Mateo 4
4
Watĩ ñerire iidoreriñumi Jesure
Mr 1.12-13; Lc 4.1-13
1Eropi Espíritu Santopʉ Jesure masa marirogue wadorepʉ erogue watĩ ĩgʉre ñerire iidoreboro dopa.
2Erogue ejagʉ, cuarenta nʉri gohra baro mariro árĩpʉ Jesu. Eropiro pʉhrʉguere ĩgʉre oa pũriyoro pare. 3Ĩgʉ oaboacʉ̃ ĩagʉ watĩpʉ ĩgʉ pohrogue ejagʉ õpa arĩpʉ:
—Mʉhʉ Goãmʉ magʉ árĩgʉ õpa ĩhmuque. Iyerire ʉtãyerire bari poyacʉ̃ iique, arĩripʉ ĩgʉ Jesure.
4Ĩgʉ eroparĩcʉ̃ peegʉ Jesu gamebiripʉ. Eropigʉ Jesu õpa arĩ yʉhripʉ:
—Goãmʉ yare erã gojarapũ õpa ãhraa: “Masare bari mera dihta ojocaribiro gahmea. Árĩpehreri Goãmʉ ĩgʉ ya wereniguiri mera árĩro gahmea,” arĩmi Goãmʉ, arĩ yʉhripʉ Jesu watĩre.
5Ĩgʉ eropa arĩ yʉhrira pʉhrʉ watĩpʉ Jerusalén waĩcʉri macague Jesure aĩgãpʉ. Erogue eja, Goãmʉ ya wihi wecague Jesure aĩ mʉrijapʉ ĩgʉ. 6Aĩ mʉrijatuha, ĩgʉre õpa arĩripʉ:
—¿Diaye ta Goãmʉ magʉ gohra ta ãhriri mʉhʉ? Goãmʉ yare erã gojarapũ õpa ãhraa:
“Goãmʉ ĩgʉ yarã anyuare mʉre ĩhadibudoregʉcumi. Eropirã erãpʉ mʉre ĩhadiburãcoma mʉgue ʉtãye weca mehbejajari arĩrã,” arãa ĩgʉ gojarapũ.
Erã mʉre eropa ĩhadibumorã árĩcʉ̃ mʉhʉ Goãmʉ magʉ ta árĩgʉ õgue buhrima dija ĩhmuque yʉre. Mʉre erã itamucʉ̃ ĩhmuñata yʉre, arĩripʉ watĩpʉ.
7Ĩgʉ eroparĩcʉ̃ peegʉ gamebiripʉ Jesu. Õpa arĩ yʉhripʉ ĩgʉre:
—Goãmʉ yare erã gojarapũ õpa arãa: “Goãmʉ mʉa Opʉ ĩgʉ arĩrare ‘¿Diaye ta ãhriri?’ arĩ masidiarã Goãmʉre ii ĩhmudoremaabiricãque,” arãa Goãmʉ yare erã gojarapũ, arĩpʉ Jesu.
8Ĩgʉ eropa arĩ yʉhrira pʉhrʉ ʉmadigʉgue ʉtãgʉgue Jesure aĩ mʉriapʉ daja. Irigʉ wecague mʉri bejaja, árĩpehreri macarire i ʉmʉ majare ĩhmupʉ Jesure. Erã opari sãre ĩhmupʉ. 9Eropa ĩhmugʉ Jesure õpa arĩpʉ:
—Yʉre mereja, “Mʉhʉ yʉ opʉ ãhraa,” arĩ umupeoque mʉhʉ yʉre. Mʉhʉ yʉre eropa iicʉ̃ mʉre árĩpehreri i macarire mʉre ogʉra, arĩ wereripʉ watĩ.
10Ĩgʉ eroparĩcʉ̃ Jesu õpa arĩ yʉhripʉ daja:
—Satana, waque mʉhʉ. Õpa arãa Goãmʉ yare erã gojarapũ: “Mʉ Opʉ Goãmʉ dihtare umupeoque. Ĩgʉ ya doreri dihtare iique,” arãa Goãmʉ yare erã gojarapũ, arĩpʉ Jesu watĩre.
11Ĩgʉ eroparĩcʉ̃ peegʉ watĩ waha wapʉ. Ĩgʉ wara pʉhrʉ anyuapʉ eja, Jesure itamuñorã. Ĩgʉre barire oñorã.
Galilea yeba Jesu buhenʉgañumi
Mr 1.14-15; Lc 4.14-15
12Eropi Ñure peresu erã iicʉ̃ peegʉ, waha wapʉ Jesu. Galilea yebague ejapʉ. 13Ero árĩri macague Nazaregue waha, tarigã, Capernaum waĩcʉri macague ejapʉ. Galilea waĩcʉri ditaru pohro árĩbʉ Capernaum. Iri maca Zabulón yeba pohro, Neftalí yeba pohro árĩbʉ Capernaum. Erogue eja árĩpʉ Jesu. 14Eropa ta iipʉ Jesu iribojegue majagʉ Goãmʉ yare weremʉhtadigʉ Isaia ĩgʉ arĩ gojadiro dopa ta. Õpa arĩ gojayuñumi:
15Zabulón yeba pohro, Neftalí yeba pohro, ditaru waro, Jordán waĩcʉriya gajipʉ masegue Galilea yeba ãhraa. Iri yeba judio masa árĩbirã ya yeba ãhraa. 16Ero majarã Goãmʉ yare õaro masibeama. Eropa masibiriquererã ta õagʉre ĩarãgue masirãcoma. Erãpʉ Goãmʉre ne masibeama. Eropirã peamegue wamorã ta árĩrima. Eropigʉ yujugʉ erãre Goãmʉ yare masicʉ̃ iigʉcumi, arĩ gojañumi Isaia Jesu eraboro coregue.
17Erogue árĩgʉ Goãmʉ yare werenʉgapʉ Jesu:
—Mʉa ñeri iirare bʉjawereque. Eropa iirã õaripʉre gohrotoque. Ʉmaro majagʉ Goãmʉ árĩpehrerã tauro ĩgʉ opʉ árĩboro merogã dʉhyaa, arĩ werenʉgapʉ ĩgʉ.
Wapicʉrã wai wejẽrãre ĩgʉ mera majarã árĩmorãre sihuñumi Jesu
Mr 1.16-20; Lc 5.1-11
18Eropi Galilea waĩcʉri ditaru tʉrogue ejagʉ, Simore, ĩgʉ pagʉ magʉ Andre mera bocajapʉ Jesu. Simo ta Pedro erã arĩ piyugʉ árĩpʉ. Erã wai wejẽri masa árĩñorã. Erã ya wejẽri yucʉre mehyurã iiñorã iri ditaru wʉari ditarugue. 19Erãre boca õpa arĩpʉ Jesu:
—Yʉ mera majarã árĩmorã arique mʉa. Yʉ mera mʉa aricʉ̃ waire ñeha gameneorã mʉa árĩro dopa ta, Goãmʉ yarã árĩmorãre masare sihu gameneomorã árĩcʉ̃ iigʉra mʉare. Yʉ mera mʉa aricʉ̃ eropa iimorãre amugʉra mʉare. Eropirã yʉ mera arique, arĩpʉ ĩgʉ erãre.
20Eropa ĩgʉ arĩcʉ̃ peerã ta erã ya wejẽdi yucʉre apicãa, Jesu mera waha wañorã.
21Eropirã erã Jesu mera tarigã, Santiagore ĩgʉ pagʉ magʉ Ñu sãre bocajañorã daja. Erã Zebedeo porã árĩñorã. Erã yaru dohodirugue erã pagʉ mera erã sã erã ya wejẽdi yucʉre amurã iiñorã. Erã perãre ĩgʉ sihubeopʉ. 22Ĩgʉ eropa sihubeocʉ̃ pee, erãpʉ erã pagʉre, dohodiru sãre api Jesu mera waha wañorã.
Bajarã masare buheñumi Jesu
Lc 6.17-19
23Eropi árĩpehrerogue Galilea yebare Jesu buhe curipʉ. Judio masa gʉa buheri wirigue õari buherire, ʉmaro majagʉ ĩgʉ opʉ árĩricʉrire buhepʉ. Eropigʉ dorecʉrãre õarã iigʉ árĩpehreri dorecʉrire cóãpʉ ĩgʉ. 24Ĩgʉ eropa iicʉ̃ peerã Siria yeba majarã árĩpehrerogue iri yeba árĩrã ĩgʉre masinʉgañorã. Eropa masirã, gajiropa árĩri dore oparãre, watẽa ñajasũnirãre, pũriri dorecʉrãre, sĩriri mʉra dorecʉrãre, dʉpʉ turabirã sãre aĩ ejañorã Jesu pohrogue. Eropigʉ árĩpehrerãre erãre õarã wacʉ̃ iipʉ Jesu.
25Ĩgʉ eropa iicʉ̃ ĩarã, Galilea yeba majarã Decapoli yeba majarã, Jerusalén majarã, Judea yeba majarã, Jordán waĩcʉriya gajipʉ masepʉ majarã, bajarã masa ĩgʉ mera wañorã.
© 2011, Wycliffe Bible Translators, Inc. All rights reserved.