӏу чарккв».
25Ахьуная те вахттуни Ерусалимдиъ Симеон агъа са инсан. Ге хьуная Аллагьдин юлайиъ ай дуз юркӀуран инсан, гъузунаф Аллагьдин Кумакихъ Ӏизраилдис. Гил алхьуная Аллагьдин РуьхӀ. 26Симеонас Аллагьдин РуьхӀди пуна ахьуная:
– Вун кӀесттава Месигь дагуна.
27Аллагьдин РуьхӀди ях агъаф суман, адиная ге Аллагьдин хулади. Гьеге ягъа Юсуфана Майрама файдиная гич бицӀи Ӏиса, закуниъ агъилди акьас пуна. 28Гебур ачадегуна, Симеона училди гъушуна Шиниккв, шукур акьуна Аллагьдис, пуная:
29– Гьал Вун фартая юркӀв сакинди Ве лукӀ, Аллагь ТегӀела. Аларкьуне Вун пуна гаф:
30Зе уларис агуне инсанар УхӀаф,
31Вун джалла халкьарис гьикунаф.
32Ӏекв, кӀилди халкьарин улар дархъаф,
ТегӀрифе, Ве Ӏизраилдин халкьдин.
33Дадна баб муьхӀтал хьуная Симеона Шиникквдихъас петтарил. 34Симеона гебурис хайир дуьгӀера акьуна, Майрамас, Гин бабас, пуная:
– Ме Шиниккв багьана хьуна, ппара инсанар Ӏизраилдиъ ахтт хьасе, ацӀунттар Гин кумак фай гъайшасе. Михъас ппара хӀуьджатар, гъургъубар хьасе, 35ве юркӀураас ханджал аттирхӀу суман хьасе вас джуьреттарин юркӀураъ ая джинабан хиялар ягӀархьегуна.
36Гисаъ ахьуная пайгъамбар Аннара, Фануилан руш, Асиран тухумдиас. ХӀа яшарин Ӏуьссе хьир хьуная ге, шувас ушуна ери исалас джигьилди ами ашкӀин хьунаеф. 37Аме Ӏуьмур фатуная ги ашкӀинди. МайцӀурна якьу ис хьуная гин. Сивара ухӀай, дуьгӀебура аркьай, гьемишан Аллагьдин хулаъ ахьуная Анна. 38Те арайи Аннара гьучушуна гебуригьди шукур акьуная Аллагьдис. Ерусалимдис Кумакихъ гъузунадегьен инсанарис ахъакьуная Аннайи ге шиникквдихъас.
Юсуфна Майрам хаб адиная Назаретиди
39Аллагьдин закуниъ пунадегьенттара акьуна, адиная Майрамна Юсуф Галилея дерейиди, чиппин Назарет агъа хӀуриди. 40Шиниккв хӀа вей батӀар джанра акьуная, фагьумра ппара хьуная, Аллагьдин дуьгӀебурин иджвел алхьуная Гил.
Ӏиса ахьуная Аллагьдин хулаъ
41Гьер иса Ӏисайин дадар бабар вей хьуная Ерусалимдиди Пасхайин хӀа ягъас. 42Ӏисайин цӀеӀу ис хьегуна, адиная гебур, гьемишан чаб верегъилди суман, хӀа ягъарис Ерусалимдиди. 43ХӀа ягъар кӀиркӀухаб, дадна баб ушуная хулади, Ӏиса экьуная Ерусалимдиъ. Дадар бабарис ягӀай хуна адава, Ге тисаъ амеф. 44Гебурин фикир хьуная джуьре инсанаригӀай рекъуьъ ай Ме пуна. Гиштти ушуная мебур кӀилин ягъди. Хабди, руцуная Майрамна Юсуф Гихъас багунттаригӀ, ягӀаттаригӀ. 45ДаджикӀина, хаб адиная мебур Ерусалимдиди Гихъас руцас. 46Хьибу ягъалас джикӀиная мебурис Ге Аллагьдин хулаъ. Ге гӀахьуная мегӀелимаригӀ, гебурил юркӀв алийина, гебурис суалар ирцӀанди. 47Джалла Гил юркӀв алихьунаттар муьхӀтал вей хьуная Гин фикирарил, Гин гъургъубарил. 48Дадна баб ппара муьхӀтал хьуная Ге агуф. Баба пуная Гис:
– Е зе кӀиркӀ, Вун фас миштти акьуфе час? Ве дадра зунна гъамар аркьай руцай уйи Вахъас.
49Ӏисайи гебурис пуная:
– Фас руцаттар э чун Захъас? Чвас ягӀай адавуйив Зун Зе Дадан хулаъ ахьуна кканеф?
50Гебур гъавурдиъ архьуна адава Ӏисайи чиппис петтин.
51Ӏиса адиная гебурихъай Назаретиди, гебурин юлайиъ ахьуная Ге. Джалла хьунаттар Ӏисайин баба учин юркӀураъ икӀуна атуная. 52Ӏиса хӀа вей, Ӏисайин фагьумра ппара хьуная, батӀар джанна акьуная. Ӏиса кканхьуная Аллагьдисра, инсанарисра.
© Библия тарджума аркьа институт, Москва, 2005