Ninge 11
11
A nianga tupas no tunotuno nong i kure ira ut na ninge: Devit ga pit iakan ra ninge.
1Aram narakoman tano Watong iau kis barahit taar.
Hobibih balik bia i tale ugu bia nu tange tagu bia,
“Pupungo laah hoing tiga maan uram tano num uladih.”
2Kanong warah, ira ut na sakena diet te taguro taar wara laplapot.
Diet te bul tagure ira udiet rumus taar tano hinau na laplapot
wara laplapot mekaia ra kankado diet ing ira kaati diet i gamgamatien.
3 #
Nng 119.152
Bia ing kana di halhaliare ira burena ira bilbilai,
asa mah um ing ira ut na takodas diet tale bia diet na gil?
4 #
Mai 1.2; Hab 2.20; Ais 66.1; Ni 4.2 No Watong ie kenam narakoman tano uno halhaliana hala.
No Watong i kis taar kenam tano uno kinkinis na harkurai aram ra mawe.
I nes tar ira tunotuno tano ula hanuo.
Ira matana i walar diet.
5 #
Jm 1.12
No Watong i walar ira ut na takodas,
ma i malentakuane ira ut na sakena ma diet ing diet sip ira dadas na magingin na halhaliarai.
6 #
Stt 19.24; Ese 38.22; Jer 4.11,12 Na burange ira lakit na iaah ma ra solam ing i kalkalangaruan taar ta ira ut na sakena.
Tiga mamahiana dadaip diet na kap bia udiet kunkulaan.
7Kanong warah, no Watong i takodas.
I manga sip ira takodasiana magingin.
Ira ut na takodas, diet na nes no matmataan tana.
© (Active), Wycliffe Bible Translators, Inc. All rights reserved.