Génesis 48
48
Josépa tsurinkunaman bendicionta Jacob churanqan
1Tsaypita pöcu tiempullatanam Joséta willayarqan papänin qeshyanqanta. Tsaymi rikaq aywarqan tsurinkuna Manasésta y Efraínta pushakurkur. 2José chanqanta willayaptinmi ujuraykanqanpita imaykanöpa Israel jamarkurqan.
3Tsaymi Joséta nirqan: <<Dios El-Shaddaimi#48.3 El-Shaddai ninanqa llapanpä poderyuq Dios ninanmi. yuripamarqan Canaánchö kaykaq Luz markachö. Tsaychö bendisamarmi 4nimarqan: <Qammanmi bendicionnïta churamushä tsurikikuna atska kayänanpä. Tsaynöllam atska nacionkuna kayänanpä tsurikikunamanpis, willkaykikunamanpis y paykunapita miraqkunamanpis bendicionnïta churashä. Paykunatam Canaánta entregashä imayyaqpis tsaychö täyänanpä> >>.#Gén. 28.13-14; 35.9-13.
5Tsaynö niskirnam Jacob nirqan: <<Kay Egiptuman manarä chämuptï yuriq tsurikikunam noqapäna kayanqa. Tsaymi Rubén y Simeón tsurïkuna kayanqannö Efraín y Manaséspis tsurïkunanö kayanqa. 6Paykunapa qepanman yuriqkunam qampa tsurikikuna kayanqa. Tsaymi Canaánman kutiyaptiki Efraín y Manasés herenciata chaskiyanqan kaqchö paykunapis herenciata chaskiyanqa. 7Tsay tsurikikunam legïtimu tsurïnö kayanqa mamayki Raquel Canaánchö wanushqa kaptin. Paymi wanurqan Padan-arampita kutimur Efrata markaman tsayrä chaykaptï. Tsaymi payta pamparqä Efrataman aywana näni kuchullanman>>.#Gén. 35.16-20. (Efrataqa Belén markam.)
8Tsaynö nikanqanchömi Josépa tsurinkunata rikaykur Israel tapurqan: <<¿Pikunatä paykunaqa?>>
9Tsaymi José nirqan: <<Papä, kay Egiptuchö taykaptï Tayta Dios qaramanqan tsurïkunam kayan>>.
Papäninnam nirqan: <<Ñöpäman wititsimuy bendisanäpä>>.
10Israel pasaypa rukuna karmi shumaq rikarqantsu. Tsaymi papäninpa ñöpanman tsurinkunata José witiykatsiptin makallakurkur mutsarqan. 11Josétanam nirqan: <<Hïju, wanushqana kanqaykita yarparmi tinkunäpä kanqanta yarparqänatsu. Tsaynö yarpaptïpis Tayta Diosmi munashqa tsurikikunatapis rikanätarä>>.
12Tsurinkunata papäninpa qonqurninpita José witiskatsirnam papäninpa ñöpanman qonqurikuykurqan urkunpis patsaman töpanqanyaq. 13Shäriskirnam tsurin Efraínta churarqan papänin Israelpa itsuqnin kaq lädunman y Manaséstanam churarqan derëcha kaq lädunman. 14Tsaynö witiykatsiptinmi bendisananpä paykunapa umanman makinta cruzaypa Israel churarqan. Tsaymi derëcha makinta churarqan Efraínpa umanman, qepa kaykaptinpis. Itsuq makintanam Manaséspa umanman churarqan, mayor kaykaptinpis. 15Tsaypitanam Joséman y ishkan willkankunaman bendicionninta churar nirqan:
<<Awilü Abraham y papänï Isaac yärakunqan Tayta Dios, qammi yurinqäpita alli mitsikuqnö cuidamarquyki.
16Qammi imayka desgraciapita tsapamaq Ángel kanki.
Kanan kay jövinkunaman bendicionnikita churaykullay.
Paykuna alli kawaykuyätsun noqata, awilü Abrahamta y papänï Isaacta runakuna imaypis yarpäyämänanpä.
Efraínpa y Manaséspa tsurinkunapis atska kaykuyällätsun.
Paykunapita miraqkunapis kay patsachö tsaytsika kaykuyällätsun>>.
17Efraínpa umanman derëcha makinta papänin churanqanqa Josépä manam allitsu karqan. Tsaymi papäninpa derëcha makinta tsarirkur Manaséspa umanman José churarqan. 18Tsaynam nirqan: <<Papä, ama tsaynöqa ruraytsu. Kay kaqmi mayor tsurï kaykan. Paypa umanman derëcha makikitaqa churaykullay>>.
19Tsaynö niptinnam papänin nirqan: <<Noqapis musyaykämi mayor mayqan kanqanta. Mayor kaqpis atskaman mirar jatun nacionmi kanqa. Tsaynö kaptinpis qepa kaqmi mas munayyuq kanqa. Paypita miraqkunam tsaytsika nacionkuna kayanqa>>.
20Tsay junaq ishkan willkankunaman bendicionninta churarmi nirqan: <<Israel runakuna pimanpis bendicionta churarmi niyanqa: <Efraínta y Manasésta yanapanqannölla qamkunatapis Tayta Dios yanapaykuyäshuy> >>.
Tsaynömi Efraínta churarqan mayornö kananpä y Manaséstana qepanö kananpä.#Heb. 11.21.
21Tsaypitanam Joséta nirqan: <<Hïju, rikamanqaykinöpis wanunäpänam kaykä. Noqa wanukuptïpis Tayta Diosqa qamkunawanmi imaypis kaykanqa. Tsaynöllam kutitsiyäshunki awiluyki Isaacwan papänin Abraham täranqan kaqman. 22Qamtam wawqikikunapita masta herenciäta entregarqü. Tsaymi Siquem chakrakunatapis entregä. Tsay chakrakunatam amorreo runakunata espädäwan y flëchäwan vinciskir qechurqä>>.
© 2002, 2008, Wycliffe Bible Translators, Inc. All rights reserved.