Genesis 5
5
Menge bowad-bowad i Adam
1Seini se ngadan te menge bowad-bowad i Adam.
Peg-inang te Timanem te otaw, ininang din dan iling kandin. 2Ininang din se otaw meama aw bayi. Mèpiya se imbegay din diyà kandan, aw iningedanan din dan otaw.
3Peg-apet te sebad gatos ketlowan se omay i Adam, timebaw se batà din meama iling kandin. Iningedanan din se batà din ki Set. 4Penga te pegtebaw i Set, walo gatos se omay minokit te wedà pa kematay si Adam. Dalem niyan, doen pa menge doma batà din timebaw. 5Siyam gatos ketlowan se omay i Adam te pegkematay din.
6Peg-apet te sebad gatos aw lima se omay i Set, timebaw se batà din meama si Enos. 7Penga te pegtebaw i Enos, walo gatos aw pito se omay minokit te wedà pa kematay si Set. Dalem niyan, doen pa menge doma batà din timebaw. 8Siyam gatos sempolò teg dowa se omay i Set te pegkematay din.
9Peg-apet te kesyaman se omay i Enos, timebaw se batà din meama si Cainan. 10Penga niyan, walo gatos sempolò teg lima se omay minokit te wedà pa kematay si Enos. Dalem niyan, doen pa menge doma batà din timebaw. 11Siyam gatos aw lima se omay i Enos te pegkematay din.
12Peg-apet te kepitowan se omay i Cainan, timebaw se batà din meama si Mahalaleel. 13Penga niyan, walo gatos kepatan se omay minokit te wedà pa kematay si Cainan. Dalem niyan, doen pa menge doma batà din timebaw. 14Siyam gatos aw sempolò se omay i Cainan te pegkematay din.
15Peg-apet te keneman teg lima se omay i Mahalaleel, timebaw se batà din meama si Jared. 16Penga niyan, walo gatos ketlowan se omay minokit te wedà pa kematay si Mahalaleel. Dalem niyan, doen pa menge doma batà din timebaw. 17Walo gatos kesyaman teg lima se omay i Mahalaleel te pegkematay din.
18Peg-apet te sebad gatos keneman teg dowa se omay i Jared, timebaw se batà din meama si Enok. 19Penga niyan, walo gatos se omay minokit te wedà pa kematay si Jared. Dalem niyan, doen pa menge doma batà din timebaw. 20Siyam gatos keneman teg dowa se omay i Jared te pegkematay din.
21Peg-apet te keneman teg lima se omay i Enok, timebaw se batà din meama si Matusalem. 22Penga niyan, dalem te telo gatos se omay, migpedomaay si Enok aw Timanem. Dalem niyan, doen pa menge doma batà din timebaw. 23Minapet se omay din te telo gatos keneman teg lima. 24Gayed migpedomaay si Enok aw Timanem lamig te aldaw te pegkewedad din, so binaloy sikandin te Timanem.
25Peg-apet te sebad gatos kewelowan teg pito se omay i Matusalem, timebaw se batà din meama si Lamek. 26Penga niyan, pito gatos kewelowan teg dowa se omay minokit te wedà pa kematay si Matusalem. Dalem niyan, doen pa menge doma batà din timebaw. 27Siyam gatos keneman teg siyam se omay i Matusalem te pegkematay din.
28Peg-apet te sebad gatos kewelowan teg dowa se omay i Lamek, doen batà din meama timebaw. 29Iningedanan din se batà din ki Noe (kelebadan niyan, peg-etod), so minikagi sikandin, “Seini se otaw megpeetod kenitadon lekat te kelimahan te terbaho tadon dini te tanà seini ininang te Timanem medaet.”
30Penga te pegtebaw i Noe, lima gatos kesyaman teg lima se omay minokit te wedà pa kematay si Lamek. Dalem niyan, doen pa menge doma batà din timebaw. 31Pito gatos kepitowan teg pito se omay i Lamek te pegkematay din.
32Penga te lima gatos se omay i Noe, timebaw se telo batà din meama, si Sem, si Ham, aw si Japet.
© 1982, Wycliffe Bible Translators, Inc. All rights reserved.