SAN LUCAS 23
23
Ndu̱ Jesús nde loo Pilato nu laca loo
1Ndatu̱ lcaa ngu' tisiya li', ndyaa lo'o ngu' ji'i̱ Jesús slo Pilato nu ngua gobernador romano tyempo bi'. 2Ca bi' nguxana ngu' ngusta ngu' qui'ya ji'i̱ Jesús:
―Cua ngusñi ya ji'i̱ nu qui'yu re, cha' ndatsaa tsa yu ji'i̱ ngu' judío tya'a ya. Nacui̱ yu cha' ná ntsu'u chacuayá' ta ya cñi cña loo ya ji'i̱ nu laca cña ji'i̱ cu'ma̱, ngu' romano; lo'o jua'a̱ lye tsa nchcui' yu cha' ycui' yu laca Cristo, ñi'ya̱ si laca yu rey ji'i̱ ya ―nacui̱ ngu' ji'i̱ Pilato.
3Li' nchcuane Pilato ji'i̱ Jesús:
―¿Ha rey ji'i̱ ngu' judío laca nu'u̱? ―nacui̱.
Li' nguxacui̱ Jesús cha' ji'i̱ Pilato bi':
―La cui' cha' nu cua nchcui' nu'u̱, la cui' bi' laca na' ―nacui̱.
4Li' nacui̱ Pilato ji'i̱ ngu' sti jo'ó nu laca loo lo'o ji'i̱ xa' la ngu' nu ndya'a̱ lo'o:
―Ná nquije ni sca cha' cuxi 'na cha' sta na' qui'ya ji'i̱ yu re ―nacui̱ Pilato.
5Pana nu ngu' bi' ni, chaca quiya' lye la nchcui' ngu', cui̱i̱ tsa ngusi'ya ngu' ji'i̱ Pilato bi' li':
―Na ngusu'ba ñasi̱' ti yu re ji'i̱ lcaa ñati̱ Judea lo'o cha' nu ngulu'u yu ji'i̱ ngu' ―nacui̱ ngu'―. Nde Galilea nguxana yu re, lo'o hasta ca nde nclyu'u yu cha' cuxi bi' ji'i̱ ngu' juani.
Ndu̱ Jesús nde loo Herodes
6Lo'o cua ndyuna Pilato cha' bi', li' nchcuane yu ji'i̱ ngu' si nde Galilea ngutu'u Jesús lijya̱.
7―La cui' ―nacui̱ ngu'.
Li' ndyi'u ti' Pilato cha' ndi'i̱ Herodes quichi̱ Jerusalén tsa̱ bi'. Lo'o nu Herodes ni, laca yu loo loyuu su cuentya Galilea; bi' cha' nda Pilato ji'i̱ Jesús ndyaa slo Herodes bi' li'. 8Lo'o na'a̱ Herodes ji'i̱ Jesús, tso'o tsa ngua tyiquee yu li', cha' cua sa'ni tsa nti' yu ña'a̱ yu ji'i̱ Jesús. Cua ndyuna yu lo'o nchcui' ngu' cha' ji'i̱ Jesús, lo'o nti' tsa yu ña'a̱ yu sca cha' tlyu nu cua'ni Jesús. 9Quiña'a̱ tsa cha' nchcuane yu ji'i̱ Jesús li', pana ná nguxacui̱ Jesús cha' ji'i̱ yu tsiya' ti. 10Lo'o jua'a̱ ndi'i̱ ngu' sti jo'ó nu laca loo lo'o ngu' mstru cha' jo'ó; ngu' bi' laca nu ngusta qui'ya ji'i̱ Jesús, lo'o juani tya quiña'a̱ tsa cha' cuxi nchcui' ngu' bi' ji'i̱. 11Li' ngua'ni lya' ti Herodes ji'i̱ Jesús; jua'a̱ sendaru ji'i̱ yu, cuxi tsa ngua'ni ngu' lo'o. Cha' caja ñi'ya̱ nu xtyí lo'o ngu' ji'i̱, li' nguxacu' ngu' late' tso'o tsa ña'a̱ ji'i̱; late' ndubi ña'a̱ ñi'ya̱ ña'a̱ ste' rey nguxacu' ngu' ji'i̱. Lo'o li' nda Herodes ji'i̱ Jesús ndyaa chaca quiya' slo Pilato. 12Tsa̱ bi' ngua stu'ba cha' ji'i̱ Herodes lo'o Pilato chaca quiya'; tya'a cusu̱u̱ ngu' ngua ngu' bi', pana juani cua ndyaca tya'a tso'o ngu'.
Ngulo Pilato cña cha' cujuii ngu' ji'i̱ Jesús
13Li' nguxuti'i̱ Pilato ji'i̱ lcaa sti jo'ó nu laca loo, lo'o ji'i̱ lcaa ngu' tisiya, lo'o ji'i̱ lcaa ñati̱. 14Nchcui' yu lo'o ngu' li':
―La cui' cu'ma̱ ñaa lo'o ma̱ ji'i̱ nu qui'yu re slo na', nu nacui̱ ma̱ cha' lye tsa ndu'ni yu cha' ná tyi'i̱ ti̱ ti ngu' ―nacui̱ yu ji'i̱ ngu'―. Pana cua nchcui' na' lo'o yu re slo lcaa cu'ma̱; cua na'a̱ ma̱ cha' ná nquije ni sca qui'ya ji'i̱ yu 'na, ñi'ya̱ nu qui'ya nu ngusta cu'ma̱ ji'i̱ yu. 15La cui' jua'a̱ Herodes, ná ngujui ñi'ya̱ qui'ya nu sta nu cusu' bi' ji'i̱ nu Jesús re, bi' cha' cua nda nu cusu' bi' ji'i̱ yu ñaa slo na' chaca quiya'. Ná sca cha' cuxi ná ngua'ni yu lacua, bi' cha' ná ndu'ni tsa cha' cajaa yu cuentya jna'. 16Xcube' na' xi ji'i̱ yu clyo, cuati culaá na' ji'i̱ yu li' ―nacui̱ Pilato ji'i̱ ngu'.
17Lcaa yija̱ lo'o ndyaca tsa̱ ta'a pascua bi', li' ndu'ni lyaá nu laca gobernador ji'i̱ sca ti preso jua'a̱ ti; 18bi' cha' nguxana ngu', tyucui ña'a̱ taju ngu' stu'ba ti, cui̱i̱ tsa nxi'ya ngu' ndijña ngu' chaca preso ji'i̱ Pilato:
―Si'i nu qui'yu re cua'ni lyaá nu'u̱ ji'i̱ ―nacui̱ ngu'―. Yaa lo'o ji'i̱ yu re. Culaá ji'i̱ nu Barrabás bi' cha' tyu'u.
19Na cua ngusu'ba ngu' ji'i̱ nu Barrabás bi' ne' chcua̱ xqui'ya cha' ndatsaa tsa ji'i̱ ñati̱ quichi̱ cha' xu̱u̱ tya'a ngu' lo'o ngu' xa' tsu' nu laca loo. Cuati cua ndyujuii Barrabás ji'i̱ ñati̱. 20Pana ngua ti' Pilato culaá ji'i̱ Jesús, bi' cha' xa' nchcui' yu lo'o ngu'. 21Cui̱i̱ la nguxacui̱ nu quiña'a̱ tsa ñati̱ bi' cha' ji'i̱ Pilato li':
―¡Cujui'i̱ ca'a̱ clya ji'i̱ yu lo crusi cha' cajaa yu! ―nacui̱ ngu'―. ¡Cujui'i̱ ca'a̱ clya ji'i̱ yu lo crusi! ―nacui̱ ngu' quiña'a̱ bi' li'.
22Nu nchca tyuna quiya' nchcui' Pilato lo'o ngu' li':
―¿Ni cha' cuxi ngua'ni yu re? Ná nquije ni sca cha' cuxi ji'i̱ yu 'na ―nacui̱ Pilato―, bi' cha' ná ndu'ni tsa cha' cajaa yu. Tso'o la si na xcube' ti na' ji'i̱ yu, ca tiya' la li' culaá na' ji'i̱ yu.
23Li' cui̱i̱ la ngusi'ya ngu' nguxacui̱ ngu' cha' ji'i̱ nu Pilato bi', cha' cujui'i̱ ca'a̱ clya ji'i̱ Jesús lo crusi. Lye tsa nchcui' ngu', jua'a̱ sti jo'ó nu laca loo nchcui' tsa ngu', bi' cha' ntaja'a̱ Pilato cua'ni ña'a̱ cha' nu ngua ti' ngu'. 24Li' nda yu chacuayá' cha' caca cha' nu ngüijña ngu'. 25Lo'o jua'a̱ ngulo laja ti ji'i̱ yu Barrabás nu ngua'ni tsa cha' cusu̱u̱, hasta ndyujuii ji'i̱ ñati̱, cha' bi' laca nu ngusubi ngu' quichi̱ cha' tyu'u ne' chcua̱ tyaa tsa̱ bi'. Lo'o li' ndya Pilato ji'i̱ Jesús ji'i̱ ngu' cha' cua'ni ngu' ña'a̱ cha' nu nti' ti ngu' cua'ni ngu' lo'o.
Ngujui'i̱ ca'a̱ ngu' ji'i̱ Jesús lo crusi
26Lo'o li' ndyaa ngu' sendaru, ndyaa lo'o ngu' ji'i̱ Jesús cha' cujui'i̱ ca'a̱ ngu' ji'i̱ lo crusi. Li' ndyacua tya'a ngu' sendaru lo'o sca ñati̱ nu naa Simón, nu lo'o ñaa yu ndyaa yu ne' quixi̱'; ngu' quichi̱ Cirene laca yu bi'. Lo'o li' ngulo ngu' cña ji'i̱ yu cha' tsaa lo'o yu ji'i̱ crusi cuentya ji'i̱ Jesús.
27Quiña'a̱ tsa ñati̱ lca'a̱ ngu' ji'i̱ Jesús ndyaa. Jua'a̱ ndya'a̱ quiña'a̱ tsa nu cuna'a̱, ndyunaa tsa ngu'; cui̱i̱ tsa nxi'ya ngu' cha' tiji̱' tsa ti' ngu' ji'i̱ Jesús. 28Li' nguxña'a̱ Jesús su ndu̱ ngu' cuna'a̱ bi', cha' chcui' lo'o ngu':
―Cu'ma̱ ngu' cuna'a̱ Jerusalén re, ná xi'ya ma̱ xqui'ya na' ―nacui̱ Jesús ji'i̱ ngu'―. Tso'o la xi'ya ma̱ xqui'ya ycui' ca ti ma̱, cuati xqui'ya sñi' ma̱. 29Cua tyalaa ti tyempo cuxi, lo'o li' ñacui̱ ngu' ndi'ya̱: “Juani tso'o la ndi'i̱ nu cuna'a̱ nu ná ngujui sñi', nu bilya cua'ni cala sca ñati̱, nu bilya ta cati' sca nu sube”, ñacui̱ ngu'. 30Li' xana ñati̱ xi'ya ngu': “Tso'o la si clyú ca'ya cua̱ hichu̱' na, masi tyacu̱' cuati̱ yuu hichu̱' na, cha' tye cha' ji'na tsiya' ti”. Jua'a̱ ñacui̱ ngu' li'. 31Ña'a̱ ma̱ ñi'ya̱ nu ndyu'ni ngu' lo'o na' juani. ¿Ñi'ya̱ ta cua'ni ngu' lo'o cu'ma̱ ngu' judío li' lacua? Tso'o tsa cha' nu ntsu'u jna'; ntsu'u tsa chalyuu jna', cha' ñi'ya̱ nti' sca yaca cuañi', jua'a̱ nti' na'. Pana cu'ma̱ ni, ná tso'o cha' nu ntsu'u ji'i̱ ma̱; na culiji yu'u ti cha' bi' ji'i̱ ma̱ jua'a̱ ti, cha' ñi'ya̱ nti' sca yaca ncui, jua'a̱ nti' cu'ma̱ ―nacui̱ Jesús ji'i̱ ngu' bi'.
32Lo'o jua'a̱ ndyaa lo'o ngu' ji'i̱ tya tyucuaa tya'a ñati̱ nu tlyu tsa qui'ya ntsu'u ji'i̱; ndyaa lo'o ngu' ji'i̱ tyucuaa ñati̱ bi', cha' cujuii ngu' ji'i̱ ñati̱ bi' stu'ba ti lo'o Jesús. 33Lo'o ndyalaa ngu' su naa La Calavera (ca'ya su nscua tyijya̱ hique jyo'o), li' ngujui'i̱ ca'a̱ ngu' ji'i̱ Jesús lo crusi ca bi'. La cui' jua'a̱ ngujui'i̱ ca'a̱ ngu' ji'i̱ tyucuaa ñati̱ nu ntsu'u qui'ya tlyu ji'i̱ bi'; ngujui'i̱ ca'a̱ ngu' ji'i̱ tsaca yu cuxi bi' lo chaca yaca crusi nu ndu̱ la'a tsu' cui̱ ji'i̱ Jesús, cuati ngujui'i̱ ca'a̱ ngu' ji'i̱ chaca yu cuxi bi' lo chaca yaca crusi nu ndu̱ la'a tsu' coca. 34Lo'o tya ndi'i̱ ngu' nu ngujui'i̱ ca'a̱ ji'i̱ ngu' lo crusi, li' nchcui' Jesús lo'o ycui' Ndyosi Sti yu:
―Sti na' ―nacui̱ yu―, cui'ya nu'u̱ cha' clyu ti' ji'i̱ ngu' re, cha' ná jlo ti' ngu' ni cha' laca ndyu'ni ngu' jua'a̱.
Li' ndacha ngu' sendaru bi' ste' Jesús ji'i̱ tya'a ngu' laja lo'o ndijya ti ngu' lo'o tya'a ngu'. 35Lo'o jua'a̱ ndi'i̱ tsa ñati̱ cha' ña'a̱ cui'ya ngu' ji'i̱ Jesús. Lo'o ngu' tisiya ni, nxtyí lo'o ngu' ji'i̱ Jesús li'. Ndi'ya̱ nacui̱ ngu' bi':
―Ngua'ni lyaá yu ji'i̱ xa' ñati̱ nquicha'; pana juani ntsu'u cha' cua'ni lyaá yu ji'i̱ ycui' ca ti yu, si chañi cha' laca yu Cristo nu ngusubi ycui' Ndyosi ji'i̱ lijya̱ chalyuu re ―nacui̱ ngu' bi'.
36Lo'o jua'a̱ ngu' sendaru bi', ngustí lo'o ngu' ji'i̱ yu ñaa ngu' cacua ti su ndu̱ crusi, cuati nda ngu' vino tiye' cha' co'o yu. 37Li' ndu'ni ngu' bi' ji'i̱ yu ndi'ya̱:
―Cua'ni lyaá nu'u̱ ji'i̱ ycui' ca si laca nu'u̱ rey ji'i̱ ngu' judío ―nacui̱ ngu' sendaru bi' ji'i̱ Jesús.
38Cua nscua letra nde que la su nga'a̱ Jesús lo crusi bi'; ndi'ya̱ nchcui' letra bi': “Nu nde laca rey ji'i̱ ngu' judío”. Sna lo cha'cña ji'i̱ ngu' nscua cha' bi': cha'cña ji'i̱ ngu' griego nscua, lo'o cha'cña ji'i̱ ngu' latín nscua, lo'o cha'cña ji'i̱ ngu' judío nscua.
39Li' chiya'a̱ tsa nchcui' sca nu cuaana tya'a nga'a̱ Jesús lo crusi:
―Si chañi cha' Cristo laca nu'u̱, cua'ni lyaá nu'u̱ ji'i̱ ycui' ca nu'u̱ lacua; lo'o jua'a̱ cua'ni lyaá nu'u̱ ji'i̱ cuare ―nacui̱ ji'i̱ Jesús.
40Li' nguxacui̱ chaca nu cuaana cha' ji'i̱ tya'a:
―¿Ha ná ntsi̱i̱ nu'u̱ ji'i̱ ycui' Ndyosi lacua? Stu'ba nchcube' ngu' ji'i̱ ca ta'a sna na juani ―nacui̱ ji'i̱ tya'a cuaana―. 41Liñi tsa ntsu'u cha' nchcube' ngu' ji'na, cha' bi' laca caya' ji'i̱ cha' cuxi nu ngua'ni na; pana nu ñati̱ re ni, ná ntsu'u cha' cuxi nu ngua'ni yu.
42Li' nacui̱ yu bi' ji'i̱ Jesús:
―Cusu' Jesús ―nacui̱―, tucuá nu'u̱ cha' jna' nu lo'o xana nu'u̱ cha' caca nu'u̱ loo nde chalyuu ―nacui̱ nu cuaana bi'.
43Nguxacui̱ Jesús cha' ji'i̱ li':
―Chañi cha' nda na' lo'o nu'u̱ ―nacui̱―, juani ti taca tyi'i̱ nu'u̱ lo'o na' ca su tso'o nde cua̱, ca su ntucua ycui' Ndyosi ―nacui̱ Jesús ji'i̱.
Ngujuii Jesús
44Lo'o cua ngua nde hora, li' ngua talya tyucui ña'a̱ loyuu; ngua cha' bi' hasta ña'a̱ cuayá' nu ndyalaa hora cua sna nde ngusi̱i̱, 45jua'a̱ ngua talya loo cuichaa. Lo'o jua'a̱ nu late' tlyu nu ndacui ne' laa tonu bi', ndya'be late' bi' cla'be la. 46Hora bi' cui̱i̱ tsa ngusi'ya Jesús:
―Sti na', qui'ya nu'u̱ cresiya 'na ―nacui̱ yu.
Nu lo'o cua nchcui' yu cha' bi', hora ti ngujuii yu li'.
47Lo'o na'a̱ nu capitán ji'i̱ sendaru romano ñi'ya̱ ngua cha' bi', li' ngua'ni tlyu ji'i̱ ycui' Ndyosi. Ndi'ya̱ nchcui' li':
―Chañi cha' ná ntsu'u qui'ya ji'i̱ jyo'o re tsiya' ti ―nacui̱ nu capitán ji'i̱ sendaru bi'.
48Li' lcaa ñati̱ nu ndi'i̱ hora bi', nu na'a̱ lcaa cha' nu ngua bi', ndu'u ngu' ndyaa ngu' li'. Ndyu'u̱ tya ngu' tyiquee ngu' ndyaa ngu' cha' xñi'i̱ tsa ti' ngu'. 49Pana ndyanu lcaa ngu' tya'a tso'o Jesús ca su ndu̱ crusi, jua'a̱ nu cuna'a̱ nu cua ndya'a̱ lo'o yu nu lo'o nguxana ti cña ji'i̱ yu nde Galilea, ndyanu ngu' bi' tyijyu' ti ña'a̱ cui'ya ngu' cha' nu ndyaca bi'.
Nguatsi' jyo'o Jesús
50Cua ntsu'u sca ñati̱ tso'o nu ndyu'ni tlyu ji'i̱ ycui' Ndyosi, José naa nu qui'yu bi'. Arimatea laca quichi̱ tyi; loyuu su cuentya Judea, bi' ndi'i̱ quichi̱ tyi. Sca nu laca cña laca nu José bi', stu'ba ti ntucua lo'o lcaa ngu' tisiya ji'i̱ ngu' judío. 51Tya tsubi' cua ntajatya nu José bi' ni jacua' ca̱a̱ ycui' Ndyosi cha' caca Ni loo nde chalyuu, bi' cha' ná ngua stu'ba cha' ji'i̱ lo'o tya'a ngu' tisiya lo'o ngusta ngu' qui'ya ji'i̱ Jesús. 52Ndyaa José li', ndyaa slo Pilato cha' jña chacuayá' tsaa lo'o ji'i̱ jyo'o Jesús cha' xatsi' ji'i̱ jyo'o bi'. 53Lo'o cua nda'ya ngu' ji'i̱ jyo'o bi' lo crusi, li' ngüixi̱i̱ José sca tasá lubii hichu̱' jyo'o Jesús; ndyaa lo'o ji'i̱ jyo'o bi' ngusu'ba ji'i̱ ne' cuaá nu ngulu ngu' sii' cua'a̱, su bilya xatsi' ngu' ji'i̱ ñati̱ tsiya' ti. 54Tsa̱ ta'a si̱i̱ laca, bi' cha' tii ti ndi'i̱ ngu' cha' cua xana ti ta'a.
55Lo'o nu ngu' cuna'a̱ nu ñaa lo'o Jesús nde Galilea ni, ndyaa lca'a̱ ngu' ji'i̱ nu José bi', ndyaa na'a̱ ngu' cuaá ji'i̱, cha' cui'ya ngu' cuentya mala ngusta ngu' ji'i̱ jyo'o Jesús bi'. 56Li' nguxtyu̱u̱ ngu' ñaa ngu' nde quichi̱ chaca quiya'. Li' ngua'ni cho'o ngu' hitya tyixi xtyi'i, jua'a̱ setye nu tso'o tsa xtyi'i cha' tyu'u chu̱' jyo'o bi'. Pana ngua'a̱ cña' ngu' tsa̱ ta'a bi', ñi'ya̱ nu nscua cña lo quityi nu ngua sa'ni cha' cua'ni ngu'.
© 1981, Wycliffe Bible Translators, Inc. All rights reserved.