Khasi Bible (BSI) ℗ The Bible Society of India, 2016 

Khasi Bible (BSI)

Hynrei, U Jisu u la leit noh sha u lum ki Olib. Te la dang step eh u la wan pat sha ka templ, bad u paidbah baroh u la wan ha U: bad haba U la shong, U la hikai ïa ki. Te ki nongthoh bad ki Pharisi ki wallam ha u ïa ka briew ïa kaba la kem ha kaba klim: bad haba ki la buh ïa ka hapdeng, ki la ïa-ong ha u, “Ko Nonghikai, la lap ïa kane ka briew ha ka jingleh hi ba ka dang klim. Te u Moses u la hukum ïa ngi ha Ka Hukum ban lynthem maw ïa kiba kum kita; me te, me ong kumno?” Ki la ïa-ong ïa kane te ba ki da tynjuh ïa u, ba ki lah ban mudui ïa u. Hynrei, U Jisu haba u la dem ha tbian, u la thoh da la ka shynriah'ti ha ka khyndew. Hynrei, katba ki la dem kylli ïa u, haba u la pynïeng ïa lade, u la ong ha ki, “Uta uba khlem pop hapdeng jong phi, to un lynthem nyngkong ïa u maw ha ka.” Pat ruh haba u la dem ha tbian, u la thoh ha ka khyndew. Ki te, haba ki la ïohsngew, bad ba ki da sngewkynduh, ki la mih noh uwei pa uwei, ki da sdang naduh kiba kham tymmen haduh ki bakhatduh: te la iehnoh marwei ïa U Jisu bad kata ka briew kaba dang ïeng hapdeng. Te U Jisu haba u la pynïeng ïa lade, bad ba um ïohi ïano ïano ruh, hynrei, tang ïa kata ka briew, u la ong ha ka, “Ko briew, hangno kito ki nongmudui jong pha? ym don ba la pynrem ïa pha?” Ka te ka la ïathuh, “Ym don, A Trai.” U Jisu u la ong te ha ka, “Nga ruh ngam pynrem ïa pha; to khie leit noh, bad to wat leh pop shuh.”

Ynda kumta, U Jisu u la ïathuhkhana pat ha ki, u da ong, “Nga long U Jingshai jong ka pyrthei: uta uba wan bud ïa nga, un ym ïaid ha ka ba-dum, hynrei, un ïoh ka jingshai jong ka jingim.” Namar kata, kita ki Pharisi ki la ïa-ong ha u, “Me, me phla shaphang ïa lade; ka jingphla jong me kam long kaba shisha.” U Jisu u la ïathuh bad u la ong ha ki, “Wat la nga phla shaphang ïa lade, kata ka jingphla jong nga te ka long kaba shisha, naba nga tip nangno nga la wan bad shano nga leit: hynrei, phi phim tip nangno nga la wan, bad shano nga leit. Ma phi kat kum ka rukom ka doh phi bishar; nga ngam bishar ïano ïano ruh; lada nga bishar ruh, kata ka jingbishar jong nga ka long kaba shisha; namar ngam long marwei, hynrei, ma nga bad uta U Kpa uba la phah ïa nga. La thoh ruh de ha Ka Hukum jong phi, ba ka jingphla ar ngut ki briew ka long kaba shisha: nga long uba phla shaphang ïa lade hi, U Kpa uba la phah ïa nga, u ruh u phla shaphang jong nga.” Ynda kumta, ki la ïakylli ïa u, “Hangno uta U Kpa jong me?” U Jisu u la ïathuh, “Phim ithuh lymne ïa nga lymne ïa uta U Kpa jong nga; lada phi la ithuh ïa nga, phin da la ithuh ïa uta U Kpa jong nga ruh.” Ïa kine ki ktien, U Jisu u la kren ha ka jaka jingkynshew, haba u dang hikai ha ka templ; te ym don ba la kem ïa u, naba ka por jong u kam pat la jia.

Ynda kumta, U Jisu u la ong pat ha ki, “Ngan sa leit noh, te phin ïawad ïa nga, bad phin ïap ha kata ka pop jong phi; sha kaba nga ngan sa leit, phi phim lah ban ïawan.” Namar kata, kita ki Jiw ki la ïa-ong, “Un sa pynïap noh ïa lade? ba u ong, ‘Sha kaba nga ngan sa leit, phi phim lah ban ïawan.’ ” U la ong te ha ki, “Phi, phi long kiba na tbian, nga uba na jrong: phi, phi long na kane ka pyrthei, nga ngam long na kane ka pyrthei. Namar kata, nga la ong ha phi, ba phin ïap ha kita ki pop jong phi: namar lada phim ngeit ba nga, nga long ma u, phin ïap ha kita ki pop jong phi.” Namar kata, ki la ïakylli ïa u, “Me long uei?” U Jisu u la ïathuh te ha ki, “Ujuh uba nga ïathuh ruh ha phi naduh mynno mynno ruh: nga don shibun kiei kiei ruh ban ïathuh, bad ban bishar shaphang jong phi; hynrei, uta uba la phah ïa nga, u long uba shisha, bad kiei kiei ruh kiba nga, nga la ïohsngew na u, ïa kita keiñ nga ong ha ka pyrthei.” Kim sngewthuh ba u la ïathuh ha ki shaphang uta U Kpa; namar kata, U Jisu u la ong ha ki, “Ynda phi la kyntiew ïa U Khun u briew, hangta phin ithuh ba nga, nga long ma u, bad ba ngam leh ei ei ruh em na lade hi; hynrei, kat kumba U Kpa jong nga u la hikai ïa nga, ïa kita kiei kiei ruh nga ïathuh. Te uta uba la phah ïa nga, u long lem bad nga; uta U Kpa um shym la iehnoh marwei ïa nga; naba ha la ka sngi nga leh ïa kiei kiei ruh kiba pynsngewbha ïa u.” Haba u dang kren ïa kine kiei kiei ruh, bun ki la ïangeit ha u.

Namar kata, U Jisu u la ong ha kita ki Jiw kiba la ïangeit ha u, “Lada phi ïaisah ha ka ktien jong nga, phi long ki synran jong nga da shisha; bad phin ïoh ithuh ïa kata ka jingshisha, bad kata ka jingshisha kan pyllait noh ïa phi.” Ki la ïathuh ha u, “Ngi long u symbai u Abraham, te mynno mynno ruh ngim shym la shong mraw hano hano ruh; te kumno me ong, ba yn pyllait noh ïa phi?”
U Jisu u la ïathuh ha ki, “Shisha, shisha nga ong ha phi, ba u briew baroh uba ïai-leh ïa ka pop u long u mraw jong ka pop; u mraw um ïaisah ha ka ïing baroh shi rta te; hynrei, u khun u ïaisah baroh shi rta. Namar kata, lada U Khun un pyllait noh ïa phi, phin long kiba la lait noh da shisha. Nga tip ba phi long u symbai u Abraham; hynrei, phi ïawad ban pynïap noh ïa nga, naba ka ktien jong nga kam ïoh jaka hapoh jong phi. Nga, nga kren ïa kaba nga la ïohi bad U Kpa jong nga: kumta, phi ruh, phi leh ïa kaba phi la ïohsngew na u kpa jong phi.”

Ki la ïathuh bad ki la ïa-ong ha u, “U Abraham u long u kpa jong ngi.” U Jisu u ong ha ki, “Lada phi la long ki khun jong u Abraham, phin da la leh ïa ki jingleh jong u Abraham; hynrei, mynta, phi ïawad ban pynïap noh ïa nga, u briew uba la ïathuh ïa kaba shisha ha phi, ïa kaba nga la ïohsngew na U Blei. Ïa kane u Abraham um shym leh. Phi leh ma phi ïa ki jingleh jong u kpa jong phi.” Ynda kumta, ki la ïathuh ha u, “Ym shym la kha ïa ngi na kaba klim; ngi don uwei U Kpa, uba U Blei keiñ.” U Jisu u la ïathuh ha ki, “Lada U Blei u la long U Kpa jong phi, phin da la ieit ïa nga, namar na U Blei nga la mih noh bad nga la wan; namar na lade hi ruh ngam shym la wan, hynrei, la phah ma u ïa nga. Balei phim sngewthuh ïa ka jingkren jong nga? naba phim lah ban shahshkor ïa ka ktien ka jong nga. Phi, phi long na u kpa jong phi, u Soitan, bad ïa ki jingkwah jong uta u kpa jong phi, phi ïamon ban leh; uta u la long u nongshohnoh briew naduh kaba mynnyngkong, bad um ju sah ha ka jingshisha, naba kaba shisha kam don satia ha u: haba u kren ïa kaba lamler, u kren na kiei kiei la ki jong, naba u long uba lamler, bad u kpa jong ki jinglamler. Hynrei, ïa nga, namar ba nga ong ïa kaba shisha, ïa nga phim ngeit. Uei na phi uba pynrem ïa nga shaphang ka pop? Te lada nga ong kaba shisha, balei phi phim ngeit ïa nga? Jar uba long na U Blei, u shahshkor ïa ki ktien jong U Blei; namar kata keiñ, phi phim ïashahshkor, naba phim long na U Blei.”

Ynda kumta, kita ki Jiw ki la ïathuh bad ki la ïa-ong ha u, “Ngi ngim ïa-ong kaba dei ba me long u kynja Samaria, bad me don u ksuid?” U Jisu u la ïathuh, “Nga ngam don u ksuid: hynrei, nga burom ïa la U Kpa, phi te phim burom ïa nga. Nga te ngam wad ïa ka burom ka jong nga hi; don uba wad ïa ka, bad uba bishar. Shisha, shisha nga ong ha phi: Lada uno uno ruh un sumar ïa ka ktien jong nga, un ym ïohi ïa ka jingïap lano lano ruh.” Namar kata, ki Jiw ki la ïa-ong ha u, “Mynta ngi ïatip ba me don u ksuid. U Abraham u la ïap noh, bad ki nongïathuhlypa ruh; me pynban me ong, ‘Lada uno uno ruh un sumar ïa ka ktien jong nga, un ym mad ïa ka jingïap lano lano ruh!’ Me, me long uba kham khraw ïa u kpa jong ngi u Abraham, uba la ïap noh? Kita ki nongïathuhlypa ruh ki la ïap noh; me, me pynlong uei ïa lade?” U Jisu u la ïathuh, “Lada nga pyndonburom ïa lade, ka burom jong nga kam long ei ei ruh em; U Kpa jong nga u long uba pyndonburom ïa nga; ïa uba phi, phi ong ba u long U Blei jong phi, te pynban, phim shym la ithuh ïa u; hynrei, nga, nga ithuh ïa u; te lada nga ong ba ngam ithuh ïa u, ngan long kum ma phi, uba lamler; hynrei, nga ithuh ïa u, bad nga sumar ïa ka ktien jong u. U Abraham u kpa jong phi u la shadkmen ban ïohi ïa ka sngi jong nga: te u la ïohi bad u la sngewkmen ruh.” Namar kata, kita ki Jiw ki la ïa-ong ha u, “Mem pat don sanphew snem ka rta, te me la ïohi ïa u Abraham?” U Jisu u la ïathuh ha ki, “Shisha, shisha nga ong ha phi, mynba ym pat kha ïa u Abraham, nga, nga long.” Ynda kumta, ki la ïarah ïa ki maw ba kin ïoh lynthem ïa u, hynrei, U Jisu u la buhrieh ïa lade, bad u la mih noh na ka templ.

收聽 ÏOANNIS 8