Traducción Bíblica: Tojolabal, 2021 © Sociedad Bíblica de México, A.C.,2021www.sbm.org.mx Grabación de Tojolabal ℗ Hosanna, 2024

Tojolabal - 2021 BSM (NT) Non Drama

Tsa'an ti' ch'ak k'e'uke tek'an ja ma'tik tey b'a tsomjeli, ti'xa yi'aje och ja Jesús b'a sti' sat ja Pilato, yuj ja ye'n mandaranum ay b'a Roma. Yajni k'otye ja b'ay ja Pilato ti och sle'e yi smul ja Jesusi, ti yalawe'a:

—Niwan mandaranum, ja winik iti, jta'atikon ja b'a jchonab'iltikoni, ja wa'n sjomjel yi' s'olom ja kristyano jumasa, ja wa'n yaljel mi oj ka'tikon yi kontribusyon ja mandaranum sb'a Roma, wax cho yala ye'n ja Mesiasi. Sok ja jawi wa sk'ana yal yuj jun mandaranum ja ye'n, —xchiye.

Jaxa Pilato, ti sjob'o yi ja Jesusi:

¿Merani ma ja we'n smandaranuma ja judio jumasa'a?

Ti yala ja Jesusi:

—Ja jawi we'n waxa wala, —xchi ja Jesusi:

Ja'yuj ja Pilato ti yal yab' ja pagre jumasa ma'tik mas niwak ja ya'tel sok spetsanil ja kristyano jumasa ma' ti' tsomani:

—Ja k'en mini jun smul wax ta'a yi ja winik ita.

Jaxa ma'tik wa sle'awe yi smuli, jel tsats st'i'e'i, ti cho yalawe'a:

—Sok ja jas wa'n sje'jeli wa'n sjomjel yi s'olom ja kristyano jumasa b'a slujmal ja Judea. Ti stuluyi b'a slujmal Galilea, jaxa ya'n julta man ili, —xchiyexta.

Yajni yab' ja Pilato ja jastal jawi, ti sjob'o ta yuj sb'a Galilea ja Jesusi. Jaxa ye'nle'i, yalawe ja'i, ja'yuj ti yala ja Pilato ye'n wa sna'a ja mandaranum Herodes jasun oj sk'u'l yi, yujni ye'n ay schol ja b'a Galilea'a. Ja'yuj ti jekji ochyi b'a sti sat ye'n ja Jesusi, ja ye'n ja k'ak'u jawi tey b'a Jerusalen.

Jaxa Herodesi, yajni yila ja Jesusi, jel gusto yila, yuj ja ayxa k'ak'u wa sk'ana oj sna' sb'aj yuj ja jastik wa smaklani, sok wa smajla oj yil oj sk'ul jun milagro. Sok jel ja jas job'o yi'i, jaxa Jesusi mini jas yala'a.
Jaxa pagre jumasa ma'tik mas niwak ja ya'tel sok ja ma'tik wa sje'a ja mandar it a'ji yi' ja Moisesi, wa sle'awe lek yi ja smuli.
Jaxa Herodes sok ja soldado jumasa ti och yixtala'uke lek ja Jesusi, ya'we slap jun tsamal sk'u jastal sb'a jun mandaranum, jasa, toj k'e'nanel wa'ne sok. Ti'xa cho yi'aje och yi ja Pilato.
Jaxa Herodes sok ja Pilato, mi lek wax yila sb'aje ajyi, jaxa k'ak'u jawi jelni lek yila sb'aje'a.


Ja Pilato ti stsomo ja pagre jumasa ma'tik mas niwak ya'tel sok ja ma'tik ay ya'teli, sok spetsanil ja kristyano jumasa, Ti yala yabye'a:

—We'n a wi'ajex jan ja winik iti, sok we'n wax cho a walawex wa'n sjomjel yi' s'olom ja kristyano jumasa b'a Roma, b'a sti'a sat we'nlex jelxa ja jas job'ota yi'i, ja'yuj ja ke'n mix ta'ayi smul. Jach'ni ja Herodesi, mini wax cho sta'a yi smula, ja'yuj cho sjeka jan pilan majke. Ja winik iti mini jas mi lekuk wa'n sk'ulajela, cho mini sb'ejuk oj chamuka, —xchi ja Pilato. Oj kal ke a mak'juk lek, tsa'an ti' oj sijpa'a.

Jaxa spetsanil ja kristyano jumasa ma' tey tiwi, ti awaniye'a:

—Ala, a smil'e ja Jesusi. Ja'xa sijpa ja Barrabasi, xchiyexta ja kristyano jumasa.

Ja Barrabasi, yujni ay smul merana, och lutan yuj ja smul ye'n ya k'e jun niwan k'umal sb'a ja mandaranum sb'a Roma ja yajni tey b'a Jerusaleni, yuj cho ay ma' smilunej.
Ja Pilato wa sk'ana oj sijpuk ja Jesusi. Ja'yuj ti cho sk'uman sb'aj sok pilan majke ja ma'tik tey tiwi. Jaxa ye'nle'i jel tsats k'e awanuke:

—A cham b'a cruz—. —A cham b'a cruz, xchiyexta:

B'a yoxil majke ti yala ja Pilato:

¿Jasyuj ja lom waxa k'anawex oj chamuk b'a? ¿Jasunk'a mi lek sk'uluneji? Ja ke'n wax na'a mi b'a jas mi lek skulunej ja winik iti, mi sb'ejuk ja oj chamuki. Oj kala wabyex mak'awik lek, tsa'an ti oj sijpuka.

Jaxa kristyano jumasa, tsatsal awanel ochye, wa sk'anawe ke'a chamuk b'a cruz ja Jesusi, ja'yuj ti'xa k'u'laji yi'e yuj ja Pilato ja jas wa sk'anawe'i. Ja'yuj ti'xa yala a smil'e b'a cruz ja Jesús ja jastal wa sk'ana ja ye'nle'i, ti'xa sijpa ja Barrabas it ochel lutan ajyi yuj ja milwaneli, yuj ja cho ya k'e jun niwan k'umali.


Jaxa soldado jumasa ti'xa yi'aje ja Jesús b'a oj waj yawe lokan b'a cruz, yajni ti wajume b'a b'eji, ti sta'awe jun winik Simon sb'i'il ti sb'aj b'a Cirene, ja k'ak'u jawi julumto b'a wits ti yalawe yab' t'ilan a sk'ech och ja cruzi, sok tix waj nochan b'a spatik ja Jesusi.
Jitsan kristyano nochan sok ja Jesusi, ja b'a snalan ja kristyano jumasa jawi, ay chab' oxe ixuke wa'nexta ok'el yuj ja scham k'ujole'i. Ti sutu sb'aj ja Jesusi, ti yal yabye'a:

—Mi lom la ok'yex yuj ja ke'n ixuke b'a Jerusalen, mas lek ja la ok'yex yuj wa wokol we'nlexi sok sb'a wa wuntikilexi. Yuj ja ojni k'otuk ja k'ak'u oj yal ja kristyano jumasa: Jel lek oj yil ja ixuk ma mi yilawe sat untikaneli—. —Jel lek ja ixuke ja ma' mi ya'we chu'nuk yal untiki—. Ja kristyano jumasa iti, oj sk'an'e ayukxta wax t'enjiye yuj jun wits b'a oj ch'ak miljuke ele. K'elawilex ja ke'n mi b'a jas mi lek k'ulunej jasa k'ela jastal oj smil oneta, ¿Ja'uktoma ja ye'nle mi jach'ni oj miljuke jastal jaw yuj ja mini jun sb'ej ja jas wa'ne sk'u'lajeli? —xchi ja Jesusi.

Ti Cho yi'aje och chawane mulanum b'a oj smil'e' lajan sok ja Jesusi. Yajni k'otye ja b'a oj yawe lokan ja Jesusi b'a it lajan sok sb'akel s'olom cham winiki, jaxa tantik soldado jumasa, ti'xa sts'apawe sklabo'il ja yok sk'ab' ja Kajwaltik Jesús b'a cruzi, cho jach'ni sk'u'lane yi ja chawane mulanumi, ja juni ti a'ji b'a stojol sk'ab' ja Jesusi, jaxa juni ti b'a spakaxil sk'ab'.
Tsa'an, ti yala ja Jesusi: —Tatey, mok wa stup ja smul ja kristyano jumasa iti. —Ja ye'nle'i, yuj mi wa sna'awe ja jas wa'ne sk'u'lajeli, —xchi ja Jesusi.
Jaxa tantik soldado jumasa yilawe ma' oj yi kan ja sk'u' ja Jesusi. Ja kristyano jumasa ti wa'ne sk'eljel ja jas wa'n ek'eli, jaxa ma'tik ay ya'teli wa'nexta sk'e'najel ja Jesusi, ti wax yalawe'a: Ja ye'n jel skolta ja tuk jumasa, yuj k'a ye'n meran ja Mesiasi tsa'ub'al yuj ja Dyosi, a b'a skolta sb'a stuch'il b'a, —xchi yexta.
Jach'ni ja tantik soldado jumasa, cho wane'xta sk'e'najel ja ye'nle'i. Wa sk'ana oj ya'we yu' pajal ja' ja Jesusi, Ti yalwe yab'a: —Ta meran k'a we'n smandaranuma ja judio jumasa, koltan a b'aj b'a, —xchiye.
Ja b'a s'olom ja cruz b'ay ja Jesusi, ti ts'ijb'anub'al jastal iti: —Ja winik iti ja'ni smandaranum ja judio jumasa'a, —xchi.
June ja ma ayni smul meran ti lokan b'a cruz lajan sok ja Jesusi, ti och yala:

¿Ta yuj k'a meran we'n ja ma' Tsa'ub'ali? Kolta a b'aj ja we'n b'a, cho koltayotikon ja ke'ntikoni, —xchi.

Jaxa jun ma' tey b'a stojol sk'ab'i ti skomo'a:

¿Ch'ab'anan ja we'n, mi'ma t'un wala xiw yuj ja Dyosi? ¿Cho ti'ni aya yoj wokol ja we'n tak? Ja ke'ntiki sb'ejni ja wa'ntik yi'jel wokola, yuj ja mini lek ja jas k'ulunejtiki; jaxa winik iti, mini sb'ejuk ja wa'n yi'jel wokola, yuj ja mi jas b'a mi lek sk'uluneji, —xchi ja ye'ni.

Ja winik jawi ti cho yal yab' ja Jesusi:

—Kajwal, ja yajni la k'ot ja b'a oj ja k'ul mandari, ti'xa na'awon t'unuk ja ke'n.

Ti yala ja Jesusi:

—Man ya'n wax kala wab'i, ti'ni oj ajyan jmok ja b'a oj ajyukon b'a jel tsamali.


Mojan kulan k'ak'u k'ik' b'i ele, spetsanil ja niwan chonab'i, k'ik'inal kani, man oxe ora b'a och k'ak'u, ja kortina sb'a snajtsil tsomjeli, sch'i'a sb'aj nalan, man k'e'el sok man ko'el. Jaxa Jesusi, ti awani tsats leka, ti yala'a: —Tatey, ja kaltsili, ti wax ka'a b'a wa k'ab'.
Tsa'an yajni ch'ak yal jachuki, ti chama.
Jaxa skapitanil ja soldado jumasa, yajni yila ja jastal ek'i, ti och stoy ja Dyosi, ti yala'a: Ja smeranil ja winik iti, jun lekil winik, —xchi.
Spetsanil ja kristyano jumasa ma'tik tey tiwi, yajni yilawe jastal wa'n ek'eli, ti ch'ak kumxuke b'a snaje, jel cham k'ujol wajye yuj ja sna'awe yuj smul ye'nle ja jas wa'n ek'eli.
Spetsanil ja ma'tik wax na'ji sb'aj yuj ja Jesusi, sok ja ixuke jumasa nochob'al jan yuj man b'a Galilea, ti kanye tek'an najat kan sk'el'e' ja jas wa'n ek'eli.


Ay jun winik sb'i'il Jose ti sb'aj b'a Arimatea. Ja ye'n jel toj sok jel lek ja jas wa sk'ulani, wa'n smajlajel jas k'ak'u oj jak sje' ja ya'tel ja Dyos ja b'a lu'umi. Ja ye'n wanix och ja b'a niwan tsomjeli wa sk'u'lane ja ma'tik ay scholi, jaxa yajni yalawe ja b'a stsomjele'i ja Jesusi ojni chamuka mini t'un lek yab' ja ye'na.
Ja'yuj ti wa sk'umuk ja Pilato, b'a waj sk'an yi ja skwerpo ja Jesús b'a oj smuke. Ja'yuj ti waj ya'ko'uk ja skwerpo ja Jesús b'a cruzi, spotso lek sok jun niwan sakal k'u'uts, ti yi'a och b'a k'e'en jotab'al b'a jun patak'. Ja k'e'en jawi mitoni ma' wax mukji'a. Ja k'ak'u jawi viernes, ja k'ak'u wa schapa sb'aje ja judio jumasa b'a wa smajlaye ja sk'ak'u'il jijleli, mojanxani oj stulyi'a.
Ja ixuke jumasa it nochane jan sok ja Jesús man b'a Galilea, wajye sok ja Jose ja b'a k'e'eni, b'a waj yil'e' jastal ya'wekan ja skwerpo ja Jesusi. Yajni ch'ak yil'e' jastal kani, ti'xa kumxiye b'a snaje'a, schapawe jun yajnal b'a jelx ajb'ani yik'il b'a oj sjax eyi' ja skwerpo ja Jesusi.
Jijliye'ni ja sk'ak'u'il jijlel jastal ni wax yala ja mandar it ajiyi ja Moisesi.

收聽 Lucas 23