Zuwã 4
4
Zezusi hã, pi'õ Samaria hawi ma, te te irowahutuzé
1Tawamhã farizeu norĩ hã, Zezusihi wasu'u ma tô wapari za'ra, isimiroti 'madâ'â pese 'wa hã dasina idahâ'â u'âsi mono na hã, duré â dawabzuri da'ahâ na te te nasi dama i'ab'manharĩ na zama, Zuwãhã nhipai u. 2(Tane nherẽ, Zezusi hã â dawabzuri te te nasi dama a'manharĩ õ di. Isiré 're inomro mono norĩ si.) 3Tawamhã Zezusi ãne hã te te waihu'u wamhã, ma tô mo Zudéa hawi, apâ Galiléia u.
4Morĩ wamhã, tô i'ru zahi Samaria na danhipti'a nho'õmo nhisi wa'waibaba te te iro'razâri da hã. 5Tawamhã ma tô wi, Samaria 're, 'ri wa'õno ihâimana, Sica na isisi u. Ta hã, Zaco ti'ra Zuzéhé ma, ti'a te te isõmri 'rata, te 're hâimana. 6Tame te â zô ab're, Zacoho te hã 're hâimana. Tawamhã abzuma wa'wa Zezusi hã sadâ'â wa, ma tô tame â zô ab're 'rata nhamra.
7Tame sãmra ré, te Samaria hawi pi'õ hã mo, â zô, te te a'âri da. Tawamhã Zezusi hã te ãne tãma tinha:
— Â hã suru na ĩma õ na.
8(Isiré 're inomro mono norĩ hã 'ri nho'õmo u si'aba'réi haré, tisa hã te te sisa 'mai'uipra za'ra da.)
9Tawamhã Samaria hawi pi'õ hã te asa tãma tinha, ãne:
— E niha te â hã ĩwi iwaptẽ, hâ'rẽne da, a hã Zudeu nherẽ, wa hã duré Samaria 're pi'õ nherẽ. (Ãne hã pi'õ Zezusihi ma, ma tô tinha, Zudeu norĩ hã, Samaria 're, 're isi'ubumroi mono norĩ me hã 're sisada'âbâ wẽ za'ra mono õ wa.)
10Tawamhã Zezusi hã te asa tãma tinha, ãne:
— 'Re ihâimana u'âsi mono nhoprubzé iwẽ uptabi hã aima waihu'u pese 'wa'âhã, duré â te te aiwi iwaptẽrẽ hã aima waihu'u pese 'wa'âhã, te aré tiwi iwaptẽ. Tawamhã ta hã te aré aima tisõ, â u'â hã.
11Tawamhã pi'õ hã te duré asa tãma tinha, ãne:
— Tiha hã aima hâimana õ di, â ãma i'a'âri da hã. Duré ab're 'rehâ di. E niha te za tawamhã â u'â hã i'a'â. 12E a hã, wahi'rada Zacoho nhipai u aipire di. Ta hã, ã hã â zô ab're, ma tô wama sõmri za'ra. Ã hawi â hã ma tô te te 're hâsi. Tane duré i'ra norĩ hã duré isimizama norĩ zama.
13Tawamhã Zezusi hã te duré tãma tinha, ãne:
— Ni'wa hã ã hã â te te hâ'rẽne wamhã, 'rubu di za tãma hã, apâ. 14Tazahã, ni'wa, â te tãma isõmri hã te te hâ'rẽne wamhã, niwa apâ tãma i'rubu da hã, mare di. E marĩ wa. Â te tãma isõmri hã te za oto â u'âsi na tãma 're hâimana. Ta hã te za dahâimanazé isi'utõrĩ'õ hã tãma tisõ.
15Tahawa te pi'õ hã isib'â tiwi waptẽ:
— Ma'ãpé, asib'â hã ĩma õ na, niwa apâ 'rubu hã ĩma hâimana tõ da, duré niwa ĩnhimnhasi tõ da, â zô we ĩmorĩ zahu da hã, ãwa.
16Tawamhã Zezusi hã te tãma rob'ru, ãne:
— Mo oto aimro zô aimorĩ. Apâ we aimorĩ za.
17Tane nherẽ, te pi'õ hã tãma siwasu'u, ãne:
— Ĩmro õ di.
Tahawa Zezusi hã te tãma tinha, ãne:
— Tane tô. I'uwaibaba te ĩma asiwasu'u, i'aimro õ na hã. 18Imrotõ na ma tô aimro. Duré ãhã na iré i'aihâimana hã aimro õ di tô. Tahawa tô sena te ĩma asiwasu'u.
19Tawamhã pi'õ te duré tãma tinha, ãne:
— Ãhã na wa tô oto aiwaihu'u. A hã, 'Re ihâimana u'âsi mono zadawa 'mahârâ'wa. 20Ãme ẽtẽ'rãihâ ãma te wahi'rata norĩ hã 're wata za'ra, 'Re ihâimana u'âsi mono ãma hã. Tane nherẽ, a norĩ wa'wa hã Zudeu norĩ te 're irowasu'u za'ra wa'aba mo, Zeruzalẽ ãma si, za ãma 're idawata za'ra mono na hã, 'Re ihâimana u'âsi mono te te ipisutuzéb zarina.
21Tawamhã Zezusi hã te pi'õi ma tinha, ãne:
— Pi'õ, ma'ãpé saze na, te aima irowasu'u zém na hã: Romhutu di oto bâdâ hã, ãme ẽtẽ'rãihâ ãma duré Zeruzalẽ ãma, Ĩmama ãma za oto 're idawata za'ra mono õ zé hã. 22A norĩ wa'wa, Samaria 're, 're i'ai'ubumroi wa'aba mono norĩ hã te 're aiwata za'ra wa'aba mo, aima iwaihu'u za'ra wa'aba õ ãma. Tazahã, wa norĩ Zudeu norĩ hã, wama iwaihu'u pese ãma, wa 're wawata za'ra. E marĩ wa. Zudeu norĩ u'âbâ danho'reptuzé hã te wei mo. 23Tane nherẽ, bâdâ hã te za wi. Ta hã bâdâ hã ma tô oto wi tô, sena na 're iwata za'ra mono hã, Ĩmama ãma 're iwata za'ra mono da hã, tihâiba uptabi na duré tô sena na. E marĩ wa. Ta norĩ zô te Ĩmama hã te te 're rob'madâ'â, ãma 're iwata za'ra mono norĩ zô. 24'Re ihâimana u'âsi mono hã, 'madâ'â waihu'u ãna te tihâiba uptabi na si 're hâimana. Tahawa ãma 're iwata za'ra mono norĩ hã te za ãma 're wata za'ra, tihâiba uptabi na duré tô sena na.
25Tawamhã te pi'õ hã ãne tãma tinha:
— Ĩma waihu'u pese di, Messias (Cristu na isisi hã) za we imorĩ na hã. Ta hã wei wisi wamhã, te za uburé ãma wama rowasu'u pese za'ra.
26Tawamhã Zezusi hã te oto tãma siwasu'u, ãne:
— Wa hã Messias! Wa hã wa aima rowasu'u.
27Tawamhã pi'õi ma siwasu'u ré, ma tô isiré 're inomro mono norĩ hã itẽme aihutu. Tahawa ma tô ãma titob'uzu za'ra, pi'õi ma nherẽ, te te robzanhamri ré, te te siwi sõpẽtẽ wa. Tane nherẽ, ni'wa te te sadanharĩ õ di, pi'õ ãne hã: “E marĩ, te asima iwẽ.” Duré Zezusi hã ni'wa te te sadanharĩ õ di, ãne hã: “E marĩ wa, te tãma irobzanha.”
28Tawamhã pi'õ hã sisa'u ma tô piza hã tirẽ. 'Ri wa'õtõ u ma tô mo apâ. Tame ma tô dama rowasu'u, ãne:
29— Ma'ãpé we ai'aba'réi wa'aba, aibâ hã asiwi 'madâ'â aba da, te te ãma ĩma inharĩ hã uburé tiha te 're i'ab'manharĩ mono zém na. E õhõtai õ di, Cristu hã.
30Tahawa ma tô tawairébé ni, 'ri wa'õtõ hawimhã. Zezusi isãmrazéb u ma tô ai'aba'ré ni.
31Taha ré, isiré 're inomro mono norĩ hã sadawa za'réi ãna ma tô nasi tãma nharĩ za'ra, ãne:
— Rowahutu'wa, marĩ hã 'mai'rẽne!
32Tane nherẽ, Zezusi hã ma tô ãne tãma nharĩ za'ra:
— Te i'rẽne da hã iré hã ĩsa, aima iwaihu'u za'ra wa'aba õ hã.
33Tahawa, te isiré 're inomro mono norĩ hã sisadanharĩ za'ra, ãne:
— E ma tô ni'wa ĩsa hã tãma 'mai'ãwisi.
34Tawamhã Zezusi hã ma tãma waihu'u za'ra, ãne:
— Ĩsa hã te 're i'manharĩ mono zé, we ĩzatõrĩ'wa te te sima 're iwẽ mono zé, duré te 'rãsutu da, ite romhuri hã. 35Te 're inharĩ za'ra wa'aba mo, ãne: “Maparane si'uiwa na a'amo hã si'utõrĩ parimhã, amnho hã wa za tehâri za'ra ni.” Tane nherẽ, wa za ãne aima waihu'u za'ra wa'wa: Ma'ãpé rob'madâ'â za'ra wa'aba, itehâri da si oto, amnho hã. 36Ni'wa amnho tehâri'wa hã, tô awa'awi tipawa'â te za ti'â. Isimiromhuri hã, dahâimanazé isi'utõrĩ'õ, da te 're sõpẽtẽ za'ra mono da. Tawamhã ãne wamhã, amnho 're'wa hã duré amnho tehâri'wai me, te za siré te te sima 're rowẽ zahuré. 37Ãne wa, te tô sena, da te 're nharĩ za'ra, ãne: “Ni'wa hã te za a're. Tawamhã ihâiba amo hã te za roptehâ.” 38Wa tô asatõrĩ za'ra wa'wa, roptehâri za'ra wa'aba da, a norĩ wa'wa hã i'a're za'ra wa'aba õ u, aiwana za'ra wa'aba aimawi norĩ te te iromhuri za'ra zéb u. Tawamhã a norĩ wa'wa hã isimiromhuri zarina uburé marĩ hã te oto aima tihâimana za'ra wa'wa.
39Tawamhã Samaria ãma 're idasi'ubumroi mono norĩ hã, da'ahâ na ma tô Zezusi hã saze za'ra ni, pi'õ te te dama wasu'u wa, ãne: “Õ hã te ãma ĩma tinha, uburé marĩ te 're i'ab'manharĩ mono zém na hã.”
40Samaria ãma 're idasi'ubumroi mono hã, Zezusi isãmrazéb u sihutu wamhã, ma tô ãma ropti za'ra, a'â i'rata sãmra za'ra da. Tahawa Zezusi hã ma tô maparane bâtâ na nhamra, tame.
41Tawamhã da'ahâ na ma tô aimawi norĩ hã saze za'ra ni, isimirowasu'u u'âbâmhã. 42Tahawa te pi'õi ma nharĩ za'ra, ãne:
— Ãhã na hã wama iwasu'u za'ra u'âbâp si, wa te oto saze za'ra õ di. Wasi'uihâ na wa te oto wapari za'ra wa, wa saze za'ra ni. Tawamhã wa waihu'u za'ra ni, tô õ hã, Uburé Danho'reptui'wa na hã.
Zezusi hã, apito zadawa zapari'wai 'ra te te ipesezé
43Tame Zezusi hã maparane bâtâ na hâimana parimhã, ma tô oto mo Galiléia u. 44Ta hã ma tô ãne hã waihu'u siro: “'Re ihâimana u'âsi mono zadawa 'mahârâ'wa hã, isipti'ai 'remhã dama wazéb õ di.” 45Galiléia u wisi wamhã, tame 're isi'ubumroi mono norĩ hã ma tô siwi âri wẽ, Pascoa na dato nhisi Zeruzalẽ ãma ihâimana u, si'aba'réi wa, tame Zezusi hã te te siwi 'madâ'â wa, uburé marĩ te te i'ab'manharĩzé hã.
46Tawamhã Zezusi hã Cana u ma tô apâ wi, Galiléia 'remhã, â nherẽ, uva 'rãi wa'u isé isei uptabi na te te i'manharĩzéb u. Tame te tihâiba, apito zadawa zapari'wa Cafarnau ãma 're isãmra mono hã. Isõrõwa 'remhã i'ra hã hâzé na te nomro. 47Tawamhã Zudéa hawi Galiléia u imorĩ na Zezusihi wasu'u te te wapari wamhã, ma tô itẽme mo, te te tiwi rowaptẽrẽ da, Cafarnau u morĩ da, i'ra hã te te tãma pese da, tihâimanazéb 'rãsutu u hâimana wa.
48Tawamhã Zezusi hã te tãma tinha, ãne:
— Marĩ dama i'manharĩ waihu'u'õ iwẽ uptabi hã te 're i'ab'manharĩ mono zé hã 're 'madâ'â za'ra wa'aba mono wap si, te asiwi 're ĩzaze za'ra wa'aba mo.
49Tawamhã apito zadawa zapari'wa hã te tãma tinha, ãne:
— Apito, ãma ĩsiré aimorĩ, ĩ'ra hã tihâimanazé te te 'rãsutu õ ré.
50— Apâ aimorĩ asõrõwa u. Ai'ra hã rowẽ na te za 're hâimana. — Ãne te Zezusi hã tãma tinha.
Tawamhã ma aibâ hã saze, Zezusi te te tãma inharĩzé hã. Apâ ma tô oto mo, tinhorõwa u. 51Bâdâdi na hâimana ré, ite romhuri'wa norĩ hã ma tô siwi sõpẽtẽ. Ãne te tãma rowasu'u za'ra:
— Ai'ra hã dâ'â õ di. Rowẽ na te nhamra.
52Tawamhã tite romhuri'wa norĩ hã ma tô sadanharĩ za'ra, nimahã bâtâ pibuzém na i'ra ma, rowẽ mono zô. Ãne ma tô tãma rowasu'u za'ra:
— Ahâmhâ, misi na bâtâ pibuzéb ãma hâiwahâ, iwa'ro hã ma tô tãma apa.
53Tawamhã imama hã ma tô waihu'u, tô taha bâtâ pibuzéb ãma, Zezusi hã te te tãma inharĩ na hã, ãne: “Ai'ra hã rowẽ na te za 're hâimana.” Tahawa, aibâ ma tô saze Zezusi hã. Duré uburé isõrõwa 're, 're isi'ubumroi mono norĩ zama, ma saze za'ra.
54Ã hã maparane ãma, marĩ dama i'manharĩ waihu'u'õ hã ma tô Zezusi hã 'manha, Zudéa hawi morĩ parimhã, Galiléia u hã.
© 2011, Wycliffe Bible Translators, Inc.