熱門經文出自 Naṉ. 17

分享

Tura Apram nuwintinuíwi uwí takakuya nui̱ Uunt Yus wantintiuk chichareak “Witjiai Ashí Tujintkiachu Yus. Wi íimmianum tuke awajitsuk péṉker atá.

Yamaikia Apram tunashtatme antsu Aprajám tunattame. Warí untsurí aentsu apachrí̱ awajsashtatjamek. Tuma asam tú náamkattame.

Chichaman ámiji̱a̱i̱ yamái nájaneaj ju̱ka ukunmasha ame shuarumji̱a̱i̱sha tuke túrittiajna nuka ju̱i̱ti. Wikia tuke ame Yúsrumek átatjai ántsaṉ ame shuarumin Yusri̱sha átatjai.

“Ju̱i̱ti ámiji̱a̱i̱ chichaman nájaneaj nu. Ámeka untsurí aentsu apachri̱ átatme.

Tutai Yuska aya̱k “Antsu nekas ame nuwemi Sara yajutmartatme. Tura akiiniamtai Isak anaikiattame. Tura ní shuari̱ ukunam akiiniawartatna núnan tuke átinian nu chícham najanamunak Isakja̱i̱ ataksha yamaram awajsattajai.

Amincha tura amiiya̱ ukunam akiiniawartatna nunasha Kanaan nuṉkan yamái pujamna ju̱na tuke atumnia atí tusan ashí susattajme. Tura Wikia ame Yúsrum tuke átatjai” tímiayi.

Tutai Aprajámka tikishmar tsuntsumá nijia̱i̱ji̱a̱i̱ nuṉkan antiṉ wishikmammiayi. “¿Wi sian uwí takakeaj ju̱i̱sha yajutmarminiashitiaj. Tura winia nua̱r Sarasha nuwintia uwí takakusha uchin takusminiashit?”

Yus nuya̱sha Aprajáman chicharuk “Yamaikia ame nuwemi náari̱ṉkia Sarái áchattawai. Antsu yamaikia Sara átatui.

Atumí shunirí̱ nuapé̱ tsupirnarti. Nu túrakrum iiji̱a̱i̱ chícham najanamu umíaji títiatrume.

Tura ju̱yá̱ chikichík uwí jeamtai uchirmin Isakan Sara takustatui. Antsu nu uchiji̱a̱i̱ chícham najanamurka tuke átatui” tímiayi Yus.

Yamaiya̱ ju̱yá̱ juárkimiuk ashí áishmaṉ uchi akiiniamu uchu tsawant jeamtai tsupirnarti. Kame ame je̱e̱miin akiiniawarusha tura chíkich aents kuitji̱a̱i̱ sumakmasha mash tsupirnarti. Mái̱ metek nekas túrunawarti. Túrunamtai atumí aya̱shi̱i̱n chichaman Wi tuke iniaitsuk nájaneajna nu paant nekanattawai.