Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

वी टेम गलील का राजा हेरोदेस ईसू का बारा में हामळयो। वणी आपणाँ नोकराऊँ क्यो, “ओ वोईस बतिस्मा देबावालो यहुन्नो हे! ज्यो मरिया तका मेंऊँ पाछो जी उट्यो हे, ईं वाते वींमूँ अचम्बा का काम परगट वेवे हे।”
काँके पेल्याँ हेरोदेस आपणो भई फिलिपुस जद्याँ जीवतो हो तद्याँ वींकी लुगई हेरोदियासऊँ ब्याव कर नाक्यो हो, जणी वजेऊँ यहुन्ने हेरोदेस ने ओळमो दिदो हो के, थने थाँरे भई की लुगई ने राकणी नेमा हस्याबूँ सई ने हे, तो हेरोदियास के केबाऊँ हेरोदेस वींने जेल में नकवा दिदो हो। अन वो वींने मारणो छातो हो, पण मनकाऊँ दरपतो हो काँके मनक वींने परमेसर का आड़ीऊँ बोलबावाळो मानता हा।
पण जद्याँ राजा हेरोदेस को जनम को दन आयो, तो हेरोदियास की छोरी मेमाना का हामे नाच बतान राजा हेरोदेस ने घणो राजी किदो। ईंपे वणी होगन खान बचन दिदो, “मांग ज्यो थूँ मांगी, वो मूँ थने देऊँ।”
वाँ आपणी बई का हिकावा में आन बोली, “बतिस्मा देबावाळा यहुन्ना को मातो कटवान थाळी में मेलन देदो।”
राजो घणी दकी व्यो, पण आपणाँ होगनऊँ अन मेमाना का मस हुकम दिदो के, मातो दे दिदो जावे। अन वाँकाणी जेळ में कुई लोग ने खन्दान यहुन्ना को मातो कटवा नाक्यो। अन वींको मातो थाळी में सजान लायो ग्यो अन वी छोरी ने दे दिदो अन वाँ वींने आपणी बई का नके लेगी। तद्याँ यहुन्ना का चेला आया वींका मरिया तका डील ने लेग्या अन वींने एक कबर में गाड़ दिदो। अन पछे जान यो हमच्यार ईसू ने दिदो।


जद्याँ ईसू ओ हुण्यो, तो वो नाव पे चड़न वटूँ कणी हून्नी जगाँ में परोग्यो। लोगाँ ओ हुणन समन्द का कनारे-कनारे वाँका पाच्छे वेग्या। जद्याँ ईसू नावऊँ बारणे आया तो वणा एक मोटी भीड़ देकी तो वाँने वाँका पे दया आगी अन माँदा मनकाँ ने हव किदा।
जद्याँ हाँज पड़गी, तद्याँ वाँका चेला वाँका नके आया अन क्यो, “अटे हून्नी जगाँ हे अन मोड़ो वेरियो हे लोगाँ ने परी हिक दो, ताँके वीं गाम में खाणो मोल ले सके अन खावे।”
पण ईसू वाँऊँ क्यो, “वाँके जाबा की कई जरूत कोयने! थाँईस अणाने खाबा का वाते दो।”
चेला वाँने क्यो, “माकाँ नके पाँच रोट्याँ अन दो माछळ्याँ ने छोड़न ओरी कई ने हे।”
ईसू क्यो, “वाँने मारे नके लावो।” तद्याँ वणा मनकाँ ने क्यो के, रेटे बेट जावो अन वणा पाँच रोट्याँ अन दो माछळ्याँ लिदी अन हरग का आड़ी देकन धन्नेवाद दिदो अन रोट्याँ का कवा करन चेला ने दिदी चेला वाँने मनकाँ में बांट दिदी। तद्याँ हाराई खान धापग्या, तो चेला बंची तकी रोट्याँ का बारा ठोपळा भरिया। अन वटे खाणो खाबा वाला में लुगायाँ अन छोरा-छोरी ने छोड़न, पाँच हजार मनक मनकईस हा।


तद्याँ वाँकाणी आपणाँ चेला ने नाव पे चड़ाया ताँके वीं वाँकाऊँ पेल्याँ पेली परा जावे, जतरे मूँ लोगाँ ने हिक देन अऊँ। वो लोगाँ ने खन्दान परातना करबा ने एक मंगरा पे पराग्यो अन हाँज हुदी वो एकलो हो। वी दाण नाव समन्द का वच्छा-वच्छ लेराऊँ हिळोळा लेरी ही, काँके हवा हामेंऊँ चालरी ही।
ईसू रात के चोती पोर में लगे-भगे भाग फाट्या समन्द पे चालतो तको वाँका नके आयो। चेला वाँने पाणी पे चालता तको देकन दरपग्या अन केबा लागा, “ओ भूत हे!” अन दरपऊँ हाका-भार मेलबा लागा।
तद्याँ ईसू तरत वाँकाऊँ क्यो, “हिम्मत राको! मूँ हूँ, दरपो मती!”
पतरस वाँने क्यो, “ओ परबू यद्याँ थूँ हे, तो मने आपणाँ नके पाणी पे चाळन आबा को हुकम दे।”
ईसू क्यो, “आव!” तद्याँ पतरस नाव पूँ उतरन ईसू का नके जाबा ने पाणी पे चाळबा लागो। पण वो डूँज ने देकन दरपग्यो, अन जद्याँ डुबवा लागो तो हाका-भार मेलन क्यो, “हो परबू, मने बचा!”
ईसू तरत हात लाम्बो करन वींने पकड़ लिदो अन वींकाऊँ क्यो, “ये कम विस्वास करबावाळा, थाँ काँ भेंम किदो?”
तद्याँ वीं नाव में चड़ग्या, तो वइरो ढबग्यो। ईंपे वाँकाणी ज्यो नाव में हाँ, वीके धोग लगान क्यो, “हाँचाई, थूँ परमेसर को पूत हे।”


जद्याँ वीं समन्द पार करन पेली पाल्ड़े गन्नेसरत नगर का नके पूग्या। वटा का मनकाँ ईसू ने ओळक लिदा अन अड़े-भड़े का हाराई देस में हमच्यार खन्दायो अन वीं हाराई माँदा मनकाँ ने वाँका नके लाया, अन वाँकाऊँ परातना करबा लागा के, वो वाँने आपणाँ गाबा का पल्‍ला की कोर के अड़बा दो अन जतरा भी अड्या, वीं हाराई हव वेग्या।

收聽 मत्ती 14