Luke 19
19
Zacchaeus ꞌen cha dune hiye dujis-i oogha íyultsꞌut
1ꞋEt Jesus Jericho tsꞌoozya ꞌinkꞌez ꞌoh whuya lhuseya. 2ꞋInkꞌez ꞌet ꞌilhoghun dune ꞌen ꞌet usda, Zacchaeus huyulhni. ꞋEn sooniya ꞌilhunaoosꞌaihne bumoodih, ꞌinkꞌez soo dinꞌa-un. 3ꞋInkꞌez Jesus mbe ꞌuntꞌoh yuntilhꞌelh hukwaꞌ ninzun. ꞋEt hoontsꞌi ꞌilhunaoosdilne bugha ꞌaw yooꞌen ꞌaitꞌoh. Ndun dune ndukw ꞌet huwa. 4ꞋInka butso tilhgai ꞌinkꞌez duchun, Sycamore huyulhni yuntilhꞌelh ha, ꞌi kꞌut dugailget. Whuz unꞌa Jesus ꞌoh whuya lhutiyalh.
5ꞋEt Jesus ꞌet neninya, ndo yútanꞌen whe yutilhꞌen, ꞌinkꞌez ꞌuyulhni, “Zacchaeus ꞌa cho nanáindaih! ꞋAndit dzin nyoh tisdalh hubaꞌ hoontꞌoh.” 6ꞋInka ꞌa cho nanája. ꞋInkꞌez hoontꞌiꞌ whe duyoh tsꞌe yughu nuséya.
7ꞋEt tsꞌiyanne hinalhꞌen whe whutsꞌo disnih, ꞌinkꞌez howu yahalhduk, “Lubeshi ꞌulhꞌen-un, ꞌen zih tidalh.”
8ꞋEt hoontsꞌi Zacchaeus dudinya ꞌinkꞌez Moodihti ꞌuyulhni, “SMoodihti whunilhꞌen, ndai la ꞌustꞌi-i lhulcho telꞌenne gha sdle. ꞋInkꞌez mbene la bubeꞌ hoostsꞌitne, dit ꞌet ꞌuniltsuk-i butlꞌa násꞌalh.”
9ꞋEt Jesus ꞌuyulhni, “ꞋAndit dzin dune ye dujis-i whe njan yoh dilhtsꞌine bugha íyultsꞌut. Ndun ꞌen cha Abraham tsꞌu hainzut whe ꞌuntꞌoh ꞌet huwa. 10Ninta ninkatne, Yinka Dune Yeꞌ, ꞌen bukúniztai ꞌinkꞌez ꞌubutilhyih ha, ꞌet huba whusainya.”
Ndi khuni be whutsꞌodulꞌeh-i, ꞌi be tꞌezninzun neMoodihti whusanátidalh whutsꞌun, ndiz unꞌa ndi yun kꞌut ꞌuzdóltsꞌiꞌ
11ꞋEt njan hidantsꞌo whe ꞌuyoo khuni be whútsꞌodulꞌeh-i be bubulh yawhénilhduk. Jerusalem whenghoh hidulh ꞌinkꞌez ꞌuhuninzun ndet Yakꞌusda whe lerwe unli-un, ꞌawet ꞌaho whe óodutaltsilh huninzun. 12ꞋEt huwa ꞌubulhni, “ꞋIlhoghun dune ncha-un, ꞌen nilhdzaꞌ keyoh tsꞌe whinya. ꞋEt whuz oozya de, whuz whulerwe hitilhtselh. ꞋInkꞌez ꞌet dukeyoh tsꞌe nátidalh. 13Tiyalh whutso whunizyane dude ꞌulhnane ꞌanih ubudaniꞌ. ꞋInkꞌez ꞌilhoghun hinli whe sooniya diztiꞌ-i, ꞌilho butlꞌa inꞌai, ꞌinkꞌez ꞌubulhni, ‘Whusanátisdalh whutsꞌun be óohtꞌen ꞌinkꞌez be ꞌéꞌ oohleh,’ ꞌubulhni.
14ꞋEt hoontsꞌi bulh keyoh whutꞌenne hika lheꞌnizun. ꞋInka whinya hukwꞌelhꞌaz keyoh whuduneꞌne, ꞌenne whulohne, keyoh whunat whuz whe bahalhꞌaꞌ hiba dóniꞌ ha, ‘ꞋAw ndun dune nelerwe ooleꞌ hukwa lheꞌuznízun,’ hutni.
15ꞋEt ndun dune lerwe suliꞌ whe whusanája, ꞌet ndunne dude ꞌulhnane, sooniya butlꞌainꞌaine, ꞌanih ubúlhni. ꞋIlhone hinli whe daltsuk hiba ꞌinla-un ꞌet nahootáꞌalh hukwaꞌ ninzun.
16ꞋEt ꞌudechoo-un yughu ninya ꞌinkꞌez ꞌuyulhni, ‘SMoodih ndi sooniya diztiꞌ-i szih nenínꞌai-i, ꞌi be whunizyai ꞌuniltsuk-i be mba ꞌusdla.’
17ꞋInkꞌez ꞌuyulhni, ‘Seꞌulhna-un, tube soo ꞌínja! Ntsool-iyaz ntlꞌasꞌai-i, tsꞌihꞌun unꞌa be neꞌzintꞌen. ꞋEt huwa whunizyat-un keyoh whuti whumoodih tanleh ꞌet ntlꞌa hóosꞌai.’
18ꞋEt bulh nane whusainya ꞌinkꞌez ꞌuyulhni, ‘SMoodih nzooneya diztiꞌ-i szih nenínꞌai-i, ꞌi be kwulat ꞌuniltsuk-i be mba ꞌusdla,’ yúlhni.
19ꞋEt ndun ꞌuyulhni, ‘Nyun cha kwulat-un keyoh whuti whumoodih tanleh, ꞌet ntlꞌa hóosꞌai.’
20ꞋEt ꞌuyoon cha yughu ninya ꞌinkꞌez ꞌuyulhni, ‘SMoodih, nah njan nzooneya diztiꞌ-i szih nenínꞌai-i. ꞋI dzezoh be beꞌ zuschuz ꞌinkꞌez mba ꞌet ꞌusꞌai. 21ꞋAw dune dutso-un inli tꞌenyunúszun, ꞌet huwa nye nuzjut. Ndai la nchꞌeꞌ lhiloh, ꞌi hoontsꞌi nailhchuk. ꞋAlhnuzinloh-i, ꞌi ha nínle,’ yulhni.
22ꞋInkꞌez ꞌuyulhni, ‘Nyunchꞌoh nze whe dája dini-un, ꞌet whe mba nahutisyeh. Seꞌulhna-un intsiꞌ. Tꞌeooninzun dantꞌoh-un dune usdli, dalhúzusꞌai-i, uschuk. ꞋInkꞌez ndai la ꞌalhnúsdlel-i ha núsdlih ꞌinkꞌez be sooniya ꞌusꞌen. 23ꞋEt di ha sooniya lhkꞌenádaꞌaihne uszooneya ꞌenne butlꞌa lheyinꞌal? ꞋEt de daꞌ, whusanasja de, ꞌon ꞌun be ꞌéꞌoosdleh?’
24ꞋEt ꞌonghoh nudilhyanne ꞌubulhni, ‘Sooneya diztiꞌ-i ooghu nayulhchoot. ꞋInkꞌez mbe la whunizyai ꞌinla-un, ꞌen oogha ínahꞌaih.’
25ꞋEt hoontsꞌi ꞌuhuyulhni, ‘Moodih ꞌudaꞌ ꞌawet whunizyai ꞌutꞌi.’
26ꞋInka dune diztiꞌ-un ꞌutni, ‘Mbene la hoonli ꞌutꞌi-un, ꞌon ꞌun lhai oogha títꞌalh. ꞋInkꞌez mbe la hoonli lhitꞌih-un, ꞌaw ꞌi yutꞌi, ꞌi hoontsꞌi ooghu nayitálchulh. 27ꞋEt ndunne schꞌaz ditnine, ska lheꞌhunízun whe bulerwe tisdleh, whusábahle ꞌinkꞌez sbut ꞌet bubahghan.’”
Yakꞌusda hudilhtiꞌ whe keyoh Jerusalem hunindil
28ꞋEt ndubúdaniꞌ-un hukwꞌelhꞌaz Jesus Jerusalem tsꞌe hutizdil whe butso tizya. 29ꞋEt ꞌawet shusyaz, Olive huyulhni, ꞌet keyoh whuyaz Bethphage ꞌinkꞌez Bethany huwhutni shusyaz zih whuzdla, whenghoh hidulh whe nane yugha hodulꞌehne ubutílhꞌaꞌ. 30ꞋInkꞌez ꞌutni, “Keyohyaz nohanchꞌaz tsꞌe whuz ahꞌus. Keyoh whuyaz nenahꞌaz de, ꞌet ꞌilhoghun yeztliyaz, donkey huyúlhni, whédintꞌi, ꞌi ꞌaw whutsodaꞌ dune yukꞌulhídoh-i, ꞌi tihꞌelh. Kꞌunaoohꞌuk ꞌinkꞌez ndiz tóolhdlooh. 31Dune nohoodulhkut de, di ha ꞌulhꞌen kꞌunahꞌuk? ꞋEt njan dúdohniꞌ, neMoodihti yukaꞌ ninzun.”
32ꞋEt whebalhꞌaꞌne whuz hoozꞌaz whe daja ni-un, ꞌet whuz unꞌa nahuhoonꞌai. 33ꞋEt yeztliyaz kꞌunuháyuꞌuk whe oochꞌeꞌne ꞌubuhutni, “Di ha ꞌulhꞌen ndi yeztliyaz kꞌunahꞌuk?”
34ꞋInkꞌez ꞌet ꞌubuhútni, “NeMoodihti yukaꞌ ninzun.”
35ꞋEt Jesus highu hinílhdlukw. ꞋInkꞌez dichꞌoh dunaih yeztliyaz hikꞌehúyinla, ꞌinkꞌez Jesus hikꞌehúyilhti. 36ꞋEt tizya whe dunaih ti yun hiba nehínilhbal.
37ꞋEt ꞌawet shusyaz, Olive whuduhútidulh ꞌet huwu nilhdukw whe, lhane yugha hodulꞌehne huhóostꞌet. ꞋEt dáhooltus-un ꞌuhóoja-un neꞌwhustꞌen huwunalhꞌen-un, ꞌet huwa tube cho Yakꞌusda hudilhtiꞌ. 38ꞋInkꞌez ꞌuhutni,
“Lerwe ꞌen Moodihti booziꞌ be whusainya-un,
ꞌukꞌenus hoonzoo-un oogha whultsꞌut!
Ndo yakꞌuz whudutághel,
ꞌinkꞌez ꞌudedo kꞌus whudutatiꞌ.”
39ꞋEt whulohne Phariseene butoh whutsꞌun hitsꞌu huyih, “Dune hodulhꞌeh-un, nye hódilꞌeꞌne hukwa budini!”
40ꞋEt hoontsꞌi ꞌubulhni, “Nohdusni, njan tꞌewhudusnih de, tse daꞌ ꞌaho yatoolhdih.”
Jerusalem whutꞌenne bubulh dawhutanelh, ꞌet Jesus howintse
41ꞋEt keyoh whuti whenghoh uyalh, Jerusalem whutilhꞌen whe howintse. 42ꞋInkꞌez ꞌet ndutni, “Nohni Jerusalem whutꞌenne, ꞌandit dzinuncha tꞌeoonahzun nohdzin ꞌuhoontꞌoh. ꞋEt huwa daꞌ tꞌeoonóhzin ntsꞌenꞌa whe nohba whudutághel-un. ꞋEt ꞌandit nohna chꞌa whuntistꞌi. 43ꞋEt dzin whusaootiltsꞌulh nohchꞌaz ditnine nohnahutigus. ꞋInkꞌez lhez lhkꞌehitalhkulh nohnat ndulcho whe, ꞌinkꞌez whez tsꞌe nohuhootatun. 44ꞋInkꞌez keyoh whuti-un lhkꞌunahuhootálhkulh. ꞋInkꞌez mbene whez tsꞌe dilhtsꞌine cha tsꞌiyawh bubulh ꞌuwhútanelh. ꞋAw ꞌilho tse lhkꞌudizꞌai-i nohba ꞌet nenálhodutasꞌal. Nohulhyis-un nohtsꞌó whusaiyan-un, ꞌaw tꞌelhonáhzil, ꞌet huwa.”
Lugliz whucho tsꞌe óoketne ꞌinkꞌez ꞌeꞌóoketne, tsꞌiyawh Jesus tenábuninyoot
45ꞋEt lugliz whucho whunaꞌniztlꞌoo-un daninya ꞌinkꞌez óoketne ꞌinkꞌez ꞌeꞌóoketne, tsꞌiyawh tenábuninyoot. 46ꞋInkꞌez ꞌubulhni, “ꞋUkꞌehóoguz wheꞌ njan ndutni, ‘Syoh ꞌet tenadudli bayoh ꞌúhoontꞌoh.’ ꞋEt hoontsꞌi ꞌundunutꞌihne bayoh whuzúlhtsi.”
47ꞋInkꞌez ꞌet lugliz whucho dzin totsuk dune hodulhꞌeh. ꞋEt hoontsꞌi soo ꞌudedo lubretne, ꞌinkꞌez Moses be ꞌudustlꞌus ꞌukꞌu nunáguzne, ꞌinkꞌez dune tso whudilhdzulhne cha, tsꞌiyawh hituzilhghelh-un hukwa hitísꞌen. 48ꞋEt hoontsꞌi ꞌilhunaoosdilne, tsꞌiyawh hinat núdilhya ꞌinkꞌez soo cho huyoozílhtsꞌai. ꞋEt huwa ꞌaw nyoonne hizoolhghelh ꞌaitꞌoh.
© 2019, Wycliffe Bible Translators, Inc. All rights reserved.