Luk 22
22
Judas tebe kamogimal imi bogobe-nala, “Niyo Yesus iyo daali yak ipmi sagaal diim abon-tema o,” agesa uta ko
Mat 26:1-5; Mak 14:1-2; Jon 11:45-53
1Bret fitimin binim fuu unan-kalin am umi win uyo, “Pasova o,” agan-nuubip kale, am boyo mep so tulu e, 2tinum amem ko age pris imi kamogimal isino ulo utamsip tinum so iyo tegen-bom, kanubeta Yesus iyo angkolup kaanak o agan-bilip kuta, unang tinum kwiin tagang iyo Jerusalam katam uyo tala tala ke-bilip kalaa age-nilipta, “Buuk o age-nilip e, tebe nuyo yan-togon-bom ye-bom kem-nimip o,” age finano kupka-nilipta, bantap umi ilep uta fen-bilip ko.
3Kale abiip Keriot kayaak Judas iyo okumop man tuluun kal ninggil imi ogok maagup kemin tinum kale, Saatan iyo tal Judas imi diim abe-nala e, imi aget fugunin uyo kufak daabelata, 4utamata e, kamogimal iyo kanubelum o agan-bilip kalaa age-nala e, no tama e, tinum amem ko age pris imi kamogimal isino ulotu am miton umi un tubulin kamogimal isino imi bogobe-nala e, “Niyo Yesus daali yak ipmi sagaal diim abelan-tema umi ilep uta fen-bii o,” agela e, 5tolong do-nilip e, deng kup tebe-bom bogobe-nilip e, “Tisol umi weng umaak telela ko kulep kutop kelup suukta, kop-kamum o,” agelip e, 6Judas iyo imi weng uyo tolong do, “O,” age-nala e, suukta, utamita, unang tinum kwiin tagang iyo tiin kubalip kalaa age-nilita, kota Yesus iyo bantap daali yak kamogimal imi sagaal diim abelak o age ilep fena ko.
Okumop man alop imi Pasova unan-kalin umi mufekmufek telela kosip uta ko
Mat 26:17-25; Mak 14:12-21; Jon 13:21-30
7Kale bret fitimin binim unan-kalin umi am ko age ifin am uyo daanu e, Juda kasel imi kuguup uyo ku-nilip e, Pasova umi sipsip man uyo ano fuu-bom unan-nuubip kale, 8kota asok bomi am uyo daanu e, Yesus iyo Fita so Jon so imi bogobe-nala e, “Alop ibo no-nilip Pasova unan-kalin umi mufekmufek uyo telela kupkamipta, no tulupta, unan-kulum o,” agela e, 9iyo bogopmip, “Nota am uyo dogap kal bomta, mufekmufek uyo telelaman-temup o?” agelip e, 10bogopma, “Niyo bomi weng uyo bogopman-temi kale, tinangku-silipta. Alop ibo no Jerusalam kutam iinipta, ogok kemin tinum maak tal abu daalan-tema kale, atamipta, beyo unang umi kuguup uyo ku-nalata, oget afalik tol umi ku telela kosip uyo ok ilu ko kwep tam dubom diim daa kwep talan-be kalaa age-nilipta, imi umik bagalip no am iinon-tema uyo, ipso iso tam am tam-nilip e, 11am kayaak iyo kutam kal alba kale, bogobe-nilip kano, ‘Numi kafalemin tinum iyo weng maak kopkela kupke tulup kale, iyo bogopke-nala, “Kapmi am komi atuk koyo kuun kale, kopmapta, nimi okumop man isino e minte nisino nuyo kagal numi Pasova uyo unelum o,” agelata, tulup o,’ age bogobelipta a. 12Minte am kayaak iyo ipmi weng uyo tolong do-nala e, imtamo tam am dong tem daa am atuk afaligen uyo kafalebelata, utamipta e, iman fuumin umi mufekmufek alugum uyo kutam kal albu kalaa age-nilip e, kutam kal unan-kalin uyo telelamipta o,” age-nala e, 13imdala no abomu, Yesus imi bogopma tulup uyo alugum mungkup tol kanubelu kalaa age-nilip e, Pasova umi unan-kalin uyo kugol telela-bom fuumip ko.
Yesus ilami okumop man bret so sok dum ok so kobesa uta ko
Mat 26:26-30; Mak 14:22-26; 1 Kor 11:23-25
1 Kor 10:16-21; Hib 9:19-22
14Atanim uyo tem iinu e, Yesus iyo ilami kalaan tinum so tal Jerusalam am ugaa kubip kal ton-bom iman unan-bom-nilip e, 15kota ilami okumop man iyo bogopma, “Nimi aget kiim fugun-nak-bii uyo, kaal fuyap uyo ku kaanin-tem som-nilita, niyo ipsino iman ko age Pasova koyo une som-nilita o agan-nak-bii kale, 16nimi weng bogobelan-temi koyo tinangku-silipta. Kamano koyo niyo ipsino Pasova uyo afung afung unan-bii kale, kafin diim kagal maak so unelan-temaali kale, kupkaa bom-bili bii, son-temu nala nimi Aatum God imi alugum tiin molan-tema uyo, Pasova umi magam uyo tol kup kemanan-temu kota, asok Pasova uyo unelan-temi o,” agela ko.
17Kale Yesus iyo sok dum ok uyo ilu ko-nala e, God iyo, “Misam o,” age-nala e, ilami okumop man kobe bogobela, “Sok dum ok koyo ku-nilip e, maak kapsiik une-nalap e, kapkum iyo kopmap unela unela kelin o,” agela unelip e, 18bogobe-nala e, “Ibo tinangku-silipta. Kamano koyo niyo sok dum ok boyo maak so unelan-temaali kale, kupkaa bom-bili bii, God imi alugum unang tinum tiin molan-tema uyo mitam tulu kalaa age-nilita, kota asok unelan-temi o,” agela ko.
19Minte bret maagup maak ku-nala e, God iyo, “Misam o,” age kupkaa fegela ko ilami okumop man iyo ife-bom-nala e, bogopma, “Bret koyo nimi dam [kale, ipmi ilim uta bobelan o age-nilita, nimi dam uyo kobelan-temi kale, mungkup bret kobelan-temi koyo ku unelin a. Kale son-temu uyo, asok bret mungkup unan-kalon-temip uyo, asok nimi dam bomi aget uta fugun-bomta unan-kalin o,” agela ko. 20Ulutap kale, Pasova umi iman uyo unelip binimanu e, Yesus iyo sok dum ok maak ilu kola uyo kobe-nala e, bogopma, “Sok dum ok koyo nimi isak kale, nimi nangkalip kaani nimi isak malaak abelan-temu uyo, ibo utamipta e, ipmi ilim uta bobelan o ageta nimi isak uyo kupkali singkam daalu kalaa age-nilip e minte, God imi weng kwep daasa uyo fen abulu kalaa agon-temip o,” agela ko.]
21Weng boyo kam age kupka-nala e, weng migik maak bogobela, “Nugumal ibo tinangku-silipta. Tinum maak nimkem daa nimdala yak waasi imi sagaal diim abon-temi iyo nisino kagal ton-bom iman unan-be kalba kale, 22sugamiyok uyo God imi aget fugunin uyo, ‘Nimi Man daali unon-tema iyo kanube kaanan-tema o,’ agesa kuta, tinum maak dogap ita Mo Tibil imi Man nimkem daalan-tema beta ki atin kaal fuyap kup misamanan-tema o,” age Yesus iyo bogobela ko.
23Yesus imi okumop man iyo tolong do-nilip e, ninggil iyo bubul iluum tebepmu e, dagana tala ke-bom-nilip e, bogolip, “Ninggil numi iibak tem katam iyo dok ita dupkem daalan-tema o?” agan-kalip ko.
Yesus imi okumop man, “Numi tinum iyo dogap ita dubom kelan-tema o?” age wengaal diginsip uta ko
Mat 18:1-5, 20:25-28, 23:11-12; Mak 9:33-35; Luk 9:46-48, 14:11
24Yesus imi okumop man iyo wengaal digin una tala ke-bom bogo-nilip e, “Numi tinum iyo dogap ita dubom kelan-tema o?” agelip e, 25Yesus iyo bogobela, “Ibaa. Kafin diim komi God imi ilak dolin binim unang tinum imi kamogimal iyo unang tinum iyo alaang weng uyo kupka-e-bom-nilip e minte, ilimi aget fugunin uyo, unang tinum ita numi tok bagamin o age-nilipta, bisop bogo-nilip e, ‘Nuyo unang tinum ipmi dong daga-emin tinum o,’ agan-nuubip kuta minte, 26nimi ilak dolin ibo imi kuguup ko kanum-nuubip boyo ipsiik dagaa ku kanumin ba kale, dogap kapta te tam kapkumal imi dubom kelap umdii, kabo, ‘Nita kup o,’ age-nalapta, kapkumal iyo alaang weng kupka-emin ba kale, imi niing ilatap ke-nalapta, kapkumal iyo ati-e-bomta tambaliim kup tiin molan-temap uta felep-kaman-temu e minte, kabo te tam kapkumal imi kamok kelap uyo, bisop tonamin ba no kale, kapkumal imi bon tem kiit fenin tinum ke-nalapta, dong daga-e-bom-nalapta o ageta ko. 27Kale taabalasebal sino ilimi ogok kemin tinum so imi kuguup uyo ibo utamsip kale, ton-bom ole-bala iman kulep tal to-e-bala unan-be beta taabala bele minte, iman ifo kulube tal to-be beta taabala a? Iyo? Ton-bom iman unan-be beta taabala kuba. Kuta niyo ipsino bom-nili uyo, kanupmin kuguup boyo maak kanum-nuubaali kale, niyo ogok kemin tinum ke-nilita, dong daga-em-nuubi ko.
28“Kuguup mafak mitam nimi diim aban-nuubu uyo, ibo nimkasaalip binim kale, ibo suun kup nimi diim uyo febam tebesip kale, 29-30bota nimi Aatum God imi kanupnesa ulutap ke-nilita, nagal ibo mungkup kanubelan-temi ko. God iyo ulaa nimdu imi titil uyo kopnesa kale, imi win tolop diim unang tinum iyo tiin molan-temi kale, ulutap mungkup, son-temu uyo, ibo no nimi abiip kugol nisino ton-bom iman unan-bilipta, ulaa imdu nimi titil uyo kobelita, nimi win tolop diim Israel imi man ilop imi miit tuluun kal kalip iyo ipkil tebe miit maagup ku tiin mola tiin mola keman-temip o,” age Yesus iyo ilami okumop man iyo baga-ema ko.
Yesus imi Fita bogobe-nala, “Kabo bogo-nalap e, ‘Niyo beyo atamsaali o,’ nagelan-temap o,” agesa uta ko
Mat 26:31-35; Mak 14:27-31; Jon 13:36-38
Jon 17:9-15, 21:15-17
31Kota Yesus iyo tebe Fita iyo bogobe-nala e, “Nugum Saimon kabaa. Tinangku-salapta. Saatan iyo alugum ibo im-kugulata, Yesus imi tinum kalaa, nalami tinum kalaa agon o age-nalata, God iyo dagalata, ‘O,’ agela kale, tinum maak rais ko age wiit uyo kwaala iit o daak o ke-bulu e, kaal uyo tegep yak iinom dam uta kup kutulu daak ilaat diim abelu ulutap kale, Saatan iyo imdala iit o malaak o ke-bom kaal fuyap uyo kupka-eman-tema ko. 32Kuta niyo Aatum God imi beten ke-e-bom-nili e, bogobeli, ‘Aatum kabaa. Saimon iyo bogopne-nala, “Niyo atamsaali o,” nagelan-tema kale, kanupman-tema uyo, dong dogobelapta, imi kuguup mafak boyo tebe-nulu bemi nimi ilak dugamin boyo kufak daga-emin ba o,’ agan-bomta beten kem-nak-bii kale, suukta, kabo maak so aget fupkela ko-nalap kapmi aget fugunin uyo bam daapkelan-temu kota, kabo kapmi kapkumal iyo dong daga-e-balapta, imi aget fugunin uyo bam daabeluta, titil fagalan-temip o,” age-nalata, Yesus iyo Fita imi baga-ema ko. 33Kale Fita isiik bogobela, “Kamogim kabaa. Niyo kapsino imtamo no kalabus am daa-nimip kuta, kapmi diim kal feba-nimi minte, kapsino ino-nimip kuta, nagal kapmi diim kal feba-nimi kwa,” agela e, 34Yesus iyo Fita imi bogopma, “Fita kabe. Niyo tuluun weng bogopkelan-temi kale, tinangku-salapta. Kutim mililep kota uun kakaluk aalap iyo olalin-tem bom-salata, kabo nimi sang uyo bogopne-nalap e, ‘Beyo atamsaali o,’ nage yakyak bii, ilep asuno fagalan-temap o,” agela ko.
Yesus okumop man imi bogobe-nala, “Kamaa kutop uyo mufekmufek so kulep tiinemin o,” agesa uta ko
Luk 9:3, 10:4, 23:32-33
35Kota Yesus iyo ilami okumop man dagala, “Siin uyo bogobe-nili e, ‘Ibo tuumon so iman men so minte yaan ilom so uyo kulep-nilipta, nimi ogok uyo kem tiinemin ba o,’ age imdali tiinan-bilip uyo, ibo mufekmufek umaak duumatanbip bele ki?” agela e, bogobelip, “E-e, mufekmufek umaak duumatanin-tem o,” agelip e, 36Yesus iyo bogopma, “Kamano komi tonbup uyo ugulumi migik kale, tuumon min, iman men min uyo albu umdii, kulep-nilip e minte, benat ko age un kong uyo binim umdii, ilipmi saket uyo delep no tolip tinum migik iyo tebe molipta, umi tuumon uta kulu-nilipta, benat uyo mo kulep bom-nilipta, tiinemin o ageta ko. 37Ibo nimi weng koyo tinangku-silipta. God imi suuk kon tem weng uyo bogo-nulu e,
‘Bilip iyo kuguup mafak uyo un tubulin imi tebe fuut tibin imi kupka-em-nuubip ulutap ke tinum begal mungkup kobelip o,’
agesu boyo nimi sang uta bogosu kale, alugum God imi suuk kon tem nimi sang bogosu uyo mep tol mitam tolon o angbu kale, kanupmin kuguup mafak boyo mep kupkaneman-temip o,” agela ko. 38Ilami okumop man iyo tolong do-nilip e, bogopmip, “Kamogim kabo kotamal a. Benat alop kalbu o,” agelip e, Yesus iyo utamata e, okumop man iyo kuguup mafak mek nimi kaal diim mep tolon-temu uyo tele utamin-tem ke amon amon weng bagamip kalaa age-nala e, bogobela, “Tii bogolip kale, binimanu o,” agela ko.
Yesus imi no Oliv Tigiin kal bom God imi aman duga-emsa uta ko
Mat 26:36-46; Mak 14:32-42
39Yesus iyo no Oliv Tigiin kal suun God iyo aman duga-em-nuuba kale, bomi mililep kota ilami kuguup kanum-nuuba bota ku-nala e, ilami okumop man iyo fola kulep abiip Jerusalam uyo kupkaa Oliv Tigiin una ko. 40Kale ninggil tam-nilip e, bogopma, “Kuguup mafak uyo, im-kugulan o age yuut tal ipmi diim abelan-temu kale, ibo God iyo aman duga-e-bom-nilipta, dagaga-bilip dong daga-e-balata, fengmin boyo tal ibo uk kugan imoluk o,” age-nala e, 41ilami okumop man iyo kugol tonip imkaa mep ko yang unom katuun duung fegela daak ton God iyo aman duga-e-bom 42bogobela, “Aatum kabaa. Kuguup mafak uyo meng, nafak daalan o angbu kale, kabo, fegelebeli dupkaluk o nagelap uyo, fegelebelapta, nimkaluk o agan-bii kuta, fen nimi aget fugunin uyo, kabo nimi aget fugun-bom, ‘Bota kanupnelal o,’ agan-bii boga ba kale, kalapmi aget fugun-bom, bota kanubelan-temi kalaa agan-balap uta kup kanumin o,” agela ko. 43[Kale kam agela e, ensel iyo malaak abe Yesus iyo dong daga-emin weng uyo kupka-e-bala e, 44Yesus iyo aget iluum ku-bom asok God iyo aman duga-e-balata, ifak afaligen uyo fuu dolu kuta, ifak boyo isak ulutap ugaa kumen malaak kafin diim abe yakyak kemu ko.]
45Beten kem abe-bala binimanu e, fen mo daage no abomu, ilami okumop man iyo aget iluum tebebe daal tebepmu agaal unbip kalaa age-nala e, 46bogopma, “Ibaa. Ibo agaal unbip aga? Saatan iyo, ibo uget taga-bilita, yang fenga kolip kalaa agelan o age-nalata, ibo im-kugu-be kale, fen-bom God iyo dagaga-bilipta, dong daga-e-balata o,” age Yesus iyo bogobela ko.
Judas tebe Yesus daala yak waasi sagaal diim abesa uta ko
Mat 26:47-56; Mak 14:43-50; Jon 18:3-11
47Yesus iyo weng baga-em-sala e, tinum kwiin tagang iyo tilip kale, Yesus ilami okumop man iyo tuluun kal kale, tuluun Judas ita Yesus imi baan diim alba uyo ilep kafal kelata, tal-nilipta, Judas iyo tal, Yesus iyo duptal migilan o age tal mep so talata, 48Yesus iyo bogopma, “Nugum Judas kabaa. Kabo talta, Mo Tibil imi Man niyo duptal migim tolom-nilita, dupkem daa daali yak waasi imi sagaal diim abelak o age-nalapta, talta nimtal migilan-temap aga o?” agela ko.
49Yesus imi okumop man iso albip iyo itamipta e, tinum iyo, Yesus iyo aafulum o agan talbip kalaa age-nilip e, Yesus iyo bogopmip, “Kamogim kabaa. Nugol numi benat ko age un kong umaak kuluta ino-numup bele ki?” agelip e, 50tinum amem imi kamok miton ko age hetpris imi ogok ke-emin tinum maak iyo iso tala kale, okumop man maak tebe ilami benat uyo kupdeta tinum beyo angko imi tuluun kaal ipkuk uyo tagaa kwaabela daak abelu e, 51Yesus iyo utam-nala e, okumop man iyo yege-bom bogopma, “Bo kanumin ba o,” age-nala e, yak tinum bemi tuluun kaal uyo waafu-nala e, asok kwep yak kwek kabilepma tambalanepmu ko.
52-53Kale tinum amem ko age pris imi kamogimal so ulotu am miton umi un tubulin kamogimal so minte tinum kamok kamok so alugum bilip iyo tal, Yesus aafulum o age-nilip e, tal kugol molip e, Yesus iyo bogopma, “Niyo no ulotu am miton kugol ton-bom unang tinum iyo suun kup kafalem-nak-bii kale, ibo tii tal kugol naafuta de namo-nimip kale minte, intaben o age-nilipta, ibo kupkasipta, kamano kota ibo tinum ipkumal aa-bom mufekmufek daga-emin tinum imi aafuu de dupkabip ulutap ke-nilipta, benat so ulin so uyo kulep talta, de namolum o ageta tilip a? Kuta kamano kota God iyo Mililepnok ko age Saatan iyo dupkala ilami aget fugunin uyo ku ipmi kobe dong dogobelata, kanupmum o ageta, numi ilep uyo albu kalaa age-nilipta, fiko tal naafulum o agan-bilip o,” age Yesus iyo kamogimal imi bogobela ko.
Fita imi bisop bogo, “Yesus iyo atamsaali o,” agesa uta ko
Mat 26:57-58, 69-75; Mak 14:53-54, 66-72; Jon 18:12-18, 25-27
54Yesus iyo bagan-siit kupkala e, un tubulin iyo aafuu duptamo tinum amem imi kamok miton ko age hetpris imi am iinip e, Fita iyo kota imi umik tem simanim so kugol tam tam yak abe 55tam hetpris imi am daam tem tam abomu e, un tubulin tebe abiip mat kal at kwegalip kena-bulu e, tinum iip maak maak iyo ton-bom at uyo fufala kwek mobip kalaa age-nala e, yagal no tama e, isino tonip ko. 56Kale ogok kemin unang maak uyo atamuta e, tal at ilagenin diim kal tonba kalaa age kek fen tele atam-nulu e, tinum tonan unbip imi bogopmu, “Ibaa. Tinum tal tonba begal mungkup Yesus so tiinan-nak-be o,” agelu e, 57Fita iyo fulma-nala e, bogobela, “Kubaa. Niyo beyo atamsaali o,” agela ko.
58Kale siit-kulu e, tinum maak Fita iyo atam-nala e, bogopma, “Kapkal mungkup tinum bemi tinum maak o,” agela e, Fita iyo yan kebe bogopma, “Kabaa. Naga ba kuba,” agela ko.
59Kale ton-siit ilugola e, tinum migik maak isiik mitam bogo-nala e, “Niyo tinum bemi weng bagan-be uyo tolong dolita e, Provins Galili kayaak kalaa ageli kale, begal mungkup Provins Galili kayaak Yesus so tiinan-nak-be o,” age yakyak kema e, 60Fita iyo bogopma, “Tinum kabaa. Niyo kapmi weng bagan-balap kwek uyo tele bam daalin-tem o,” agan-kala e, kota maak fagalin tap uun kakaluk aalap iyo olala ko. 61Kota Kamogim Yesus iyo fupkela kek fen Fita iyo tele atama e, Fita iyo asok aget fugunota, siin Yesus imi bogopne-nala, “Kutim mililep kota uun kakaluk aalap iyo olalin-tem bom-salata, kabo nimi sang uyo bogopne-nalap, ‘Beyo atamsaali o,’ nage yakyak bii, ilep asuno fagalan-temap o,” ageba uyo fen ko kanubeli kalaa age-nala e, 62bilii imkaa daam tem uyo kupkaa tam sep kutam kal fomtuup amema ko.
Un tubulin imi Yesus titul weng baga-e-bom saal dagamsip uta ko
Mat 26:67-68; Mak 14:65
63Un tubulin Yesus imi tiin mobip bilip iyo Yesus iyo titul weng fiil weng baga-e-bom saal dagamip kale, 64kanupmin kuguup uta kanu-bom-nilip e, ilim ku Yesus imi tiin so tibit so uyo katibe-nilip e, asok saal daga-bom titul weng baga-e-bom-nilip e, “Kabo imkalap unang tinum iyo bogopke-nilip, ‘Kabo God imi profet ko age weng kem baga-emin tinum o,’ agan-nuubip kuta, kabo tele utamsap tinum iyo kulbap aga? Tinum maak tebe kangkola kale, bogobe-nalap, ‘Beyo waanta o,’ agelapta, utamum o,” age sal faga-e-bom titul weng baga-e-bom-nilip e minte, 65mungkup weng mafak ugulumi migik migik uyo baga-e-bom no kemip ko.
Juda kamogimal tebe Yesus dep no daa tele atama-bom dagagamsip uta ko
Mat 26:59-66; Mak 14:55-64; Jon 18:19-24
66Am daanu e, Juda kasel imi kamok kamok so tinum amem ko age pris imi kamogimal so e minte ulo utamsip tinum so bilip iyo, weng bagamum o age tala tala ke tal ilimi weng telelmin am katam kal tonip e, un tubulin iyo Yesus iyo dep no bilip imi diim daalip e, 67kamogimal iyo Yesus imi bogopmip, “Kabaa. Bogobelal a. Kabo God imi ulaa kamdula kamok kesap tinum bele ki?” agelip e, Yesus iyo yan kepma, “Niyo bogobe-nili, ‘Niyo God imi ulaa nimdula kamok kesi tinum Krais o,’ agelan-temi uyo, ibo, boyo dam bagan-be kalaa nagon-temaalip binim kale, 68ulutap niyo weng maak dagalan-temi uyo, yan kepnelan-temaalip kuta, 69niyo weng kota kup bogopman-temi kale, kamano kaa kutop kutop kem unon-temu uyo, Mo Tibil imi Man niyo abiil tigiin kal bom kamogim imi baan diim uyo ku-nilita, titil kup tebesa tinum God imi sagaal ipkuk ilo keng kal tonan-temi o,” agela e, 70alugum bogobelip, “Kam agelap boyo, ‘Niyo God imi Man o,’ ageta bogolap bele ki?” agelip e, Yesus iyo yan kepma, “Niyo maak bogobelin-tem kale, ipkil boyo bogopnelip kale, boyo dam o,” agela e, 71ilimi weng uyo buguna tala ke-bom bogolip, “Nuyo ilami weng bagan-be uyo nulumi tolong alop diim tinangkulupta, beyo fen fengmin tinum kalaa agelup kale, nuyo tinum maak atamupta, beta Yesus imi sang uyo maak so bogolan-temaala binim o,” age ilimi weng kup bagamip ko.
© 1988, Wycliffe Bible Translators, Inc. All rights reserved.