Pokomchi, Western - 2012 Edition (NT) Drama

Pokomchi, Western - 2012 Edition (NT)

Pan jenaj kꞌi̱j nok rilom chic Jesus chi kꞌe̱ꞌ qꞌuihal take tinamit xitahkanic je reh, xjohtic johtok china̱ jenaj yu̱kꞌ eh naxoj-o̱j cꞌolok ru̱cꞌ i hoj raj tahkanel, xitzꞌuka̱ꞌ jok ri̱b chi kacꞌuhbaljic chi jeꞌ wili:
«Reꞌ hat-tak reꞌ xa jenaj ti nakꞌor tak jeꞌ ricab ncꞌuhtunic ru̱cꞌ acapew-bal tak, sukbok acꞌux tak maj reꞌ Dios reꞌ nkꞌatbic cho kꞌoric cu pan taxa̱j, xiyew chic cho chana̱ tak i ricuseꞌsbal.
«Jeꞌ woꞌ reꞌ chaꞌn i hat-tak reꞌ suk tokꞌic tak ruꞌum tiꞌcꞌaxic nacꞌul tak maj reꞌ Dios nariyeb risukquil acꞌux tak nok jeꞌ reꞌ wilca̱t tak wi̱ꞌ.
«Jeꞌ woꞌ, sukbok woꞌ acꞌux hat-tak reꞌ chꞌublic ti wach acꞌux tak maj reꞌ Dios nariyeb aweh tak i kꞌoro̱j chi nariyeb jeꞌ ricab nok jenoꞌ winak riyew cahnok riyeꞌa̱b queh take ra̱ꞌ riꞌsil.
«Reꞌ hat-tak reꞌ kꞌe̱ꞌ nawotowej tak chi naribanaric i coric, jeꞌ ricab rotowjic quiwaꞌ quiha̱ꞌ ncaꞌn take maꞌ quiniqꞌuem ta chic wiꞌc haꞌ, sukbok acꞌux tak maj ruꞌum chi jeꞌ reꞌ anoꞌjbal tak narimanlajic wach ruꞌum i Dios reꞌ nawotowej tak reꞌreꞌ.
«Sukbok woꞌ acꞌux hat-tak reꞌ naquetelej tak quiwach awas acha̱kꞌ tak, maj reꞌ aj woꞌ Dios nariquetelem woꞌ cho awach hat-tak.
«Jeꞌ woꞌ, reꞌ hat-tak reꞌ risakbem chic wach awa̱mna tak i Dios sukbok woꞌ acꞌux tak, maj reꞌ hat-tak nawilom tak wach i Dios nachicꞌuhtaj ri̱b aweh tak.
«Jeꞌ woꞌ reꞌ chaꞌn i hat-tak reꞌ tipitbic tak reh chi maꞌ noquic ta cho wolic, maj ruꞌum chi reꞌ rinoꞌjbal kAja̱w Dios nacꞌam tak tzꞌeht reh jeꞌ wili narikꞌormojic chawi̱j tak cuꞌum take awich cꞌacharel:
‹Reꞌ take reꞌ til racꞌu̱n rixkꞌu̱n take i Dios, nqui narikꞌormojic chawi̱j tak.
«Jeꞌ reꞌ ajic ruꞌum nok chi reꞌ Dios reꞌ nkꞌatbic kꞌoric ar pan taxa̱j xipꞌut chic i kꞌatoj kꞌoric chana̱ tak ayuꞌ wach acꞌal, sukbok acꞌux tak wi ruꞌum reh rinimjic riCꞌuhbal enacꞌul tak i tiꞌcꞌaxic.
Nikꞌor chi jeꞌ reꞌ maj wi ruꞌum reh nitahkaljic i hin enacꞌul tak tiꞌcꞌaxic, tzꞌujuric on enkꞌormojic chucuj kꞌoric chawi̱j tak, jenaj rinimal sukquil cꞌuxlis enyeꞌeric aweh tak.
Jeꞌ reꞌ nikꞌor ruꞌum chi eticojoric tak chiwach i Dios chi jeꞌ quicab take cho raj kꞌorol Cꞌuhbal najtir kꞌi̱j. Jeꞌ ricab chi reꞌ take cho aj kꞌorol cꞌuhbal reꞌreꞌ xyeꞌeric cho juꞌjun quisi̱ ruꞌum reh ricꞌuluric i tiꞌcꞌaxic, reꞌ hat-tak nariyeb woꞌ aweh tak i Dios jenaj asi̱ tak kꞌe̱ꞌ holonquilal ar pan taxa̱j. Sukbok aj acꞌux tak kꞌuruꞌ nachacꞌul tak i tiꞌcꞌaxic xa ruꞌum chi hat-tak waj tahkanel.


«Tiwi̱ꞌ tak ayuꞌ wach acꞌal chi jeꞌ ricab ncamanic atzꞌa̱m nok cu wilic riquiꞌal. Maꞌ nacꞌul nchel aweh tak jeꞌ ricab ricꞌul atzꞌa̱m chi nanelic riquiꞌal nquiljic je cuꞌum take cꞌacharel ruꞌum nok maꞌxta chic bih ricamanej queh. Ruꞌum chi jeꞌ reꞌ ncꞌuluric ru̱cꞌ atzꞌa̱m, reꞌ take cꞌacharel nquiyakꞌabej woꞌ pan okis. Jeꞌ reꞌ kꞌuruꞌ jeꞌ ricab ncꞌuluric ru̱cꞌ jenoꞌ tinamit wilic johtok china̱ jenoꞌ yu̱kꞌ chi maꞌ eta nsahchic pan nakꞌ wachi̱s ruꞌum take sakombal quisakomonic cho chipam pan tak chakꞌab, jeꞌ woꞌ reꞌ hat-tak wilca̱t china̱ acꞌal wili chi risakomsjic wach quinoꞌjbal take tinamit reh chi naquinaꞌbem wach i kAja̱w Dios. Jeꞌ woꞌ, jeꞌ ricab nok jenoꞌ ok sakombal maꞌ nkoporic ta chi naritacꞌabjic na̱ pan jenoꞌ tzꞌak acꞌal xun, nkoporic laꞌ chi nariyeꞌeric johtok wa taxa̱j chi sakombal queh take wilque̱b cok pan pa̱t, jeꞌ aj woꞌ reꞌ nicꞌuhtunic i hin reꞌ nsakomonic pa̱m capew-bal, chacꞌuhtaj tak queh cꞌacharel reh chi reꞌ Dios wilic cho ar pan taxa̱j entioxmojic johtok cuꞌum take cꞌacharel jeꞌ ru̱cꞌ equiꞌehtꞌalanic reh chi kꞌe̱ꞌ ato̱b i cꞌuhtunic naꞌn tak reꞌreꞌ.

«Reꞌ nicꞌuhtunic xchalic nikꞌor, ma̱capaj tak chi naribokom wach i Cꞌuhbal yeꞌo̱j reh Moyses chꞌi̱l xquikꞌor take aj najtir raj kꞌorol Cꞌuhbal i Dios. Maꞌxta! Maꞌ jeꞌ ta reꞌ naribanam cu̱cꞌ i cꞌuhbal reꞌreꞌ. Reꞌ cok haj wilic naribanam cu̱cꞌ reꞌ chi narimanlajic wach. Ruꞌum aj reꞌ til coric nikꞌor aweh tak chi jeꞌ ricab chi cu rehtal maꞌxta chic i taxa̱j richꞌi̱l acꞌal cu reꞌ narisahchic wach i cꞌacharic, jeꞌ woꞌ reꞌ chiꞌnchel kꞌoro̱j cahnok chiwi̱j i hin narojic elok wach cu rehtal nmanlajic wach chiꞌnchel take Cꞌuhbal quikꞌoric chiwi̱j chipam i hu̱j wilic wi̱ꞌ i Cꞌuhbal Yeꞌo̱j reh Moyses, to̱b ta maꞌ naꞌlic ti take reh jeꞌ ricab jenoꞌ tꞌuch rehtalil kꞌoric. Jeꞌ reꞌ kꞌuruꞌ, xa hab wach jenoꞌ maꞌ rinimej ta take maꞌ naꞌlic ti take reh cꞌuhbal reꞌreꞌ eh ricꞌuhtaj queh take cꞌacharel chi maꞌxta quinimem, reꞌreꞌ maꞌ reꞌ ta soꞌ holohic laj aj tijinel chiwach i Dios reꞌ nkꞌatbic cho kꞌoric cu pan taxa̱j. Raj nchel aj tijinel reꞌ rinimej take cucꞌ cꞌuhbal reꞌreꞌ eh ricꞌuhtaj queh tinamit chi naquinimem, reꞌ cok reꞌ til holohic laj aj tijinel chiwach i Dios. Ruꞌum aj chi jeꞌ reꞌ, reꞌ hat-tak kꞌuruꞌ manlic wach cꞌuhtunic chaꞌn tak maj til nikꞌor aweh tak chi reꞌ Dios reꞌ nkꞌatbic cho kꞌoric cu pan taxa̱j maꞌxta richopom ana̱ tak wi reꞌ ato̱b laj acꞌuhtunic naꞌn tak maꞌ kꞌe̱ꞌ ta woꞌ chic manlic wach chiwach i cꞌuhtunic ncaꞌn take cow laj aj niminel reh Cꞌuhbal Yeꞌo̱j reh Moyses chꞌi̱l take aj tijem ri̱j cꞌuhbal reꞌreꞌ.

«Reꞌ hat-tak abiram tak chi reꞌ take cow laj aj niminel reh Cꞌuhbal Yeꞌo̱j reh Moyses chꞌi̱l take aj tijem ri̱j cꞌuhbal reꞌreꞌ, jeꞌ wili risakomsjic wach ncaꞌn i cꞌuhbal reꞌ xkꞌormojic cho najtir kꞌi̱j chi maꞌxta ribanaric i cansanic:
‹Reꞌ riban cansanic, reꞌ aj cok reꞌ tanlic chiri̱j chi narichꞌukuric kꞌoric china̱, nqui take.
«To̱b ta nchel til coric chi jeꞌ reꞌ nquikꞌor, maꞌ xa ta ruꞌum reꞌreꞌ tanlic chiri̱j jenoꞌ cꞌacharel chi narikꞌataric kꞌoric china̱, reꞌ laꞌ hin nikꞌor woꞌ aweh tak chi xa hab wach jenoꞌ aweh tak njohtic cho joskꞌil pa ra̱mna chiri̱j i ras richa̱kꞌ to̱b ta nak xa ritzꞌujuric ta nak ti eriban, reꞌreꞌ tanlic woꞌ chiri̱j chi enkꞌataric kꞌoric china̱ chi quiwach take chꞌukul wach mahc. Jeꞌ reꞌ kꞌuruꞌ, ruꞌum chi xa hab wach jenoꞌ cꞌacharel to̱b ta nchel xa eritzꞌuj i ras richa̱kꞌ, riyew ri̱b pan yohbal chi eno̱j pan kꞌa̱kꞌ reꞌ ncꞌulmujic wi̱ꞌ tiꞌcꞌaxic, reꞌ hat-tak wi wilic jenoꞌ amahc tak chiwach jenoꞌ awich cꞌacharel tak, pe̱t chaꞌn tak jeꞌ ricab nak eriban jenoꞌ xa hab wach aweh tak wi ta nak enponic chi rikꞌahsjic risi̱ chiwach i Dios ar chiwach i lokꞌ laj yeꞌa̱b cꞌatbal si̱. Reꞌreꞌ nacꞌolok cho pa ricꞌux ar chi richꞌiꞌtam ri̱b ru̱cꞌ i ras richa̱kꞌ, reh chi encꞌulmujic cho risi̱ ruꞌum i Dios, pe̱t nak eno̱j ru̱cꞌ i ras richa̱kꞌ chi ripahkaljic cuybal rimahc eh nok cu ripahkam chic cho cuybal rimahc, cu reꞌ chic ruꞌ nsoljic woꞌ chic je chi rikꞌahsjic risi̱ chiwach i Dios chiwach i lokꞌ laj yeꞌa̱b cꞌatbal si̱, majeꞌ? Jeꞌ woꞌ reꞌ chaꞌn hat-tak kꞌuruꞌ nok atikꞌa̱b ok chic awi̱b tak ru̱cꞌ awas acha̱kꞌ tak, chatikꞌa̱ꞌ woꞌ tak awi̱b ru̱cꞌ i Dios.
«Jeꞌ reꞌ ajic, nok jenoꞌ aweh tak wilic rimahc chiwach jenoꞌ rich cꞌacharel chaꞌn tak jeꞌ ricab nak eriban jenoꞌ xa hab wach aweh tak reꞌ wilic ricꞌa̱s ru̱cꞌ jenoꞌ ras richa̱kꞌ. Reꞌreꞌ chi juncꞌam ritikꞌa̱ꞌ wach ricꞌaxquilal richꞌi̱l i ras richa̱kꞌ nah be̱h, majeꞌ? Jeꞌ reꞌ riban nok chi cu jaꞌ quiponic ta ru̱cꞌ aj chꞌukul wach mahc, maj wi xkꞌahsjic nchel pan kꞌab aj chꞌukul wach mahc reꞌ enkꞌahsanic woꞌ reh pan kꞌab aj chaꞌjanel tzꞌahpel chi naricojoric pan che̱ꞌ, til coric nikꞌor aweh tak chi maꞌ eta ta chic nelic cho ar, cu rehtal ritoj cho chiꞌnchel ricꞌa̱s wilic.

«Reꞌ risakomsjic wach i cꞌuhbal kꞌoro̱j cho queh aj najtir kꞌi̱j chiri̱j chi maꞌxta ribanaric i cꞌoyomal, reꞌreꞌ abiram woꞌ tak cu̱cꞌ take cow laj aj niminel reh Cꞌuhbal Yeꞌo̱j reh Moyses chꞌi̱l take aj tijem ri̱j cꞌuhbal reꞌreꞌ. Reꞌ take reꞌ coric nquikꞌor chi nok jenoꞌ hab wach rituna̱ꞌ ri̱b ru̱cꞌ jenoꞌ ixok reꞌ maꞌ reꞌ ta rehqꞌue̱n, reꞌreꞌ nkajic pan cꞌoyomal raj laꞌ hin nikꞌor aweh tak chi reꞌ cꞌacharel reꞌ rilow je wach jenoꞌ ixok maꞌ reꞌ ta rehqꞌue̱n eh ricapaj pa ra̱mna chi tunlic ta nak chic ru̱cꞌ, reꞌreꞌ nkajic woꞌ pan cꞌoyomal xa ruꞌum ricapewjic chi jeꞌ reꞌ. Jeꞌ reꞌ kꞌuruꞌ nikꞌor aweh tak chi chiꞌnchel take capew-bal ncutbic aweh tak pan mahc chakꞌeb tak lok chiri̱j acꞌux tak, jeꞌ ricab nak resmejic lok jenaj queh nakꞌ awach tak enaꞌn wi ta nak xa ruꞌum reh ruꞌ etitakꞌabjic tak je pan kꞌa̱kꞌ reꞌ ncꞌulmujic wi̱ꞌ i tiꞌcꞌaxic. Nikꞌor chi jeꞌ reꞌ maj chaweh hat-tak, sakbih nak chi enawesaj tak lok i jenaj queh nakꞌ awach tak wi ta nak ru̱cꞌ reꞌreꞌ eriban chi maꞌ eta nak titakꞌmajic tak je pan kꞌa̱kꞌ chi manlic awach tak. Jeꞌ woꞌ nak reꞌ enaꞌn tak ru̱cꞌ jenoꞌ queh akꞌab tak wi ta nak xa cuꞌum queh ruꞌ etitakꞌabjic tak je pan kꞌa̱kꞌ reꞌ ncꞌulmujic wi̱ꞌ tiꞌcꞌaxic, majeꞌ? Nikꞌor chi jeꞌ reꞌ maj chaweh hat-tak sakbih nak chi enayocꞌ tak lok akꞌab reꞌreꞌ wi ta nak ru̱cꞌ reꞌreꞌ eriban chi maꞌ eta nak titakꞌabjic tak je pan kꞌa̱kꞌ chi manlic awach tak.
«Jeꞌ woꞌ, reꞌ take winak reꞌreꞌ nok ncaꞌn i cꞌuhtunic chiri̱j i cꞌoyomal nquicꞌuhtaj woꞌ i takꞌanic xiban cahnok i Moyses chi jeꞌ wili:
‹Jenoꞌ winak ra̱j richꞌakam i rehqꞌue̱n, pe̱t chitikꞌa̱ꞌ jenoꞌ hu̱j reꞌ eritzꞌihmbaj wi̱ꞌ take riwi̱ꞌ chi narichꞌakam wi̱ꞌ ri̱b chꞌi̱l i rehqꞌue̱n
eh nok riyeb chic reh rehqꞌue̱n i hu̱j reꞌreꞌ, cu reꞌ aj ruꞌ eriban chi erichꞌak ri̱b chi cꞌacharic, nqui rikꞌor.
«Coric ruꞌ chi jeꞌ reꞌ nquicꞌuhtaj take reꞌ, raj laꞌ hin nikꞌor aweh tak chi xa reꞌ cok wi reꞌ ehqꞌuenbe̱s rijop wach ricaxa̱ra ru̱cꞌ toco̱m chic winak, xa reꞌ aj reꞌ ruꞌ wilic rimahc chi nkajic pan cꞌoyomal. Tzꞌa̱b ruꞌ, wi reꞌ bahilbe̱s richꞌak je i rehqꞌue̱n chi maꞌxta jenoꞌ riwi̱ꞌ, reꞌ bahilbe̱s reꞌreꞌ wilic woꞌ rimahc chi reꞌ rehqꞌue̱n nkajic pan cꞌoyomal chꞌi̱l jenoꞌ chic winak reꞌ encꞌambic reh chi rehqꞌue̱n.

«Reꞌ take cow laj aj niminel reh Cꞌuhbal Yeꞌo̱j reh Moyses chꞌi̱l take aj tijem ri̱j cꞌuhbal reꞌreꞌ, nabiraj woꞌ tak chi nok ncaꞌn i cꞌuhtunic chiri̱j i cꞌuhbal kꞌoro̱j cho queh aj najtir kꞌi̱j chi naquinimem eh chi maꞌxta quiyakꞌabem pan co̱k paꞌ bih quikꞌorbal nquiyew chiwach i Dios, reꞌ take reꞌ jeꞌ wili nquikꞌor:
‹Nanayew akꞌorbal tak chiwach i Lokꞌ laj Ajabe̱s Dios, wi toco̱m chic kꞌoric nakꞌor tak chi rijelow-bal ribihnal i Dios, ru̱cꞌ reꞌreꞌ maꞌ timahcanic ta tak chiwach wi maꞌ xanimej tak akꞌorbal ayeb tak, nqui nquikꞌor.
«Coric ruꞌ chi jeꞌ reꞌ nquicꞌuhtaj take reꞌ, raj laꞌ hin nikꞌor aweh tak chi nachayew akꞌorbal tak ma̱kꞌor tak jenoꞌ bihnal. Xa ta nak jeꞌ wili enakꞌor tak:
‹Til wili taxa̱j til coric i cꞌahchiꞌ nikꞌorom, maꞌ tiquitak.
«Jeꞌ reꞌ nikꞌor maj reꞌ hat-tak maꞌxta awajawric tak china̱ i nicꞌ paꞌ nimal ncꞌuluric johtok ar, reꞌ laꞌ til wilic rajawric china̱ reꞌreꞌ xa reꞌ woꞌ i Ajabe̱s Dios. Jeꞌ woꞌ, ma̱kꞌor tak chi jeꞌ wili:
‹Til wili kich tiꞌjolal, til coric i cꞌahchiꞌ nikꞌorom, maꞌ tiquitak.
«Jeꞌ reꞌ nikꞌor maj reꞌ hat-tak maꞌxta awajawric tak china̱ ncꞌuluric cu̱cꞌ take cꞌacharel ayuꞌ wach acꞌal, reꞌ laꞌ til wilic rajawric china̱ reꞌreꞌ xa reꞌ woꞌ i Ajabe̱s Dios. Jeꞌ reꞌ kꞌuruꞌ, xa ta nak reꞌ tinamit Jerusalen enakꞌor tak ribihnal chi riyeꞌeric akꞌorbal tak. Jeꞌ reꞌ nikꞌor maj reꞌ hat-tak maꞌxta awajawric tak china̱ nicꞌ nimal ncꞌuluric ru̱cꞌ i tinamit reꞌreꞌ, reꞌ laꞌ til wilic rajawric china̱ reꞌreꞌ xa reꞌ woꞌ i Ajabe̱s Dios ruꞌum chi reꞌreꞌ wilic chi aj kꞌatal kꞌoric china̱. Jeꞌ woꞌ, xa ta nak reꞌ rismal ana̱ tak enakꞌor tak bihnal nachayew akꞌorbal tak maj xa ta nak woꞌ china̱ reꞌreꞌ wilic awajawric hat-tak. Jeꞌ reꞌ nikꞌor maj wi ta nak sak chic i rismal ana̱ tak, maꞌxta awajawric tak chi rimiksjic woꞌ chic chi kꞌek, on wi ta nak kꞌek, maꞌxta woꞌ awajawric tak chi rimiksjic chi sak.
«Jeꞌ reꞌ kꞌuruꞌ nachayew achi̱ꞌ tak xa manlic ru̱cꞌ i take kꞌoric wili reꞌ raj rikꞌormojic:
‹Reꞌ hin til nanibanam reꞌreꞌ on reꞌ hin til maꞌxta nibanam reꞌreꞌ, tiqui ok tak.
«Jeꞌ reꞌ nikꞌor maj xa reꞌ wach i cꞌacharel wilic cho jotꞌo̱j pa ra̱mna curman chi reh chi erikꞌor jenoꞌ bihnal reh chi encojoric wach i rikꞌorbal.


«Reꞌ take cow laj aj niminel reh Cꞌuhbal Yeꞌo̱j reh Moyses chꞌi̱l take aj tijem ri̱j cꞌuhbal reꞌreꞌ nabiraj woꞌ tak chi nok ncaꞌn i cꞌuhtunic chiri̱j i cꞌuhbal kꞌoro̱j cho queh aj najtir kꞌi̱j, reꞌ rikꞌor chi xa hab wach enpuchꞌuric i nakꞌ wach ruꞌum jenoꞌ, chi puchꞌ woꞌ chic nakꞌ wach i hab wach xbanic reh on wi xpaxjic ware̱ chi kꞌabis, chi paxej woꞌ chic ware̱ i hab wach xbanic reh, reꞌ take reꞌ jeꞌ wili nquikꞌor:
‹Reꞌ hab wach nbanic jenoꞌ tiꞌcꞌaxic, tare̱t chi naribanaric woꞌ chic rijelow-bal reh, nqui nquikꞌor.
«Coric ruꞌ chi jeꞌ reꞌ nquikꞌor, raj laꞌ hin nikꞌor aweh tak chi ma̱ban tak chic rijelow-bal i chaj bih tiꞌcꞌaxic nbanaric aweh tak. Jeꞌ ricab cu̱cꞌ take quisecꞌbic aweh tak nikꞌor chi maꞌ ticꞌuꞌlunic tak chi quiwach. On wi reꞌ take reꞌ nca̱j woꞌ quitikim juꞌ aseqꞌueric tak, chacana̱ꞌ tak chi encaꞌn aweh tak. Jeꞌ woꞌ, wi hab wach take equicꞌambic je aweh tak chi wolic chiwach i chꞌukul wach mahc ruꞌum nca̱j quimakꞌam asoꞌ tak, chayew tak kꞌab queh chi encaꞌn chi jeꞌ reꞌ. Wi cu nca̱j laꞌ woꞌ quimakꞌam ajuc ro̱k tzꞌih roxlo̱cꞌ lok asoꞌ, chayew woꞌ tak kꞌab queh chi enquimakꞌ aweh tak. Jeꞌ woꞌ, wi xat-toljic tak cuꞌum take sol aj Ro̱ma chi ricꞌamaric je jenoꞌ ihk, maꞌ xa ta junhi̱ꞌl nahtil ro̱k chacꞌam tak je, caꞌhiꞌl laꞌ chic nahtil ro̱k chacꞌam tak je i ihk reꞌreꞌ. Jeꞌ woꞌ chic, wi wilic jenoꞌ ripahkaj ritoꞌbal aweh tak, chayew tak reh i paꞌ bih ripahkaj. On wi xipahkaj riquime̱l aweh tak, ma̱ban woꞌ tak chi maꞌ eta nayew tak reh.


«Reꞌ take cow laj aj niminel reh Cꞌuhbal Yeꞌo̱j reh Moyses chꞌi̱l take aj tijem ri̱j cꞌuhbal reꞌreꞌ, jeꞌ wili cꞌuhtunic ncaꞌn chiri̱j i cꞌuhbal kꞌoro̱j cho queh take aj najtir kꞌi̱j:
‹Chacꞌax awas acha̱kꞌ eh chawixowej wach awaj ixowonel, nqui cꞌuhtunic ncaꞌn.
«To̱b ta woꞌ jeꞌ reꞌ cꞌuhtunic ncaꞌn, reꞌ hin nikꞌor aweh tak chi chacꞌax tak take aj ixowonel jeꞌ woꞌ chatoꞌbej tak take. Reꞌ chic take quisihtinic aweh tak chi narichalic tiꞌcꞌaxic chana̱ tak, chaꞌn ati̱j tak chiqui̱j chi ripahkaljic ricuseꞌsbal i Dios chi quina̱ to̱b ta tiquitzꞌuj tak on ncaꞌn tiꞌcꞌaxic aweh tak.
«Chacꞌax take awaj ixowonel tak kꞌuruꞌ reh chi ru̱cꞌ reꞌreꞌ encꞌutunic chi manlic chi hat-tak racꞌu̱n rixkꞌu̱n i Ajabe̱s Dios reꞌ wilic cho pan taxa̱j maj reꞌreꞌ ricꞌuhtaj cho ricꞌaxbal ru̱cꞌ riyeꞌeric cho jab chꞌi̱l i kꞌi̱j chi quina̱ take holohic chꞌi̱l take maꞌ holohic ta quinoꞌjbal.
«Chi jeꞌ aj reꞌ riwi̱ꞌ rinoꞌjbal i Dios, reꞌ hat-tak chacꞌax woꞌ tak take awaj ixowonel tak. Nikꞌor chi jeꞌ reꞌ maj wi xa reꞌ woꞌ ti take quicꞌaxbic aweh tak nacꞌax tak take jeꞌ ricab i noꞌjbal ncaꞌn take aj molol to̱j reh Ro̱ma, reꞌ hat-tak maꞌ jenoꞌ asi̱ enacꞌul tak ru̱cꞌ i Dios wi jeꞌ reꞌ tibanic tak. Jeꞌ woꞌ maꞌ eta nacꞌul tak asi̱ wi xa cu̱cꞌ woꞌ awas acha̱kꞌ tak jeꞌ ru̱cꞌ suk wilque̱b awu̱cꞌ tak, xa hat-tak chic chakꞌlam eh raj laꞌ cu̱cꞌ take jeꞌ ru̱cꞌ quixowonic awach tak xa ta nak ticꞌalenic tak, jeꞌ ricab ncaꞌn awu̱cꞌ tak take maꞌ quilokꞌonic ta wach i kAja̱w Dios. Jeꞌ reꞌ ajic, reꞌ hat-tak coric ok wach acꞌux tak cu̱cꞌ chiꞌnchel cꞌacharel jeꞌ ricab i kAja̱w Dios wilic cho pan taxa̱j til coric wach ricꞌux cu̱cꞌ chiꞌnchel take cꞌacharel.

收聽 SAN MATEO 5