Chuj, San Sebastian - 1999 Edition (NT) Drama

Chuj, San Sebastian - 1999 Edition (NT)

Biblia Chuj San Sebastian © Sociedades Bíblicas Unidas, 1999.

A 'a jun sc'ul 'iljelal, 'ix 'ec' Jesús 'a jun b'e 'a scal trigo yet' eb' scuywum. Ax eb' scuywum cha, sch'in 'elt eb' sjolm 'ixim, sb'uchn eb' sc'uxu'. Palta 'ay jun tzo'n̈ ewin fariseo 'ix aln 'a eb' 'ixtic:
—¿Tas yuj wan e munlj 'ixtc 'a sc'ul 'iljelal tic? 'In may sleyl tze b'o 'ixtic, xchi ewin 'a eb'.
Yuj cha, 'ix yaln Jesús 'a ewin 'ixtic:
—¿Tom may 'aj xeyil 'a Ch'an̈ U'un̈, tas sb'ojnac can David 'a jun 'el, yic yoch swejl yet' eb' ajun yet'oc? 'Ochnc 'a yatut Dios, syamjnac jun tzo'n̈ pan yic Dios yaji. Swajnac, ya'n pax 'a eb' ajun yet' cha. A jun tzo'n̈ pan cha, cojn eb' ya'mal 'och qui ti 'a Dios, an̈j eb' 'ay sleyl swani. Palta man̈ mulc tas 'ix sb'o David chi 'a sat Dios.
An tic, tztac' walni tas tzb'o 'a sc'ul 'iljelal, yujto 'Ochnc in 'Anma'il, xchi Jesús 'a ewin fariseo cha.


Ax 'a junx sc'ul 'iljelal, 'ix 'och Jesús 'a yol capiya, 'ix cuywj 'a eb' yamn yaj ta'. Ata 'ayc' jun winc sicb'nac 'el swach' c'ab', jun 'ejmn̈ej caw tacn̈ cotnac. Ax ewin cuywjum 'a ley yic Moisés yet' ewin fariseo, 'ix stan̈wj ewin yila', toto 'oj b'oxc can sc'ab' win yuj Jesús 'a sc'ul 'iljelal cha. Yujto tznib'j ewin tzsay junc smul, sec tzyac' queja ewinac. Palta yojc Jesús tas wan snan ewinac. Yuj cha, xyaln 'ixtc 'a win sicb'nac 'el sc'ab' cha:
—Q'uen̈ lin̈an, cotn̈ quet' on̈, xchi 'a winac.
Yuj cha, 'ix q'ue lin̈n winac, 'ix jaw yet' eb'. Xlajw cha, 'ix yaln Jesús 'ixtc 'a ewinac:
—'Oj in c'anb'c jun tic 'ayex. ¿'Aja junc 'ay sleyl tzqui b'oc 'a sc'ul 'iljelal tze na'a? ¿Tztac' am tzqui b'oc jun tzo'n̈ tas wach', mto a jun tzo'n̈ maysch'olnil tzqui b'o'ec? ¿Tztac' am ca'nec b'oxc sc'ojl junc ya'ay, mto tzqui wach' milnec chamoc? xchi.
Xlajw cha, 'ix 'ec' q'uel-loc 'a eb' oyn 'och 'a 'a, 'ix yaln 'ixtc 'a winac:
—'A' cot a c'ab' 'ayin, xchi 'a winac.
'Ix ya'n cot win sc'ab' 'a 'a, 'ixta to b'i'an, 'ix b'oxi. Palta ton̈j xwach' cot yowl ewin fariseo cha, yuj cha, 'ix slajtin sb'a ewinac, tas 'oj yutc ewin Jesús.


A 'a jun tiempoal cha, 'ix 'at Jesús leslwoc 'a jun tzalan. Jun 'ac'wl 'ix leslwi 'a Dios ta'. Ax 'a sq'uin̈b'ial, xyawtn cot eb' scuywum 'a 'a. 'Ix si'n 'elt lajchwan̈ 'a scal eb', xya'n 'och yopiso eb' schecb'oc. Atn eb' schecb' tic: A Simón, tzcuch pax Pedro yu'uj, yet' jun yu'tac Andrés sb'i, yet' Jacobo, Juan, Felipe, Bartolomé, Mateo, Tomás, yet' junx Jacobo yunnal Alfeo, yet' junx Simón spartido eb' cananeo 'a yic yaln̈taxi. 'Ayc' pax Judas yu'tac Jacobo, yet' pax Judas 'aj Queriot, atn jun x'a'n 'och Jesús 'a yol sc'ab' chamel.


Xlajw cha, 'ix 'em paxt Jesús 'a jun tzaln chi yet' eb' scuywum cha. 'Ix 'och wan eb' 'a jun pan̈n 'a'lic. Til wal 'anma xjaw 'a eb' ta'. 'Ix laj cot eb' 'a smasnil yol yic Judea, yet' 'a chon̈b' Jerusalén. 'Ay pax eb' xlaj cot 'a sti a mar, atn 'a Tiro yet' 'a Sidón. Xwulc' eb' 'ab'xnoc 'a Jesús, yic tzb'ox can sc'ojl eb' yu'uj. Ax eb' 'aych demonio 'a 'a, 'ix b'ox pax sc'ojl eb' yu'uj. C'uxn tznib'j eb' 'ec' stzaych sc'ab' 'a Jesús cha, yujto tzlaj b'ox can sc'ojl eb' smasnil yuj spoder.


Ax Jesús, 'ix 'ec' q'uel-loc 'a eb' scuywum, 'ix yaln 'a eb' 'ixtic:
—Ax meb'a ex, caw wach' eyico', yujto 'ayx 'och 'a yol sc'ab' Dios.
Ax 'ay e wejl ticnec, caw wach' eyico', yujto 'oj e b'ut'ji.
—Ax tzex 'oc' ticnec, caw wach' eyico', yujto 'oj e tzewji.
Wuj an 'Ochnc in 'Anmal tic, 'oj chichnc 'och eb' 'anma 'ayex, 'oj ex spech 'elt eb' 'a scal, 'oj ex sb'uch pax eb'. Caw maysch'olnil 'oj yal eb' 'a e patc wu'uj. Palta 'a yic 'ixta 'oj ex yutc eb', caw wach' eyico'. Tzaljan̈ec, 'ay cab' e tzaljc'ojlal si'mb'il, yujto caw niwn spac 'oj e cha 'a satcha'an̈. 'Icha tz'ajx 'och 'a eyib'n̈ ticnec, 'ixta 'ajxnac 'och 'a yib'n̈ eb' schecb' Dios pecti'.
Palta ax xo rico ex ticnec, caw 'oltac ex, yujto tox xeyil swach'l 'a tic.
Ax xo b'utnn̈ej e c'ojl ticnec, caw 'oltac ex, yujto 'oj jawc jun tiempoal, caw 'oj 'och e wejel.
Ax xo tzex tzewjn̈ej ticnec, caw 'oltac ex, yujto 'oj eyoc' yuj cusc'ojlal.
A yic 'oj ex yal eb' 'anma wach'il, caw 'oltac ex, yujto 'ixta yutjnac eb' 'anma yaln wach'l eb' cob' yaljnac 'och sb'a schecb'oc Dios pecti'.


Palta tzwaln pax 'ayx ax tzeya'ch e chicn 'a tas tzwala: Caw tze chamc'ojlej eb' 'ajc'ojl yajch 'ayex, wach' tzeyutj e b'a 'a eb' tzchichn 'och 'ayex. A eb' tzc'ann cot yowl sc'ojl Dios 'a eyib'an̈, ax xo tze c'an cot swach'c'ojlal Dios 'a yib'n̈ eb'. A eb' tzex b'uchni, tzex leslwi yuj eb'. Toto 'ay mach tzma'n junc spac'b'il e ti', tzeyac' jun pac' xo chi smac'a'. Toto 'ay mach tzto'n 'ec' e chumpa, tzeyac' pax e camx yico'oc. Tzann̈j eb' tzc'an junc tas 'ayex, tzeya'n̈j 'a eb'. Ax eb' tz'i'n 'ec' junc tas 'ayex, man̈x e c'anx 'ec' 'a eb'. Toto tze nib'j caw wach' tzyutj sb'a eb' eyit 'anmal 'ayex, wach' tzeyutj e b'a 'a eb'.
Toto an̈j eb' 'ay schamc'ojlal 'ayx tze chamc'ojlej, ¿tom yel wach' jun chi tze b'o'o? An̈jtona eb' man̈ 'ojtnacoc Dios, 'in 'ixta tzyutj pax sb'a eb'. Toto an̈j eb' wach' tzyutj sb'a 'ayex, an̈j 'a eb' wach' tzeyutj e b'a, ¿tom yel wach' jun chi tze b'o'o? An̈jtona eb' man̈ 'ojtnacoc Dios, 'in 'ixta tzyutj pax sb'a eb'. Ax eb' tzc'ann majnanc junc tas 'ayex, toto an̈j 'a eb' tztac' ya'n pax sjel 'ayx tze na'a, an̈jta tzeyac'a, ¿tom wach' tze b'o 'ixta'? 'In 'ixta tzyutj eb' man̈ 'ojtnacoc Dios ya'n majnil junc tas 'a eb' yit 'anma'il, yujto tzna eb' to 'oj scha pax eb' junc chi 'a eb'. Palta ax xo tic, chamc'ojlejc eb' 'ajc'ojl yajch 'ayex. Wach'n̈j cab' tzeyutj e b'a. A yic tzeya'n junc tas majnil, man̈ e na', toto 'oj e chaxi. Toto 'ixta tzeyutj e b'a, caw niwn spac 'oj e cha'. Ax scheclj 'eli, to yunnal ex xo Dios, atn jun yel xo niwn yel'chi. 'In tzch'ox swach'c'ojlal pax 'a eb' maysch'olnil. 'O'ch cab' e c'ojl 'a eb' eyit 'anma'il, 'icha tzyutj qui Mam yo'ch sc'ojl 'ayex.


Man̈ e b'eyc'ojloc junc xo mach, toto 'ixta', ma'oj ex sb'eyc'ojloc Dios. Man̈ e comn aloc, to 'ay smul junc xo mach, toto 'ixta', ma'oj yal Dios to 'ay e mul jun xo. 'A'cn̈ej niwnc'ojlal, toto 'ixta', 'oj ex ya'n̈j pax niwnc'ojlal Dios jun xo. 'A'cn̈ej tas 'a eb' eyit 'anma'il, toto 'ixta', 'oj ya'n̈j pax Dios tas 'ayx jun xo. 'Icha junc tas tz'acn tz'aj yechtaxi, tzquilx 'ejmi, tzicb'tan̈xi, masnto tzq'ue ch'ucn sti', 'ixta 'oj yutc Dios ya'n tastc 'ayex. Yujto 'icha tzeyutj e b'a 'a eb' eyit 'anma'il, 'ixta 'oj ex yutc Dios jun xo.
Q'uinloc 'ay junc mach matz uj yilni, ¿tom tztac' squetzn 'at junc xo mach matz uj yiln yet'oc? Ton̈j tzto'b't sb'a eb' 'a sat junc pa'n schawn̈il. May junc cuywum 'ec'b'al yel'ch 'a yib'n̈ scuymal, palta a yic tzc'ay eb' cuywum cha, lajn tz'aj eb' yet' scuymal cha.
Q'uinloc 'ay junc eyit 'anma'il, tz'at c'ajloc c'alem 'a yol sat. Ax xo, q'uinloc a junc patzb' 'aych 'a yol e sat. Toto matz eyila to 'aych jun te chi 'a yol e sat cha, ¿tom 'oj stac' eyiln jab' c'alem chi 'ayb't 'a yol sat junx cha? Toto man̈ eyojcoc, to 'aych jun patzb' chi 'a yol e sat, ¿tom 'oj stac' eyaln 'a junx chi 'ixtic? Yaj 'elt jun c'alem 'a yol a sat, tzin nib'j tzwij 'elt 'ayach, ¿tom 'oj e chic 'a 'a? Toto 'ixta tzeyutj eyalni, caw chab'sat ex. Yowlal tze b'ab'l 'ijcan 'elt jun patzb' chi 'a yol e sat cha. 'Ixta to b'i'an, 'oj stac' eyilni. Ax eyi'n can 'elt jun c'alem chi 'a yol sat jun eyit 'anmal cha.


A jun tzo'n̈ snun te wach', may junc maysch'olnil sat tzyac'a. An̈jtona jun tzo'n̈ snun te maysch'olnil, may junc wach' sat tzyac'a. Yuj sat junjn te', tz'ojcax 'eli, tas yaj junjn te'. Q'uinloc 'ay junc snun higo ticnec, ¿tom q'uix sat tzyac'a? Q'uinloc 'ay pax junc snun manzan, ¿tom tz'usp sat tzyac'a? A eb' wach' snab'en, wach' tzyutj eb' sb'eyb'al, yujto cojn tas wach' 'ay 'a snab'en eb'. Ax eb' maysch'olnil snab'en, maysch'olnil tzyutj eb' sb'eyb'al, yujto an̈j maysch'olnil 'ay 'a snab'en eb'. Yujto a tas 'ay 'a qui nab'en junjn on̈, a tzcala.


¿Tas yuj tzeyal 'ayn 'ixtic: Mamin, Mamin, xe chi, palta matz eyiclj 'icha tas tzwala? 'Oj wal 'ayex, tas 'oj 'aj eb' tzjaw 'ab'xnoc 'ayin, toto tzyiclj eb' 'icha tzwala: Lajn 'oj 'aj eb' 'icha junc winc 'ix sb'o yatut, 'ix sjoyl lu'um, masnto xcheclj stzatzl yich lu'um. Axta 'ix sb'o 'ejm yipnub'al yich yatut cha. Xlajw sb'o yatut cha, ax a niwn a tzb'ey 'a stz'ey, 'ix q'uib' chan̈ a', caw ow xjaw chel-loc a 'a yich, palta ma'ix 'ib'x xon jac jun n̈a chi yuj a', yujto caw wach' yaj 'ejm yipnub'al yich 'a stzatzl lu'um. Palta ax eb' tz'ab'xni 'ayin, toto matz yiclj eb' 'icha tzwala, lajn 'oj 'aj eb' 'icha junc winc 'ix sb'o yatut 'a yib'n̈ lu'um. May yipnub' yich 'ix ya'cn 'ejm 'a xab'. Ax a niwn a tzb'ey 'a stz'ey, 'ix q'uib' chan̈ a'. Caw ow xjaw chel-loc a 'a yich, ax yatut cha, yajn̈ej x'em junnjoc. Caw xlan̈chj 'ejm 'a jun 'ejmn̈ej, xchi Jesús 'a eb'.

收聽 Lc 6