Rut 1
1
Elimeleke sira muda osi la aldeia Belem rea Israel laka la rea Moabe
1-2Lain-enen liurai Israel hatima'a makailuluki sira ukuna kii Israel.
La tempu seto kii se nain Elimeleke. Eto mai osi la Efrata, mai osi Aldeia Belem la rejiaun Juda. ona atan naina Noemi. Sira anan uarua nain Malon nua Kilion.
La tempu seto, rea luba heban la rejiaun Juda. Nikin Elimeleke sira rusila sira aldeiana, nikin laka baha latodi da'nhoe ho'o rea Moabe, la meta Jordaun eto la parte lorosae. 3Masi la wele seto Elimeleke mata, rusinau eto ona'atan nua anan sira mesa. 4Waihira dihaana sira heba deba, sira kaben nua kii la rea Moabe. Malon kaben nua ona-ata se nain Rut. I Kilion kaben nua ona-ata se nain Orpa. Masi waihira sira baha lato mais-ou-menus ta,an-welise deba, 5Noemi anan asukai uarua sinio mata. Sira mata rusinau sira inan mesa i asukai seo maa, anan seo ma'a, i bu-anan seo ma'a.
Noemi nua Rut Whali-hila la Belem
6Waihira Noemi hati baha la rea Moabe, eto dene ehe, "NAI Ulara teha Eto kiin la rejiun Juda, i lasetodi dihila deba kha kha.'' Nikin miminna ona'atan sini nua ota-morin uarua sini ri'akhai nekhun rusinau hila rea Moabe, whali-hila la Noemi uman la eto rean isibu. 7I sira uatelu laka deba rusinau mimin ona-ata uman la rea Moabe, laka osi dalawata se whali hila la rejiaun Juda.
8Masi waihira laka dadau deba, Noemi ehe la otamorin uarua ehenau ini, "Nausini ana! Hian wailiu kamirua whali hila la gami ina sira di. Tanba kami khina deba gami lale hian la au ana se mata debani, no aku. Nikin aku neko la NAI Ulara nikibo khina botu lale hian la kami rua. 9Beki Eto ia kami rua asukai olin se lale hia, nikibo kami beki lhaha hakmatek." I Noemi khokhai no muni sira uarua, i sira nhei wailiu.
10Masi uarua hatan, "Dahoo, Inau! kita hama'a toi osi inau, baha nua la inau kiin sira.''
11Masi Noemi hatan, ''Au ana sirawae! kami whali-hila di! kami toi osi aku. wain ma'a deba. Aku ba'a deba, akuo' dahetan deba ana'asukai se para rema wairua kaben nua kami. 12Beki kami rua naubotu au ana rasik deba, masi hian wailiu kami whali hila di. Tanba aku ba'a deba, nikin kami dabeki teha ehe aku laki hila. Aku dioo dateha deba sini. Se nausini ana deguseti, aku laki hila di teni au'ana asukai se teni, kami teha nausei? 13Kami teha bo i rhia diha ana sira hebawae i kaben nua sira nauni? klaru dahoo! Lodi kami da hria raha, depois kami kaben ene nua ki olin. Siine susar, godi nauni dahoo? Masi au lale susar bera wailiu duke gamin. Tanba aku senti NAI Ulara rasik kastigo aku. Nikin hian waliu kami dabeki toi osi aku."
14Depois sira uatelu nhei wailiu. I Orpa muni mimin ona'ata i despede nikibo whali hila. Masi Rut khokhai mhedan eto mimin ona-ata.
15Noemi ehe la eto, "Ei di ! Orpa whali deba la eto povu no whali hila la eto lulin sira. Lonsei norin ka da whali mhutu-ini nua eto?"
16Masi Rut hatan,
Dabeki lalemara, masi inau dabeki kasa aku whali.
I inau dabeki obriga aku laka rusinau inau mesa.
Tanba aku hama'a Lhaha toi-osi mhutu-ini nua inau
Inau laka la weleseri, akuo laka lato.
Inau baha la weleseri, akuo baha lato.
Inau kinna naubotu au kii.
I inau Nai Ularanna naubotu au Nai Ularan
17Rema-wairua inau mata la weleseri, akuo mata lato.
Ki tháne inau la weleseri, kii thane akuo lato.
Beki Nai kastigo aku,
se aku bati an osi inau.
so mata wae beki batila hirua.''
18Waihira Noemi eila Rut hama'a waliu toi osi eto, eto daehe teni.
19I sira uarua laka dinaga, nata la aldeia Belem.
Waihira ona'ata uarua sini nata lato, ki kosini admira nua sira. Ona'ata sira la aldeia neko la ini no ehe, ''sini tia Noemi, Nauni?"
20Masi eto hatan la sira ehenau ini,
"Kami dabeki bolu teni aku Noemi,
sini magaritin ehe, 'lale mhau'.
Hian wailiu kami bolu aku Mara,
sini magaritin ehe, 'lale ba'i'.
Tanba Ulara semo Forsa Wailiu lo deba au lahan sai ba'i wailiu.
21Lain, waihira aku sai osi la eti,
aku kompletu, tanba au asukai no diha ana uarua.
Masi naueti Ulara ala hila aku whali,
nua lima lalema'a.
Siniana, tanba sei kami bolu aku 'Noemi',
aku Nai gulara kastigo deba aku?
Tan Eton Forti Wailiu.
I Eto kasa susar mai aku."
22istoria sini ana waihira Noemi whali osi la rea Moabe nua ota-mhorin Rut, kii Moabe sini. Sira uarua nata la Belem, la tempu sini sa'i trigu.
Currently Selected:
Rut 1: BNAU
Highlight
Share
Copy
Want to have your highlights saved across all your devices? Sign up or sign in
Wycliffe Timor-Leste © 2025 Wycliffe Bible Translators Inc