Génesis 8
8
Co'na' ime'uegue so nqodoc
1Co'na' ime, ca' ñi qota'olec ỹo'leenta'a so Noé chaqai sá'ogue so iseripi neetaugui aso lo'ueenata só'maq ỹaỹoxontegueri'o' na'le quena lauat so huaxaỹaq. Ca' ỹo'ueeto' so nonot pe'telec nqai'en na 'laua. Ca co'na'le, ca' nqo'neetañi so huaxaỹaq. 2Ca' napoguilo naua lliquishiguim na huaxaỹaq quena huaaxai chaqai pogui qai'neeta na piguim, ca' ỹaxanegue so ỹaxat. 3Ca' nqo'neetañi so huaxaỹaq. Ca na' ỹovite' saua ciento cincuenta na'xata' quiyim nqo'neetañi so huaxaỹaq. 4Ca co'na' mashic ỹovirerec saua seis shiriguiri, ca hueetouguilo saua diecisiete na'xata', ca' aso no'ueenata nahi' chaqai nejlec aso qa' ladocai naalec yi 'laua Ararat. 5Qam ñaq nqo'neetañi so huaxaỹaq. Ca co'na' mashic ỹovite' saua nueve shiriguiri. Ca' queso 'auaxaic liỹa na'xa'a, ca mashic 'ue na liỹa re'oq quená'maq paguec qoỹoqoshi'megue quena 'laua.
6Ca co'na' ime' saua cuarenta na'xata', ca' so Noé ỹauachigui aso nqote aso lo'ueenata lahi' huaxaỹaqse. 7Ca ỹaxaneco' so 'óna ratecsan. Ca' so ratecsan chaqai ỹootegueri' quena 'laua, nauaanta'a quiyim rashivilec na 'laua. 8Ca co'na' ỹoxogue so ratecsan. Ca' so Noé ỹaxanec so coviguiñic, ma' ỹahotaque ỹa'den quiyim mashic rashivilec na 'laua. 9Ca' so coviguiñic rapila'a aso nahi', ma' sqaica quet cá'maq ỹa'maxañi quiyim ỹo'ñi, ma' na 'laua ñaqai 'xoic na huaxaỹaq hueetalec. Ca' so Noé nañaanec da lqai'laxat, ca' so coviguiñic ỹolec, ca qaỹopilaxatougui aso nahi'.
10Ca' so Noé rauaanaxanac quesaua liỹa' siete na'xata', ca lotqai liỹa ỹaxanec so coviguiñic. 11Ca co'na' mashic sham napalñi, ca novi' rapilo so coviguiñic, ỹa'queeta'a aso olivo lasocho'lli'. Ca' quedajo so Noé retano' quiyim sham rashivilec na 'laua. 12Ca' rauaanaxan quesaua liỹa' siete na'xata', ca lotqai liỹa ilarec so coviguiñic. Ca' so coviguiñic tot rapilo.
13Ca co'na' so Noé ỹovite' saua seiscientos chaqai 'óna ñaxari co'na' rashivilec na 'laua. Queso 'auaxai na'xa'a queso 'auaxaic shiraigo, ca' so Noé naqat so lelaq aso lahi' huaxaỹaqse, ca' iuano' na 'laua mashic rashivijlec. 14Ca na' ỹovirerec saua veintiseis na'xata' queso liỹa shiraigo, ca' na 'laua ỹaatqajam rashivijlec. 15Co'na'le, ca' ñi qota'olec 'naaco' queso Noé:
16—Nenoxoñirec cana rahichi', chaqai aca roua'e', chaqai naua qachaalaxahi' chaqai naua rachilli'. 17Chaqai naqachirec qai'neeta ná'ogue na iseripi neetaugui ana rahichi': na ỹoipi, chaqai iseripi neloipi, chaqai ná'maq nqai'queetegueri', qaiyi quelec ná'ogue na 'laua. Ca' ỹa'ue na llaalec, ca no'xataxajlec na 'laua.
18Co'na'le, ca' so Noé, chaqai aso loua, chaqai saua llaalqa chaqai saua latel nenoxondec caso lahite'. 19Chaqai qai'neeta nenoxonec sá'ogue so iseripi quena neloipi chaqai na neuequipi, ná'maq nqai'queetegueri' chaqai na ỹoipi. 20Ca co'na' ime, ca' so Noé ỹo'ueeto' aso lcopatoxonaxalate quiyim imaqachin ñi qara'gaxala'. Ca ỹacona'a quena iseripi chaqai quena ỹoipi quená'maq co'teeta, 'oonoqui' ñi ỹacona'a quená'maq ỹoreta'oguit iseripi. Ime, ca ỹavigaxat, ỹa'ue aca lachitaxanataxanqate quiyim ỹaanot ñi qara'gaxala'. 21Ca co'na' ỹovitot ñi qara'gaxala' da lo'daxa na lahita. Ca 'naaco':
—Nagui, ca' tot qaica ma' liỹa quet so'uet ca se ỹa'maxañi sauaxat na qom, ma' naqueta'ogue' na qomyipi quiyim qaica ca liỹa la'deenataxanaxac, qaidaata dá'maq se no'uen. Chaqai tot nilliviñi nqaishin, totqai shine'tegue nagui.
22Quiyim saqa' ỹovita ca lqodoc na 'laua,
ca' 'ue na nanec chaqai quiyim qanaqat ana la;
chaqai 'vii naua npa'ỹaxari chaqai naua no'oomaxari,
ca' novi' na no'oomaxa chaqai yi ñaaxa,
chaqai naua na'xata' chaqai naua piri.
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.