San Juan 13
13
Jesusa' txãa yakh u'jusawe'sx çxidatx pkhi'kxni
1Paskua fxiesta ãjxa' teeçx ençxáa pejiiçku yu'. Aça' Jesusa' jiik yu' naa kiwe's nvxihtçxa Ney tasxna u'jwa'j en ãani's. Sa' naa kiwete txãa yakh u'jusawe'sxtxi' nyafxiitey ma'wẽne' peeygãh na', nmeh entepkaçxku peeygãh.
2Jesusa' txãa yakh u'jusawe'sx yakh ũ'na u'ppkaçxha', eçxthẽ'ja' Simon nçxi'k Judas Iskariote's kaaũusuthe'jeçyã'kh yu' Jesusa's ewmeesa kusete dukhkahn. 3Aça' Jesusa' jiik yu' Dxus tasxune' yuusa yu' sa' ki' Dxus tasxnay u'jwa'ja's. Sa' txã'wẽy jiik yu' Dxus ma'wẽçxah jxkaahwa'ja'swa txãaçxaçxá's dukhni'swa.
4Txajũ' Jesusa' ũ'na u'píi kiitena'wa, atxhna ki'pçxa, toalxa's jxtuhdku. 5Sa' kuse khweeçxaniite yu' awna', mesate ih ũ'na u'psa çxidatx pkhi'kxna', toalxaju adxi'k.
6Sa' Simon Pedro çxidatx pkhi'kxya'wate', txã' na'wẽk we'we:
—Kwe'sxtxi jxpe'jsa yuja', ¿adx çxidatx pkhi'kxma'g? jĩte', 7Jesusa' na'wẽk pas:
—Ãçxhíi yu' jiyumeene'ga na'wẽ yũuni's. Nawa e'su' jiyune'ga.
8Txã'jĩtewa, Pedro' ki' na'jĩk:
—Idxa' adx çxidatx pkhi'kxwa'jsameeg jĩte', Jesusa' na'jĩnak pta'sx:
—Idxa's pkhi'kxmeete', adx yakh ũsya' ãjameene'ga jĩte', 9Simona' na'wẽk pxthaa we'we:
—Txã'wẽyã'the', çxidaçxáatx pkhi'kxmée, kuse petx dxikthé yã'jçxa meen pkhi'kx jĩk.
10Nawa Jesusa' na'jĩk:
—U'se pẽwçxa ũssa', jxuka ateyã'tha', kxah çxidaçxáatx pkhi'kxwa'j peejxta'. I'kwe'sxa' ateyã'ji'kwe, nawa jxukasa yu' ate ũsmeei'kwe.
11Jxukaysa yu' ate ũsmeei'kwe jĩnak we'we, txã's ikhkahn dukhwa'jsa's we'weçxak txã'jĩ.
12Txajũ' Jesusa' txãawe'sx çxidatx pkhi'kxna jxã'jçxa', atxha's jxkahçna' mesate ki' kaçxçxa na'jĩnak paapẽjx:
—¿I'kwe'sxa' jiyu'kwe' adx txã'wẽ i'kwe'sx çxidatx pkhi'kxte'? 13I'kwe'sxa' adxa'sa' kaapiya'jsa, jxpe'jsa, jĩçxa', isa yuh we'we'i'kwe, adxa' txã'wẽsa yuhth naa pa'ga. 14Adxa' kaapiya'jsa, jxpe'jsaçxawa i'kwe'sx çxidatx pkhi'kxthu aça' i'kwe'sxwa txã'wẽy çxidatx puutx ya'pkhi'kxna mfxi'zewe teeçxsa na'wẽçxaçxáa. 15Adx na'wẽy yũuna fxi'zekahnthu i'kwe'sxtxi txã'wẽ selpíi. 16Isath we'we', maawa selpisa' txajx patronte jxthaakwesame', aça' txã'wẽy kaahnisawa txã's kaahsate jxthaakwesame'. 17Na'wẽ selpiwa'ja's jiyuçxa kxtey yuuna fxi'zeçxa', weçx weçxa fxi'zene'kwe.
18I'kwe'sx jxukaysa yuutxi' txã'jĩ'çmeeth. Jiith kimçxah adx txhitxhnisatewa. Nawa Dxus librute na'wẽ fxi'jni ũsa': Adx yakh ih ũ'saçxawa, adxa's ahçeçxa kiikhe'jya'wa' jĩna fxi'jni' kxtey yuukahnthu txã'jĩ'. 19Ãçxhíi pta'sxiçthu, kxah kxtey yuute', adxa's ew jiyune'kwe Dxus Nçxi'kdxihtewa. 20Isath we'we': maawa adx kaahnisa's jxpa'gaçxa', adxa'swa jxpa'gasa yuuna. Sa' adxçxáana jxpa'gamée, adxa's kaahsanawa jxpa'gasa yuuna.
Judasa' Jesusa's ewmée yũuya' yaakxni
(Mt 26.20-25; Mr 14.17-21; Lk 22.21-23)
21Txã'jĩna jxã'jçxa', Jesusa' nxusnxus yajkxçxa ãatek we'we:
—Isath txã'jĩ', i'kwe'sx yakh u'jusa teeçxsa' adxa's ahçeçxa ewmeesa kusete dukhya'wa' jĩk.
22Txajũ' kimna txã'jĩtewa jiyumeeçxa', dxi'p iisaçxáatx puutx thegu' txãawe'sx pwe'sx. 23Teeçxsa' Jesus pukate ih u'psa' Jesus wedxnisak yu'. 24Aça' Simon Pedro' kimna txã'jĩtewa jiyu wẽeçxa', txãa ih u'psa's kuseju pta'sxku paapẽykahn. 25Aça' Jesus pukate ih u'psa' tuphiçxa na'jĩnak paapẽjx:
—Jxpe'jsa, mpeeta'sx ¿kim idxa's txã'wẽ ahçeçxa dukhwa'jsana? jĩte', 26Jesusa' na'jĩnak pta'sx:
—Pana's tuupha'jçxa maana ũsu'nja txãa adxa's dukhwa'jsa' jĩçxa', pana's tuupha'jna'wa Simon nçxi'k Judas Iskariote'sku ũs. 27Aça' Judasa' pana's jxpa'gaçpkaçxha', eçxthẽ'ja' txajx ũuste u'kak.
Aça' Jesusa' Judasa's na'jĩnak we'we:
—Kĩh yũuya'waçxawa, dud kxtey myuu jĩte', 28mesate ũ'na u'psa' maa yuhwa jiyumeeta' txã'wẽ we'weni's. 29Maaíi yu' na'wẽtx yaaki': Judasa' vxyu jxaawsate', kxah wá' Jesusa' fxiestate peejiwa'ja's weykaja', meeçxawa puuplesatx wá' kĩhçxáawa peeskaja' sũju'tx. 30Naapkaçxha' Judasa' pana's ũ'na'wa kasehna u'kh. Txã'wẽ yuuçte', çxhi'dxni yã'kh yu'.
U'se jxkaahnisa
31Judas u'jni e'su', Jesusa' na'wẽk pta'sx:
—Dxus Nçxi'k Nasa Yuusá's ãçxha' tuuthe'jnik yuu, aça' Nçxi'kwa Neya's tuuthe'kh. 32Dxus Nçxi'k Nasa Yuusa' Neya's tuuthe'jeçpkaçxha', Neywa Nçxi'ka's tuuthe'jena, nawa ãçxhíi txã'wẽ yuuya'wa'. 33Adx nçxi'kkuẽwe'sx, jwee yu' txaçx ũsme'nja i'kwe'sx yakh. Adxa' judiuwe'sxtxi nyafxíi we'weçxa': I'kwe'sxa' adxa's pakweene'kwe. Nawa adx u'jweçthu kxte' yujxa' ãjameene'kwe jĩnath we'we, sa' i'kwe'sxtxiwa txã'wẽyçxáath we'we'. 34I'kwe'sx yakh nvxiituçthu u'se jxkaahnisa's, puutx ya'peeygãhna fxi'zewa'ja's. Adx ma'wẽtka i'kwe'sxtxi peeygãhna fxi'ze', txã'wẽy i'kwe'sxwa puutx ya'peeygãhna mfxi'zewe. 35Txã'wẽ puutx ya'peeygãhna fxi'zete', maa nasawa jiyutxna i'kwe'sx adxa's nwẽese'jsatewa.
Pedro' ĩsxiiwa'jsatewa Jesus pta'sxni
(Mt 26.31-35; Mr 14.27-31; Lk 22.31-34)
36Txajũ' Simon Pedro' na'jĩnak Jesusa's paapẽjx:
—Jxpe'jsa, ¿mtee u'jweçga? jĩte', Jesusa' na'jĩnak pta'sx:
—Adx u'jweçthu kxte' yujxa' ãjameene'ga ãçxhíi yu'. Nawa e's yu' yuweene'ga jĩtewa, 37Pedro' ki'kin paapẽjxku:
—Jxpe'jsa ¿kĩh yuuçxa ãçxhíi yu' yujxa' ãjamée yuuki'th? Adx uuwa'ja's yuhwa ũukhya'mée ũsthu, idxa's peeygãaweete jĩte', 38Jesus we'weçxa':
—¿Isaga txã'jĩ'á'? Nawa adxa' na'jĩ'th na': atalx we'wemeyna, adxa's jiimeeth jĩna tekh us ĩsxiijaçyã'j yuune'ga jĩk.
© 1984, Wycliffe Bible Translators, Inc. All rights reserved.