Nau Ntơm 33
33
Yakôp tâm di đah Êsao
1Jêh ri Yakôp n'gơr măt uănh, say Êsao hăn, nđâp ma geh băl păng 400 nuyh hăn ndrel păng đŏng, jêh ri Yakôp tâm pă kon ăn ma Lêa, ăn ma Rachel, ndrel ma ăn ma bu ur sơm kơl jan kar bar hê nây. 2Yakôp ăn bu ur sơm kơl jan kar bar hê nây, ndrel ma dâng lĕ kon khân păng hăn lor, jêh ri Lêa, ndrel ma dâng lĕ kon păng, n'glĕ dŭt bu ri păng ăn Rachel ndrel ma Yôsep hăn. 3Yakôp nơm ri păng hăn bơh năp phung nây, păng hăn păn mbah a neh su pơh tơ̆, n'ho ma tât dăch Êsao nô păng ri. 4Êsao nchuăt ran păng, ut păng, ut ta tong ko păng, chŭm păng, jêh ri nhŭm lĕ bar hê. 5Êsao uănh say phung bu ur, ndrel ma phung kon se, păng ôp: “Bu moh phung gŭ ndrel may dja?” Yakôp ơh: “Dja kon, Kôranh Brah de ăn ma gâp tă bơh nau ueh Păng Nơm”.
6Jêh ri bu ur sơm kơl jan kar ma bar hê ur păng ri, ndrel ma dâng lĕ kon khân păng hăn păn mbah Êsao nây. 7Jêh nây Lêa ndrel ma dâng lĕ kon păng hăn păn mbah, n'glĕ dŭt bơh kơi Yôsep, ndrel ma Rachel hăn păn mbah đŏng. 8Jêh ri Êsao ôp Yakôp: “Moh jan ndơ may i ăn bu leo mâp gâp ndơh nơh?” Yakôp ơh: “Gâp leo ma njŭn ăn may nô, gay ma nô yô̆ gâp”.#32:14-17 9Êsao lah ma păng: “Ơ oh, gâp be lĕ geh ŏk ngăn, may sŏ ndơ may nây prăp ăn ma may nơm dô”. 10Yakôp ơh: “Mâu ôh ndri nô, lah may yô̆ gâp ngăn, may dơn ndơ gâp njŭn ăn ma may nây dô. Dôl gâp say muh măt may tâm ban ma say muh măt Kôranh Brah đŏng, yorlah lĕ may rom gâp ma nau ueh đăp mpăn. 11Lah ndri dăn may sŏ dơn hŏm ndơ gâp njŭn ăn may nây, yorlah lĕ Kôranh Brah ăn geh jêng ma gâp, ăn gâp geh drăp ndơ ŏk rmeh”. Jêh ri Êsao sŏ dơn ndơ nây, yor ma Yakôp nchâp păng ngăn. 12Êsao lah: “Hô̆, hăn hŏm bân, gâp hăn ndrel may”. 13Yakôp lah ma păng: “Ơ nô#33:13: Ta nau ngơi Hêbrơ nchih: «Ơ kôranh», yorlah Yakôp ŭch njŭr ngăn săk ta năp nô păng., may lĕ gĭt, bân brô̆ trong hăn ndrel kon se oh bê mâu geh ôh ueh, gâp geh be biăp, geh be, ndrel ma geh ndrôk hôm e kon pu toh. Lah bân nchâp ăn hăn ngai ir ta du nar, dâng lĕ mpômpa (siŭm) nây khât lĕ phiao ro. 14Lah ndri may hăn lor gâp i bunuyh sơm kơl jan kar ma may dôh nô, gâp ma hăn mplêm mplêm phung kon se, ndrel ma mpômpa (siŭm), n'ho ma tât gâp tâm mâp đah may ta bri Sêir ri”. 15Êsao lah ma Yakôp: “Lah ndri gâp ăn băl gâp hăn ndrel may ƀă dôh”. Yakôp ơh: “Mâu chrao ôh nô, may lĕ yô̆ ma gâp kơt nây lĕ găp jêh”. 16Jêh ri Êsao plơ̆ sât ta bri Sêir ri nar nây đŏng. 17Yơn ma Yakôp mâu ôh hăn ta bri Sêir, păng hăn tât ta ƀon Sukôt chrao. Păng jan du mlŏm jay ma gŭ păng nơm, ndrel ma rdŏk nkưp ma ăn mpômpa (siŭm) păng nơm đŏng. Kơt ndri dâng bu kuăl ntŭk nây «Sukôt», geh nau khlay lah «Chun».
18Bơh kơi Yakôp sât bơh bri Pađan-Aram nây, păng hăn ta ƀon Sikem bri Kanan ma nau đăp mpăn, jêh ri păng rdŏk chun bok tâm dăch ma ƀon nây. 19Neh ntŭk păng jan chun bok nây, păng rvăt tă bơh phung oh kon Hamor i bơ̆ Sikem, khlay 100 kăk prăk.#Yôs 24:32; Yôh 4:5 20Jêh ri păng jan du ntŭk ma jan brah ta ntŭk nây, păng tê̆ rnha «El Elôhê Israel», geh nau khlay lah «Kôranh Brah jêng brah Israel yơk mbah».
© (Active) Wycliffe Bible Translators, Inc. All rights reserved.