ယဟ 1
1
လွင် ဇဝ် ယေဆူ ဘဲန် ဒူအီ
1အူ ဆိန့် ဒေါ ဂုဝ် အန်၊ န့ မိုဝ်း အန် ဇဝ် အီ စိူဝ် “ဂြုဝ်း။” ဂြုဝ်း တီ ကွယ် ရိုမ် ဒူပ် ဇဝ်ဖြာ။ ဘော အန် ဘော ဇဝ်ဖြာ မုး အူ မျုဝ်။ 2အူ ဆိန့် ဒေါ ဂုဝ် အန်၊ အန် ဟဲ့ ကွယ် ရိုမ် ဒူပ် ဇဝ်ဖြာ ဆေဆေ။
3ဇဝ်ဖြာ ဟဲ့ တဲး ဂြုဝ်း တီ ဖာန် ဘ့လေး တူတ့် ဒွန် မျုဝ်၊ တဲး န့ မိုဝ်း။ အာဝ် မိုဝ်း ခေါ အူ မျုဝ် ပီ တူ ဖာန် ဘ့လေး အန်။ 4ဂြုဝ်း တီ မိူဝ် မိုဝ်း အာဆာက် ပီ ဒွါ ဇဝ်ဖြာ။ အာဆာက် တီ ဘော ပီ ဘ့လာင် အီ တဲး ဒူအီ နပ် နာ မှာန်။ 5ဘ့လာင် ဇိုဝ် တီ တဲး ဒူင် အပ် ဝွင့် ဝီ လိုဝ်း ဝီ ဘ့လာင်။ အပ် ဝွင့် အာဝ် ပွိုန် ဆီဘ့လိုက် ဘ့လာင် တီ။
6ဇဝ်ဖြာ ဟဲ့ ဒွိုမ် တိုယ် ဒူအီ အူ ဝီ အီ စိူဝ် အာယောဟာန်။ 7အန် ဟဲ့ တး တဲး အန် ကာလာင် ဆက်ဆေ လွင် ဘ့လာင် တွိုန်၊ တဲး ဂေ ဒူအီ ဘောကာဂ့လျီတ် ကော ညှိုမ် ဇဝ်ဖြာ ဒေါ ထူမ် ဂေ ဂြုဝ်း အန်။ 8အန် ယီ တူ မုး ဒူအီ အီ ပီ ဘ့လာင် တွိုန်၊ အန် ဟဲ့ တး တဲး အန် ခဲ ဒီ အီ လွင် ဘ့လာင် တွိုန်။ 9ဘ့လာင် တီ ယီ မုး ဘ့လာင် အာခါခ်ု၊ ဘ့လာင် အီ တး ဒဲင် ကာဒါယ်၊ တဲး အီ နပ် နာ မှာန်၊ တဲး န့ လိုဝ်း ဒီ ဒူအီ ဒွန် အီ။
10အန် ဇဝ် တီ ဟဲ့ ဒွိုမ် ကွယ် ဒဲင် ကာဒါယ်။ ကာဒါယ် မိူဝ် မိုဝ်း ကူပ် အန်။ ဂေ ဒူအီ ဒဲင် ကာဒါယ် ယီ တူ နပ် အန်။ 11အန် တး ဇမ် ခဲင် မိူင် အန်။ ဂေ ဒူအီ အာမျုဝ် အန်၊ ဂေ ယီ တူ ရွုး အန်။ 12အာဆေ ယီ ရွုး အန်၊ အာဆေ ဘော ညှိုမ် အန်၊ အန် ဇဝ် တဲး ဂေ ဒွန် အီ ဘဲန် ဂွန် ဇဝ်ဖြာ။ 13ဂွန် ဇိုဝ် တီ တူ ပီ ဂွန် ဒူအီ အီ မိုဝ်း ဂုန့် မာ။ ဂေ ဘဲန် ဂွန် ဇဝ်ဖြာ ကူပ် ဒွါ ဇဝ်ဖြာ အာဆာက် ကာမာယ် ဒီ ဂေ။
14အန် ဇဝ် အီ စိူဝ် “ဂြုဝ်း” တွိုန်၊ အန် ဟဲ့ ဝီ ဘဲန် ဒူအီ၊ တဲး အန် ကွယ် ရိုမ် ဒူပ် အေ အာမျုဝ် ဒူအီ။ အန် မိူဝ် ကာဝေ ကာဆဝ် အီ။ အန် ဘော မာနုဝ် ဂေ ဘော ဘူင် နာ မှာန် ဆေဆေ။ ယေ မိူဝ် ဟဲ့ ယိုဝ် အာဖုင် ဒင်ခုဝ် အန်။ န့ မုး အာဖုင် ဒင်ခုဝ် ပီ ဒွါ ဇဝ်ဖြာ ဒီ ဂွန် အန်၊ အီ မုး ဂွန် အူ ဝီ တီ။
15အာယောဟာန် တွိုန် ဟဲ့ ဒွိုမ် ခဲ လွင် အန် ဇဝ် တီ။ အန် ဟဲ့ ဒတ် တဝ်း၊ “အုဝ် ဟဲ့ ဒွိုမ် ကာလာင် ဒီ ဘေ လွင် ဒူအီ ဝီ တီ။ အုဝ် ဟဲ့ တဝ်း၊ န့ ဒီ မိုဝ်း ဒူအီ အူ ဝီ အီ ဒီ တး ဒီ ပန် အုဝ်။ အန် ယီ တာင် လွှိုမ် အုဝ်။ ခုဝ်၊ အန် ဟဲ့ ကွယ် ဆိန့် အာတ့် မိုဝ်း အုဝ်။” 16န့ ယီ မုး အန် ဇဝ် တီ၊ အန် ကာဝေ ကာဆဝ် ဒူအီ။ ဂေဇူ အန် အာဝ် နပ် ဒီ တူတ့်။ ခုဝ်၊ အေ ဒွန် အီ ဟဲ့ ပွိုန် ဒီ ဒိုဝ်း ဂေဇူ အန် ဘဲန် ဇေန့် ဘဲန် ဇေန့်။ 17ဇဝ်ဖြာ ဟဲ့ တဲး အာမုဝ်ဆဲ တွိုန် ဒွါ ဒါရာ အန် ဒီ ဒူအီ။ အန် ယီ တဲး ဇဝ် ယေဆူ ဒွါ ဂေဇူ အန် ဘော နာ မှာန် ဒွန် မျုဝ် ဒီ အေ ဒူအီ။ 18အာဝ် မိုဝ်း အာဆေ အီ ဟဲ့ ဒွိုမ် ယိုဝ် ဇဝ်ဖြာ။ န့ ယီ မုး ဂွန် ဇဝ်ဖြာ၊ အီ မုး ခဲ့ အူ ဝီ တီ၊ အီ ကွယ် ရိုမ် ဒူပ် ဇဝ်ဖြာ။ အန် တဲး အီ နပ် လွင် ဇဝ်ဖြာ။
လွင် ဒါ ဆာရာ အာယောဟာန် တူ မုး အန် ဇဝ် အီ ချွတ် ဒူအီ
19န့ ယီ မိုဝ်း ဒူအီ အာယူဒါ အီ ကွယ် ခဲင် မိူင် ယေရူဆာလဲမ်။ အူ ဆီငဲ ဂေ ဝီ တိုယ် ဒူအီ အီ လှူ ဒီ ဇဝ်ဖြာ ဘော ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ မင် အီ၊ တဲး ဂေ ဟာဝ် ဇမ် ဒူင် ကွယ် အာယောဟာန် တွိုန်၊ တဲး ဂေ ဒီမွှတ် လွင် အာဆေ အန် မုး။ 20ဒေါ အန် တီ အာယောဟာန် ဝီ ကာလာင် အူ ဇေန့်၊ တဲး န့ ကာလှုး ဆီချာ ဒီ ဒွန် အီ။ အန် တဝ်း၊ “အုဝ် တူ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။”
21ဂေ ဝီ ဒီမွှတ် အန် တဝ်း၊ “ဆေ န့ ပါယ် တီ၊ မဲ မုး အာဆေ။း မဲ မုး ဒါ အာအေလီယ တွိုန်၊ အီ ဟဲ့ ယမ်၊ ဝီ ယိတ့် ဝီ အိမ်။း”
အန် ဝီ တဝ်း၊ “အာဝ် မုး။”
ဂေ ဝီ တဝ်း၊ “ဆေ န့ ပါယ် တီ၊ မဲ မုး ဒူအီ အီ ဘျာန် ဂြုဝ်း ဇဝ်ဖြာ။း”
အန် ဝီ တဝ်း၊ “အာဝ် မုး။”
22ဝါယ် အန် တီ ဂေ ဝီ ဒီမွှတ် ပေါ ဇေန့် တဝ်း၊ “ဆေ န့ ပါယ် တီ၊ အာဆေ မဲ မုး။း တဲး မဲ ကာလာင် ဒီ ယေ၊ တဲး ယေ နပ် ဒီ ဝီ ကာလာင် ဒီ ဂေ အီ တိုယ် ယေ။ မာဆေ ပီ တဝ်း မဲ လွင် ဒုဝ် မဲ။း”
23အာယောဟာန် ဝီ တဝ်း၊ “အုဝ် မုး ဒါ တွိုန်၊ အီ ကာလာင် ဂြုဝ်း ခဲင် ပြဲ ကာဟဝ်း တဝ်း၊ ‘တဲး ဘေ မ့ပြာယ် န့တေန့် ပီ လုဝ် ဝဝ့် အန် ဇဝ်။ ဘူင်၊ တဲး န့ ဆိူဝ်။’ ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာအီဆာယ၊ အန် ဟဲ့ ဒွိုမ် ကာလာင် လွင် အုဝ် ပါယ် တီ။”
24ဂေ ဒူအီ အီ ဟဲ့ တး ဒီမွှတ် အာယောဟာန်၊ ဂေ မင် အီ ဘော မုး ဒူအီ ခဲင် ဖိုင် ဖာရီဆဲ။ 25ဂေ ဝီ ဒီမွှတ် အာယောဟာန်။ ဂေ တဝ်း၊ “ဆေ န့ ပါယ် တီ၊ ဆေ မဲ တဝ်း၊ မဲ တူ မုး အန် ဇဝ် အီ ချွတ် ဒူအီ၊ မဲ တူ မုး ဒါ အာအေလီယ တွိုန်၊ အီ ဟဲ့ ဝီ ယိတ့် ဝီ အိမ်၊ မဲ မိူဝ် တူ မုး ဒူအီ အီ ဘျာန် ဂြုဝ်း ဇဝ်ဖြာ၊ မှဝ် န့ ပါယ် ပီ စိုပ် မဲ ဒူအီ ခဲင် အိုမ်။း”
26အာယောဟာန် ဝီ တဝ်း၊ “ဆေ န့ မုး အုဝ်၊ အုဝ် စိုပ် ဒူအီ ခဲင် အိုမ်။ န့ ယီ မိုဝ်း ဒူအီ ပေါ အူ ဝီ ကာတဲ ဘေ ပီ တူ နပ် ဘေ။ 27န့ မုး အန် အီ ဒီ တး ဒီ ပန် အုဝ်။ အန် ယီ တာင် လွှိုမ် အုဝ်။ ဝန် ခူဒိန့် အန် မိူဝ်၊ အုဝ် ညှမ် ကာအာပ် ဂဝ်း။”
28လွင် အန် တီ ဒွန် မျုဝ် အာယောဟာန် ကာလာင် ဒေါ ကွယ် အန် ဒီ ခူပ် ဘ့လဲင် ယောဒါန် ဘ့လာက် နာ ဝန် အွက်။ ဒူင် စိုပ် အန် ဒူအီ ခဲင် အိုမ် ယောဒါန်၊ န့ စိူဝ် ဘေထာနီ။
လွင် ဇဝ် ယေဆူ ပီ မာဘူ
29ပါ ခဲညှာ အာယောဟာန် တွိုန် ဝီ ယိုဝ် ဇဝ် ယေဆူ တး ဒူင် ကွယ် အန်။ အန် ဝီ တဝ်း၊ “တဲး ဘေ ယွတ်၊ ဇဝ်ဖြာ ဟဲ့ တိုယ် ဒူအီ ဝီ တီ၊ တဲး အန် ခမ် ဒီ ယမ် ပီ မာဘူ အီ လုဝ် လှူ၊ တဲး အန် ဘ့လွာ့ ဝဲန် မှာပ် ဂေ ဒူအီ ဒွန် အီ အီ ကွယ် ဒဲင် ကာဒါယ်။ 30လွင် ဒူအီ တီ အုဝ် ဟဲ့ ဒွိုမ် ကာလာင်၊ န့ မိုဝ်း ဒူအီ အီ တာင် လွှိုမ် အုဝ် ကူပ် ဟဲ့ မိုဝ်း အန် ဆိန့် အာတ့် မိုဝ်း အုဝ်။ 31အုဝ် တူ ဒွိုမ် နပ် အန်။ အုဝ် ယီ ဟဲ့ တး စိုပ် ဒူအီ ခဲင် အိုမ်၊ တဲး ဂေ ဒူအီ အီဆာရေလ ကော နပ် လွင် အန် တီ။”
32အန် ဟဲ့ ဟွတ့် ကာလာင် ပါယ် တီ၊ အန် ဝီ တဝ်း၊ “အုဝ် ဟဲ့ ယိုဝ် နဝ်း ဖွိုမ် ဇဝ်ဖြာ အီ ပီ မာဘ့လူယ် လူင် ခဲင် ဂါင်ဟြာဝ်၊ တး စုး ဒီ အန်။ 33အုဝ် ယီ တူ နပ် အန်။ န့ ယီ မုး ဇဝ်ဖြာ အီ စ်ု အုဝ်၊ တဲး အုဝ် စိုပ် ဒူအီ ခဲင် အိုမ်၊ အန် ဟဲ့ တဝ်း ဒီ အုဝ်၊ ‘ဆေ မဲ ယိုဝ် နဝ်း ဖွိုမ် အုဝ် တး လူင် ဒီ ဒူအီ ဝီ မှဝ်၊ ဒူအီ ဝီ တီ ဒီ တဲး နဝ်း ဖွိုမ် ဇဝ်ဖြာ အိုပ် ဘေ။ 34အန် မုး ဂွန် ဇဝ်ဖြာ။’ အုဝ် ဟဲ့ ယိုဝ် လွင် အန် တီ။ အုဝ် မိူဝ် ဝီ ခဲ ဒီ ဘေ ပါယ် တီ။”
လွင် ဒီဘဲ ဇဝ် ယေဆူ မင် အီ
35ပါ ခဲညှာ န့ ယီ မိုဝ်း အာယောဟာန် ဘော ဒီဘဲ အန် အာ ဝီ။ 36ဒေါ ယိုဝ် အာယောဟာန် ဇဝ် ယေဆူ ဟာဝ် ဒူပ် န့တေန့်၊ အန် ဝီ တဝ်း ဒီ ဂါယ်၊ “တဲး ဘာယ် ယွတ် ဒူအီ တီ။ ဇဝ်ဖြာ ဟဲ့ တိုယ် အန်၊ တဲး အန် ခမ် ဒီ ယမ် ပီ မာဘူ အီ လုဝ် လှူ။”
37အာယောဟာန် ဟဲ့ ဟွတ့် ကာလာင် ဂြုဝ်း တီ၊ ဒီဘဲ အန် အာ ဝီ တွိုန် ဝီ ဟာဝ် ဒူပ် ဇဝ် ယေဆူ။ 38ဇဝ် ယေဆူ ယီ ယွတ် နာ ပန်၊ ဝီ ယိုဝ် ဂါယ် အာ ဝီ ဒူပ် အန်။
အန် ဝီ ဒီမွှတ် တဝ်း၊ “မာဆေ ပီ လုဝ် ဘာယ်။း” ဂါယ် ဝီ တဝ်း၊ “မဲ ဒါ ဆာရာ၊ နာ မှဝ် မဲ ကွယ်။း”
39ဇဝ် ယေဆူ ဝီ တဝ်း၊ “တး ဒူပ် အုဝ်။ ဘာယ် ဒီ ယိုဝ်။”
ပန် တီ ဂါယ် ဝီ ဒူပ် အန်၊ ဝီ ယွတ် ဒူင် ကွယ် အန်။ အာဒါ အူ ဆီငဲ တီ ဂါယ် ဝီ ကွယ် ရိုမ် ဒူပ် အန်။ ပန် တီ န့ ကော နုဝ့် ဖွုန် နာရီ ဝါယ် ဆီငဲ ကာတဲ။
40ဂါယ် ဒီဘဲ အာယောဟာန် အာ ဝီ တွိုန်၊ အီ ဟဲ့ ယိုဝ် ဂြုဝ်း အာယောဟာန်၊ ဝီ ဒူပ် ဇဝ် ယေဆူ၊ အူ ဝီ စိူဝ် အာအန်ဒါရူ။ အန် မုး ဝါ အာဆီမူန်၊ အီ စိူဝ် ဘော အာပေတာရူ။ 41အန် ဝီ ဟာဝ် ဟြေတ့် အီကတ် အန် အီ စိူဝ် အာဆီမူန်၊ ဝီ တဝ်း ဒီ အန်၊ “ယာယ် ဟဲ့ ယိုဝ် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အေ ဘော တဝ်း အန် မုး အာမေဆီယာ။”#1:41 ခဲင် ဂြုဝ်း ဂြိက် “အာမေဆီယာ” လေး “ခိတ်။” လွင် ဒါင် အန် မုး “ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ” 42အန် ဝီ ယဲတ့် အီကတ် အန် ဟာဝ် ဇမ် ဒူင် ကွယ် ဇဝ် ယေဆူ။ ဇဝ် ယေဆူ ဝီ ယွတ် အီကတ် အန် တီ၊ ဝီ တဝ်း၊ “မဲ မုး အာဆီမူန်၊ ဂွန် အာယောဟာန် တွိုန်။ အုဝ် ဒီ တဲး မဲ စိူဝ် အာခေဖာတ်။”#1:42 “အာခေဖာတ်” ဂါယ် “အာပေတာရူ” မုး အူ မျုဝ်။ လွင် ဒါင် ဂြုဝ်း အာ ဒဲ တီ လေး “မာဝ် တာင်။”
43ပေါ အူ ဆီငဲ ဇဝ် ယေဆူ တဝ်း ဒီ လေး ဒူင် ကွယ် အန်၊ ဟာဝ် အိူင် ဂါလီလေ။ အန် ဘော ယိုဝ် အာဖီလိပ်၊ ဝီ တဝ်း ဒီ အန်၊ “မဲ ဒူပ် အုဝ်။” 44ဘော အာဖီလိပ် ဘော အာအန်ဒါရူ ဂါယ် အာပေတာရူ၊ ဂေ တး ခဲင် မိူင် ဘေတ်ဆီဒါ။
45အာဖီလိပ် ဘော ဝီ ယိုဝ် အာနာထာနေလ၊ ဝီ တဝ်း ဒီ အန်၊ “ယေ ဟဲ့ ယိုဝ် ဒူအီ အူ ဝီ။ ဒါ ဆာရာ အာမုဝ်ဆဲ ဘော ဂေ ဒူအီ အီ ဘျာန် ဂြုဝ်း ဇဝ်ဖြာ ဟဲ့ ဒွိုမ် ဒဲမ် အုန် လွင် အန်။ အန် စိူဝ် အာယေဆူ အီ ကွယ် မိူင် နာဆာရေတ့်။ အန် မုး ဂွန် အာယုဝ်ဆဲပ်။”
46အာနာထာနေလ ယီ တဝ်း၊ “အာဝ် မိုဝ်း အီ မွှိုမ် အီ တး မိူင် နာဆာရေတ့်။” အာဖီလိပ် ဝီ တဝ်း၊ “တဲး မဲ တး ယွတ် အန်။”
47ဇဝ် ယေဆူ ယီ ယိုဝ် အာနာထာနေလ တး ဒူင် ကွယ် အန်၊ အန် ဝီ တဝ်း လွင် အာနာထာနေလ၊ “ယွတ်၊ ဒူအီ တီ ဟဲ့ မုး ဒူအီ အာမျုဝ် အီဆာရေလ ခါခ်ု မှာန်။ အန် တူ နပ် ဒီ ကာလုဝ် အီ။”
48အာနာထာနေလ ဝီ တဝ်း၊ “မှဝ် န့ ပါယ် ပီ နပ် မဲ ဒီ အုဝ်။း” ဇဝ် ယေဆူ ဝီ တဝ်း၊ “ဒေါ ကွယ် မဲ ခြိုမ် ဟေ ဒီပူ တွိုန်၊ အာတ့် ဒဲ့ အာဖီလိပ် မဲ တး ဒီ နီ၊ အုဝ် ဟဲ့ ယိုဝ် မဲ။”
49ပန် တီ အာနာထာနေလ ဝီ တဝ်း၊ “မဲ ဒါ ဆာရာ၊ မဲ မုး ဂွန် ဇဝ်ဖြာ၊ မဲ မုး ခုန်ဒီခမ် အီ ဒီ အိုပ် ဒူအီ အီဆာရေလ။” 50ဇဝ် ယေဆူ ဝီ ဒီမွှတ် အန် ဝီ တဝ်း၊ “မဲ ညှိုမ် အုဝ်၊ ကူပ် တဝ်း အုဝ်၊ အုဝ် ဟဲ့ ယိုဝ် မဲ ဒေါ ကွယ် မဲ ခြိုမ် ဟေ ဒီပူ တွိုန်။း မဲ ဒီ ဘော ယိုဝ် ဘဲန် မျုဝ် ဘဲန် မျုဝ် အီ မွှိုမ် အာမ် လွှိုမ် ဇိုဝ် တီ။” 51အန် ဘော တဝ်း ဒီ ဂေ ဒွန် အီ၊ “အုဝ် တဝ်း အာခ်ု ဒီ ဘေ။ ဘေ ဒီ ယိုဝ် ဂါင်ဟြာဝ် ဒီ န့ဝိုဝ်း။ ဘေ ဒီ ဘော ယိုဝ် ဘော ဂေ အာမူ အာမာတ် ဇဝ်ဖြာ ဟုဝ့် ဟုဝ့်၊ လူင် လူင်၊ ဇမ် ဒူင် ကွယ် ဒူအီ အီ ဟဲ့ ဘဲန် ဂွန် ဒူအီ။”
© 2023, Wycliffe Bible Translators, Inc. All rights reserved.