San Juan 7
7
Tu ni ka kandija ña ñani maa Jesús jin ya
1Te nuu ni yaꞌa ndiꞌi yun, te ni jinkondee Jesús jikanuu ya Galilea. Chi tu ni kuini ya ja kiondita ya Judea, chi ka nduku ndee tee ka kuu nijaꞌnu nuu ñayiu judio ja vi kaꞌni ña de jin ya. 2Te ja ni kuyatni kiuu viko ñayiu judio ja nani viko veꞌe xtnuu kuii. 3Yun te ka jiñaꞌa ñani ya:
―Ma koo ka ron ñuo yaꞌa, te kuanoꞌo Judea, nagua ja suni na vi kuni ñayiu ka skuaꞌa jin ron tniuu saꞌa ron. 4Chi nuu ja na in kaꞌan ja vi kuni tniuu saꞌi, te ma saꞌa yuꞌi. Te nuu ja tniuu yaꞌa saꞌa ron, te xneꞌe nagua ja na vi kuni ndiꞌi ñayiu ñuyiu ―ka jiñaꞌa de.
5Chi vini maa ñani ya, tu ka kandija ña jin ya.
6Yun te jiñaꞌa Jesús:
―Ja nuu in in maa ni, chi ndiꞌi ni kiuu kuu guaꞌa, su sein chi kuini ka ja kenta kiuu ja kiꞌin san. 7Te ja ñayiu ñuyiu, chi tu ka kaꞌan uꞌu ña jin ni, su sein chi ka kaꞌan uꞌu ña jin san, chi ndakani san siki tniuu kueꞌe ka saꞌi. 8Kuanoꞌokuei maa ni viko yun, chi ma ndanuu sein ja noꞌo san, chi kuini ka ja skunkuu kiuu ja kiꞌin san ―jiñaꞌa ya.
9Te saa jiñaꞌa Jesús, te ni kendoo ya Galilea.
Kuaꞌan Jesús nuu viko veꞌe xtnuu kuii
10Su nuu ja mavindanuu ñani ya, yun te suni ni ndanuu ya nuu viko yun, su ni jaꞌan yuꞌu ya ja ma vi kuni ña ñayiu. 11Te ni ka ndanduku ña tee ka kuu nijaꞌnu nuu ñayiu judio jin ya nuu viko yun, te ka kachi de:
―¿Ndenu oo tee yun?
12Su ni ka kaꞌan ndevaꞌa ñayiu kuaꞌa yun ja jaꞌa ya, te sava de ka kachi: “Tee guaꞌa kuu de”. Su sava ka de ka kachi: “Ñaꞌa, chi ninoꞌo ni xndaꞌu de ñayiu ñuo”.
13Su ni in de, tu ni kaꞌan ndijin ja jaꞌa ya, chi ka yuꞌu de tee ka kuu nijaꞌnu nuu ñayiu judio. 14Su nuu ja ni kuu sagua viko yun, te ni ndanuu Jesús veñuꞌu, te yun ni kaxtnoꞌo ya nuu ñayiu. 15Te vini ka saꞌu kuii kuiti ini tee judio ja ka kuu nijaꞌnu yun ka nini de, te ka kachi de:
―¿Naxa jini tee yaꞌa tnoꞌo kaꞌan de, te tu na in tee ni kaxtnoꞌo nuu de? ―ka kachi de.
16Yun te jiñaꞌa Jesús:
―Tnoꞌo ja kaxtnoꞌo san yaꞌa, chi masu tnoꞌo maa san kuu, chi tnoꞌo maa ia ni tetniuu ña jin san kuu. 17Te na in kuini ja saꞌa nagua kuini ia Dios, te kuni a nuu Dios vaji tnoꞌo kaxtnoꞌo san yaꞌa axi tnoꞌo kaꞌan ni maa san kuu. 18Chi na in kaꞌan tnoꞌo mai, te javaꞌa mai ndukui. Su na in nduku javaꞌa na in ni tetniuu ña, te tee yun kuu tee ndaa, te tu na tnoꞌo kueꞌe kaꞌan de. 19Ni xndendoo Moisés Ley nuu in in maa ni, su ni in ni tu ka skunkuu ni, chi saa suaꞌa ka nduku ndee ni ja vi kaꞌni ña ni jin san ―jiñaꞌa ya.
20Yun te ni ka kana ñayiu kuaꞌa yun, te ka jiñaꞌi:
―Vaa tachi ñuꞌu ña jin ni, ¿na in nduku ja kaꞌni ña jin ni? ―ka jiñaꞌi.
21Yun te jiñaꞌa Jesús:
―Invaa tniuu kaꞌnu ni saꞌa san kiuu ndatatu, te vi ndiꞌi ni ni ka saꞌu kuii kuiti ini ni. 22Te jandaa ja Moisés ni kaꞌan ja vi chitnunio nuu yiki kuñuo, su masu Moisés ni jinkondee jin, chi ndee ndi tata veluo ni ka jinkondee ka chitnuni nuu yiki kuñu, te vi ndee kiuu ndatatu ka chitnuni maa ni nuu yiki kuñu seyii ni. 23Chi nuu ja ka chitnuni ni nuu yiki kuñu in seyii ni kiuu ndatatu, nagua ja ma vi kuiso kava ni Ley Moisés, ¿te nau ja ka kiti ini ni nuu san ja ni ndasavaꞌa san in tee kiuu ndatatu? 24Ma vi ndanduku ndichi ni naxa oo naxa kaa in ñayiu, chi vi skuaꞌa guaguaꞌa ni nagua kuu ndaa, te saa vi saꞌa ni ―jiñaꞌa ya.
Kaxtnoꞌo Jesús ndenu vaji ya
25Yun te ka jiñaꞌa sava ka tee maa Jerusalén:
―¿A masu tee yaꞌa kuu tee ka ndanduku ja vi kaꞌni? 26Te vi kondiaꞌa ni ja vi kaꞌan de jin nuu ndiꞌi ñayiu, te tu na in kaꞌan saꞌun, axi saa ni ka ndakuni ndaa ña tee ka tatnuni nuu ñuo ja tee yaꞌa kuu Kristu, ia ni tetniuu Dios. 27Su tee yaꞌa, chi ka jinio na ndenu kuu ñuu de. Su nuu na kii Kristu, chi ni in ñayiu tu na in kuni ndenu kii ya ―ka jiñaꞌa de.
28Yun te ni kaxtnoꞌo Jesús nuu veñuꞌu kaꞌnu, te ni kana jaa ya, te jiñaꞌa ya:
―¿Nuu saa te a ka jini ña ni vi a ka jini ni ndenu vaji san? Su masu vaji san ja jaꞌa maa san, chi ia ndaa kuu ia ni tetniuu ña jin san, te tu ka jini maa ni ya. 29Su maa san, chi jini san ya, chi nuu maa ya vaji san, te maa ya ni tetniuu ña jin san ―jiñaꞌa ya.
30Yun guaa ni ka nduku ndee de ja vi kakuiko ña de jin ya. Su ni in de tu ni kakuiko ña, chi kuini ka ja jino kiuu ja kuu ya. 31Su visi ni saa, te kuaꞌa ñayiu ni ka kandija ya, te ka kachi:
―Nuu na kii Kristu, ia tetniuu Dios, te ¿a saꞌa ka ya tniuu naꞌnu saa nagua saꞌa tee yaꞌa? ―ka kachi.
Ni ka nduku tee ka kuu fariseo ja vi tnaa ña de vekaa jin Jesús
32Te nuu ni ka onini tee ka kuu fariseo ja ka kaꞌan ñayiu tniuu naꞌnu ja saꞌa Jesús, te ni ka ndatnoꞌo tnaꞌa de jin tee ka kuu nijaꞌnu nuu sutu, te ni ka tetniuu de ndajaꞌa de ja vi kakuiko ña jin ya. 33Yun te jiñaꞌa Jesús:
―Vi koo nunuu kao ndesaa ka kiuu, te saa noꞌo san nuu oo ia ni tetniuu ña jin san. 34Te vi ndanduku ña ni jin san, su ma vi ndaniꞌi ña ni, chi ma kuu kentakuei ni nuu koo san ―jiñaꞌa ya.
35Yun te ka ndatnoꞌo tnaꞌa maa tee ka kuu nijaꞌnu nuu ñayiu judio:
―¿Na ndenu kiꞌin tee yaꞌa ja ma vi nukuꞌon de? ¿A kiꞌin de nuu ni ka ndutenuu ñayiu ñuo neꞌu sava ka ñuu, te yun kaxtnoꞌo de nuu ñayiu sava ka ñuu yun? 36¿Axi naxa kei tnoꞌo kaꞌan de: “Vi ndanduku ña ni jin san, su ma vi ndaniꞌi ña ni, chi ma kuu kentakuei ni nuu koo san”? ―ka kachi de.
Jesús kuu ndute taa ja kotekuo
37Yun te kiuu sandiꞌi ja kuu kiuu kaꞌnu ka viko yun, ni junkuiin Jesús, te ni kana jaa ya, te jiñaꞌa ya:
―Nuu ja ndee ni yichi, neꞌe ni nuu san, te koꞌo ni ndute taa san, 38te na in kandija ña jin san, te ndee ini ndee anui kaka ndute ja taa ja kotekui na kuinio yute nagua kaꞌan nuu tutu ii ―jiñaꞌa ya.
39Te tnoꞌo yaꞌa ni kaꞌan Jesús ja jaꞌa Espíritu ia Dios ja vi niꞌi ñayiu vi kandija ña jin ya, chi kuini ka ja kii Espíritu ia Dios, chi chiaꞌan ka ja noꞌo ya nuu yeꞌe tajan ya.
Ni ka saꞌa siin tnaꞌa ñayiu ja jaꞌa Jesús
40Yun te nuu ni ka onini sava ñayiu kuaꞌa yun tnoꞌo yaꞌa, te ka kachi:
―Jandaa ndija ja tee ndakani tnoꞌo ia Dios kuu tee yaꞌa ―ka kachi.
41Te sava ka de ka kachi:
―Kristu, ia ni tetniuu Dios, kuu tee yaꞌa.
Su sava ka de ka kachi:
―Ñaꞌa, chi masu ñuu Galilea kii Kristu. 42Chi kaꞌan nuu tutu ii ja Kristu kokuu tatatnoꞌo David, te kii ya ñuu Belén nuu ni okuu ñuu maa rey David ―ka kachi de.
43Yun te ni ka jaꞌnde tnaꞌa ñayiu yun ja jaꞌa Jesús. 44Te sava de ni ka kuini de ja vi kakuiko ña de, te vi kasi ña de vekaa, su ni in de tu ni kakuiko ña.
Tu ni ka kandija ña tee ka netniuu jin Jesús
45Yun te ni ndajinokuei ndajaꞌa yun nuu ka oo tee ka kuu nijaꞌnu nuu sutu vi tee ka kuu fariseo, te ka jiñaꞌa de nuu ndajaꞌa yun:
―¿Nau ja tu ni kikuei ni jin Jesús?
46Yun te ka jiñaꞌa ndajaꞌa yun:
―Ni in tee tu na ama kaꞌan nagua kaꞌan tee yaꞌa.
47Yun te ka jiñaꞌa fariseo yun:
―¿A vi suni ni xndaꞌu ña tee yun jin in in ni? 48Te ¿a ndee tee ka tatnuni nuu ñuo axi ndee tee ka kuu fariseo ni ka kandija ña jin de? 49Su ñayiu ja tu ka jini nagua yoso nuu Ley, chi ni ka tau tniaꞌai nuu ia Dios ―ka jiñaꞌa de.
50Yun te jiñaꞌa Nicodemo, tee ni jinkoto ña jin Jesús in jakuaa, ja suni kuu de fariseo:
51―¿A xtavi kuechi ña Ley ka nevaꞌo jin in tee, nuu ja masu xtnañuꞌu ka koninio tnoꞌo kaꞌan de, te kunio nagua ni saꞌa de? ―jiñaꞌa de.
52Yun te ka jiñaꞌa de:
―¿A suni tee ñuu Galilea kuu ni? Skuaꞌa guaꞌa ni nuu tutu ii, te kuni ni ja tu kee saꞌun in tee ndakani tnoꞌo ia Dios ñuu Galilea ―ka jiñaꞌa de.
Ni ka kaꞌan kuechi de siki in ñaꞌa saꞌa yika kuechi
53[Yun te kuanoꞌokuei mamaa de veꞌe de.
© 2016, Wycliffe Bible Translators, Inc. All rights reserved.