मत्ती 13
13
बिहन मेमेरय राः उदाहरड़
(मरकुस 4:1-9; लूका 8:4-8)
1हेनेन देवह ईसु ओड़ाः वरी उडूंग केनते समुन्धर अड़ी रे सेनकेन तेय दुड़ूब यनु। 2#लूका 5:1-3अवुर हेना रे एतना होड़कू जवर एना कि हेंय मियाँटंग डोंगा रे रकब केनतेय दुड़ूब यनु, अवुर होड़कू अड़ी रेकू चड़ाँ तना। 3ना रे ईसु उदाहरड़ घयते अखीर टेबोईय लाय वकू दोहो एनु, “मियाँहोड़ बिहन मे-राय बिहन मे-रिय उडूंग एना। 4मेमेर तोलोग अवुराः बिहन होर अड़ी ते लोजोर एना। अवुर तितीजकू मेजकेन तेकू डोंगो जोम तेडा 5अवुराः बिहन चटाँड़ीवन ओत रे लोजोर एना, अवुर हेना रे हास कम दोहो एना, अवुर तुरेत्ते ओमोन एना। कहेकि हास गहीर मेनते मेने दोहो गना। 6लेकिन सीतोंग तेड तहाँ गुरलो यनु, अवुर मेने जेड़ियो गना ते लोहोड़ यनु। 7अवुराः बिहन जनोम भेंजुड़ ते लोजोर एना, अवुर हेना हरा एना, तहाँ जनोम भेंजुड़ दबो गोत्तेडू। 8लेकिन अवुराः बिहन बढ़ियाँ ओत रे लोजोर एना, अवुर पयदा एना, कोई सव गुना, कोई साठ गुना, कोई तीस गुना।” 9“जे लूतुर वनायू, हेंय अँजोम जोमियू।”
उदाहरड़ घयते ची लगाडिय कहनी तेडा हेना राः मतलोबिय लाया
(मरकुस 4:10-12; लूका 8:9-10)
10हेना वरी चेला कुतय बँदेत रे सेनकेन तेकू होंबोर तेडिया, “अम होड़कू सुदा उदाहरड़ दे-दे ते ची लगड मी टेबोआ?” 11तहाँय लाय वडकू, “सरग राज राः भेद समझोः लगड अपे बरदान ञँमकेना, लेकिन मेकू बेगर ञाँमा। 12#मत्ती 25:29; मरकुस 4:25; लूका 8:18; 19:26कहेकि जे थरे इदाना, हेंय अवुरिय ओवाया, हेंय थरे अवुर बगराआ, अवुर जे थरे कोवाआ, हेंय थरे जो कुछ इदाना, हेना होय अँगेर अविया। 13होड़कू ञेंञेंल तन रेहो मेनेकू ञें-लेआ, अवुर अअँजोम रेहो मेनेकू अँजोमेआँ; अवुर मेनेकू जे-रेआ ते, उदाहरड़ घयतेंञ लाय यडा। 14नेकू राः बारे ते एसायाह भविस्यवक्ता पहील तेय लाय तडा, हेना उतरोः तना, ‘लुतूर पेते दोपे अँजोमेआँ, लेकिन एरो पे जेर तेडा; मेडपे तेपे ञें-लेआ, लेकिन एरो पे चिन्हों तेडा। 15कहेकि नेकू होड़कू जीवित कुकू केटेज गोत्तेडा, अवुर मेने अँजोम गिसन यडकुआ, अवुर नेकू मेडतू कुकू जपिड केडा; अगर नेकू जीवित कू मेनेकू केटेज गड रेदो, अपन मेड ते ईञाः काम कू ञेंलतेड मेनू, अवुर अपन लुतूर तेकू अँजोम तेड मेनू, अवुर मन रेकू समझो एन मेनू, अवुर नेकू पाप वरी मन मिड़ाः केते इंञ हनते कू मेजेन मेनू, अवुर इंञ नेकुंञ चिकन तेडकू मेनू।’
16 #
लूका 10:23,24 लेकिन आसीसित गिआ अपे राः मेड, कहेकि अपे अपन मेड ते ईञाः काम पे ञेंलियाडा; अवुर अपे लूतुर, कहेकि अपन लूतुर तेपे अँजोम यडा। 17कहेकि इंञ अपे थरे सही मेतेंञ कहनी यडा, अखीर भविस्यवक्ताकू अवुर धरमिकू अपे ञेंलियाडा, हेना टेबोः ञेंल गिसन तेडकुआ, लेकिन हेंकू मेनेकू ञेंल सको गना। अवुर अपे अँजोम यडा, हेना टेबोः अँजोम गिसन तेडकुआ, लेकिन मेनेकू अँजोम सको गना।”
बिहन मेमेरय हेना उदाहरड़ राः मतलोब
(मरकुस 4:13-20; लूका 8:11-15)
18“निहों अपे बिहन मेमेरय मेनाआ, उदाहरड़ राः मतलोब पे अँजोमू 19कनय होड़ राज राः टेबोईय अँजोमे, अवुर मेनेय जे-रे, तहाँ लाय वडिया, हेना टेबोः सयतान मेजकोःते हेंय राः मन वरी एर लीड़िंञ गोत्तेया; होर अड़ी ते लोजोर एना, हेना बिहन ने-नी हवे। 20चटाँड़ी ओत रे लोजोर एना, हेना बिहन नेय हवे, अँजोम केते खुसी तेय मनोवेआ। 21लेकिन हेंय राः जीवित रे मेने जेड़ियोआ, अवुर पक्का बिसवास मेने दोहो नते कुछ दिन लगाडिय दोहोना, भगवान थरेय बिसवास केडा, हेना चलते ते कनारा संकट चहे सताव मेजुः रेय बगी वआ। 22अवुर जनो वना रे लोजोर एना, हेना बिहन नेय हवे, बचन अँजोम तुदोय अँजोमेआँ। लेकिन न दुनिया राः चिन्ता, अवुर धन राः मोंह, हेंय अँजोम केडा, हेना बचन दबो गोत्तेआ, अवुर हेंय मेने जो-आ दुबी घयते बचन रा अनुसार ते मेनेय सेन सकोआ। 23अवुर बढ़ियाँ ओत रे मेर केडा, हेना नेय हवे, बचन अँजोम केतेय समझो वेआ, अवुर फालिय आगा; कोई सव गुना, कोई साठ गुना, कोई तीस गुना।”
बीर दना राः उदाहरड़
24ईसु अवुर मियाँटंग उदाहराड़िय कहनी तेडा, “सरग राज नेय होड़ घयगिआ, अनेज राः खेत रे बढ़ियाँः बिहानिय मेरतेडा। 25लेकिन होड़कू गितीज तन तोलोग, हेंय रेनिय मुदेय मेजकेनते, गोहोम खेत रे बीर दनाय मेर अटु केतेय चलो यनु। 26हेना वरी ओमोन एना, अवुर गेले एना, तहाँ बीर दना हो ञेंलेना। 27हेना वरी हरवाहकू सेनकेन ते, खेत मुँवर थरे कू कहनी तेडा, ‘ए गिरहत, खेत तम रे बढ़ियाँः बिहन मेनेम मेर गडा किदो? हेनारे करा वरी बीर ओमोन केना?’ 28तहाँ हेंय हेंकू थरेय कहनी तेडा, ‘नआँ कनय मुदेय राः काम हवे।’ हेना वरी हरवाहकू हेंय कू होंबोर तेडा, ‘अम ची मेनतेम कहनी यडा, सेनकोः तेले रचागे किदो?’ 29हेना वरी हेंय कहनी तेडा, ‘बीर दना रचाः तोलोग गोहोम हो रचाः एड़ोआ, हेनाते इकावापे।’ 30अनायिन ईरे मेन दिन मियाँ तेपे एनेम बडेवा, अवुर ईरे तोलोग इईर कुंञ कहनी वआ, ‘पहील ते बीर पे जवारू, अवुर तुयाँगे लगड पे बोझायू, अवुर गोहोम तुदो ईञाः कोठी रेपे जवारे’।”
सरसों दना राः उदाहरड़
(मरकुस 4:30-34; लूका 13:18-21)
31ईसु अवुर मियाँटंग उदाहराड़िय कहनी तेडा, “सरग राः राज सरसों दना घयगिआ, हेना मियाँहोड़ बरी तय रेय मेरतेडा। 32हेना सींड़ दना वरी दमभर दो दोहोना, लेकिन बडे जोमा, तहाँ नआँ सगोर अड़ाः वरी बडे जोमा;#13:32 इसरायिल देस रे सरसों दाना बडा बडे ते काठुः दोहो एनु। अवुर एयसा काठ बनो जोमा कि अगस तेनकू तितीजकू मेजकोःते हेना डाँड़ तुते कू डेराआ।”
खमीर राः उदाहरड़
33हेंय अवुर मियाँटंग उदाहराड़िय कहनी तेडा, “सरग राः राज खमीर घयतेआ, हेना मियाँहोड़ कोड़ीहोन तीन पसेरी आटा रेय सुवेड मेड़वा तेडा, तहाँ सींड़ आटा खमीर बनो यनु।”
उदाहरड़ राः प्रयोग
34नआँ सींड़ टेबोः ईसु होड़कू थरे उदाहरड़ दे-दे तेय समझो तेडकुआ, अवुर बेगर उदाहरड़ ते कनर मेनेय कहनी दोहो एनु, 35नआँ सींड़ टेबोऊ भगवान अनेज रेनिय भविस्यवक्ता राः दोवारा ते पहिल तेय कहनी तडा, हेना टेबोः पूराऊ, “इंञ उदाहरड़ राः रूप तेंञ टेबोआ, दुनिया बनो तेड वरी बेगर टिपाआ, टेबोः इंञ टिपायञूँ।”#सिरिंग 78:2
बीर दना राः उदाहरड़ राः मतलोब तू
36हेना वरी भीड़ बगी वते ओड़ाः रेय मेजेना, अवुर चेला कुतय हेंय थरे मेजकेन तेकू कहनी तेडा, “खेत राः बीर दना राः उदाहरड़ मी समझो ले।” 37तहाँ हेंकू थरेय कहनी तेडा, “बढ़ियाँः बिहन मेमेरय होड़ होपोन हवे। 38अवुर खेत चँवदीस हवे, बढ़ियाँः बिहन भगवान राः राज रेनकू होपोनकू हवे, अवुर बीर दना, सयतान होपोनकू हवे। 39मेमेरय दुस्मन सयतान हवे; इईर दुनियाँ राः अन्त हवे, अवुर इईरकू सरगदूतकू हवे। 40जेयसे बीर जवर केतेकू तुयागेआ, हेन घयते दुनियाँ राः अखरी रे होयाआ। 41हेन घयते होड़ होपोन अनेज रेनकू सरगदूत कुय कूला, अवुर हेंकू हेंय राः राज वरी पापे लगड एटाः कुकू अडिजा, हेंकू सगोरकू अवुर गलत काम कुकू जवारा। 42अवुर हेंकू सेंगेल दिलकोआ हेना रेकू अटड़ कुआ, हेना रे ईयामा कू अवुर तिरींग तुकुकू लुकड़ूमा। 43हेना तोलोग धरमी होड़कू अपत राः राज रे बेर घयतेकू लवकोआ। जे लूतुर वनय, अँजोम जोमियू।”
अड़हत अवुर मोती राः उदाहरड़
44“सरग राः राज खेत रे उकू केना धन घयगिआ, हेना कनय होड़ ञँमकेतेय उकू गोत्तेडू, अवुर हेंय खुसी राः मार ते सेनकेनते अनेज राः सगोरिय केजा गोत्तेडू, अवुर हेना खेतीय तिला तेडा।”
अनमोल मोती राः उदाहरड़
45“सरग राज बढ़ियाँआँ मोती छपाअय बेयपारिया घयगिआ। 46हेंय मियाँटंग किमतिआ मोतिय ञँमतेडा, तहाँ सेनकेनते अनेज राः सींड़ चीजिय केजा तेडा, अवुर हेनाय तिला तेडा।”
जाल राः उदाहरड़
47“सरग राज समुन्धर रेकू अटड़ केडा, बडेआ जाल घयगिआ, अवुर हेना जाल ते जे-निरीत रेनकू हकुकू रपोट अगतेडा। 48अवुर जाल पेरेज एना, तहाँ हकु ञेंड कू हेना धरी हनतेकू ओर अगतेडा, अवुर दुड़ूब केनते बढ़ियाँ बढ़ियाँ कुदो बरतन रेकू जवर तेडकुआ, अवुर बेकार कुदोकू घिर तेडकुआ। 49दुनियाँ राः अखरी रे नेन घयते होयाआ। सरगदूतकू मेजकोःते पापी होड़कू धरमी होड़कू वरी कू हिगरो कुआ। 50अवुर हेंकू दिलकोआ सेंगेल रेकू अटड़ कुआ। हेनारे ईयामा कू अवुर तिरींग तुकुकू लुकड़ूमा।”
नवाआँ अवुर मरिआ सिक्छा राः महत्व
51ईसु चेला कुय होंबोर तेडा, “अपे नआँ सगोर टेबोःपे जेर तेडा किदो मेने?” हेना वरी हेंकू हेंय थरे कू कहनी तेडा, “हूँ।” 52हेना वरी हेंय हेंकू थरेय कहनी तेडा, “हेनाते हर एक एहूदी नियम चेचेडय जोकि सरग राज रेनिय चेलाय बनो केना, हेंय अनेज राः गोदाम वरी नवाँ अवुर मरिआ चीजिय उडूंगा, हेंय ओड़ाः मुँवर घयगी अयू।”
नसरेत रे ईसु मेनेकू आदर गडिया
(मरकुस 6:1-6; लूका 4:16-30)
53ईसु नआँ सींड़ उदाहराड़िय कहनी हनी तेडा, तहाँ हेना जघा वरिय चलो यनु। 54अवुर अकू राः सहर रे मेजकेन ते हेंकू राः आराधना ओड़ाः रे एयसाय चेडकू दोहो एनु कि अहचरज यन तेकू कहनियू, “नेय चेडकू लगड बुद्ही अवुर नआँ सक्ति करा वरिय ञँमकेडा? 55नेय बढ़ेय होपोन न लगे किदो? अवुर नेय इंगत ञुमू मरियोम मेनते कोवाआ किदो? अवुर नेय बोहोत एकूब, उसुफ, सिमोन अवुर एहूदा एडकू न लगे किदो? 56नेय मीसित एडकू अबू सुदा मेने कू दोहोना किदो? दो नेय होड़ नआँ सींड़ करा वरिय ञँमकेडा?” 57#एहुन्ना 4:44अवुर हेंकू हेंय मेने कू सरी गडिया। लेकिन ईसु हेंकू थरेय कहनी तेडा, “अपन सहर अवुर अपन ओड़ाः रे भविस्यवक्ता मेने कू आदर इजेतिया, लेकिन एटाः हँडे कू आदर इजेतिया।” 58होड़कू मेने कू बिसवास गडा ते, ईसु हेना रे बगरा अहचरज काम मेनेय करो गडा।
© 2022, Wycliffe India. All rights reserved.