San Mateo 3
3
Juan Bautistata gentemmeu nokakähui
(Mr. 1:1-8; Lc. 3:1-9, 15-17; Jn. 1:19-28)
1Huámechi taahuarimmet Juan Bautista áma yepsak mékka ánia see päria Judeapo, Diosta noki noksimeka 2ínel jíaka:
—Emóem jíapsi kúaktia, bueïtuk téhuekapo Dios réy nésauri äbo jëla ansime.
3Ïri ájäria jü profeeta Isaíasta áa bétana nokakähui, ínel jíaka:
Mékka ánia see päriapo chay noki jikkaijtuk:
“Señorta böomem nanahuitte,
éntokem jume ili böom rútuktia.”
4Juan camello bóata sánkokay, entok huakäbiata huikosakay; ä buäyeu éntok buere guöchim entok mumu sitörimtukay. 5Huanäi jume Jerusalénpo, Judeapo, entok Jordán bathue mayoat jóakame sïmetakam áu yeu sájjak. 6Bem Dios bejrim am yeu buíseko, áapo am batöay jum Jordán bathuepo.
7Juebena pariserom entok saduseom áu yájjay, emo batö ïaaka. Juan am bíchaka ínel ámeu jiaahuak:
—¡Bakot asoarim bénnam! ¿Jábesu júkäi enchim téjhuak, juka ára enchim ä tö tennëhui, juka Diosta ómtiraa äbo huémta bétana? 8¡Jü enchim jíapsi kúaktiläu, júyata türim takä bénasi enchimmet jünakiachitunake! 9Katem enchim jiápsipo emo jábele: “Abrahamtatte yeu kat‑ria” ti éaka, bueïtuk ínenne enchimmeu jiaahua: Dios ímï tétampo ára áma yam kattua, jume Abrahamta üusim. 10Entok kétchi, jume tépuam béjam jípuhua, júya nahuam chúktiä béchïbo; bueïtuk sïme júya kaa türik takame chúktiahuaka tájiu jímmaana. 11Lútüriapo, ínapone bäampo enchim batöa, jíapsi kúaktihuamta enchim jípunakë béchïbo; të hua íno sáu huéeme, katchanne júne ä bocham huériapo yúmala, Diosta bétana Áapo ino béppa chë úttiärata jípureka nésahue. Áapo, Espíritu Santoy enchim batönake, entok tájiyi. 12Jü tirijkom áy huijhuijtiahuame ä mámpo óorek; erata éntok tútenake, tirijkom éntok náu tójaka, báchiam ëeriahuäpo am ërianake; juka tirijko ótata éntok táanake, jum táijta kaa tutukëpo.
Jesústa batöhuakähui
(Mr. 1:9-11; Lc. 3:21-22)
13Huanäi Jesús Galiléa buiära bétana huéeka Juantau yepsak, jum Jordán bathuepo, áapörik ä batö ïaaka. 14Të Juan kaa báarey, ínel jíaka:
—Émpë nee batöpo yúmala. ¿Én éntoke émpoisu inou huéiye?
15Të Jesús ä yómmiak, ínel jíaka:
—Júnëlë ä tójja, bueïtuk türi sïmeta Diostau bíchaa lútula huémta itom chúpanakëhui.
Huanäi Juan ínel ä tójjak. 16Jesús entok batösuhuaka, bäapo yeu simlataka jikau ä huey téhueka áu étapok. Huanäi juka Diosta Espíritu bitchak, áa béppa guókouta bénasi kóm huémta. 17Jíahui nooki téhueka bétana jíkkaijtuk, ínel jíaka:
—Ïri ín Üusi tüisi ín nákëhui; áa bétanane tüisi al‑leiya.
© 2014, Wycliffe Bible Translators, Inc. All rights reserved