Matthew 5
5
Jesus kaa aayimuumaat aweyuuh chihchiwe e shaweyihtaakusiyich
Luke 6.20-23
1Jesus maak chii waapameu e mihchetiyich aweyuuh ekw kaa shaakachuwet anit e piskutauhkaayich, ekut kaa waweyapit. Ekw aniyuu uchischinuhamuwaakanh kaa pechi takushiniyich. Chii ati wiitapimikuu maak, 2ekw kaa chihchipayihtaat e chiskutamuwaat aniyuu uchischinuhamuwaakanh e itaat,
3“Shaweyihtaakusuuch anichii kaa chistimaatisiitwaau anite ahchaahkuwinihch, wesh wiyawaau tipiyeusiyuuch kihchikiishikw chisheuchimaawiniyuu. 4Shaweyihtaakusuuch anichii kaa nanehkaateumutwaau wesh Chishemanituu chika kaachiichihiikuuch. 5Shaweyihtaakusuuch anichii kaa yuuspaatisiitwaau wesh chika miyaakanuuch uyuu aschiiyuu. 6Shaweyihtaakusuuch anichii kaa siiweyitutahkwaau kaye kaa nuuhteyaapaakwetutahkwaa kuiskutaatisiiwiniyuu, wesh Chishemanituu tekash chika chiishpuhiikuuch. 7Shaweyihtaakusuuch anichii kaa shaweyimaatwaau aweyuu wesh kata shaweyimikuuch Chishemanituu. 8Shaweyihtaakusuuch anichii kaa payehchisiitwaau utehiiwaahch, wesh chika waapameuch Chishemanituu. 9Shaweyihtaakusuuch anichii kaa miyupayihaatwaau aweyuu e machipayihkahtaatuyich, wesh Chishemanituu utawaashiimh chika ishinihkaataakanuuch. 10Shaweyihtaakusuuch anichii kaa nanehkaachihaakanuutwaau aniyuu e kuiskutaatisiitwaau wesh ayaauch kihchikiishikw chisheuchimaawiniyuu.”
11“Chishaweyihtaakusinaawaau e maayeyimikuyekw, maak e nanehkaachihiikuyekw kaye e nanatayaachimikuyekw niya uhchi e pechi nuushuushkuuyekw. 12Miywaatamukw wesh chika mishaau chitipahamaakusiiwinawaau taan e ishi kanuweyihtaakuhch anite kihchikiishikuhch. Wesh ekun mwehch kaa ishi nanehkaachihaakanuutwaau anichii chischiwehiichesuuch anite utaahch.”
Muyaam siiuhtaakan ekw maak waashtewin e iteyihtaakusiyekw
Mark 9.50; Luke 14.34, 35
13“Chiyawaau eukw siiuhtaakan utah aschiihch. Ekaa maak e ati wiyaahpachispukuhch siiuhtaakan, namui ihtakun taanite chechii ihtuutaakanuuhch muyaam chechii ispakuhch. Namui maak wiyesh chika chii itaapatan, ekush maak kata wepinikanuu, ekw maak che taahtahkushkaataakanuuhch.”
14“Chiyawaau eukw waashtewin utah misiwe e ispichiskamikaach uu aschiih. Muyaam maak utenaau e wiikaapuuhtaakanuuhch anite e wachiyuuhch, namui chika chii kaataakanuu an utenaau. 15Namui awen akunaham waashtenamaakaniyuu e chii saskahahk. Nehpemashtaau aniyuu waashtenamaakaniyuu ekw maak misiwe awen wiyaashtenamaakut anit waaskaahiikanihch kaa ihtaat. 16Ekun maak mwehch chipaa ishi waashtenamaakuuch awenichii chiwaashtewinawaayuu anite chipimaatisiiwiniwaahch kaa ihtakuhch, chechii waapahtahkwaau aniyuu e ishi miyutuutamekw ekw maak che maamihchimaatwaau Kuuhtaawaau kihchikiishikuhch kaa ihtaayich.”
Jesus kaa chiskutamaachet wiishuwewiniyuu
17“Ekaawii iteyihtamukw e chii pechi takushiniyaan chechii iichenamaan wiishuwewin kaye maak aniyuu kaa ishi chiskutamaachetwaau uchischiwehiichesuuch. Namui nuuhchi takushin chechii iichenamaan aniyuuh, maak nichii takushin taapwe chechii ispayiyich taan kaa ishi chiskutamaachetwaau. 18Wii chischisikw, che ishpish ihtakunikwe kihchikiishikw kaye aschii, namui waawaach an maauch e apishaashich e masinaatech wiishuwewinihch chika uhchi paashikunaakun, paatish misiwe chii ispayihche taan e itashtech che ispayihch. 19Ekw maak awen ekaa nanihiihtahke aniyuu aat ekaa naashch chisteyihtaakuniyich kacheskwewiniyuu, nesht kaye chiskutamuwaate kutak chechii ihtiyich, eukw an maauch namui wiyesh chika uhchi iteyihtaakusuu anite kihchikiishikw chisheuchimaawinihch. Ekw maak awen nanihiihtahke aniyuuh wiishuwewinh kaye ishi chiskutamuwaate kutak aweyuuh uyuu chechii ihtiyich, eukuu che chisteyihtaakusit anite kihchikiishikw chisheuchimaawinihch. 20Chiwiihtamaatinaawaau maak, eukw mikw chechii piihcheyekw an kihchikiishikw chisheuchimaawin etituu chiyawaau kuiskutaatisiyekwe ishpishaat anichii kaa chiskutamaachetwaau wiishuwewiniyuu kaye anichii Phariseech.”
Jesus kaa aayimuutahk chishuwaasuwiniyuu
21“Chichii pehtenaawaau e chii itaakanuutwaau awenichii anite utaahch, ‘Ekaawii nipahaahkw awen, awen nipahiiwete chika wiyaaskunaakanuu.’ 22Mikw maak chititinaawaau niya, awen e chishuwaasiistuwaat wiichishaanh chika wiyaaskunaakanuu, kaye awen e aatuweyimaat wiichishaanh chika peshuwaakanuu uhchishkuu aniyuu kaa wiishuwaatamiyich taan che ihtuutawaakanuyich aweyuu, kaye awen kaa itaat wiichishaanh taapwe ekaa chekwaan mitun kaa iteyihtaakusiyin kushpanaateyihtaakuniyuu chechii ishiwepinaakanuut machishkutehch. 23Ekw maak mwehch wii miyate Chishemanituu miiwewiniyuu pachishtinicheunaapiskuhch, uhchi chischisiyine maak chiichishaan e chii wanituutaask, 24nakatih an chimiiwewin anit pachishtinicheunaapiskuhch, che nituwaapamat an chiichishaan che miyupayihtaayekw taan kaa ispayekw. Ekw miin kaau che takushiniyin ekw maak yaakw che miyat Chishemanituu aniyuu kaa wii miyat miiwewiniyuu.”
25“Awen maak mamishimiske chekwaayuu e chii ishi wanituutamut ihtuutaaske maak chechii ituhtahiisk wiyaaskunicheukamikuhch, chipaa kuchihaau pitamaa niishtam chechii miyu ayimihiit ekaa chechii ituhtahiisk anite mekwaach an e ati pimuhteyekw. Wesh takushiniyekwe nete wiyaaskunicheukamikuhch, anite wiyaaskunichesuu e ihtaayich ekute che ishi pachishtinisk, ekw an wiyaaskunichesuu anite kaa maakunawesiyich e ihtaayich ekute che ishi pachishtinisk, che chipahuuskwaau anichii kaa maakunawesitwaau. 26Chiwiihtamaatin maak taapaa chika chii wiiwiyin anit chipahutuukamikuhch paatish mitun tekash chii chiishiihkamane an e ishi masinahiichepayin.”
Jesus kaa ayimitutahk ekaa awen chechii wiichimaat kutak aweyuuh uwiichimaakaniyuuh
27“Chichii pehtenaawaau e iinaanuuhch, ‘Ekaawii wiichipisikwaatisiim kutak awen uwiichimaakan.’ 28Mikw maak chititinaawaau niya, awen kanawaapamaate iskweu, nitamukw maak ishi maamituneyimaate, shaash ishinaakuniyuu e wiichipisikwaatisiimat anite utehiihch. 29Ekw maak ihtuutaakuyine chischiishikw chinihiiwinihch kaa ihtakuhch chechii machituutaman kuikunh, che wepinaman. Uste miywaau chechii wanihtaayin apishiish chiiyuu ishpish wii misiwe chiiyuu chechii ishiwepinikanuuhch machishkutehch. 30Kaye maak ihtuutaakuyine chitihchii chinihiiwinihch kaa ihtakuhch chechii machituutaman, manishah che wepinaman. Uste miywaau chechii wanihtaayin peyakw an chitihchii ishpish wii misiwe chiiyuu chechii ishiwepinikanuuhch machishkutehch.”
Jesus kaa ayimitutahk e wepinitunaanuyich
Matthew 19.9; Mark 10.11, 12; Luke 16.18
31“Kaye maak chii iinaanuu, ‘Awen e wepinaat wiichiskweuh chipaa miyeu masinahiikaniyuu e itashteyich e wepinaat.’ 32Mikw maak chititinaawaau niya, naapeu e wepinaat wiichiskweu aat ekaa nitawiin ihtiyich machituutam an naapeu. Ihtuutuweu aniyuu wiichiskweu chechii wiich pisikwaatisiimaayich kutak aweyuu. Kaye an naapeu kaa wiichimaat aniyuu kaa wepinaakanuyich iskweu pisikwaatisiyuu.” Jesus kaa itwet che cheshtinaachishtaayin taan e itweyin.
Jesus kaa itwet che cheshtinaachishtaayin taan e itweyin
33“Kaye maak chichii pehtenaawaau e chii itaakanuutwaau iinuuch anite utaahch, Yaaitei ihtuutamukw aniyuu taan kaa itekw Chishemanituu che ihtuutamekw.”
34“Mikw chititinaawaau niya, ekaawii mitun nispitaapwekw. Ekaawii kihchikiishikuhch ishi nispitaapwekw wesh eukw aniyuu Chishemanituu uchisheuchimaau tehtapuun, 35kaye ekaawii aschiihch ishi nispitaapwekw wesh ekut tiyehtashtaat Chishemanituu usith, ekaawii mechim an ihtaawin Jerusalem kaa ishinihkaatech ishi nispitaapwekw wesh eukw aniyuu utenaam Chishemanituu an kaa chisteyihtaakusit Chisheuchimaau. 36Ekaawii mechim chistikwaaniwaahch ishi nispitaapwekw wesh namui waawaach peyakwaapech chistikwaaniyaapiiwaauh chika chii ihtuutenaawaau chechii wiipaakwaauh maak chechii waapaakwaauh. 37Mikw ehe maak namui chipaa itwen, kutach maak chekwaan itweyine e nituweyihtaman chechii taapwehtaakuyin, machimanituu e ihtaat uhchipayuu.”
Jesus kaa ayimitutahk ekaa chechii taapishtaat awen taan kaa ishi wanituutuwaakanuut
Luke 6.29, 30
38“Kaye maak chichii pehtenaawaau anite weskach e chii iinaanuuhch, ‘Wanaachihtaawate awen uschiishikw, kaye chii chischiishikw chipaa wanaachihtaakanuu, maak manaapitehute awen kaye chiya chipaa manaapitehukuun.’ 39Mikw maak niya chititinaawaau, ekaawii taapishtaah awen e chii machituutaask. Awen utaamihkwehuuske chitaamihkanihch, mii ekush anite kweshtehche kaye chechii utaamihkwehuusk. 40Maak awen ituhtahiiske wiyaaskunicheukamikuhch itisk chechii chiishiihkaasuyin chipachuyaaniyuu e nituweyihtamaask ekush mii chechii ayaat kaye aniyuu chitakuhpiyuu. 41Awen maak siihchimiske chechii wiiushuut wiiwat peyakw tipahiikan, ekush niishu tipahiikan ishpish ituhtataau. 42Kaye awen nituweyihtamaaske chekwaayuu, mii. Maak awen wii auhaasuumiske chekwaayuu, mii aniyuu chekwaayuu waa uhaasumisk.”
Saachihaahkuch anichii kaa uhkaatitaakuch
Luke 6.27, 28, 32-36
43“Chichii pehtenaawaau e iinaanuuhch anite weskach, ‘Saachihaahkuch chiwiichewaakanuwaauch, uhkaataahkuch anichii kaa uhkaatitaakuch.’ 44Mikw maak chititinaawaau niya, saachihaahkuch anichii kaa uhkaatitaakuch kaye ayimiheshtamuwaahkuch anichii kaa nanehkaachihiitaakuch, 45ekw maak che ukusitutaataakw an Kuuhtaawaau anite kihchikiishikuhch kaa ihtaat. Wesh taapishkun miyeu aniyuuh kaa machituutamiyich kaye kaa miyutuutamiyich chechii waashtenamaakuyich piisim, kaye taapishkun miyeu e chimuuniyich aniyuu kaa miyutuutamiyich kaye aniyuu kaa machituutamiyich. 46Chekwaayuu chipaa uhchi miikw Chishemanituu chikaaniyuwiniyuu mikw saachihiitwaau anichii awenichii kaa saachihiiskwaau. Wesh ekun misiwaach e ihtitwaau anichii kaa machituutahkwaau. 47Kaye maak mikw chiwiichewaakanich ayimihiitwaawenich, chekwaan e ihtuutaman anit uhchi ekaa ihtuutahkwaau kutakach awenich. Wesh misiwaach ekun e ihtitwaau anichii ekaa kaa taapweyimaatwaau Chishemanituu. 48Muyaam Kuuhtaawii kihchikiishikuhch kaa ihtaat kaa ishpish tekash mitunisiit ekun mwehch kaye chiya chipaa ishi mitunisiin.”
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.