लूका 20
20
यहुदि मुक्याल लोकुरक येसुना अदिकारतिगा सवाल किन्तोर
(मत्ति २१:२३-३७; मर ११:२७-३३)
1उन्दि दिया येसु लोकुरकुन प्रार्थना लोतिगा परमेस्वरना पोल्लोतुन वेहिला आस मन्दुर असके मुक्याल याजक अनि मूसाना नियमतुन करिहवालोरक अनि यहुदि मुक्याल लोकुरासंग#२०:१ यहुदि दरमाते मुनेटोर लोकुर। हेरे वासुन येसुन पुच्चेमातुरक: 2“इव बुतोनुंग निमा बोना अदिकारते किन्तोन, अनि निकुन इद अदिकार बोर हितोर? इन्जोर माकुन वेहा।”
3असके येसु ओरकुन इतुर, “नना वने मिकुन उन्दि पोल्लो पुच्चेमान्तोना। निमाट उत्तर हिम्ट। 4युहन्नाल बपतिस्मा हिन्दुर अद अदिकार परमेस्वरनिकेडाल मता या मानेयनिकेडाल मता?”
5असके ओरक वरोन दुसरोनासंग वळकिला लाकतुरक, “माक ‘परमेस्वरनिकेडाल,’ इन्काट ते ओर इन्दानुर, ते ‘निमाट ओनांग वेहताल पोल्लोतिगा बाक्या विस्वास केविट आतिट?’ 6अनि माक ‘मानेयनिकेडाल’ इन्काट ते सबोय लोकुर युहन्नान खरोय परमेस्वरना पोल्लो वेहवाल समजेमान्तोरक इन्जोर ओरक माकुन कल्कने पिटहानुरक” इदाम वळकसुन, 7“बोना अदिकारते हिन्दुर ते माक पुनोम” इदाम ओरक येसुन इतुरक। 8असके येसु ओरकुन, “ते नना वने बोना अदिकारते इव बुतोनुंग किन्तोना इन्जोर मिकुन वने वेहोन” इन्जोर इतुर।
दुष्ट ठेका येतवाल कास्तकारकना पिटो
(मत्ति २१:३३-४६; मर १२:१-१२)
9अनि येसु लोकुरकुन उन्दि पिटो वेहिला लाकतुर: “वरोर मानेय अंगुरकना बगिचा लावेकितुर, अनि कस्ताकरकुन अद अंगुरकना बगिचातुन ठेका हिसितुर, अनि पकाय दियांग साटि परदेस हतुर#यश ५:१। 10अनि अंगुरकना पन्डाना बेरा वात असके अंगुरकना बगिचाताल हुचुक अंगुरक ओन हेविर इन्जोर आपुनोर वरोर दासतुन लोहतुर, मति ओरक कास्ताकारक लोकुरक ओन पिटितुरक अनि खालि कय लोहतुरक। 11असके ओर असा वने वरोर आपुना दुसरो दासतुन लोहतुर अनि ओन वने कास्ताकारक लोकुरक पिटिहतुरक अनि ओना अपमान किसुन ओन वने खालि कय लोहतुरक। 12अनि असा वने ओर आपुनोर दुसरो दासतुन लोहतुर अनि ओन वने कास्ताकारक लोकुरक पकाय पिटिचुन बाहरो पसिचीतुरक। 13असके अंगुरकना मालकाल इदाम इन्दा लाकतुर, ‘इदेक नना बदाम कियाका? नना इदेक नावोर मयातोर मरिन लोहका, बाक्याकि येर नावोर मरि आन्दुर इन्जोर येना मान कियानुरक।’ 14अनि मालकाल आपुना मरिन लोहतुर असके कास्ताकारक लोकुरक ओन हुळसुन ‘येर ते मालकाना वारसान मन्तोर, वाट माक येन होवकिकाट पजा इद सबोय मावा आयार’ इन्जोर वरोन दुसरोनासंग वळकिला लाकतुरक। 15अनि कास्ताकर लोकुरक मालकाना मरिन गसेकिसोरिंग अरियसोरिंग आवाटा बाहरो पसिहचुन होवकसितुरक। इन्जोर मालकाल कास्ताकर लोकुरासंग बाताल कियानुर? 16अनि ओर मालकाल वासुन कास्ताकर लोकुरकुन नाश किस अंगुरकना आवाटुन दुसरोन सोपेकिसियानुर।” अद पोल्लो केन्जुन, “इदाम बसकेय आयमाकि!” इन्जोर लोकुरक इतुरक। 17अनि येसु लोकुरकनिके हुळसुन इतुर,
“ ‘कलदुन बिलडिंग बनेकेवालोर मिस्रीलोकुर खराबता मन्ता इन्जोर हरचिस मन्तोर,
अदे कल कोन्टाता मुक्याल कल आत#भज ११८:२२’
इन्जोर पवित्र पुस्तकतिगा बाताल कोटताल मन्ता? 18बोर-आयि अद कलदिगा अरानुर ओर तुकळेंग-तुकळेंग आयनुर अनि कल ओना पोरो अरार अनि ओर पेचकांग आयनुर। नना अद कल लेहका मन्तोना अनि बोर-आयि नावागा विस्वास केवोर आयनुर ओर अद कलपोरो अरान्तोर ओना लेहका मन्तोर।”
केय्सारिन टाक्स हियाना
(मत्ति २२:१५-२२; मर १२:१३-१७)
19येसु पिटो वेहतुर अद मावा बारेते वेहतोर इदाम मूसाना नियमतुन करिहवालोरक अनि मुक्याह याजक लोकुरक समजेमासुन ओरक येसुन सान्डे पयिला हुळन्दुरक मति ओर लोकुरकुन वरियतुरक। 20अनि ओरक येसुना बोदना-बोद दोषता पोल्लोतुन पयसुन येसुन मुक्याह लोकुरा कयदे अनि अदिकारकुन सोपेकिसिवेरक इन्जोर येसुन पयान साटि सन्दि हुळस डावदे परमेस्वरना मुने येताना योग्य लोकुरक लेहका नाटक किस हुचुक लोकुरकुन येसुना हेरे लोहन्दुरक। 21अनि ओरक येसुन पुच्चेमातुरक: “हे गुरु, निमा खरोय पोल्लोंग इन्जुन करहान्तोन अनि बोनाय पक्षपात केवोर आस परमेस्वरना हरितुन खरोयते वेहान्तोन इदाम माक पुन्तोरोम। 22हे येसु, रोमि देशता हजोर राजान टाक्स हियाना बेस मन्ता या हिले? इन्जोर निमा माकुन वेहा।”
23अनि येसु ओरा हुशयारितुन हुळसुन सान्डे ओरकुन इतुर, 24“उन्दि डबु नाकुन हिम्ट। इद डबुतिगा बोना छाप अनि पोरोय मन्ता?” इन्जोर ओरकुन पुच्चेमातुर। ओरक इतुरक, “हजोर राजालना।” 25असके येसु ओरकुन इतुर, “हजोर राजान बोद हियाना मन्ता अद हजोर राजान हिम्ट, अनि परमेस्वरना बोद हियाना मन्ता अद परमेस्वरिन हिम्ट।” 26अदाम ओरक येसुन लोकुरा मुने ओना पोल्लोते पयिला परोरक आस ओना पोल्लोतुन केन्जुन दंगेमासुन कमेक आतुरक।
मानेयना हासुन असा जिवे मायाना अनि मरमिंग
(मत्ति २२:२३-३३; मर १२:१८-२७)
27ओदे दिया हातोर लोकुरा असा जिवेमायानातुन मानेमायोर सदुकि लोकुरकनिकेडाल#२०:२७ सादुकि लोकुरक यहुदि समाजता उन्दि खास दल मतोरक। ओर पकाय करियतोरक मतोरक मति स्वरगदूतना विस्वास केवोर आन्दुरक अनि केवल मूसाना सेयुंग पुस्तकतिगा विस्वास किन्तोरक। हुचुलोर लोकुरक येसुना हेरे वास ओन पुच्चेमातुरक#बुतोंग २३:८, 28“हे गुरु, बोरे मानेय ओना मुत्ते मन्दार ते अदेन बालक हिलेंग आयनुंग ओर हातुर, असके ओर मानेयता तमो अद रान्डिनसंग मरमिंग किसुन आपुना तमोन साटि बालक केविर इदाम मूसाल मावा साटि कानुनिनुंग हितोर#व्यव २५:५। 29मति उन्दि लोतिगा सात तमोलोर मन्तोरक, असके हजोर तमो मरमिंग कितुर अनि ओर बालक केवाय हातुर। 30असके दुसरो तमो अनि तिसरो तमो वने अदेनासंग मरमिंग कितुर। 31अदे रितिते सातोय तमोलोरक अदेनासंग मरमिंग कितुरक, अनि सातोय तमोलोरक वने उन्दि गेला बालक वने आयोंग आस हातुरक। 32अनि पजा अद रान्डि आळ वने हातु। 33मति सातोय तमोलोरक असा जिवेमायनुर असके अद बोना मुत्ते आयार? बाक्याकि सातोय तमोलोरक अदेनसंग मरमिंग किस मतोरक।”
34येसु सदुकि लोकुरकुन इन्तोर, “इद दुनियाता लोकुरा पेकोरक मरमिंग किन्तोरक अनि पेकिहकुन मरमिंग साटि हिन्तोरक। 35मति अद वायाना काळदा अनि हाता पजा असा जिवे मायाना लायेक बनेमायनुरक ओरक बसकेय मरमिंग केवोर आयनुरक अनि बोने मरमिंग साटि पेकिह हेवोर आयनुरक। ओर असा बसकेय हाय परोरक। 36ओर हासुन असा जिवेमातोरक ओरक परमेस्वरना बालक आयनुरक इन्जोर स्वरगदूतक लेहका आयनुरक। 37अनि परमेस्वरना सेवक मूसाल वने पवित्र पुस्तकतिगा जुळपि मराता पिटोता भागतिगा ‘अब्रहामना परमेस्वर, इसहाकना परमेस्वर, याकुबना परमेस्वर’ इदाम ओर प्रबुन इन्तोरक#निर ३:१-६,१५-१६ इदेनते हातोरक असा जिवेमायनुरक इन्जोर दिसान्तोर#२०:३७ मूसाना सेयुंग पुस्तकतिगा हातोरा असा जिवेमायानाता बारेते बाताले सन्देश हिले इदाम परीसि लोकुरक विस्वास कितुरक।। 38मति परमेस्वर हातोरक लोकुरा परमेस्वर आयोर, मति जिवोत लोकुरा परमेस्वर आन्दुर; बाक्याकि परमेस्वरना हेरे सबोय जिवोत मन्तोरक।” 39अद पोल्लो केन्जुन मूसाना नियमतुन करिहवालोरकिडाल हुचुलोरक, “हे गुरु, निमा खरोय इतोन!” इदाम इतुरक। 40अनि पजा ओरक येसुन बोद-आयि पोल्लो पुच्चेमायान साटि वरियतुरक।
मसिहाल दावुदनोर मरि
(मत्ति २२:४१-४६; मर १२:३५-३७)
41अनि असा येसु ओरकुन पुच्चेमातुर, “मसिहान दावुदनोर मरि बाक्या इन्तोरक?
42-43‘परमेस्वर नावोर प्रबुन इतुर,
“नना निया दुश्मन लोकुरकुन हारेकिसुन निया काल अडिय इरनाच दम
निमा नावा तिन्दान्तिके उदा” ’#भज ११०:१
इन्जोर दावुद राजाल आपुना भजन संहिता पुस्तकतिगा इन्तोर। 44मति दावुद राजाल मसिन ‘प्रबु’ इन्तोर; ते ओर बदाम दावुद राजानोर मरि आयपरानुर?” इदाम पुच्चेमातुर।
मूसाना नियमतुन करियवालोरासंग सावदान मन्ट
(मत्ति २३:१-३६; मर १२:३८-४०)
45अनि सबोय लोकुर केन्जदुर असके येसु आपुनोरक चेलालोरकुन इतुर, 46“मूसाना नियमतुन करहान्तोर, ओराताल चोवकोस मन्ट। ओरक मानेय आपुनतुन हजोर तोहान साटि लाटिंग-लाटिंग कपळांग करसुन वल्याना ओरकुन बेस लागान्ता, अनि ओरकुन हाटुहनिगा नमस्कार कियाना, अनि समाज मन्डलितिगा तिन्दाना साटि मुक्याह जागातिगा उदाना ओरकुन बेस लागान्ता। 47अनि ओरक रान्डिहना लोता धनसंपतितुन दोखाते येतिन्तोर अनि आपुहकुन दरमि तोहान साटि पकाय बेराताल प्रार्थना किसोरिंग मन्तोरक: येरकुन पकाय दन्ड पुटार।”
© (Active) Wycliffe Bible Translators, Inc. All rights reserved.