Génesis 5
5
Adán aptawán'ák neptámen
(1 Cr 1.1-4)
1Keso apkelwesey axta Adán aptawán'ák neptámen se'e: Xama axta apkeláneya énxet ma'a Dios, apkeláneyak axta m'a aphawo aptémakxa nak; 2apkenna' tén han kelán'a, keñe axta apkeltamho kataqmelhok ekheykha. Apteméssessek axta apwesey énxet Dios ma'a sekxók axta apkeláneya.
3Ciento treinta apyeyam apagkok axta temék Adán, apteyeykmo m'a apketche, apteméssessama axta apwesey Set, aphawók apagko' axta han ma'a. 4Aphegkek axta makham Adán ochocientos apyeyam natámen xa, keñe axta apkelweteykekxo makham mók apketchek apkelennay'a, tén han kelwán'ák. 5Novecientos treinta apyeyam axta han weykmok apha, keñe apketsapa.
6Ciento cinco apyeyam apagkok axta temék Set, apteyeykmo m'a apketche Enós. 7Aphegkek axta makham ochocientos siete apyeyam Set natámen xa, tén axta apkelweteykekxo makham mók apketchek apkelennay'a, tén han kelwán'ák. 8Novecientos doce apyeyam axta han weykmok apha, keñe apketsapa.
9Noventa apyeyam apagkok axta temék Enós, apteyeykmo m'a apketche Cainán. 10Aphegkek axta makham ochocientos quince apyeyam Enós natámen xa, tén axta apkelweteykekxo makham mók apketchek apkelennay'a, tén han kelwán'ák. 11Novecientos cinco apyeyam axta han weykmok apha, keñe apketsapa.
12Setenta apyeyam apagkok axta temék Cainán, apteyeykmo m'a apketche Mahalalel. 13Aphegkek axta makham ochocientos cuarenta apyeyam Cainán natámen xa, tén axta apkelweteykekxo makham mók apketchek apkelennay'a, tén han kelwán'ák. 14Novecientos diez apyeyam axta han weykmok apha, keñe apketsapa.
15Sesenta y cinco apyeyam apagkok axta temék Mahalalel, apteyeykmo m'a apketche Jéred. 16Aphegkek axta makham ochocientos treinta apyeyam Mahalalel natámen xa, tén axta apkelweteykekxo makham mók apketchek, apkelennay'a tén han kelwán'ák. 17Ochocientos noventa y cinco apyeyam axta weykmok apha, keñe apketsapa.
18Ciento sesenta y dos apyeyam apagkok axta temék Jéred, apteyeykmo m'a apketche Henoc. 19Aphegkek axta makham ochocientos apyeyam Jéred natámen xa, tén axta apkelweteykekxo makham mók apketchek, apkelennay'a tén han kelwán'ák. 20Novecientos sesenta y dos apyeyam axta weykmok apha, keñe apketsapa.
21Sesenta y cinco apyeyam axta temék Henoc, apteyeykmo m'a apketche Matusalén. 22Aptemegkek axta chá'a Henoc neyseksa apha m'a ektémakxa axta chá'a apmopmenyého m'a Dios. Aphegkek axta makham trescientos apyeyam Henoc, natámen axta aptéyam ma'a Matusalén, tén axta apkelweteykekxo makham mók apketchek apkelennay'a, tén han kelwán'ák; 23trescientos sesenta y cinco apyeyam axta weykmok apha. 24Xama ekhem axta apxeganakmo Henoc, hakte Dios axta apyentamákxa', eñama apteme chá'a m'a ektémakxa axta apmopmenyého Dios.
25Ciento ochenta y siete apyeyam axta weykmok Matusalén, apteyeykmo m'a apketche Lámec. 26Aphegkek axta makham setecientos ochenta y dos apyeyam Matusalén natámen xa, tén axta apkelweteykekxo makham mók apketchek apkelennay'a tén han kelwán'ák. 27Novecientos sesenta y nueve apyeyam axta weykmok apha, keñe apketsapa.
28Ciento ochenta y dos apyeyam axta weykmok Lámec, apteyeykmo m'a apketche apagko' nak. 29Apteméssessek axta apwesey Noé, tén axta aptáha s'e: “Aptaqnagkamchek axta Wesse' egegkok xapop, kéméxcheyk antemeykha ekyentaxno agko' yaqwayam agkenekxak aqsok, sa' eyke héllókassesek negyampe s'e sakcha'a nak.” 30Aphegkek axta makham quinientos noventa y cinco apyeyam Lámec, natámen axta aptéyam ma'a Noé, tén axta apkelweteykekxo makham mók apketchek apkelennay'a, tén han kelwán'ák. 31Setecientos setenta y siete apyeyam axta weykmok apha, keñe apketsapa.
32Quinientos apyeyam apagkok axta temék Noé, appalleykmo m'a apketchek apqántánxo; Sem Cam tén han Jafet.
Enxet Lengua Sur Bible © Paraguayan Bible Society, 2015.