Mark 3
3
Kekama kelima epiꞌo
(Mat 12.9-14; Luk 6.6-11)
1Jesus uvaꞌai muli i hale loku noꞌike kekama kelima epiꞌo enoho ilaa. 2Alakama ilaa hihai mau kakala hakoa ia Jesus. Ia kena nakama la eꞌilaꞌila hamakonu, aoki Jesus uapaꞌe nokonaꞌi kama la i keaho kapu la. 3Kena Jesus eme aꞌe kekama kelima epiꞌo la, “Masiꞌe iluna. Kuu imua keonohenua.” 4Kena Jesus eme aꞌe nakama la, “Nakuaa kakou i keaho kapu emea pehe? Ea? Kakou ipena namea kaualeꞌa, ma ipena namea saꞌino? Kakou ekau kekonaꞌi nakama iola, ma ikiaꞌi nakama la imake?” Ia nakama la enoho semuu oia.
5Jesus eꞌila haloko aꞌe i nakama la. Kama la ekipuaina haeꞌo pela nakama la ehakapanaka lo. Kena Jesus eme aꞌe kekama kelima epiꞌo la, “Hola kelima aꞌoe.” Kena iko kama la ihola aꞌe kelima aia nokaualeꞌa. 6Kena naFarasi la uo noꞌuku ma nakama Herod la. Pela lakou mesesee hakaꞌoko ma ikaa Jesus imake.
Keonohenua kaukali Jesus
7Jesus ma nakama kaukali aia la uo ikaha ma hale loku la nokaꞌa ikai. Kena komaꞌi nakama ekakaꞌa ma Jesus hoi. Ala nikama Galilee, Judea, 8Idumea, ia ma nakama namakaꞌina Jerusalem, Tyre, ia ma Sidon. Ia ma nakama kela enoho i kelaa vahi ke{liva} Jordan. Nakama la hakoa ulono pela Jesus ehuli aꞌe namahi aia la. Kela hea nakama la uo aꞌe nomaka Jesus. 9Kena Jesus eme aꞌe nakama kaukali aia la ikanakana hemonoui maia, maikinimea keonohenua la umumui aia. 10Kama la uoki kekonaꞌi komaꞌi nakama la nokaualeꞌa, ia kena komaꞌi nakama lavea ehihai ikaohi Jesus imea lakou ikaualeꞌa hoi. 11Kulana nakaulaiku la eꞌike Jesus, nakama la ehamaoha imua Jesus, kena nakipua saꞌino iloko lakou uanaa hamaloa, “Aꞌoe o kekama Keakua.”
12Ia Jesus ehamakaꞌu aꞌe nakipua la pela i sehaꞌali aꞌe oai aia.
Jesus ekini sanahulu ma lua nakama heheaꞌu
(Mat 10.1-4; Luk 6.12-16)
13Jesus ehaele i keꞌina namouna la noanaa nakama kela aia ekini la. Kena iko nakama la io aꞌe i aia. 14Kena Jesus ehilihili sanahulu ma lua nakama nonoho maia, kena iꞌave nakama la nokaukaꞌu, 15ia iau aꞌe namahi i nakama la nohakui nakipua saꞌino la ikaha.
16Anei sanahulu ma lua nakama kela Jesus ehilihili la,
Simon kela Jesus emale ma Peter,
17James laua ma John nakama Zebedee. Jesus esui namale koꞌolua la ma “Boanerges”. (emea ma “nikama hakuli”)
18Andrew
Philip
Bartholomew
Matthew
Thomas
James, kekama Alphaeus
Thaddaeus
Simon, kekama sehihai pela Rome ilolosi Israel,
19Ia Judas Iscariot, kekama meihaꞌali aꞌe Jesus i nakama hamakua la.
Jesus ia ma Baꞌal Zebub
(Mat 12.22-32; Luk 11.14-23; Luk 12.10)
20Jesus uhaele i hale, ia kena komaꞌi nakama uo aꞌe i hale la hoi. Kena ehainakaa Jesus ma nakama kaukali aia la ikeꞌai. 21Ia kulana kina Jesus ia ma nakaina aia la nilono kelono la, nakama la uo aꞌe ma iko Jesus, maikinimea alakama ekakala ma, “Jesus uvale.”
22Nakama kela polopolo nakuaa iloko Jerusalem ukae kehale la, kena ime aꞌe, “Baꞌal Zebub*f2* ekau iloko Jesus. Kekuꞌu nakipua la eau aꞌe kama la namahi nohakui nakipua saꞌino la ikaha.”
23Jesus eanaa aꞌe nakama la io aꞌe aia, kena ime aꞌe kakala hulihuli nei, “Ea? Satan elavaa kehakui nakipua aia la ikaha? Seai. 24Amea nakama henua la ehavavaꞌee solakou, nakama la meselavaa kenoho kaualeꞌa. 25Ia amea haleaina ehavavaꞌee solakou, haleaina la meselavaa kenoho kaualeꞌa hoi. 26Ia amea nakipua Satan la ehavavaꞌee i naukulana novuhu solakou, namahi Satan la umakea.
27“Ia pena hekama hihai iulu iloko kehale kekama eivi noailalao; kama na ekau kesaisai kekama eivi la imua, kena uailalao namea iloko kehale kama eivi la.*f3*
28“Anau eme aku kehamaoni. Niaina ma nakama kemaalama nei la ehaisala haeꞌo, kena ikakala saꞌino Keakua, Keakua elavaa kehaialoha nakama la. 29Ia poi hekama ekakala saꞌino Keanana Kapu, Keakua mesehaialoha kama la. Maikinimea haisala la emoe naualoko hamau.”
30Jesus ekakala penei, maikinimea nakama epolopolo nakuaa la ekakala ma, “Kama la eisi kipua saꞌino iloko aia.”
Nakaina ia ma kina Jesus
(Mat 12.46-50; Luk 8.19-21)
31Vahola, kina Jesus ia ma nakaina aia la ukae kehale la, kena ihaunalia kekama nome aꞌe Jesus ihaele iho imaka hale. 32Nakama kela enoho hakiꞌe Jesus la eme aꞌe, “Ila aꞌe, kina aꞌoe la, ia ma nakaina aꞌoe la ekuu i maka hale, maꞌoe ihaele aꞌe.”
33Kena iko Jesus ime aꞌe nakama la, “Oai kina anau ma nakaina anau?” 34Jesus eꞌila hakaꞌa nakama enoho maia la, kena ime aꞌe, “Anei nakina anau ia ma nakaina anau. 35Poi hekama epena nia Keakua hihai, kena kaina anau, keꞌave anau, ia ma kina anau.”
© 1999, Wycliffe Bible Translators, Inc. All rights reserved.