मती 17
17
ईसू विड़चेड़नेना
(मरकूस 9:2-13; लूका 9:28-36)
1छो दिन तयोमरे ईसू, पतरस, एकूब अरू एकूबरीग बोहोत एहुना सुदा मीटोंग उसूल पहाड़ सेरमो एकलाय गोःयाडकू। 2हंडा चेलाकू ञेनेल ञेलरे हाँयराः मुरइत बदलावयान अरू हाँयराः सुरइत बेर इया विड़चेड़नेना अरू हाँयराः सोनहे मरसल इया फक-फक उजड़यान। 3असाका भगवानराः बड़रा कता होड़किन मोसेस अरू इलियाह, ईसू सुदा बुतुड़ूकिन एचे ञेलयान।
4दो पतरस ईसू एचेरेय कतातेड, “ने परबू, अबू नंडा इदानबुःआ दो नपाय इदा। आम चाहाःतान दो, नंडा ईंग पेयटोंग कुंबायिंग तुलाता, मीटोंग आम लगा, मीटोंग मोसेस लगा अरू मीटोंग इलियाह लगा।”
5पतरस नाःआ इयाय कनकता मेला मीटोंग विड़चेड़तो बदरी हँकू दाब रेडगोतेडकू अरू हना बदरीते भगवानराः बड़रा अयूमनेना, “नाँय ईंगरीग दुलार बेटा हवे, नाँय बदीरे ईंग मुरुक बहालते इदानिंगा। नाँयराः कतापे मनाः।”
6नाःआ कता अयूमतेडखन चेलाकूतेन मुरुककू बोरोयान अरूकू लेबदायान। 7मनदो ईसू हँकू एचेरेय सेनेडा अरू टोँवावतेडकूखने कतातेरा, “रिमुःपे, अलोपे बोर।” 8अरू हँकू रेमनेनखनकू ञेलतिडिग दो हंडा ईसू एकला दोहोना।
9अरू हँकू पहाड़ अतेकू उतराःआ हनमेला ईसू चेलाकूतेने हुकुमवातेडकुःआ, “मनुवारीग बेटात गोएगतो अते अरीन जियाव रिमुः वरी, अपे ञेलकेरा हना तोनोंगीग एचेरे अहापे उदुःगे।”
10हनते चेलाकूतेन हाँयकू होंबोरतेड, “दो गुरुजी, नियम चेडदार होड़कू चिला लगाकू कतायता, इलियाह मड़ंगरे वेग लगा इदा, माःआन?”#मला 4:5-6
11दो ईसू कतातेड, “हँकू सतायकू कतायतना। इलियाह वेगकियानखन जमाकूने नपायगोडता। 12मनदो ईंग अपे एचेरेयिंग कतायतना, इलियाह वेगनेना, मनदो होड़कू हाँय मेरकू सिनहागडीग। अरू होड़कू चहावनेना हनन इया जमाकून हाँय सुदाकू एचेतेरा। दो हनन इया मनुवारीग बेटातके हों हँकू एचेरे कटसिया ससहाव पराःता।”#मती 11:13-14 13हनते चेलाकूतेन सुदीगोतेड, नाँय बतिसमा एमेयीग होड़ एहुना बदीरेय कताकेरा, माःआन।
भूत समसावतो डिंघा होड़राः नपायगुः
(मरकूस 9:14-29; लूका 9:37-43)
14ईसू अरू चेलाकूतेन मुरुक बगरा होड़कू दोहोना हंडाकू सोदोरनेन दो मी होड़ ईसू मड़ंगरे उकुड़ोमनेनखने कताया, 15“ने परबू, ईंग बेटाम मयावा। हाँय भपरी ञेडेयता अरू मुरुक ससताय दोहोनता अरू घड़ी घड़ी सेंगेलरे अरू दाःरेय लेबदा जुवाःता। 16अरू नाँय एचे नपायगे लगा आमरिकुःआ चेलाकू एचेरेयिंग अगूतिरिया। मनदो हँकू मेरकू नपाय अवेगडीग।”
17दो ईसू चेलाकू एचेरेय कताया, “ने बेलूर अरू गुनमिन बिसवासगे होड़कू, अपे सुदा तुमिस वरीयिंग दोहोनता? तुमिस वरी अपेयिंग सहाव?”
हनते ईसू कतातेड, “माँय नंडा ईंग एचेरेपे अगूगेय।” 18हनते ईसू हाँयग भूते डंटावतेरा अरू भूत डिंघा अतेय उडुंगयान अरू हनन मेला हाँयग डिंघा नपायबाःयान।
19तयोमरे ईसू एनेकलाय दोहोन मेला चेलाकूतेन ईसू एचेरे सेनेकियानखनकू होंबोरतिरिया, “ने गुरुजी, अले हाँयग भूत चिला लगा मेरले उडुंग अवेगडीग?”
20दो ईसू चेलाकूतेने कतावातेड, “अपेराः बिसवास गुनमिन दोहोन अते अपे भूत मेरपे उडुंग अवेगडीग। मनदो अपे ईंगपे अयूम! अपेराः बिसवास ढड़हा बिहान मिन दोहोकुः दो नाःआ पहाड़पे कता अवेवाकेःआ, नाःआ ततेरते जोंझोडकियानखन मना अगी सलाव जुवाः। दो हनन अगी सलाव जुवाःता। अरू तोनोंगाः कता अपे कताय हना कता होनोया जुवाःता। 21[नाःआ इयाकुःआ भूतकू बेगर उपासतेःआ अरजीरे मेरकू उडुंगगुःता।”]
ईसू अनँयग गुजुः बदीरे अरूय कताया
(मरकूस 9:30-32; लूका 9:43-45)
22हँकू गलीलरेकू दोहोन मेला ईसू चेलाकूतेन एचेरेय कताया, “मनुवारीग बेटात, होड़कूराः तिःईरेकू एचे सबेयता। 23अरू हाँयकू ञेड गोजेयता अरू पेय दिनरेय जियाव रिमुःता।” नाःआ कता अयूमतेडखन चेलाकूतेन मुरुककू हदरावयान।
भगवानराः ओड़ाःराः मलगुजारी
24ईसू अरू आँयगरिकुःआ चेलाकू कपरनहूम सहररेकू सोदोरनेन दो, भगवानराः ओड़ाःरिकुःआ मलगुजारी गोः होड़कू पतरस एचेरे सेनेडखनकू होंबोरतेरा, “ने गोय, अपेरीग गुरुजी, भगवानराः ओड़ाःराः मलगुजारी#एचे उडुंग 30:11-16 मेरेय एमेयता जा?”
25दो पतरस कतातेड, “हाव, एमेयताय।”
26हनते पतरस ओड़ाःरेय सोदोरनेन दो ईसू हाँय होंबरे अते मनाड़ंग हाँय एचेरेय होंबोरतेरा, “ने पतरस, आम चिलाम ओंगोलतना? चउंदीसरिकुःआ राजाकू इये इये अते मलगुजारीकू गोःता, अँननकूरिकुःआ बेटाकू अते जा एटाः होड़कू अते?”
दो पतरस कतातेड, “एटाः होड़कू अतेकू गोःता।”
ईसू कतातेड, “दो बेपटाकूतेन मलगुजारी एमे अतेकू बनसावयान। 27मनदो अलंग अते हँकूके तोनोंग इयाःआ हलकाइन अलो होयाः लगा आम हुडिंग समुंदर धरीरे सेनेकियानखन बनसीम तेके बोलो। अरू मड़ंगमे उडुंगगेय हाँयग हकूम साब अरू हाँयराः आहमे उघाड़ दो आम चाँदीराः मीटोंग रिचकीम पवाःता। हनानाः रिचकी गोःकेडखन ईंगराः अरू आमराः मलगुजारीम एमेगोड।”
© (Active) Wycliffe Bible Translators, Inc. All rights reserved.