Lii Lolo dhu Uru Tèka 7
7
Èi aae lala
1Èle èèna ka, LAMATUA peka dènge Noh, “Jaꞌa ladhe le palème, te ngaa abhu dhoka èu di dhu dꞌara mola. Nèti èèna ka, èu dènge bhèni-ana niki èu, lami ka asa dꞌara kapa. 2-3Mèti dènge badha-badha dhu bisa miꞌa, aa bisa hia Jaꞌa kahèi, de mèti pidhu-pidhu pasa asa dꞌara kapa. Mèti kahèi rupa-rupa manu-bhui pidhu-pidhu pasa. Te ngaa badha dhu leo, mèti dhoka ca pasa-ca pasa di. Sèna ka badha dènge manu-bhui se, jꞌajꞌi hini, ho baku maꞌète.
4Sanèdꞌe paie-iie, oo! Di pidhu lodꞌo ka, Jaꞌa papuru èjꞌi aae mai dhu bhoka boe ca lodꞌo sa, toke dꞌai èpa nguru lodꞌo mèu-mèda. Dènge sèmi neꞌe, Jaꞌa pamadhe aaꞌi ngaa-ngaa dhu mamuri ètu dedha-rai, dhu Jaꞌa pajꞌajꞌi kore le.”
5Ka Noh tao aaꞌi sèmi lii paredha LAMATUA. 6Lodꞌo èi aae lala, umur Noh 600 (èna ngasu) tèu. 7Noh dènge dhèu èmu na, dènge ana niki na, aa dènge dhèu èmu ana ra di, lasi asa dꞌara kapa, ho ra abhu mamuri. 8-9Madhutu lii paredha LAMATUA, ka Noh pamaso manu-bhui dènge badha leo sèra, èci-èci ka dènge pasa na, nèti dhu bisa raꞌa, dènge dhu bisa boe raꞌa. 10Ropa èle pidhu lodꞌo, cagꞌagꞌa laa èi aae lala, ka rai-haha ne, mulai cène.
11Lèke dènge umur Noh 600 (èna ngasu) tèu, risi dua hèru, canguru pidhu lodꞌo, ka mulai èi aae lala. Lodꞌo èèna, sèmi babèdho liru dhu bhoke eele sa, ka èi na tao sabhori mai. Aa èi madha-èi madha ètu rai-haha sabhoka, ka sèmi tao sabhuu sa dedha. 12Ka èjꞌi bhori mai loe boe èpa nguru lodꞌo mèu-mèda.
13Te ngaa lodꞌo èèna, Noh dènge dhèu èmu na, dènge ana mone na dhèu tèlu: Sem, Yafet dènge Ham, dènge dhèu èmu ra, maso lasi asa dꞌara kapa. 14Lasi palere dènge badha aaꞌi-aaꞌi ra, sèmi: badha ani, badha hui, badha dhu rodꞌo, manu-bhui, dènge badha-badha leo dhu dènge èla sèra. 15-16Ca pasa-ca pasa nèti aaꞌi-aaꞌi dhu mamuri, lasi asa dꞌara kapa palere dènge Noh, madhutu sèmi lii paredha Ama Lamatua.
Ropa aaꞌi-aaꞌi ra dꞌai dꞌara kapa, LAMATUA bèdho babèdho kapa èèna.
17-19Èjꞌi aae puru maꞌète boe dꞌai èpa nguru lodꞌo. Hèia kapa èèna talebꞌo. Èi caꞌe loe boe toke hutu nare kolo ledhe dhu dedha aae. 20Èi caꞌe taruu, ka marèma na seli èpa rèpa risi nèti kolo ledhe sèra.
21-23Dènge jꞌara èèna, ngaa-ngaa dhu mamuri ètu dedha-rai sèra, madhe aaꞌi mèu-mèu. Nuka: dhèu, badha ani, badha hui, badha dhu rodꞌo, dènge manu-bhui aaꞌi-aaꞌi ra. Ate dhoka Noh dènge aaꞌi-aaꞌi dhu ètu dedha kapa. 24Èi na, kura boe toke 150 (ca ngasu lèmi nguru) lodꞌo.
© 2012, Wycliffe Bible Translators, Inc. All rights reserved