HAOKAPHOK 6:1-4

Okathuili mikumo kachungkha mataisangmamān kaji tharan, sha̱naola kachungkha pharāsanga, Varewui naomayara ngarāna miwui naongalāva̱ ngarāwui khamathā chi theilaga; athumna kapangkakhui chi khalattawui preiva̱ sāda ngakuma. Chieina PROHOna hānga, “Imanglāna mikumoli katang mavaila mangayurchingmara, kaja ava phasā khavaiana; ana zingkum shākha maga̱ okthuira.” Atam chitharān Nephilimbing okathuili pānsai, kala Varewui naomayara ngarāna mibingwui naongalāva̱ ngarāli ngakumda nao kachungkha pharā kahaiwui thilila leisai. Achālakha aming kazata kala kapanga mi chi athumna.