Mark 15
15
Iesu bi Pilate di nemokori afei boyadi
(Mt 27.1–2, 11–14; Lk 23.1–5; Jn 18.28–38)
1Ari uveyori, Sei ma amiye utari naivo vene di varika vene, tora vene ma ago gira oteimana vene bi kanisoro vene tau vakoisa egogo resi nirorotari resi bi Iesu di vana ukita resi afei bosi Pilate di vanari aeyadi. 2Ye Pilate yaku nikaiteyo, “Ya bi Jew vene di kini ba?”
Ma nikabai reyo, “Ya bi mina niyo.”
3Ye Sei ma amiye utari naivo vene di varika vene bi ago tau dudu nitourage reyadi. 4Ye Pilate yaku dudusa nikaiteyo, “Ya bi nikabai de regiya ba? Ya veisa ba de, gokaisanu ago no tau ya rofu nitourage rededi?”
5Idu ago yokoi nikabai de reyo, ye Pilate bi tururu iniye reyo dada.
Iesu di umuyena ago
(Mt 27.15–26; Lk 23.13–25; Jn 18.39—19.16)
6Ye Ferei ebu rena irakuna neineiri, amiye yaku usa nina kana, Pilate yaku dibura amiye yokoi erufugamo. 7Ma amiye roka Barabbas bi gavamani rofu ruda rena venesa dibura yavari amegamo. Ina bi mina gavamani rofu ruda rena vegu dudu amiye umuyeyadi. 8Ma amiye tau bi Pilate rofu baesi ini mina ari okidori rei baedo kana#15.8 Bura bedakai ka ababa nisi nufa. nikaiteyadi. 9Ma nikaiteyo, “Yi ura rededi bi Jew vene di kini moi yakugida ba?” 10Adina Pilate bi sena diba niyo Sei ma amiye utari naivo vene di varika vene bi gonema dudu ini vanari aeyadi.
11Idu Sei ma amiye utari naivo vene di varika vene bi amiye tau gade di uka moiyadi, ye Barabbas moi erufuyainedi. 12Ye Pilate dudusa nikaiteyo, “Ye na bi beika mina amiye, Jew vene di kini, vo nidedi, ina rofu regida?”
13Ma dudusa imuna niyadi, “Satauro ikoko re!”
14Idu nikaiteyo, “Beika resi, ina bi beika vegu no be reyo?”
Idu besa imuna niyadi, “Satauro ikoko re!”
15Ye amiye tau di uka moi ada regi, Pilate yaku Barabbas ina vene rofu erufusi ago masi Iesu iya rededi vene di vanari aeyo, buburu vai resi satauro ikoko reyaganedi.
Ruda vene Iesu nikuruyadi
(Mt 27.27–31; Jn 19.2–3)
16Kamini iya rededi vene gavana di ourefeidena yava tora ideri afei boyadi. (Mina yava di roka bi Praetorium.) Mina usi iya rededi vene tau vakoi raka niegogo reyadi. 17Resi varuka purple aku masi yabo imiye maena moi mekuna resi kini kana ada bou ini adari aeyadi. 18Resi ofa kikifa regi kora reyadi, “Jew vene di kini o!” 19Resi ini adari kodu dudu usi ina fafau ayaka su resi efuka meimisi ini budari nikurugamadi. 20Kamini nikuruna koina niyori, bi varuka purple doba kutusi iniye di varuka aku masi satauro ikoko regi afesi yakuyadi.
Iesu bi satauro ikoko reyadi
(Mt 27.32–44; Lk 23.26–43; Jn 19.17–27)
21Kamini Cyrene gagani amiye yokoi roka Simon baku reyadi. Ina bi taoni etofaro gutuna digamori, bi ini satauro uakaiyaine niyadi. Ina bi Alexander ma Rufus di baba.#Rom 16.13 22Kamini bi gagani roka Golgotha ri afei boyadi. Ini adina bi “Ada girika di sana”. 23Kamini waini muramura roka myrrh sa maradi, idu moina de reyo. 24Ma kamini satauro ikoko resi laki dudu isira reyadi kaere yaku bi ini varuka yokoi yokoi moigedi.#Ps 22.18 25Iesu bi satauro ikoko reyadiri, bi meda nemoko 9:00 uriyaku. 26Ini no nikake regi bi yomakai bura reyadi: “Jew vene di kini.” 27Kamini duma duma amiye remanu inasa satauro ikoko reyadi, yokoi bi ini vana rama rofu ma yokoi bi ini vana enana rofu.#15.27 Bura bedakai ka nanaka 28 nufa: 28 Mina ida dudu, Sei di ago bura rena bae rama aesi niyo, “Ina bi vegu no amiyesa toe moiyadi” (Lk 22.37 baku re).#Is 53.12
29Ma amiye kaere ini budari digamadi, bi nifafana regasa ini ada buro regasa nigamadi, “Ye, ya yaku Sei nivakena yava ukero vau resi meda regodenuri dudusa akugiya, vo niyo!#Ps 22.7; 109.25; Mk 14.58; Jn 2.19 30Satauro gutuna sokau rei desi ya kaya moi vegu ri!”
31Mina ida yokoi makari, Sei ma amiye utari naivo vene di varika vene ma ago gira oteimana vene ka iniye iniye nikurugasa nigamadi, “Amiye be moi vegu riyo, idu iniye bi makai anua rego! 32Mina Keriso, Israel di kini, satauro gutuna soka rei deyaine vesi kumo ina rofu mokena vari gira aegifa!”
Ma kaere bi inasa satauro ikoko reyadi, ka nifafana reyadi.
Iesu di muyena
(Mt 27.45–56; Lk 23.44–49; Jn 19.28–30)
33Meda nemoko tobo niyori, gagani tora noibanu bi mukuna yaku fono reyo boyo meda nemoko regodenu koina niyo mamo. 34Ma meda nemoko regodenuri, Iesu bi ababa nigasa raka ni tora reyo, “Eloi, Eloi, lema sabachthani?” ago di adina bi, “Nai Sei o, beika resi na ferei tavoi reyo?”#Ps 22.1
35Kamini amiye be, kaere bi ina atafu are regamadi, mina neidesi niyadi, “Vefo kumo, ina bi Elijah raka nido!” 36Amiye yokoi raga resi sipanisi waini ru dudu vata baesi koduri aesi ina rofu iriyainedi, magasa niyo, “Kode, venadi kumo Elijah desi moi sokau rego ba ide!”#Ps 69.21
37Ma raka tora nisi asa youfeideyo.
38Kamini Sei nivakena yava ideri biri rina varuka doba bi odoro gutuna doka rofu bado remanu uesi rei neyo.#Ex 26.31–33 39Ma iya rededi vene di ourefeidena amiye tora bi Iesu di nemokori are regasa bi gokai muyeyo,#15.39 muyeyo; bura bedakai raka nisi muyeyo nufa mina vesi niyo, “Rama mina amiye bi Sei di mida!”
40Ma rema bedakai ka bi gaima gutuna are resi vegamadi. Ini fogori bi Mary Magdalene, Mary, kaere bi usika James ma Joseph di nono, ma Salome.#Lk 8.2–3 41Mina rema vene bi Galilee ri Iesu usi disi moi aedegamadi. Ma rema tau gade kaere bi Jerusalem ri inasa baeyadi ka minari.
Iesu guri aeyadi
(Mt 27.57–61; Lk 23.50–56; Jn 19.38–42)
42Kamini mina bi dogo dogo meda, Sabati meda bi agiya. Ye uriyenau nigi regamori, 43Joseph, Arimathea amiye, kaere bi kikifa reyadi kanisoro amiye yokoi, ma bi Sei di ourefeidena amena sana baego mina tua regamo, bi roaita gira dudu Pilate rofu bosi Iesu di roaita usa niyo. 44Ma sena muyeyo ago mina neidesi tururu resi iya rededi vene di tora amiye yokoi, mina nikaiteyo bi sena muyeyo ba. 45Iya rededi vene di ourefeidena amiye tora yaku niyo bi muyeyo ma Pilate mina neidegasa Joseph rofu niyo bi ini roaita moi digo. 46Ye Joseph bi varuka buni voi resi ini roaita moi soka resi mina varuka dudu kumu risi kono guri, bi fore ideri goeyadi, bi ini roaita mina ideri aeyo. Kamini fore moi kurevai resi guri di ida vena biri riyo. 47Ma Mary Magdalene, ma Mary, kaere bi Joseph di nono, bi ina aeyadi sana veyadi.
© 2016, Wycliffe Bible Translators, Inc. All rights reserved.