Lík 8
8
Kanaalaabuku kalambenumuu Yéesu li kúgoomaku koola
1Muñeˈe li fiyo jakee, Yéesu li ajow li sísukasu sáamakasu li básukabu batitabu, ajow ayiiŋen ban li awaale bo Hulimahu Hásuumaahu hata Jáyiiyaju jata Ateemit. Kúgoomaku koola kuŋen li kúl̥ubaabuku, li kunab li okila, 2li foof kanaale kakee kan akesoole uyinum wajakut úfu’ li buko, li kan afakene li úsomut: Mali aaneyimuu Mali Madala, an Yéesu akesoomuu uyinum wajakut woono hutok li úl̥uba úfu’ li okila. 3Saan, anaalaawu ata alokaawu ata Elod, an koonemuu Suusa, Susaan li bukan kukee kameeŋe, kanaake kulambenoo Yéesu li kúgoomaku koola li wahiil.
Bukittenoolum bata an áami li ebet sígul
(Máciya 13:1-9; Maak 4:1-9)
4Bukanabuku kunaanaak kubilum li ésuk yanooyan boot bata Yéesu. Nan ésukayi ejowe emeeŋumuu, Yéesu li alobiil bukittenoolumabu umbe:
5— Bile baj awaña áfule ajow ebet sígul. Nan alakomuu ebetayi, búgin bakee bata sígulasu li bulo li bútinabu. Esúkayi li ékakul só, basuuwabu bata haatiya li butiñ so. 6Búgin baabu li bulo li etaam yata bagisa. Nan siyaane sil̥iilumuu, li sisay mata etaamayi ébukut. 7Búgin bakee li bulo li etaam yata banuunuken bata úbuja, min bul̥iiloolul li sígulasu sajakumuu, li búgoben só. 8Bale búgin baabu bata sígulasu li bulo li etaam yakonete. Li sil̥iilul min sibuk ŋáa’, min kabas kano kubaj ukake’ woono téemeel. Nan Yéesu alobumuu loon muñowu aban, li afamen butiya aan:
— An áakimuu sijan boot bajam, li ajanten jak min ajam.
Wahawu wájimuu Yéesu li álobum li bukittenoolum
(Máciya 13:10-17; Maak 4:10-12)
9 Kúgoomaku umbu bulobe. 10Yéesu li aaniil:
— Ateemit lakaanuukaan jihaas wahawu wahaasutimuu wata Jáyiiyaju joola. Bale kaabuku fan kújamum wahawu unwu li búkittenolum bájum:
«Li kujuke, ban let kujuk, li kujam, ban let kúnaanum.»#Esay 6:9
Yéesu li akitten bukittenoolumabu bata abetaawu ata sígulasu
(Máciya 13:18-23; Maak 4:13-20)
11— Muñeˈe bukittenoolumabu umbu bulobe: sígulasu so sommuu Hulimahu hata Ateemit. 12Kagendenaku kata bútinabu, ko kommuu bukanabuku kajamumuu Hulimahu hata Ateemit ban, Sayitaane li abil áfulen hó li uyinumawu wooliil jakum bil kúyinen min kufak. 13Etaamayi yata bagisaabu, yo yommuu bukanabuku kajamumuu Hulimahu hata Ateemit ban, li kuyab ho li ésuumansuum. Bale huyawut kuhaa’ li buko, min kúyinen maa jatit, li kukat bo káyinenaku kooliil nan sílaamasu sibilumuu. 14Etaamayi yata banuunukenabu bata úbujaawu, yo yommuu bukanabuku kajamumuu Hulimahu hata Ateemit. Bale li kukat uyinoolawu, li ebajayi li másuumamu mata buloŋabu umbe min úgoben Hulimahu; mó lí múji ebukoolumayi yooliil let yaal. 15Etaamayi yajakumuu, yo yommuu bukanabuku kajamumuu Hulimahu hata Ateemit kuban, li kuyab ho li buyinum bajake ban li kul̥egen. Li kuhanken min kútuk káyinenaku kooliil lit yok kubaj ebukoolum.
Bukittenoolum bata ehiitum
(Maak 4:21-25)
16— An let ayaben ehiitum aban li aŋa’ éking min áhimen yo, mantee foof li akaan yo kata láala elal. Bale, fan aŋa’ yo akaan li yiil bájum bukan kúnokenulumuu li eluufayi, li kujuk mawuŋeyamu. 17Mata bajut wah wayoli waatut ubil ujuki. Ban bajut wah wayolooli, waatut ubil uhaasi min úhiisi li mawuŋe.
18«Kama jíkaanum buu jijantenemuu eeno! Mata an abajumuu wah, Ateemit fan afamenool. Bale an abajutumuu wahoowah, maayeet jatitaju jan ayinoomuu li aan jo labaje, Ateemit fan ayab jo.»
Kutuyaku kata Yéesu li jaawool
(Máciya 12:46-50; Maak 3:31-35)
19Muñeˈe kutuyaku kata Yéesu li jaawool li kubilool bajuk, bale kuyilaatool kukooj mata búsukabu búji. 20Bukanabuku li koon Yéesu:
— Jaawi li kutuyi kumbuku tíyaŋ mayitowe, ban kufañe kujuki.
21Bale Yéesu li aaniil:
— Jaawom li kutuyom buko koonomuu bukanabuku kajantenemuu Hulimahu hata Ateemit ban li kukaan loon hulobumuu.
Yéesu li ayeelen búlus
(Máciya 8:23-27; Maak 4:35-41)
22Li bil líiŋ hunak hakee, Yéesu li ájufo li busaana li kúgoomaku koola ló ban li aaniil:
— Ulimbaal boot kageb kaaka húwajahu.
Mal̥egen li kujow. 23Nan kulakomuu kalimbaku, Yéesu li ámooli. Búlus báamak li buyaan bútekul li húwajahu. Busaanaabu li búyij min bulako li buyooko. 24Kúgoomaku li kukooj Yéesu min kúliwool ban li koonool:
— Anahaan, Anahaan ummuwaal li újimaal!
Nan Yéesu áliwomuu, li anuuloo búlusabu li kulambajaku, li yeelen. Li lulenoo lul. 25Muñeˈe Yéesu li aan kúgoomaku koola:
— Káyinenaku kooluul kunkay?
Bale kúgoomaku li kúkoli ŋáa’, ban li kusego. Li kunaak kugel̥l̥enoo koon:
— Kama ánayinaawu ummu fíle okila ammuu ayi, an emmuu alobumuu maayeet li élusayi li étuulool, li malamu li mútuulool?
Yéesu li akesoo uyinum wajakut úfu’ li ánayine an újufoye
(Máciya 8:28-34; Maak 5:1-20)
26Muñeˈe Yéesu li kúgoomaku koola li kuya busaanaabu booliil li etaamayi yata kata Gelasa#8:26 Gelasa: Li síliibal sakee li sihaanasu Gadala kukaane (Máciya 8:28), sakee Geligesa kukaane, bújooŋoo etaamayi yata Gálile. 27Nan Yéesu áwalowumulomuu li busaanaabu, ánayine akee áfulumulo li ésukayi, an uyinum wajakut újufoye li abil kufam. Fiyofiyo ŋáa’ nan ánayinaawu ummu akate kakaano wañ, ban akinut li eluuf, bale li ajow akin li kuyaak kawoki li kugisa. 28Nan ánayinaawu ajukumuu Yéesu, li akaaw butiya ban li ákuntuŋ hákilool min alob li sembe aan:
— Waa lufañe lí ínje, Yéesu, Añiil ata Ateemit ata Haatiya? Liyaaki, jakum ulillimenom.
29Lalollob loon muñaˈa mata Yéesu lanuuloonuuloo buyinum bajakutumuu min búfu’ li ánayinaawu. Buyinumabu bajakutaabu bujokewoojok ñameeŋe, min bukanabuku kuŋa’ useel min kujenk kuŋenaku li kootaku kata ánayinaawu kuyiliwum kufooyool. Bale fan anaak acac useelawu, min buyinumabu bajakutaabu bújowetumool boot ban an akinut. 30Yéesu li agel̥l̥en ánayinaawu aanool:
— Kajawi buu?
Anáyinaawu li aanool:
— Kajawom «Jameeŋ».
Li mal̥egenamu, uyinum wajakut wameeŋe újufowool. 31Uyinumawu wajakutumuu li uyaakoo Yéesu woonool jakum aan wo ujow boot li sambun.
32Muñeˈe li baj to li huyuuyahu bumat báamak bata sifulugun balakowe kahoof. Uyinumawu wajakutumuu li uyaakoo Yéesu mantee li akat wo min újufo sifulugunasu. Mal̥egen Yéesu li akat wo min újufo so. 33Muñeˈe li uyaan úfulul li ánayinaawu ujow újufo sifulugunasu. Bumatabu foof bo feh li búwubbenoolumul haatiya kagebaku kata hulijahu, buliiŋowul bubil bulo li húwajahu min bújim ló.
34Nan kumataabuku kata sifulugunasu kujukumuu wahawu wabajumuu, li kutey kujow kúhebul kakinumuu li ésukayi li kakinumuu kuloh yo. 35Bukanabuku li kúfulul kubil bajukabu bata wahawu wabajumuu. Nan kúliiŋulumuu tan Yéesu alakomuu, li kujuk ánayinaawu an uyinum wajakutumuu úfulummuu li okila, mabahe li kootaku kata Yéesu ban li akaano wañ, ban okila mágiilowe. Ekole li ejokiil. 36Bukanabuku kamaatumuu wahawu wabajumuu, li kukitten kaabuku buu Yéesu afakenumuu ánayinaawu an uyinumawu wajakutumuu újufoweenumuu. 37Muñeˈe bukanabuku feh kakinumuu li etaamayi yata ésukayi yata Gelasa li koon Yéesu áfu’ booliil, mata kúkolikoli ŋáa’. Mal̥egen Yéesu li ájufo li busaanaabu min átiiwo alaañ. 38Anáyinaawu an uyinumawu wajakutumuu úfulummuu li okila, li ayaakoo Yéesu mantee li akatool min anab li akila. Bale Yéesu li alaañenool ban li aanool:
39— Ulaañ úbalo, ujow ukitten wahawu feh wan Ateemit akaanimuu. Mal̥egen ánayinaawu li ajow ayiiŋen li ésukayi feh wahawu feh wan Yéesu akaanumuu boot li akila.
Yéesu li ayiten ásungute akete ban li afaken anaale ásomute
(Máciya 9:18-26; Maak 5:21)
40Nan Yéesu alaañumuu boot kageb kaaka húwajahu, búsukabu li buyabool, mata bukanabuku feh okila kulakowe kakob. 41Muñeˈe ánayine akee an koone Jáyilis li áliiŋul. Okila alakomuu anahaanawu ata eluufayi yata kal̥awaku yata ésukayi. Li ákuntuŋ hákil Yéesu min ayaakoolool aanool abil boot boola. 42Mata lababbaj jiñiil jano jaale, jayilo jibaj simit kuŋen li síl̥uba, jásomute boot eket.
Nan Yéesu alakomuu ejowayi boot bata Jáyilis, búsukabu li bunaak buñuññool. 43Muñeˈe li baj to anaale akee áfululo huña ban afosowut ho jow baj simit soono kuŋen li síl̥uba. Anaalaawu li aban wahool feh bata kubuntenaabuku, bale an li buko ayilaatool afaken. 44Anaalaawu li álohul Yéesu kata búsol min ago’ kabeyaku kata kañaku koola. Huñaahu hoola li huyaan huban to. 45Muñeˈe Yéesu li agel̥l̥en aan:
— Ayimaa agolom?
Bukanabuku feh li koon inti buko. Fiyeel li aan Yéesu:
— Anahaan, lujuke buu búsukabu búwooñenimuu, ban li bunaak buñuññuli.
46Bale Yéesu li aan:
— Akee lagolongo’, mata lihahhaas een sembe sífuffu’ lí ínje.
47Nan anaalaawu ahaasumuu aan wahawu wan akaanumuu uhaasihaas, li abil mateelenemaa ákuntuŋ hákil Yéesu. Li akitten Yéesu hákil ésukayi feh wahawu wájiwoolumuu li agolool li buu layaane afakumuu. 48Yéesu li aanool:
— Añoolom, káyinenaku kooli kufakeni. Ujow li kásuumaay.
49Nan Yéesu alakomuu elobayi, akee li áfulumul bata Jáyilis ammuu anahaanawu ata eluufayi yata kal̥awaku, abil aanool:
— Jáyilis, jísungutaaju jooli jikete. Jakum umit uyoken Anahaanawu. 50Bale nan Yéesu ajamumuu loon muñowu, li aan Jáyilis:
— Sákoli, úyinen bale, añooli fan afak.
51Muñeˈe nan Yéesu áliiŋumuu bata Jáyilis, akatut an min anoken li eluufayi ábuti li Fiyeel, Saŋ, Saak li atuubaawu li jaaw ata jísungutaaju. 52Bukanabuku feh li kulako búluulen li jíl̥okoo mata añiilawu. Yéesu li aaniil:
— Jakum jil̥ok. Jísungutaaju jiketut, bale jímoolimooli.
53Muñeˈe bukanabuku li kulako kajakakaay Yéesu, mata kuhaase koon jísungutaaju jikeeket. 54Bale Yéesu li átukool li kaŋen, ban li alob li sembe aan:
— Añoolom, uyito!
55Mal̥egen jísungutaaju li jíliwo, min jiyaan jiyito. Yéesu li aaniil kusen añiilawu atiñ. 56Sibukoolaasu sata jísungutaaju li sisego ŋáa’. Bale Yéesu li aaniil jakum kulob an wahawu wabajumuu.
© 2008, Wycliffe Bible Translators, Inc. All rights reserved.