San Juan 8
8
Teeçx u'ya's Jesus peltunãyni
1Naapkaçxha' Jesusa' Jerusalenu kasehçxa Oliwos vxiçnak u'j. 2Sa' kuskus kusíiçxáa dxuus yatte sxawedna pa'kh. Txajũ' nasa jxukaysa utxaate', Jesusa' kaapiya'jya' kaçxku. 3Txajũ' ley kaapiya'jsawe'sx vxite' fxariseowe'sxa' teeçx u'y kazx yũuna ũste kpajkxçxa Jesus tasxte nuypa'jtx sa' pxãhte txahçxa' 4na'jĩtx:
—Kaapiya'jsa, naa u'ya's kazx yũuna ũsíin kpajkxtha'w. 5Txã'wẽ yũusatxi' Moises leya' kwet wãatatahçxak ikhkaja'. Aça' idxa' ¿ma'wẽ jxkaajaki'g? jĩnatx pẽjx. 6(Kxtee ãhmée we'wete', paatxhĩ'khya' sũhçxatx txã'wẽ paapẽyi'.)
Nawa Jesusa' kĩiçhuçxak kiwete kuseju fxi'ja'. 7Aça' maz uswa jwee pẽjxte', Jesusa' kaphuteçxa na'jĩk:
—I'kwe'sxa' maaçxáawa pkal ji'phmeesa ũsçxa', txãa khuẽ'y naa u'y kakwete kwet mwãatahwe jĩçxa', 8ki' kĩiçhuçxa kiwete fxi'kh. 9Aça' txã'jĩni's wẽse'jçxa': Kwe'sxwa pkalsane'tka'w sũhçxa, kasehna u'jtx teeçxteeçxçxah, nyafxte' jwee ĩisxsa khuẽ'ytxi kaseh. Txã'wẽ jxuka kasehna u'the', txãa u'yçxáak kxtee neeyũu Jesus ũsnite. 10Aça' Jesusa' kaphuteçxa ley kaapiya'jsawe'sx jxuka kasehna u'jnite' txãa u'yçxáa ũste uyçxa', na'jĩk:
—I'kwena paatxhĩ'khsawe'sxa' ¿mteeta yuu? ¿Maawa i'kwe's ewmeete nvxiht-ya' ãjãmeewá'nta? jĩte', 11txãa u'ya' na'jĩnak pas:
—Maa yuhwa ãjãmeeta' jĩte', Jesusa' na'jĩk:
—Adxwa i'kwe's ewmeete nvxihtme'nja. Me'jwe, nawa peena yu' ewmée yũuna u'junuwe jĩk.
Jesusa' eena'te kaafxi'ze'jsa
12Ki'kin nasa pkhaakhete', Jesusa' na'jĩnak we'we:
—Adxa' eena'te kaafxi'ze'jsath, aça' maawa adx yakh yuusa' eena'te fxi'zewa'ja's ji'phutxna, sa' bagaçxte yuhwa çxhi'dxte fxi'zemeetxna.
13Txajũ' fxariseowe'sxa' na'wẽtx we'we:
—Idxa' peekíiçxáa ya'tuuthe'jna ũsgu aça' txã' kxul yuhna jĩte', 14Jesus pasçxa':
—Makwe peekíiçxá'ntka ya'tuuthe'je', nawa adx pta'sxni' ĩsxiinisame'. Txãa pa'gatey adxa' jiith majũwe'sxçxa' ki' maa dxi'j u'jweççxawa. Nawa i'kwe'sxa' jiimée i'kwe adx majũwe'sxtewa sa' maa dxi'j u'jweçtewa. 15I'kwe'sxa' peekx ũus yaakxnijũçxáa i'kwe txã'wẽ we'we', adx isa we'weni's jiyumey. Nawa adxa' jiimeeçxa yu' we'we'çmeeth. 16Nasa ma'wẽsatewa isa jiyuçxath we'we', Tata' adxa's kaakh txãak ma'wẽ yũuwa'ja'swa adxa's pu'çxhi' txãa pa'ga. 17I'kwe'sx leyte' na'jĩ'k: Yuwe's jiisa e'zíi txãa na'wẽçxaçxáa we'wenisaçxáa selpiina jĩ'k. 18Aça' isa we'wesa teeçxsa' adxíiçxáath. Aça' vxite' adxna kaahsa Tataíiçxá'.
19Txã'jĩte', fxariseowe'sxa' na'jĩtx:
—Iidx Tata' ¿mtee ũsna? jĩte', Jesus pasçxa':
—I'kwe'sxa' adxa's jiyu'çmeei'kwe, sa' adx Tatanawa jiyu'çmeei'kwe. Adx kimtewa jiyuwaça', adx Tatanawa jiyune'kwe jĩnak pta'sx.
20Dxuus yatte ofxreda ãsxni kaja pukate kaapiya'jna ũsçxa', txã'jĩnak pta'sx Jesusa'. Nawa maa yuhwa preesu'jya' ãjãmeeta', preesu'jwa'j en ãhmeyne' yu' naa pa'ga.
Adx ũsnite' pa'jya' ãjameene'kwe
21Jesusa' ki'kin we'weçxa na'jĩk:
—Adxa' u'jweçthu, aça' i'kwe'sxa' makwe pakweene'kwe, nawa adxa's uymey i'kwe'sx pkalte uune'kwe. Txãasa adx u'jweçthu kxteea' pa'jya' ãjameene'kwe jĩna we'wete', 22judiuwe'sxa' na'jĩtx:
—Meeçxa' ¿peekx kusetey uuya'wawáanakx, txãasa wá' adx u'jweçthu kxteea' pa'jya' ãjameene'kwe jĩna we'we'kx? jĩte', 23Jesusa' pta'sxku:
—I'kwe'sxa' aytewe'sxi'kwe, naapkaçxha' adxa' ẽejũwe'sxthu. Aça' i'kwe'sxa' naa kiwetewe'sxi'kwe, naapkaçxha' adxa' naa kiwetewe'sxmeeth. 24Txã'wẽçxaíith i'kwe'sx pkalte uune'kwe jĩna pta'sxi'. Txã'wẽ Dxus kaahnisa' adxçxáath jĩna pta'sxtewa jiyumée yã'jçxa', i'kwe'sx pkalte uune'kwe jĩna pta'sxte', 25na'jĩnatx paapẽjx:
—Txã'wẽçxa' ¿idxa' kimga? jĩte', Jesus pasçxa' na'jĩk:
—Adxa' kimçxawa nyafxíi pta'sxyã'th. 26Txãasa wala pta'sxwa'j ji'pthu i'kwe'sx ma'wẽsatewa ãate pta'sxna, txãa pa'gatey adxna kaahsa' ĩsxiisame', aça' adxa' txajx we'weni's wẽse'jçxa txã'wẽ íiçxáath pta'sxi' maawa jiyukahn jĩnak we'we.
27Txã'wẽ Dxusa' adx Tata' jĩna Jesus pta'sxtewa jiyumeeta'. 28Txãa pa'gak Jesusa' na'jĩna we'we:
—I'kwe'sxa' Dxus Nçxi'k Nasa Yuusa's ẽete txahçxa yuuçxáa jiyune'kwe kimtewa, sa' peekxçxáa yu' we'wemée, wejxwa Tata kwe'we'jniçxá'sne' kaapiya'j sũjune'kwe. 29Txãa pa'gatey adxna kaahsa', adx yakh ih ũsa', Tata' adxçxáa yu'sa' nvxiitu'çme', txajx jxthãasniçxá'sthu kxtey yu' naa pa'ga jĩk.
30Txã'jĩna we'wete', nasa kuhsa Jesus ju'gu yuutx.
Ewmeete fxi'zesa vxite' ewmeejũ nwe'wenisa
31Txajũ' Jesusa' txajx ju'gu yuusaawe'sxtxi' na'jĩnak pta'sx:
—Adx kaapiya'jni's jxpubamée nwẽese'jçxa', adx nasa yuuçxa 32ewsa's jiyune'kwe, aça' txãa ewsa' ewmeesajũ nwe'wena jĩte', 33txãawe'sxa' na'wẽtx pas:
—Kwe'sxa' Abrahan ji'tha'w, sa' bagaçxte yuhwa ewmeete yu' fxi'zesameetha'w. Aça' idxa' ¿ma'wẽga ewmeesajũ nwe'weni yuune'kwe jĩna we'we'? jĩte', 34Jesusa' pta'sxku:
—Isath we'we', maawa ewmée yũuna fxi'zesa', ewmeete fxi'zesata'. 35I'kwe'sxa' peekx jii i'kwe: selpisa' yat namu na'wẽsame', naasáa peekx nçxi'k yuuçxáa yat namu na'wẽsa'. 36Txãa pa'ga yat namu na'wẽsa Dxus Nçxi'k txã'wẽ ewmeesajũ nwe'wete yuuçxáa, isa ewmeete fxi'zesamée yuh yuune'kwe. 37I'kwe'sxa' Abrahan ji'thewa jiith, nawa adxa's ikh wẽje'i'kwe, adx kaapiya'jni's nwẽese'j wẽemeeçxaçxáa. 38Adx Tata kwe'we'jniçxá'sthu pta'sxi', naapkaçxha' i'kwe'sxa' i'kwe'sx tata jxkaahniçxá's i'kwe kxtey yu' jĩte', 39txãawe'sxa' na'wẽtx pas:
—Kwe'sx tata' Abrahana' jĩte', Jesus pasçxa':
—Abrahan luuçxwaça', Abrahan na'wẽy yũune'kwe. 40Txã'wẽtewa, adxna ma'wẽ Dxus kaapiya'the', txã'sçxáath isa pta'sxi'. Nawa i'kwe'sxa' adxa's ikhya' yuuçxáa i'kwe pa'pçxu'. Abrahana' bagaçxte yuhwa txã'wẽ yũume'. 41I'kwe'sx tata ma'wẽ yũute', i'kwe'sxwa txã'wẽy i'kwe yũ' jĩte', na'wẽtx pas:
—Txã'jĩkahna', kwe'sxa' ¿ptamunimeesa luuçx wá'ntka'w? Kwe'sxa' teeçx tataçxáa ji'ptha'w, txã' Dxusa' jĩte', 42Jesusa' na'jĩnak we'we:
—Isa Dxusa' i'kwe'sx tatawaça', adxa's ahçemeene'kwe, adxa' Dxus tasxu kaahnith yuwé' txãasa ayte ũsthu. Adxa' peekxçxáa yu' yuwe'çmeeth, adxa'sa' Dxusku kaah. 43Na'swa adx kaapiya'jni's jiyu'çmeei'kwe, txã'wẽ adx we'weni's nwẽese'je'çmeei'kwe, txãasa i'kwe jiyu'çmée. 44I'kwe'sx tata', eçxthẽ'ja', aça' i'kwe'sxa' txajx luuçxi'kwe. Txã'wẽçxaíi i'kwe txajx jxthãasni's kxtey yuu wẽje', eçxthẽ'ja' nyafxiitey nasaa kiikhe'jsa' naa pa'ga. Eçxthẽ'ja' bagaçxte yuhwa ewsa's yũ'çme', sa' bagaçxte yuhwa isa we'we'çme'. Txãa yuu txã'wẽesana na' ĩsxiinaçxáak we'we', sa' kaaĩsxiija'jsa'. 45Nawa adx isa we'weni yu's nwẽese'je'çmeei'kwe. 46I'kwe'sxa' ¿maaçxa' adxa's pkalsa' jĩna ukhe'jya' ãjama'kwe? adxa' isasaçxá'sthu pta'sxi' aça'. Adx isasa's kaapiya'jaçte', ¿ma'wẽtekwe adx we'weni's nwẽese'je'çmée? 47Dxus luuçxa' Dxus we'weni's nwẽese'je'tx. Nawa i'kwe'sxa' nwẽese'je'çmeei'kwe na' Dxus luuçx meei'kwe jĩk.
Abrahan meetey Kristo ũsyã'kh yu'
48Txajũ' judiuwe'sxa' Jesusa's na'wẽtx açewe'we:
—Idxa' Samariajũwe'sxgu, txãasa eçxthẽ'j yakh ũsgu aça' isatha'w txã'jĩ' jĩte', 49Jesusa' na'wẽk pas:
—Adxa' eçxthẽ'j yakh ũsmeeth, naasáa adx Tata's tuuthe'jsaçxáath. Nawa i'kwe'sxa' adxa's açe'i'kwe. 50Adxa's weçxana tuuthe'jni's pakwe'çmeeth. Nawa teeçx ũsa' adxa's tuuthe'jsa txã' adx ma'wẽsatewa jiia'. 51Isath we'we': Adx we'weni's kxtey yuusa', bagaçxte yuhwa uu ena's ji'phumeetxna.
52Txã'jĩte', judiuwe'sxa' na'wẽtx we'we:
—Ãçxhtha'w wejx ew jiyu, eçxthẽ'j yakh ũstewa. Abrahana' uuk sa' Dxus yuwe pta'sxsawe'sxwa uutx. Naapkaçxha' idxa' na'jĩ'g: Maawa adx we'weni's kxtey yuuçxa', bagaçxte yuhwa uu ena's ji'phumeetxna jĩ'g. 53Kwe'sx yaçgawe'sx Abrahana' uuk sa' Dxus yuwe pta'sxsawe'sxwa uutx, aça' idxa' ¿Abrahante jxthaakwesa wá'ga? jĩte', 54Jesusa' na'wẽk pas:
—Adxíiçxáa ya'tuuthe'jna pta'sxi'nja na' txã' selpimeena. Nawa adxa's tuuthe'jsa' adx Tata' txã's i'kwe kwe'sx Dxusa' jĩna we'we'. 55Nawa i'kwe'sxa' txãa Dxusa's jii yuuwa meei'kwe. Nawa adxa' txã'sa' ew jiith. Txã'wẽ txã'sa' ew jiiçxa jiimeeth jĩ'nja na', i'kwe'sx na'wẽy ĩisxihsa yu'nja. Nawa adxa' ĩsxiimée Dxusa's jiith, sa' txajx jxkaahni's kxteythu yu'. 56I'kwe'sx yaçgawe'sx Abrahana' adx naa kiwete pa'jwa'ja's jiyuçxa', wala weçxana yajkxku, sa' kxtey yuuni's jiyuçxa' wejxku wala weçxa.
57Txã'jĩte', judiuwe'sxa' na'wẽtx weeçx we'we:
—Idxa' cinkwenta anxu yuhwa mée ji'phgu, sa' ¿ma'wẽga txã'wẽ Abrahana's uy? jĩte', 58Jesus pasçxa':
—Isath we'we', Abrahan meeíin, adxa' ũsyã'th yu'.
59Txã'jĩte', judiuwe'sxa' ũusaçxaçxa', Jesusa's kwet wãatatajxa'watx yu'. Nawa Jesusa' txãawe'sx ksxavxysuy dxuus yatu kasehna u'kh, kim yuhwa jiyunimeete.
© 1984, Wycliffe Bible Translators, Inc. All rights reserved.