San Juan 21
21
Tiberias ĩkh pukate Jesus vxyaani
1Jesusa' Tiberias ĩkh wala pukate ki'kin na'wẽk vxyaa txãa yakh u'jusawe'sxtxi. 2Kxtee pkhaakheçxatx ũs yu' Simon Pedro, vxite' Tomas melxisu jĩ'tx txãa, vxite' Natanael Galilea kiwesu Kaná çxhabtewe'sx, vxite' Zebedeo nçxi'kwe'sx, vxite' e'zsa. 3Kxtee pkhaakheçxa ũsçxa', Simon Pedro' na'jĩnak we'we:
—Wedx uweya' u'jweçthu jĩte':
—Kwe'sxwa idx yakh yuhtha'w jĩnatx pas txãawe'sxwa.
Sa' teeçx barkote khẽeçxa u'jtx. Nawa txãa kuste' teeçx wedx yuhwa uwemeeta'. 4Khikhyna sẽjeçte', Jesusa' ĩkh pukate vxyaak. Nawa txãawe'sxa' jiyumeeta' kimtewa. 5Txajũ' Jesusa' na'jĩnak pẽjx:
—¿Teeçx wedxçxá' uwekwe'? jĩte':
—Uwemeetha'w jĩna paste', 6Jesusa' na'jĩnak jxkaah:
—Wedx ukhe's paçu ju'gkhẽ makhwe, sa' uweene'kwe jĩte', txã'wẽy ukhe's akhçxa', yu'ju wezxçxawa kutxi'jya' çxhãçxhameeta', wedx iiméh kuh khẽepa'ga. 7Txã'wẽ yũuni's uyçxa', Jesus yakh u'jusa wedxnisa' Pedro's na'jĩnak pta'sx:
—¡Naate ũsa' txã' kwe'sxtxi jxpe'jsa'!
Txã'jĩna we'weçpkaçxha', Pedro' txã'wẽ wẽse'jna' ropa's jathna'wa yu'khẽ khẽek Jesus tasxna u'jya'. (Ropa's pahdeçxak ũs yu', txãasak txã'wẽ yũu.) 8Barkote neeyũusáa vxite yu' wedx ukhe's wezxna kũhtx, cien metroçxáak ũhdxte kũuwa'j peejx yu' naa pa'ga. 9Txajũ' barkoju jxsa'jçxa', ipx yuthni çxhã'çxha kajkwega teeçx wedx petx pan khikhni ũstetx uy. 10Txajũ' Jesus we'weçxa':
—Ãçxh uwenisa wedxtxi mneejxũhwe jĩte', 11Simon Pedro' barkote khẽena'wa wedx ukhe's wedx walasaçxaçxáa ji'phsa's wezxna kũjk ũhdxte pa'j. Ciento cinkwenta y tres wedxku ji'phu'. Kxaazkuẽe wedx ji'phçxawa, ukhe' suteme'.
12Txajũ' Jesus pa'yaçxa':
—Ũ'ya' myuhwe jĩk.
Txã'wẽ pa'yate', txãa yakh u'jusawe'sxa' jxpe'jsatewa jiyuçxa', maa yuhwa: Idxa' ¿kimga? jĩna pẽyi'çmeeta'. 13Aça' Jesusa' utxaana kũhçxa', pana's uwena'wa txãawe'sxtxi ũsu'sku, wedxnawa txã'wẽy.
14Jesus uuçxa ki' ĩtxi yuunijũ naa yakha' tekh us vxyaak txãa yakh u'jusawe'sxtxi.
Jesus Pedro's neewe'weni
15Txajũ' ũ'na jxã'jçxa', Jesusa' Simon Pedro's pẽjxku:
—Jonas nçxi'k Simon, ¿ayte ũsta' txãawe'sxte jxthaakwega' adxa's wedxi'á'? jĩte', Pedro pasçxa':
—Idxa' peekx jiig adx idxa's wedxiçtewa jĩte', Jesusa' na'wẽk neewe'we:
—Txã'wẽçxa', adx piisxakuẽtx wedxna miipe'j jĩk.
16Txajũ' Jesusa' Pedro's ki' pẽjxku:
—Jonas nçxi'k Simon ¿adxa's wedxi'gá'? jĩte', Pedro pasçxa':
—Idxa' jiig adx idxa's wedxiçtewa. Txã'jĩte', Jesusa' na'wẽk neewe'we:
—Txã'wẽçxa', adx piisxaatx sã'jĩna miipe'j jĩk.
17Tekh uswa ki' pẽjxku Jesusa':
—Jonas nçxi'k Simon, ¿adxa's wedxi'gá'? Aça' Pedro' wala nxusku txã'wẽ tekh us ¿adxa's wedxi'gá'? jĩna pẽjxte'. Sa' na'jĩk:
—Idxa' jxuka jiig adx idxa's wedxiçtewa jĩte', Jesusa' na'jĩnak neewe'we:
—Txã'wẽçxa' adx piisxaatx jxpa'yakx miipe'j. 18Isath we'we', nyafxíi piçtakxteya' ropa's peekíi jathe'g, sa' mtee u'j wẽeçxawa u'jwe'g. Nawa ĩisx yã'the', vxitesa' idxa's tudçxa jxũna u'jwetxna idx u'j wẽemeetewa.
19Jesusa' txã'wẽ we'weçxa', Pedro ma'wẽ yũuni uuçxa Dxusa's ãate kaavxya'ja'jwa'ja's pta'sxnak txã'jĩ.
Txajũ' Jesus we'weçxa':
—Adx yakh myuhçxáa jĩnak pi'kx.
Jesus yakh u'jusa wedxnisa
20Pedro' yu'thegçxa' uyku Jesus wedxnisa's. Txãa wedxnisaíi nmeh kus ũ'weçte', Jesus pukate kaçxçxa u'pçxa' na'jĩnak pẽysa yu': Jxpe'jsa ¿kim idxa's dukhwa'jsana? jĩna. 21Txã'sna Pedro uyçxa', na'jĩnak Jesusa's pẽjx:
—Jxpe'jsa, naa piçthẽ'ja's ¿kĩh yuukx? jĩte', 22Jesusa' na'wẽk pas:
—Adx jxthãaste' naa piçthẽ'ja' uumée u'juma'k adx sxawedna kĩhpkaçx, nawa txã'sa' idxa' yaakxwa'j ji'phmeeg. Idxa' adx yakh fxi'zewa'jçxá's miiyajkx.
23Jesus txã'wẽ we'wepa'ga, txãa piçthẽ'ja' uuwa'jsamée wáana sũhnatx ũsu' Jesus yakh u'jusawe'sx vxite yu'. Nawa uumeena jĩçxa Jesusa' txã'wẽ we'weme', naasáa adx jxthãaste', uumée u'juma'k adx sxawedna kĩhpkaçx, nawa idxa' txã'sa' yaakxwa'j ji'phmeeg jĩnaçxáak we'we.
24Jesus we'weçxa' txã'wẽ uumeena jĩna we'wenisa piçthẽ'jíiçxáak pta'sxna fxi'j, aça' isasa yuja's we'we'k sũju'tha'w.
25Txã'wẽ Jesus kĩjkĩhwa kaavxya'ja'jnitx jxuka pta'sxna fxi'jwaça', naa kiwete libru yuuwa khẽemeetxna sũju'th.
© 1984, Wycliffe Bible Translators, Inc. All rights reserved.