U̍ku̍rɔ̍ yī Alɛrɔ̄ 17
17
Lɛlā ogbōgbo yī ipwo̍gra yī Itɛsalona̍yīka
1Ipɔ̍ɔli ba̍la Isa̍yi̍lāasi ga la ipwo̍gra yī Amfi̍pɔ̄lisi ba̍la Apolo̍niya, ga i̍ngɔ̍ɔ wa̍a̍ ga ipwo̍gra yī Itɛsalona̍yīka. U̍nu̍ ogrēeyī yī Iju̍u hɔ̄ abɔ̍ɔ. 2Lɔkɔ nīi e̍ ē ya̍ ogbo̍gbe̍ ma̍, e̍ pīya chɛ̄ ga u̍nu̍ yī ogrēeyī ɔla̍ā. Ɔ̄chī Ɔmyɛ̍nyɛ̍ ɛta̍ ligbo̍ ligbo̍, o̍ hɔ̄ abɔ̍ɔ ē ta̍ āchɛ ɛla̍ā ahu̍lɛ̄lā bū la Īpū yī Ɔwɔ. 3Ipɔ̍ɔli ka ochi̍chi̍ yī lɛlā wa̍a̍ nīi tū la Īpū yī Ɔwɔ ma̍ de wa̍, chabɔ̄ hu̍ wā bū la Īpū yī Ɔwɔ hīka Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ ɔ̍lɔ ge̍ē mi̍chi̍ gba̍a̍, o̍bū pīyēku̍; ɔ̍lɔ chī ge̍ē hye̍ēyī la okū. Ipɔ̍ɔli koko̍o de wa̍ bɛ̍ɛ̄nɛ̄ hīka, “Ala̍ ma̍ ko̍ō! Iji̍sɔ̄ɔsi nūma̍ nīi yɛ ma̍ ē kɛlā yī nū de ala̍ ma̍, anu̍ - Ɔhɔ̍ɔnyɛta̍ Nīi Ɔwɔ Hōhu Ma̍ a̍nɛ.” 4Āchɛ yɛ̄mɛ̄mɛ̄ yī wā chɛ̄ku Ipɔ̍ɔli ba̍la Isa̍yi̍lāasi, pīya tū tāa aa̍. Igri̍iki ɛha̍ nīi ē ya̍ otūlichō yī Ɔwɔ ma̍ ba̍la anyā ɛnɛ̄kɛ̄kū yɛ̄mɛ̄mɛ̄, aa̍ titi tū tāa aa̍ Ipɔ̍ɔli.
5Iju̍u ɛha̍ nīi i̍ chɛ̄ ni̍ ma̍, o̍ de wu̍ wā ɔtū. E̍ gāa ge̍ hī alya̍chi āchɛ ɛha̍ ɛra̍ ngmo̍tu̍chɛ̄, ba̍ wā tū ta̍tu̍tu̍ nīi e̍ de ipwo̍gra ɔla̍ā wa̍a̍ ti̍yatū ɔlamu ɔlamu. E̍ ga wɔlɛ̍ yī ɔngrɔ̄ɔ ɔha̍ nīi re̍ka Ije̍sin ma̍ ge̍ yɛ̍ɛ̄lā ji̍gījigī abɔ̍ɔ ka aɛ̍lɛ ē gāla̍ Ipɔ̍ɔli ba̍la Isa̍yi̍lāasi. E̍ chikpo̍ ge̍ē bī aa̍ Ipɔ̍ɔli ngmɛ̍ɛchɛ ge̍ē de āchɛ nīi grēeyī ma̍. 6E̍ i̍ ma̍ wā gɛ ni̍ ma̍, e̍ ku̍ Ije̍sin ba̍la āchɛ yī Iji̍sɔ̄ɔsi ɛha̍. E̍ pi wa̍ pīya ge̍ de ɛgabɔ̄ yī ipwo̍gra ɔla̍ā. E̍ to̍ohwe̍e hīka, “Āchɛ nūma̍ yɛ amu ē ta̍tu̍tu̍ yī lɛlā ta̍ ɔchɔcha ē ta̍. U̍ma̍ama, ē gbajɛ wā amu la ipwo̍gra yī alɔ mɛ̍. 7Ije̍sin kpo̍ wā tū abɔ̍ɔ la wɔlɛ̍ yī nū a̍nɛ. E̍ gblāa amu ē bīya lihɔ yī ɔchwɔ̄lɛ̍ yī alɔ gba̍a̍ ē ka ē de āchɛ hīka ɔchwɔ̄lɛ̍ ɔha̍ ɔ̍lɔ hɔ̄ abɔ̍ɔ re̍ka Iji̍sɔ̄ɔsi.” 8Lɛlā nūma̍ wu̍ āchɛ ɛla̍ā wa̍a̍ ɔtū kpɛ̍ɛji. Ɛgabɔ̄ ɛla̍ā titi wɔ̍ɔ̄tū gba̍a̍. 9E̍ hɛ̍ Ije̍sin ba̍la āchɛ yī Iji̍sɔ̄ɔsi ɛla̍ā okpo nīi e̍ ge̍ē de o̍bū nīi e̍ tu̍ hī wā nīi e̍ pīya.
Abɔ̍ɔ la ipwo̍gra yī Ibɛri̍ya
10Otu̍ wā ge̍ de bī ɔpɔ̄ɔpɛ̄ ma̍, āchɛ yī Iji̍sɔ̄ɔsi yī ɛbɛ ɔla̍ā de Ipɔ̍ɔli ba̍la Isa̍yi̍lāasi tɛ̄rɔ̄ pīya ga Ibɛri̍ya. E̍ gbajɛ gāa ma̍, e̍ gba̍a pīya ga u̍nu̍ ogrēeyī yī Iju̍u yī ɛbɛ ɔla̍ā. 11Ūkpɔ̄tū yī alɛbɛ ɔla̍ā lwāa tɔ̍ɔ̄ta̍ hi̍ iyī Alitɛsalona̍yīka. E̍ gbarɔ̄chi̍i̍ plɛ̍ɛ̄lā yī Ɔwɔ nīi e̍ yɛ ē ka ma̍ hwɔhi hwɔhi. Mɔ̄chīmɔ̄chī, e̍ ē ma̍ Īpū yī Ɔwɔ, hɛ̄ɛbɛ ge̍ē ma̍ hīka lɛlā nīi Ipɔ̍ɔli ɔ̍lɔ ē ka ma̍ ɔ̍lɔ - ichɛ̄ɛhi nɛ. 12Aa̍ yɛ̄mɛ̄mɛ̄ chɛ̄ku Ɔwɔ. Anyā ɛnɛ̄kɛ̄kū yī wā ba̍la angrɔ̄ɔ nīi - Igri̍iki ma̍ chɛ̄ i̍ngi̍ngɔ̍ɔ. 13Iju̍u yī Itɛsalona̍yīka po̍ bɛ̍ɛ̄nɛ̄ hīka Ipɔ̍ɔli ɔ̍lɔ yɛ abɔ̍ɔ kɛlā yī Ɔwɔ la Ibɛri̍ya i̍ngi̍ngɔ̍ɔ ma̍, e̍ wā abɔ̍ɔ. E̍ wā ge̍ ba̍ āchɛ tū, ya̍ nīi ɛbɛ wa̍a̍ ti̍yatū. 14Āchɛ yī Iji̍sɔ̄ɔsi de Ipɔ̍ɔli tɛ̄rɔ̄ pīya ga oko̍o yī li̍hu ɔpɔ̄ɔpɛ̄. Isa̍yi̍lāasi ba̍la Iti̍mōti jī gblāa abɔ̍ɔ la Ibɛri̍ya kpɔ̍ɔ̍ we̍. 15Āchɛ nīi bī Ipɔ̍ɔli ɔtū ma̍, bī ɔ̄ ɔtū ge̍ chɛ̄ la A̍ten. La ɔchɔ̄chā, Ipɔ̍ɔli tū wā ɛrɔ̄ ka ɛ̍lɛ ge̍ ka de Isa̍yi̍lāasi ba̍la Iti̍mōti nīi ɛ̍lɛ ge̍ wā dikpo̍ba̍ anu̍ pa̍pa̍.
Abɔ̍ɔ la A̍ten
16Ipɔ̍ɔli hɔ̄ abɔ̍ɔ la A̍ten yɛ ē gbēyī yī Isa̍yi̍lāasi ba̍la Iti̍mōti ma̍, ūkpɔ̄tū ti̍ya anu̍ tū kpɛɛ nīi o̍ ma̍ lɔkɔ nīi ɛchi̍yɛka mu ipwo̍gra ɔla̍ā omōmu rɛ abɔ̍ɔ ma̍. 17Wu̍chē yī ɔla̍ā, anu̍ ba̍la Iju̍u tūla āchɛ ɛha̍ nīi ē ya̍ otūlichō yī Ɔwɔ ma̍ ē gblāa ē ta̍ahu̍ yī lɛlā abɔ̍ɔ la u̍nu̍ ogrēeyī yī Iju̍u. O̍ ē kɛlā de āchɛ mɔ̄chīmɔ̄chī la o̍gra yī ɛbɛ ɔla̍ā. 18Āchɛ ɛha̍ nīi ē ngū lɛlā yī Ɛpiku̍rīyɔn ba̍la iyī Isitɔ̍yīiki ma̍ ta̍ahu̍ tāa anu̍ i̍ngi̍ngɔ̍ɔ. Ɛha̍ ka hīka oji̍ nīi ɔngrɔ̄ɔ ɔgbɛri̍ya̍ ka anɔ̍lɔ jyɛ̍ɛ̄lā ka̍ka̍ nūma̍ ɔ̍lɔ u̍tu ē kɔ̄ka kpɛ̍ɛ ma̍/?
Ɛha̍ ma̍ ka ɔ̍lɔ ka̍a lɛlā yī ɔwɔ ita ɛha̍ nīi aɛ̍lɛ i̍ je̍ ni̍ ma̍ nīi ɔ̍lɔ ē kɔ̄ka a̍nɛ oo! Ɔjā nīi hu̍ nīi e̍ ka i̍ngɔ̍ɔ ma̍, Ipɔ̍ɔli yɛ ē kɛlā ku̍ “Iji̍sɔ̄ɔsi” ba̍la “ohye̍ēyī la okū” 19Wu̍chē yī ɔla̍ā, e̍ bī Ipɔ̍ɔli pīya ga ɛbɛ Ogrēeyī yī Areyo̍pāgusi. E̍ da Ipɔ̍ɔli hīka aɛ̍lɛ chikpo̍ ge̍ē plɛ̍ɛ̄lā ongōngū onīpīpɛ̄ nūma̍ nīi ɔ̍lɔ yɛ ma̍ ē ka ma̍. 20E̍ ka aɛ̍lɛ i̍ po̍ ita yī lɛlā nūma̍ je̍ ni̍ ma̍, aɛ̍lɛ chikpo̍ ge̍ē po̍ ochi̍chi̍ yī ɔ̍lɔ yɛ̍yɛ̍yɛ̍. 21E̍ ka i̍ngɔ̍ɔ, wu̍chē oji̍ nɛ, Ala̍ten wa̍a̍ tūla āchɔga nīi gblāa abɔ̍ɔ ma̍ ē nāa yɛ̄grāa yī wā wa̍a̍ ē gblāa ē kɛlā onīpīpɛ̄, ē plɛ̍ɛ̄lā onīpīpɛ̄.
22Ipɔ̍ɔli nīichō yarɛ abɔ̍ɔ la ɛbɛ Ogrēeyī yī Areyo̍pāgusi ɔla̍ā bɛ̍ɛ̄nɛ̄ ka hīka, “Aya̍ala̍ten! N ma̍ wa̍a̍ ma̍, n jo̍ōkū hīka ala̍ - āchɛ ɔya̍ otūlichō yī ɛchi̍yɛka gba̍a̍ nɛ. 23Wu̍chē oji̍ nɛ, n yɛ ē ti̍yaha la ipwo̍gra yī ala̍ nūma̍ ma̍, n ma̍ ɛbɛ ɔyɔ̍ɔ̄pɔ̄pā ɔha̍ nīi e̍ ta̍ ɔjā gblāa abɔ̍ɔ hīka, ‘ONŪMA̍ - ƐBƐ IYĪ ƆWƆ NĪI E̍ I̍ JE̍ Ɔ̄ OJO̍ŌJE̍ NI̍ MA̍ NƐ.’ Ala̍ i̍ je̍ ɔ̄ ni̍ ala̍ chī yɛ amu ē ya̍ otūlichō de ɔ̍. Anu̍ nīi n yɛ ma̍ ge̍ē koko̍o de ala̍ u̍ma̍ama a̍nɛ. 24Ɔwɔ nīi ya̍ yɛchɛ ba̍la ɛjā wa̍a̍ nīi hɔ̄ la yɛchɛ ma̍, anu̍ re̍ka Ādādā yī ichō ba̍la ajɛ wa̍a̍ a̍nɛ. Anu̍ i̍ ē tū la u̍nu̍ nīi āchɛ̄ɛchɛ bī abɔ̄ gwo̍ ma̍ ni̍. 25Ɔjɔ̄jā i̍ ku ɔ̍ lɛha̍ nīi ɔ̄chɔ̄chɛ ge̍ē ya̍ ē de ɔ̍ ni̍. Anu̍ ē de ɔhɔ̄leyī ba̍la owu ɔhɔ̍ɔ̄hɛ̍ ba̍la ɔjāha̍ ɔjāha̍ wa̍a̍ ē de āchɛ a̍nɛ. 26Bū la ɔ̄chɛ ūkpo̍he nīi Ɔwɔ ya̍ ipwɔ̍ɔma yī āchɛ̄ɛchɛ ita ɔha̍lɔha̍ wa̍a̍ de wa̍ hɔ̄ la ɛbɛha̍ ɛbɛha̍ wa̍a̍ la yɛchɛ a̍nɛ. O̍ de yɛ̄grāa ba̍la ɛbɛ nīi ɔnyɔnyɛ ɔnyɔnyɛ ge̍ē hɔ̄ tɛ̄ɛjī ma̍ lā de ɔchamɔcha wa̍a̍. 27O̍ ya̍ hɛ̄ɛbɛ nīi āchɛ wa̍a̍ ge̍ē gāla̍ ɔ̄; ɔha̍ni̍ e̍ ē ma̍ ɔ̄ yɛ̄grāa nīi e̍ yɛ ē gāla̍ ɔ̄ nganga ma̍. La olēchi̍ lēchi̍ yī nū ma̍, Ɔwɔ i̍ hɔ̄ hwɛɛ hī alɔ ni̍. 28Wu̍chē lɔkɔ nīi alɔ hɔ̄ la anu̍ ma̍ - ohu̍ nīi alɔ hɔ̄leyī, de wōwi hɔ̄ ma̍ ē pīya kpa̍ta̍kpa̍ta̍ mɛ̍ a̍nɛ. O̍ lɛ bɔ̄ɔkɔ nīi āchɛ oti̍īpū yī ala̍ ɛlɛjā ɛha̍ ka ma̍, ‘Alɔ titi - ayi̍ yī Ɔwɔ nɛ.’ 29Alɔ ge̍ - ayi̍ yī Ɔwɔ ɔ̍lɔma̍ alɔ ā gbɛri̍ya̍ hīka Ɔwɔ - ɔjā ɔha̍ nīi e̍ bī igo̍olu kɛ̄ɛ isi̍li̍ba kɛ̄ɛ lɛchɔ̄ yɔ̍ɔ̄ya̍ ni̍. Ɔwɔ i̍ ɔjā nīi ɔ̄chɛ̄ɛchɛ bī abɔ̄ yɔ̍ɔ̄ya̍ ma̍ ni̍. 30I̍chɔ̍lɔ nīi āchɛ i̍ je̍ lɛlɛ̄lā ni̍ ma̍, Ɔwɔ i̍ ē deyīrɛ lɛlā nūma̍ wa̍a̍ nīi āchɛ ē ya̍ ma̍ ni̍. U̍ma̍ama, Ɔwɔ yɛ ē koko̍o de āchɛ wa̍a̍ ka ɛ̍lɛ ge̍ pīya hī ɔpɔ̄pū ɔdwɔ̄bi̍ ɔla̍ā. 31Wu̍chē oji̍ nɛ, o̍ de ɔ̄chī nīi o̍ ge̍ē hlɛ̍ɛ̄pɔ̄ yī āchɛ wa̍a̍ la ɔgulɛ̄lā ɔlɛkpakpa ma̍ lā mɛ̍. O̍ hu ɔ̄chɛ nīi o̍ ge̍ē yɛ̍ɛ̄lā nūma̍ wa̍a̍ ē gala abɔ̄ yī nū ma̍ lɔ̄lā mɛ̍. O̍ de wɔhu̍ yī nū chabɔ̄ hu āchɛ mɛ̍, bū la onīi o̍ de ɔ̄chɛ ɔlɔjā hye̍ēyī la okū ma̍.”
32Āchɛ nūma̍ plɛ̍ɛ̄lā yī ɔ̄chɛ ohye̍ēyī la okū ma̍, āchɛ ɛha̍ yī wā hɛhɛ tū Ipɔ̍ɔli. Ɛha̍ ka hīka aɛ̍lɛ chikpo̍ ge̍ē gba̍a plɛ̍ɛ̄lā ɔla̍ā īchāha̍. 33Ipɔ̍ɔli wā ge̍ pīya hī wā bɛ̍ɛ̄nɛ̄. 34Āchɛ ɛha̍ chɛ̄ku lɛlā yī Ipɔ̍ɔli pīya tū tāa anu̍. Ɔ̄chɛ ɔha̍ lipu̍ yī āchɛ nīi chɛ̄ ma̍ re̍ka Idiyoni̍sīyusi. Olihiyo abɔ̍ɔ la ɛbɛ Ogrēeyī yī Areyo̍pāgusi ɔla̍ā nɛ. Ɔnyā ɔha̍ titi nīi re̍ka Idama̍risi ma̍ chɛ̄ku ɔ̍; ba̍la āchɛ ɛha̍ yɛ̄mɛ̄mɛ̄.
© 2020 Bible Society of Nigeria (second edition)