Mat. 2
2
Hɔɔra Ba Naa Funɛ Li Nha Bar Yɛli
1Ba funɛ lul Yesu a li tɔhɔn naa ba yir Bɛtlihɛm a li Judia pulum ni. Chen saha ti koor digi funɛ nyɛn doon a dɔ dooni. Ba funɛ yir un Hɛrɔd. Nara ba naa funɛ zim wula ta mun wɛ, ba waa funɛ wa Jɛrusalɛm a li nha bar yɛli ni. 2Ba fun pɛɛsi nara, “Leene ba fun lul be naa kaa wa ya Ju tim koora chen? Ya wau di ya wa jɛɛmi un, domi ya na o wulu ka o li nha bar yɛli aa wa.”
3Koor Hɛrɔd funɛ nu ka hɔɔra tima wa pɛɛsi be ti wɛ, o fun muksi un kinkan. Chen gbanko fun muksi Jɛrusalɛm tim maga. 4Hɛrɔd fun a yir Koosa dam kɔkɔɔrsa awa Koosa chiksɛ nibiksɛ maga ba lagmi o wati. O fun pɛɛsi ba, “Leene ba lul naa Koosa fun ŋɔ di o zi wa tumu chen?”
5Ba ŋɔ un di, “Koosa witinsi ta digi funɛ sɔbi a li Koosa sɛm tɔn ti ni saha digi di ba zi wa lul unu a li Bɛtlihɛm naa nyɛn Judia pulum ni. O fun ŋɔ,
6‘Ba zi wa lul nyuhu tiinau a li Bɛtlihɛm ni.
Waa la zi il mu Ju tima.
Chendaha Bɛtlihɛm ya kibirigire a kaali tɔsi naa maga nyɛn Judia pulum ni.’ ”
7Hɛrɔd funɛ nu ba sɛma, o fun yir hɔɔra ba naa li nha bar yɛli chen, ba wa lagmi o wati ba duŋduŋ. O fun pɛɛsi ba nɛnɛ, “Ma zim saha naa ma na wul tiuu?” Ba fun ŋɔ un saha ti. 8O fun ŋɔ ba, “Ma la Bɛtlihɛm a la dɛu be ti nɛnɛ. Ma la na un, ma bur kuwa a wa ŋɔ min, chen ni n gbanko zi la jɛɛmi unu.”
9Doone hɔɔra ta fun si a kaali Bɛtlihɛm. Ba funɛ nyɛn nyinbaan ni a la chene, ba fun bukoo na wul naa funɛ li nha bar yɛli chen. O fun te ba suwachak, hali a fun wa chiŋi doonani Yesu nyɛn. 10Hɔɔra ta funɛ na wul ti chiŋi dooni chen, ba tusa fun sɔɔni a la gali. 11Ba fun la zu dam ti a na be ti awa o niina Mɛri. Ba fun wa gbiri o suwachak ni a jɛɛmi un a puk ba kapursa a yisi kina a nyɛ un. Ba fun kpa salma awa tulale naa ba yir firaŋkinsens awa mɛr a nyɛ un, a la hiisi.
12Ba funɛ hiisi chene, Koosa fun sɛm ba a li ba deesi ni a ŋɔ, “Ma ta bur la Hɛrɔd wati.” Doone ba fun si a tiŋ nyinbaan digi a kaali ba tɔha.
Yesu Wa O Walɛ Fun Si Kaali Ijipt Pulum
13Ba funɛ kaali, Josɛf fun bukoo na Koosa malaika ti a li o deesi ni. O ŋɔ un, “Koor Hɛrɔd dɛu i be tiu di o kpu un. Si a zer be ti awa o niina a chɔ la Ijipt pulum. Nyɛn doon hali n wa ŋɔ hin di i bur kuwa.”
14Josɛf fun si lalaga a zer be ti awa o niina dusum ti ni a kaali Ijipt. 15O wa ba fun la nyɛn dooni hali Hɛrɔd wa sou. Ba funɛ ya chene di chenani Koosa witinsi ta digi fun sɔbi a li Koosa sɛm tɔn ti ni saha digi zi ya wutiu. O fun sɔbi di Koosa ŋɔɛɛ di,
“Mu funɛ yir n beu a li Ijipt ni”.
Bichɛsa Kpuuli Saha
16Hɛrɔd funɛ zim di hɔɔra tima mur unu, o fun na paan kinkan. O fun yir o lanjimasa a tum ba di ba la kpu nibabichɛsa ba naa maga vɛ tel bunsa lɛ a nyɛn Bɛtlihɛm awa tɔsa naa maga go un ni. Hɔɔra tima funɛ piin ŋɔ unu saha naa Mɛri lul.
17Lanjimasi ta funɛ kpu bichɛsi ta, sɛma naa Koosa witiina naa ba yir Jɛrɛmaya fun sɛm chen ya wutiu. 18O ŋɔ di,
“N nu nandigi tarɛ ka o kaasi a la wi kinkan.
Haan naa ba yir Rachɛl funɛ nyɛn Rama ni.
O bisi maga fun siti.
Nandigi wa fun koti a belimi un.”
Yesu Wa O Walɛ Fun Bur Li Ijipt Pulum Ni
19Hɛrɔd funɛ sou, Koosa malaika ti fun bur wa Josɛf wati a li Ijipt pulum ni. 20O fun ŋɔ un a li o deesi ni, “Naa la daŋni o kpu i be ti chen, sou. Si a zer be ti awa o niina a bur kila Ju tim pulum.” 21Doone Josɛf fun si a zer ba ba bur kaali.
22Ba funɛ la tel dooni, a funɛ nu di Hɛrɔd be, naa ba funɛ yir Arkɛlaus chen, di Judia koora. Nan sɛm na nyɛ o ɔm di o nyɛn dooni. Amaa Koosa funɛ bukoo ŋɔ unu a li o deesi ni, 23di o la sa o dama a li tɔhɔn naa ba yir Nazarɛt a li Galili pulum ni. O fun ya chen, chenani Koosa witinsi ta fun sɛm saha digi, chen ya wuti. Ba funɛ ŋɔ di,
“Koosa be la zi yir Nazarɛt nar.”
© 1993, Ghana Institute of Linguistics Literacy and Bible Translation