Eastern Arctic Inuktitut Bible © Canadian Bible Society, 2012, 2021-2023.

ᑕᕝᕙ ᕿᓔᓪᓗ ᓄᓇᕐᔪᐊᕐᓗ ᐱᔭᕇᓚᐅᖅᐳᑦ, ᐃᓂᖃᖅᑐᓪᓗ ᑖᒃᑯᓇᓂ. ᐅᓪᓗᐃᑦ 7ᖓᓐᓂ ᒎᑎᐅᑉ ᐱᓇᓱᐊᖅᑕᓂ ᐱᔭᕇᕋᒥᒋᑦ, ᑕᕾᖅᓯᖅᐳᖅ ᓴᓇᔭᓕᒫᒥᓂᑦ ᐱᓇᓱᐊᓚᐅᖅᑕᒥᓂᑦ. ᒎᑎᐅᓪᓗ ᐅᓪᓗᐃᑦ 7ᖓ ᓮᒻᒪᖅᑎᑉᐹ ᐃᑦᔪᕐᖕᓁᑎᓪᓗᒍᓗ, ᑕᕝᕙᓂ ᒎᑎ ᑕᕾᖅᓯᓚᐅᕋᒥ ᐱᓇᓱᐊᖅᑕᓕᒫᒥᓂᑦ ᐱᓐᖑᖅᑎᑦᓯᓪᓗᓂ. ᐅᑯᐊ ᑕᕝᕙ ᑭᖑᓕᕇᑦ ᕿᓚᖕᒥ ᓄᓇᒥᓗ ᐱᓐᖑᖅᑎᑕᐅᓚᐅᖅᑐᑦ.

ᑍᑦᓱᒪᓂ ᐊᑕᓂᖅ ᒎᑎ ᓄᓇᕐᔪᐊᕐᖕᒥᒃ ᕿᓚᖕᒥᐅᑕᓕᒫᓂᒡᓗ ᐱᓐᖑᖅᑎᑦᓯᑎᓪᓗᒍ, ᓱᓕ ᐱᕈᖅᑐᖃᓚᐅᓐᖏᓚᖅ ᓄᓇᒥ ᐱᕈᖅᓯᐊᒃᓴᑦ ᐱᕈᓕᓚᐅᖏᒻᒪᑕ ᐊᑕᓂᖅ ᒎᑎ ᓯᓚᓗᒃᑎᑦᓯᓚᐅᖏᒻᒪᑦ ᓱᓕ ᓄᓇᒧᑦ, ᐃᓄᖕᓂᒃ ᓄᓇᓕᕆᔪᒃᓴᖅᑕᖃᓚᐅᖏᒻᒪᑦ ᐱᕈᖅᑐᒃᓴᑦ ᐃᓂᒃᓴᖏᓐᓂᒃ. ᓴᓗᐊᖅᐸᓪᓕᐊᔪᖅ ᖁᒻᒧᐊᖃᑦᑕᓚᐅᖅᐳᖅ ᓄᓇᓕᒫᖅ ᖃᐅᓯᖅᑎᓪᓗᒍ.
ᐊᑕᓂᕐᓕ ᒎᑎ ᐃᓄᒃᓴᓕᐅᖅᐳᖅ ᓄᓇᐅᑉ ᐃᓚᖓᓂᒃ ᐱᓪᓗᓂ; ᓱᖅᓗᖓᒍᑦ ᐊᓂᖅᓵᕐᕕᒋᕚ ᐃᓅᓯᖃᕐᖕᓇᖅᑐᒥᑦ; ᐃᓄᒡᓗ ᑕᕝᕙ ᐆᒻᒪᖅᐳᖅ.
ᐊᑕᓂᕐᓗ ᒎᑎ ᐱᕈᖅᓰᕕᓕᐅᖅᐳᖅ ᐄᑕᓂᒥᒃ, ᓯᕿᓂᐅᑉ ᓄᐃᕕᐊᑕ ᓇᓛᓂ; ᐊᖑᓪᓗ ᑕᕝᕗᓐᖓᖅᑎᑉᐹ ᓴᓇᓚᐅᖅᑕᓂ. ᓄᓇᒥᓪᓗ ᐊᑕᓂᖅ ᒎᑎ ᓇᐹᖅᑐᓂᒃ ᑕᒤᓐᓂᒃ ᐱᕈᖅᑎᑦᓯᕗᖅ ᑕᑯᒥᓇᖅᑐᓂᒃ ᓂᕿᒃᓴᐅᑦᓯᐊᖅᑐᓂᒃ, ᐱᕈᖅᓰᕕᐅᓪᓗ ᕿᑎᖓᓃᑦᑐᖃᕆᕗᖅ ᓇᐹᖅᑐᒥᒃ ᐃᓅᓯᖃᕐᖕᓇᖅᑐᒥᒃ, ᓇᐹᖅᑐᖃᕆᓪᓗᓂᓗ ᐱᐅᔪᒥᒃ ᐱᐅᖏᑦᑐᒥᒡᓗ ᖃᐅᔨᒪᓕᕐᖕᓇᖅᑐᒥᒃ.
ᑰᒃᑕᖃᖅᐳᖅ ᐄᑕᓂᒥᑦ ᑰᒃᑐᒥᒃ ᐱᕈᖅᓰᕕᖕᒥᒃ ᐃᒻᒥᖅᓱᐃᔪᒥᒃ, ᑕᕝᕙᓐᖓᓪᓗ ᑕᒪᓐᓇ ᑰᒃ ᓯᑕᒪᐅᓕᖅᑲᖓᕗᖅ. ᓯᕗᓪᓕᖅ ᑰᒃ ᐊᑎᖃᖅᐳᖅ ᐱᓴᓐᒥᒃ; ᓄᓇᐅᑉ ᕼᐊᕕᓚᒥᒃ ᐊᑎᓕᐅᑉ ᐊᕙᑎᓕᒫᖓᒍᑦ ᑰᒃᑐᒥᒃ, ᒎᓗᖃᖅᑐᒥᒃ. ᑕᕝᕙᓂᓗ ᓄᓇᒥ ᒎᓗ ᐱᐅᔪᐊᓘᕗᖅ; ᑎᓕᐊᒻ ᑎᐱᑦᓯᐊᕆᒃᑐᒃᓴᖅ ᐊᒻᒪᓗ ᐅᔭᕋᖕᒥᒃ ᐆᓂᒃᒥᒃ ᐊᑎᓕᖕᒥᒃ ᑕᕝᕙᓃᑦᑐᖃᕆᕗᖅ. ᑰᓪᓗ ᐂᑉᐹ ᐊᑎᖃᖅᐳᖅ ᒋᕼᐅᓂᒥᒃ; ᓄᓇᐅᑉ ᑯᔅᒥᒃ ᐊᑎᓕᐅᑉ ᐊᕙᑎᓕᒫᖓᒍᑦ ᑰᒃᑐᒥᒃ. ᑰᓪᓗ ᐱᖓᔪᖓᑦ ᐊᑎᖃᖅᐳᖅ ᑍᒍᕆᓯᒥᒃ, ᐊᓯᕆᐊᑉ ᖃᐅᓕᕐᕕᐊᑕ ᓇᓛᒍᑦ ᑰᒃᑐᖅ. ᑰᓪᓗ ᓯᑕᒪᖓᑦ ᐊᑎᖃᖅᐳᖅ ᐃᕗᕅᑎᒥᒃ.
ᐊᑕᓂᐅᓪᓗ ᒎᑎᐅᑉ ᐊᖑᑦ ᐄᑕᓂᒧᐊᖅᑎᑉᐹ ᐱᕈᖅᓰᕕᖕᒧᑦ ᓄᓇᒥᒃ ᐋᖅᑭᒃᓱᐃᖁᓪᓗᒍ ᑲᒪᒋᓗᒍᓗ. ᐊᑕᓂᐅᓪᓗ ᒎᑎᐅᑉ ᐊᖑᑦ ᐱᖁᓪᓚᕆᒃᓗᒍ ᐅᖃᐅᑎᕚ, “ᓇᐹᖅᑐᓂᒃ ᑕᒤᓐᓂᑦ ᐃᓱᒪᖅᓱᖅᓗᑎᑦ ᐱᕈᖅᑐᖏᓐᓂᒃ ᓂᕆᔪᓐᓇᕐᖕᓂᐊᖅᐳᑎᑦ ᐱᕈᖅᓰᕕᖕᒦᑦᑐᓂᑦ. ᓇᐹᖅᑐᒥᓪᓕ ᐱᐅᔪᒥᒃ ᐱᐅᖏᑦᑐᒥᒡᓗ ᖃᐅᔨᒪᓕᕐᖕᓇᖅᑑᑉ ᐸᐅᕐᖓᖏᓐᓂᒃ ᓂᕆᔪᒃᓴᐅᓐᖏᓚᑎᑦ, ᓂᕆᕕᒋᒍᕕᐅᒃ ᐅᓪᓗᒥ ᑕᕝᕙᓂ ᑐᖁᔪᒫᖅᐳᑎᑦ.”
ᐊᑕᓂᕐᓕ ᒎᑎ ᐅᖃᖅᐳᖅ, “ᓈᒻᒪᓐᖏᓚᖅ ᐊᖑᑦ ᐃᓄᑑᒃᐸᑦ; ᑖᑦᓱᒪ ᐃᑲᔪᖅᑎᒃᓴᖓᓂᒃ ᓴᓇᓂᐊᖅᐳᖓ ᓈᒻᒪᒋᓗᒍ ᐂᑉᐸᕆᓂᐊᖅᑕᖓᓂᒃ.” ᐊᑕᓂᖅ ᒎᑎ ᓄᓇᒥᑦ ᐱᓪᓗᓂ ᐆᒪᔪᓂᒃ ᓇᑎᕐᖕᓇᒥᐅᑕᕐᖕᓂᒃ ᓴᓇᕗᖅ; ᑎᖕᒥᐊᓂᒡᓗ ᖃᖓᑕᕙᒃᑐᓂᒃ, ᐊᖑᑎᒧᐊᖅᑎᓪᓗᓂᒋᓪᓗ ᖃᓄᖅ ᑍᓂᐊᕐᖕᒪᖔᒋᑦ ᖃᐅᔨᔪᒪᓪᓗᓂ; ᖃᓄᑐᐃᓐᓇᖅ ᐊᖑᑎᐅᑉ ᑍᖕᒪᒋᑦ ᐆᒪᔪᑦ ᖃᓄᐃᑦᑐᑐᐃᓐᓁᑦ, ᑍᒫᒃ ᐊᑎᖃᓕᓚᐅᖅᐳᑦ. ᐊᖑᑎᐅᓪᓗ ᐊᑎᖃᖅᑎᑉᐰᑦ ᐆᒪᔪᓕᒫᑦ ᓄᔪᐊᖅᑐᑦ ᓄᔪᐃᑦᑐᓪᓗ, ᑎᖕᒥᐊᓕᒫᓪᓗ ᖃᖓᑕᕙᒃᑐᑦ, ᐆᒪᔪᓕᒫᓪᓗ ᓄᓇᒦᑦᑐᑦ ᑭᓯᐊᓂᓕ ᑕᒪᒃᑯᐊ ᐊᖑᑎᐅᑉ ᐃᑲᔪᖅᑎᒃᓴᖓᓂᒃ ᓈᒻᒪᒋᔭᖓᓂᒃ ᐱᑕᖃᖅᑐᖃᓚᐅᓐᖏᓚᑦ.
ᐊᑕᓂᐅᓪᓕ ᒎᑎᐅᑉ ᐊᖑᑦ ᐃᑎᔪᒥᒃ ᓯᓂᓕᖅᑎᑉᐹ, ᓯᓂᒃᑎᓪᓗᒍᓗ ᑐᓕᒫᖓᑕ ᐃᓚᖓᓐᓂᒃ ᐲᖅᓯᕗᖅ ᐲᖅᓯᕕᒋᔭᓂᓗ ᒪᒥᑎᑉᐹ ᐅᕕᓂᖓᓗ; ᐊᑕᓂᐅᓪᓗ ᒎᑎᐅᑉ ᑐᓕᒫᖅ ᐲᖅᑕᓂᒃ ᐊᖑᒻᒥᑦ ᓴᓇᕚ ᐊᕐᖕᓇᓕᐊᕆᓪᓗᒍ ᑐᓂᓪᓗᒍᓗ ᐊᖑᒻᒧᑦ. ᐊᖑᓪᓗ ᐅᖃᖅᐳᖅ,
“ᐅᓇ ᐊᓱᐃᓛᒃ ᓴᐅᓂᖅ ᓴᐅᓂᓐᓂᑦ ᐱᓯᒪᔪᖅ
ᐅᕕᓂᐅᓪᓗᓂᓗ ᐅᕕᓂᓐᓂᑦ ᐱᓯᒪᔪᖅ,
ᐊᕐᖕᓇᒥᒃ ᐊᑎᖃᕐᖕᓂᐊᓕᖅᐳᖅ, ᐊᖑᒻᒥᑦ ᐲᖅᑕᐅᓯᒪᖕᒪᑦ.”
ᑍᒤᓐᓂᖓᓄᑦ ᐊᖑᑎᐅᑉ ᐊᑖᑕᓂ ᐊᓈᓇᓂᓗ ᕿᒪᖕᓂᐊᖅᐹᒃ ᓄᓕᐊᓂ ᑲᑎᖔᖅᓗᓂᐅᒃ, ᑖᒃᑯᐊᒡᓗ ᐅᕕᓂᒃᑯᑦ ᐊᑕᐅᓯᐅᓕᖅᐴᒃ.
ᐊᖑᓪᓗ ᓄᓕᐊᖓᓗ ᑕᒪᕐᖕᒥᒃ ᐊᓐᓄᕌᖃᓚᐅᓐᖏᓚᒃ, ᑲᓐᖑᓱᒐᑎᒡᓗ.

收聽 ᒨᓯᓯ ᓯᕗᓪᓖᑦ 2