Marcos 1

1Ije laes alekot. Ije Uisneno In Aan mone in aꞌmonin.#1:1 Laes fuaf ‘Uisneno In Aan Mone’ ka matuꞌi maneꞌo fa mbi lulat bian. In kaan aa, Jesus Kristu, es Uisneno nleek nani naꞌko un-unuꞌ. In lasi nane, nahuun nak on ii:

Naꞌ João Aslain Atoni, nalekoꞌ lalan neu Usif Jesus

(Mateus 3:1-12; Lucas 3:1-18; João 1:19-28)

2Jesus feꞌ ka nanaob In mepu, mes Uisneno nsonuꞌ nahuun In atoni meseꞌ, in kanan naꞌ João. Naꞌ João musti nnao nalekoꞌ lalan neu Jesus In amneman. Fun naꞌko un-unuꞌ, Uisneno anpaek nalail In mafefa kniun tuaf es, in kaan ee naꞌ Isaías. In nluul nane, nak on ii:

“Mneen nai! Au ꞌleul Au ꞌhaef ma ꞌnimaf, henati nnao nalekoꞌ lalan neu Ko.#Malaquias 3:1

3Leꞌ atoni nane lof in annao mbi bael sonaꞌ es, he in nkoaꞌ mnak:

‘Hi ala ki ok-okeꞌ mfeen nai, he miloitan lalan, henati msium Usiꞌ In amneman!

Bifeel-atoni mmoeꞌ minesaꞌ lalan nai, he msenu.’ ”#Isaías 40:3

4-6Atoni sin nteek naꞌ João nak ‘Aslain Atoni’. In natua mbi bael sonaꞌ. In bael abtais, nmoꞌe naꞌko bikaes ‘unta’ in nafun. Ma In paus-abaf, nmoꞌe naꞌko muꞌit in pasun. In amnahat, naꞌko keloꞌ ma oin oef. [Naꞌ João in aꞌmoin ii, namnees on leꞌ mafefa kniun naꞌi Elias afi unuꞌ.]#1:4-6 2 Uisf ini 1:8

Olas nane, atoni namfau naꞌko koot Jerusalem, ma nok profinsia Judea in saaꞌ-saaꞌ ok-okeꞌ, neman naꞌeuk nok naꞌ João mbi in bale. Sin neem he nkiso ma nail João, ma he nneen in lasi ꞌnoinaꞌ. In natoon sin am nak, “Hi musti mmanako ma misaitan hi sanat ma penu sin ok-okeꞌ, henati Uisneno nnoes naen hi saant ini. Nalail hi musti mislain feꞌ, he on nfani takaf meseꞌ nak, hi mileko mfain mok Uisneno be.”

Anneen on nane te, sin nmanako sin sanat, ma in naslain sin mbi noel Jordaun.

7In natoon sin am nak, “Anmuiꞌ tuaf es leꞌ nneis naꞌko kau, lof he neem. Masti ꞌjael on In ate msat, au leꞌ ije ka ꞌumnees ꞌok Ne fa.#1:7 Lulat lasi Gregu (Yunani) maneo na nak, ‘ubees he ꞌseif in tain peen-haꞌe msat, au ka ꞌumnees fa ꞌok Ne.’ In aꞌnaonaꞌ nak, naꞌ João alahaa atoin aꞌbaut. Maski nak jael Usif Jesus in ate msat, in ka namnees fa nokan. 8Au ala uslani ki ꞌeki oel, mes In lof nmoeꞌ nneis naꞌko kau. Fun In lof nahenu ki hi nekam neik Uisneno In Smana Kninoꞌ.”

Naꞌ João naslain Usif Jesus

(Mateus 3:13-17; Lucas 3:21-22)

9Mbi neno nane, Jesus neem naꞌko kuan Nazaré mbi profinsia Galilea, ma he naꞌeuk nok naꞌ João. Ma naꞌ João naslain Ee mbi noel Jordaun. 10Olas Jesus mpoi naꞌko oel, suk naskeek, napeen niit neno tunan natfeiꞌ. Nalali te, Uisneno In Smana Kninoꞌ nsaon neem neu Ne, namnees on leꞌ kol-pani. 11Ma on nane te, anneen Uisneno In hanan naꞌko neno tunan nak,

“Ho leꞌ ii, Au Aan Honiꞌ.

Ho es meki mhaliin Kau, Au nekak.”#Jenesis 22:2; Salmu ini 2:7; Isaías 42:1; Mateus 3:17; 12:18; Marcos 9:7; Lucas 3:22

Pah-tuaf in sin aꞌnakaf aꞌnaet nsuaꞌ Usif Jesus mbi bael sonaꞌ

(Mateus 4:1-11; Lucas 4:1-13)

12Okeꞌ te, Uisneno In Smana Kninoꞌ nheel neik Jesus nnao neu bael sonaꞌ. 13In natua mbi bale nane, naan neno boꞌ haaꞌ-fai boꞌ haaꞌ, In ntook nabua nok aleꞌ kanan muꞌit fuij. Mbi nane te, pah-tuaf in sin aꞌnakaf neem nsuaꞌ Jesus he natuin ee, mes ka nꞌai nane fa. Okeꞌ te, Uisneno nleul In ameput naꞌko neno tunan he neman nhae neu Ne.

Usif Jesus nnao mbi Galilea he nalekan lalan Uisneno

(Mateus 4:12-17; Lucas 4:14-15)

14Olas nane, sin nataam nalail João Aslain Atoni mbi paꞌan in nanan, ma Jesus nnao mbi profinsia Galilea, he natoon Uisneno In Laes Alekot mbi nae. 15In natoon mnak,

“Mneen nai! Uisneno In neno he nteel ee!

Neno ii, atoni ok-okeꞌ nahiin am nak, Uisneno naplenat.

On nane te, hi musti misnaas nai miꞌko hi sanat sin!

Okeꞌ te, mituin lalan Uisneno nai.”#Mateus 3:2

Usif Jesus noꞌen atoni atifkai ikaꞌ he natuin Ee

(Mateus 4:18-22; Lucas 5:1-11)

16Mbi neno es, Jesus nnao natuin nifu ꞌnaek Galilea in ninen. In niit tuaf es, kanan naꞌ Simão, ma nok in olif, naꞌ Andre. Sin nua sin ntifkain ikaꞌ. Nane, sin mepu neno-neno. 17Jesus noꞌen sin mnak, “Hoi, baeꞌ sin! Eim mituina Kau feꞌ! Nen-nenoꞌ hi maim ikaꞌ, mes neno ii, Au he ujalip ki he maim atoni meu Uisneno.” 18Nneen nalalin on nane te, sin nua sin nabelak naen tifkai nane, ma nnaon natuin Ee.

19Oke te, Jesus nnao nteni naan akleꞌo, In napeen niit ꞌnaef Zebedeu in aanh in. Tataf, kanan naꞌ Tiago, ma nok in olif, naꞌ João. Sin nua sin naliatan redi mbi beroꞌ in nanan. 20Jesus noꞌen sin nua sin mnak, “Hoi, baeꞌ sin! Ati eim mituin Kau feꞌ.” Oke te, sin nua sin nnaon nasaitan sin amaf ma sin ameupt in mbi beor aa tuun. Ma sin nua sin nnaon natuin Ee.

Usif Jesus nliuꞌ napoin pah-tuaf naꞌko tuaf es mbi kuan Kafarnaum

(Lucas 4:31-37)

21Nalali te, Jesus nok tuaf haaꞌ, es natuin Ee, nnaon ntenuk kuan Kafarnaum. Olas nane, pas neon neeꞌ, nateef nok atoni Judeu sin neon onen.#1:21 Atoni Judeu sin neon onen, aiꞌ neno snasat, sin nak neno nane, nak ‘neno sabdu’. Ma Jesus ntaam neu uim onen he naꞌnoinaꞌ mbi nane. 22Nneen in aꞌnoinaꞌ, atoni ok-okeꞌ sin namkakan, fun In nahiin maneꞌo ꞌnoinaꞌ nane in nesan. Nane ka namnees fa nok atoni Judeu sin kulu akama.#Mateus 7:28-29

23Olas nane, nmuiꞌ tuaf es leꞌ pah-tuaf anhuku. In antaam mbi uim onen amsat, ma nalail pah-tuaf leꞌ mbi tuaf in nekan nane, nkoaꞌ 24mnak, “Hoi! Jesus, atoni Nazaré! Ho munsaꞌan kai?! Ho oum he muleꞌun kai, ka? Hai mihiin Ko. Ho leꞌ ii, Atoni leꞌ unuꞌ Uisneno nsonuꞌ Ko he Ho oum. Ho leꞌ ii, Atoni leꞌ ka asanab Ko fa.”

25Mes Jesus naskeekn ee mnak, “Muꞌmekaꞌ! Mpoi muꞌko atoni ii!”

26Oke te, pah-tuaf nane nmoeꞌ atoni nane in aon naꞌtaꞌi nahel-heel on. Ma in mpoi naꞌko atoni nane, ma nkoa-muus naheel on. 27Nalali te, atoni ok-okeꞌ mbi uim onen in nanan, sin namkakan. Ma sin ok-okeꞌ naꞌuaban mnak, “Hoi, ii saꞌan? Ije ꞌnoinaꞌ feꞌu, ka? Amnasit ije in naꞌuab lo-esan, he! In nleul pah-tuaf he mpoin, ma sin natuin In aꞌlomin amsat.”

28Ma sin nmulai naꞌuaban naꞌko fefaꞌ nnao neu fefaꞌ, ma leꞌ hanaf ii manenaꞌ ntee kuan-kuan mbi profinsia Galilea.

Usif Jesus nalekoꞌ Simão in beif, ma nok atoni bian

(Mateus 8:14-17; Lucas 4:38-41)

29Olas sin mpoi naꞌko uim onen nane, Jesus nnao mbi naꞌ Simão nok naꞌ Andre sin ume. Naꞌ Tiago nok naꞌ João nnaon nabuan nok sin. 30Naꞌ Simão in beif nmainiik-nabubuꞌ ma antuup mbi haal aa tuun. Olas Jesus sin ntaam mbi ume nane, nmuiꞌ amnemat neem natoon mnak, “Een tete nmainiik.”

31Nalali te, Jesus nnao nail en tete nane, ma ntoup nafeen ee. Ma in mainikit nane, naleok naan. Oke te, een tete mpoi ma nail sin.

32Olas maans aa nfaiꞌ, atoin in neem neik sin atoin ameent in, ma nok atoni leꞌ pah-tuaf anhuuk sin. Sin neik sin nnaon neu Jesus, he ntoit lasi mnaut. 33Ma toob ok-okeꞌ mbi kuan nane, neem nabuan mbi ume in nesun. 34Atoni leꞌ nane kin, sin menas humaꞌ-humaꞌ, mes Jesus nalekoꞌ naen sin ok-okeꞌ. Ma In nliuꞌ napoin pah-tuaf amaunut sin namfau. Mes In ka nfee fa sonaꞌ neu pah-tuaf he namoolk in, fun sin nahiin Ee.

Usif Jesus nnao napuun-nateef pah-pah, he natoon Uisneno In Laes Alekot

(Lucas 4:42-44)

35Mbi nok-nokaꞌ, feꞌ ka nmeu nfiin, Jesus anfeen ma mpoi naꞌko ume nane. In nnao mbi bael sonaꞌ he nꞌonen, ma namolok nok Uisneno. 36Olas Simão sin nfenan, sin ka niit fa Jesus, ma sin nnao nami. 37Olas sin naꞌeuk nok Ne, sin naꞌuaban mnak, “Amaꞌ, atoni namfau leꞌ naim Ko.”

38Mes In natae mnak, “Nane alekot amsat. Mes naleko nneis, hit tnao teu kuan bute bian feꞌ, leꞌ mpaumaak naꞌko ii. Fun Au he ꞌutoon Laes Alekot neu sin amsat. Nane, Au mepu.”

39Oke te, In nnao nafuun profinsia Galilea, he neik Laes Alekot naꞌko Uisneno neu sin uim onen. Ma In nliuꞌ napoin pah-tuaf in naꞌko atoin in sin neek in.#Mateus 4:23; 9:35

Usif Jesus nalekoꞌ tuaf es leꞌ nameen bune

(Mateus 8:1-4; Lucas 5:12-16)

40Olas nane, tuaf es leꞌ nameen bune, neem neu Jesus. Ma in nleuꞌ-tuu he ntoit lasi mnaut neu Jesus nak, “Amaꞌ! Mumnau maan kau feꞌ! Au uhiin, au Amaꞌ nabeiꞌ nalekoꞌ kau, au menas ii, he atoni kaisa nmaiꞌnisin kau. Kalu Ho mloem on nane.”

41Nalali te, Jesus namnau atoni nane, ma In nnona In aꞌniman ma nlaab ee, ma nak, “Namneo, Au ꞌloem! Muleok nai!” 42Suk naskeek, atoni nane in menas namneuk. Oke te, in naleok nain. 43Ma Jesus nleul atoni nane he nnao nfain, ma Jesus ampaaꞌ ee mnak, 44“Mumnau lek-leok! Ho muleok ben, mes ho kaisa mutonan sikau-sikau, he! Ho musti mutuin naꞌi Moisés in plenat unuꞌ. On nane, mnao meu amepu kleij feꞌ, he npariska ho aom, he nail ho menas he namneik kuun, ai feꞌ kah. Oke te, ho musti mfee tuluꞌ he on nfani mtoit trima kasi, henati atoni ok-okeꞌ sin nahinan mnak, ho muleko mfini ee.”#Levitiku 14:1-32

45Mes atoni nane in mpoi, ma nnao natoon mbi mee-mee. Nalali te, atoni namfau naim he naꞌeuk nok Jesus, tal antee In ka nabeiꞌ fa he napoin on In human mbi kuan in nane. On nane te, In ntook mbi bael sonaꞌ leꞌ nakloꞌo naꞌko kuan. Mes atoni neem piut naꞌko bale-bale, he naꞌeuk nok Ne.

Currently Selected:

Marcos 1: BBKN

Highlight

Copy