Luka 7
7
Yesu a̱ creng a̱kwwa kaptin soja Rom
(Matta 8:5-13)
1Ka̱ram ka Yesu na̱ bun tyak ba̱ryat ba bu ba̱nyet ba ni, a̱ drok a̱ nat Ka̱fa̱rna̱hum. 2Kaptin nsoja Rom a̱yaan a̱ yin shyi ka̱ yemi, a̱ byyi a̱kwwa a̱ ku cat ba̱t, a̱kwwa nu a̱ yya hywu a̱ nat ka̱nu dikwu. 3Kaptin nu na̱ bu hok nkhang Yesu na a̱ tom ba̱nekwo ba̱nyet Yahuda ba̱yaan ba si yei Yesu na̱ ba a̱ bu creng a̱kwwa nu nu. 4Ba ba di Yesu a̱ bu hwat mbvak a̱ ku naai a̱ hywa, “A̱ntyen a̱ni a̱ myim a hok dizot nu i ku brang, 5rot nu a̱ gwai ba̱nyet njit ba, hat a̱ za nok bat a̱duwa.”
6Yesu a̱ nat ba̱ mba. Na̱ si tat ba̱shishrek bu ka̱ryi ka, kaptin nu a̱ tom ba̱rywai nu ba bu tyyei Yesu, a̱ hywa, “Malam, ryok ya waat ba. N maai a nwa a̱gbang nzuk ba, 7da n maai n ba da̱ nwan mbvak nzuk ba. Ko a hywa bu di ka̱nu ma, a̱kwwa nzuk u a̱ ni creng. 8Rot nzuk ma n shyi a mbvak a̱yin, n ma̱n byyi nsoja na shyi a mbvak nzuk. Ki n hywa da̱ a̱ntyen a̱ni ‘Nat ka̱yaa ni’, na̱ nat. Ki n bo hywa da̱ a̱nyanyet, ‘Ba kyi’; na̱ ba. Ki n bo hywa da̱ a̱kwwa nzuk ‘Yya ni,’ na̱ yya.”
9Yesu na̱ bu hok ba̱ryat nu ba a̱ ma pyyem bu ka̱nu, a̱ brak a̱ hywa di ka̱tswa ba̱nyet ka a̱ yin cong ba̱ nu ni, “Ryok n ya tyyei, ko ka̱yat Isreila ka n ka̱n shya a̱ntyok wrak rya da̱ a̱tuba a̱ni ni ba.”
10Ba̱nyet ba ba tom ni ba bu brek a̱ ba ka̱ryi kaptin ka a̱ bu shya a̱kwwa nu na̱ creng.
Yesu a̱ shyek ka̱seyang ka a̱ kwu ni
11Ba bu tyak, Yesu a̱ drok a̱ naat ka̱nkrang ka̱yaan ban yei Na'in. Na̱won pfong nu na bu ba̱nyet ba̱gingang a̱ cong ba̱ nu. 12Na̱ bu tat ka̱nu ka̱nkrang ka a̱ ryi ba ccok kom a̱yanyet a̱ wwut i, a̱ yin yet ka̱seyang a̱ shyi ba̱diyin a a̱naa nu nu. A̱tyyi nu a̱ ka̱n kwu a̱ ku wwon ba̱diyin ba̱ a̱naa nu nu. Ba̱nyet ba̱gingang i ka̱nkrang ka a̱ yin tssup a̱naa nu bu kom a. 13Ka̱ram ka A̱gwam Yesu na̱n dyi a̱naa ka̱seyang u na̱ shyi i ka̱nak i, na̱ hok dizot nu ba̱t, a̱ hywa da̱ nu, “Ryok kun ba.” 14Wwon a̱ seyak a̱ nat a̱ si tyyi bvak nu na a̱n byram a̱ngbrak u, ba̱nyet ba a̱ ccok kom a ni a̱ brek a̱ sseng. Yesu a̱ hywa, “Ka̱seyang, n hywa da̱ nwan, ta̱za!” 15Ka̱seyang iya a̱ kwu ni a̱ ta̱za a̱ swrang a̱ nwa ba̱ryat. Yesu a̱ ku pyyem a̱ tyyi a̱naa nu mi mbvak.
16Koyan ka̱wun a̱ ku pyyem, ba dyep Ka̱za, a̱ hywa, “Zi shya a̱gba̱dang a̱ntyok tyyei ba̱ryat Ka̱za ka̱yat njit.” A̱ bo hywa, “Ka̱za a̱ ba za brang, njit ba̱nyet nka.”
17Nkhang ani i nat koke i ka̱byen ba̱nyet Yahuda bu kpikpit na̱byen na shyi shishrek ba̱ mba ni.
Yohana A̱yya Baptisma a̱ tom ba̱pfong nu di Yesu
(Matta 11:2-19)
18Na̱won pfong Yohana na a̱ ku tyyei sa̱rei nkyang a Yesu na̱ yya ni, Yohana a̱ yei na̱won pfong nu ba̱na na̱hwa 19a̱ ba̱ tom di Yesu ba si ku zzim, ka̱ nu a̱ yet a̱yin nu a̱ bai ni, ki ba ma̱ ri pfong a̱yanyet, na̱ ba̱ tyyei.
20Ba̱pfong Yohana ba a̱ nyyai a̱ ba di Yesu a̱ bu hywa da̱ nu, “Yohana A̱yya Baptisma a̱mi a̱ za tom zi bu na̱ zzim i hok ka̱ nwan yet a̱tuba nu na̱ hywa di a̱ bai ni ki zi ri pfong a̱yanyet.”
21Ka̱ram iya Yesu a̱ creng ba̱nyet nhywu ba̱gingang a̱ bo trung a̱ka̱tuk tswa, a̱ yrang ba̱nyet a̱tutwan ba̱gingang a̱ssi. 22Na̱ hywa di ba̱pfong Yohana ba, “Yi nat si ku tyyei kyang a yi bu ryi i bu hok ni. Ba̱nyet a̱tutwan a̱ tssak a̱ssi, ba̱nyet kwi nkap a̱ nwa cong, ba̱nyet gbap a̱ creng, ba̱nyet diran a̱ pfong, ba̱nyet ba a̱ ka̱n kwi ni a̱ tang sso, ba̱nyet dizot a̱ bo pfong Ka̱sham Ba̱ryat ka. 23A̱yin nu a̱ wwat ka̱ryong da̱ nzuk ni a̱ shyi bu ba̱gwai.”
24Ka̱ram ka ba̱pfong Yohana ba ban drok i, Yesu a̱ ryat tazwa Yohana a̱ hywa di ka̱tswa ba̱nyet ka, “A̱nzan yi yin wruk nat ryi na ka̱yit ka? A̱ma̱ndyim a wun ku jim ni e? 25A̱nzan yi yin nat ryi na ba̱t? Yi yin nat cyang a̱yin na̱ kup a̱cecet na̱sham ba̱tro o? Ba̱nyet ba a̱ tssup ntaka̱i ba̱tro iya ni a̱ bo swat i shya-hwat i a̱ swat i na̱sa ba̱gwam. 26To, a̱nzan yi yin nat ryi na? A̱ntyok tyyei ba̱ryat Ka̱za a? Ee, ku yet ka̱ryong, Yohana a̱ ra̱u ba̱nyet tyyei ba̱ryat Ka̱za ba ma. 27Yohana a̱mi ba̱ryat Ka̱za ba ba hywa a̱za̱ nu, ‘Cyang a̱pfong nzuk, a̱nu n tssop na̱ sook ka̱son nwan. Nu a̱mi a̱ ni jyi ryen na a ni sook ni.’ ” 28Yesu a̱ bo hywa, “Ka̱ryong n ya tyyei, sa̱rei ba̱nyet ba a̱ yet byin a̱ra̱mbyring ni, a̱yin a̱n shyi a̱ ra̱u Yohana ba. Ma brak, a̱yin nu a̱ bo yet ka̱baan ka sa̱rei i ba̱nyet nwa Dityok Ka̱za ti ni a̱ ku ra̱u.”
29(Ba̱nyet ba sa̱rei nta̱mak bu ba̱nyet ssang diga̱ndu ba ba bu hok a̱ shim ryen Ka̱za na nkpa yet, rot ba ka̱n san baptisma Yohana nu. 30Ma ba̱nyet Farisa bu ba̱malam Truwang ba a̱ rak kyang a Ka̱za ka cat ba yya ni, rot ba rak ba ba̱ yya baptisma Yohana nu.)
31Yesu a̱ bo hywa da̱ mba, “Ba̱nyet zamani bani a̱ tai a̱nzan? Ba yet a̱nzan taka̱i ba̱nyet? 32Ba tai na̱mawon na a̱ swat an kasuwa ni, a̱ yei ba̱yaan a̱ yya, ‘Zi ya tyap shwrya da̱ nyin ba song ba, i kun ka̱nak da̱ nyin ba kun ba̱ njit ba.’ 33Yohana A̱yya Baptisma a̱ ba a̱ yya a̱zumi di na̱ sswa nkwwa ba, yi hywa da̱ a̱ shyi ba̱ a̱ka̱tuk tswa. 34Nzuk Ka̱won A̱neywu n bo n ba, n za n sswa, yin ba bu hywa, ‘Yi cyang a̱nying ka̱hwa a̱dyying a̱ni! A̱ sswa nkwwa, a̱rywai ba̱nyet ssang diga̱ndu bu ba̱nyet a̱ka̱tukyya!’ 35Ma ba̱nyet ba a̱ san a̱za̱ncyi Ka̱za ni a̱ na̱ tyyei da̱ yet ka̱ryong!”
Yesu gbang Siman Ba̱farisa
36A̱ntyok ba̱nyet Farisa a̱yaan a̱ yei Yesu na̱ si ya kyangya a̱gbang nu. Yesu a̱ nat a̱ si swrang a̱ ni ya kyangya na. 37A̱mbyring a̱yaan a̱ ma̱n shyi i ka̱nkrang ka. A̱ yin yet a̱kan-a̱naan. Na̱ hok ka̱sak ka Yesu na̱n za kyangya a̱gbang a̱ntyok ba̱nyet Farisa ni, na̱ sook shep ka̱sham ba̱myyi. 38A̱ nyyai a̱ bu sseng a̱maryim Yesu ka ba̱cicrak ba̱ a̱tak a, a̱ nwa ka̱nak a̱ kwot ba̱ssi ba a a̱tak nu na, a̱ tyyi a̱cat diccu nu na a̱n shok a̱tak a, a̱ ta̱gbok a̱ brak ba̱myyi ba a̱ krok a a̱tak Yesu na. 39Ka̱ram ka a̱ntyok ka̱ryi nu na̱n dyi kyang a̱mi ni, a̱ hywa ka̱yat mpfwa, “A̱ntyok a̱ni da̱ nan yet a̱ntyok tyyei ba̱ryat Ka̱za, se a̱ bvwo ka̱sak ka a̱mbyring a̱ywu a̱ ku byram ni na̱n yet a̱mbyring a̱ka̱tukyya nu ni.”
40Yesu a̱ yrek diwan ti a̱ hywa, “Siman! N ni na̱ tyyei kyang yring.”
Na̱ hywa, “To, Malam; ryat zi hok!”
41Yesu a̱ hywa, “Ba̱nyet ba̱hwa a̱ yin si sook ta da a̱ntyok wwat kwap. A̱tuba a̱yring a̱ kwwak dinari ncyi tsson, a̱tuba a̱yring u nswak mpfon. 42Ba bu yyat tan na ba, na̱ ba̱ wwon ni. A̱nyan ka̱yat ba̱nyet ba̱hwa iya a̱mi a hwa di a̱ ni ku gwai bat?”
43Siman a̱ hywa, “N dyi anye a̱tuba nu ba ku wwon a̱kpok ta nu ni.”
Yesu a̱ hywa, “A hywa ka̱ryong.” 44A̱ brak a̱ cyang a̱mbyring a̱ywu a̱ hywa di Siman, “Da̱ cyang a̱mbyring a̱ni! Nyyai ka̱ram ka n nin nwa a̱gbang nwan ni, a n dyi ba̱shekwot tssu a̱tak ba. Ma nu a̱ n tssu a̱tak di ba̱ssi nu a̱ bo na̱ shok da̱ a̱cat diccu nu. 45A n byyek ansham ba, ma nyyai n nin nwa kyi na̱ pfut a̱tak nzuk a a̱n tyyei ka̱sak ka na̱ ni n cat i. 46A n krok ba̱myyi diccu ba, ma nu a̱ n krok ka̱sham ba̱myyi a a̱tak nzuk a. 47Nkpa n na̱ tyyei: a̱gba̱dang cat u na̱ tyyei ni a̱ tyyei ka̱sak ka Ka̱za ka ka̱n kaai a̱gba̱dang a̱ka̱tukyya nu nu a̱ wwon ni. Ma a̱yin nu ba kaai a̱cincong a̱ka̱tukyya a̱ wwon ni a̱ ma̱ ni gwai ba̱cincong.”
48Wwon a̱ brak a̱ hywa da̱ a̱mbyring a̱ywu, “Ka̱za a̱ na̱ cii a̱ka̱tukyya nwan nu.”
49Ba̱nyet ba a̱ swat ba̱ nu ni a̱ hywa di ba̱yaan, “A̱nyan a̱nu ni hat a̱ maai cii a̱ka̱tukyya?”
50Yesu a̱ bo hywa da̱ a̱mbyring u, “Wrak rya nwan na na̱ san. Nat ka̱ryi bu rya nwan yring.”
© 2011, Wycliffe Bible Translators, Inc. All rights reserved.