Génesis 46
46
Egiptuman Jacob aywanqan
1Llapan imaykanta apakurkurmi Egiptuman Israel aywakurqan. Beersebaman chaykurnam papänin Isaac yärakunqan Tayta Diosta adorar sacrificiuta altarchö rupatsirqan. 2Tsay paqasmi Israelta Tayta Dios revelar nirqan: <<¡Jacob, Jacob!>>
Jacobnam nirqan: <<¿Imallatä, Taytay?>>
3Tsaymi Tayta Dios nirqan: <<Noqaqa papäniki yärakunqan Diosmi kä. Ama mantsariytsu Egiptuman aywayta. Tsaychömi qampita miraqkunaman bendicionnïta churashä atskaman mirar juk nación kayänanpä. 4Egiptuman aywaptikipis yanapashaykim. Wanuptikipis tsuriki Josémi ñöpaykichö kanqa. Tsaynöllam qampita miraqkunatapis Egiptupita kikï jipimushä>>.
5Beersebapita Egiptuman aywakurmi Faraón apatsinqan carrëtakunaman tsurinkuna yarkatsiyarqan papänin Jacobta, wamrankunata y warminkunatapis. 6Canaánchö tarinqan kaqtaqa wäkankunata y üshankunata qatikurkurmi llapan imaykankunatapis apakurkur Egiptupa aywakuyarqan.#Hech. 7.15. 7Tsaynöpam llapan tsurinkunawan y willkankunawan Egiptuman Jacob charqan.
8Egiptuman aywaq Israel runakunapa jutinkunam karqan:
Jacobpa mayor tsurin Rubén;
9Rubénpa tsurinkuna Enoc, Falú, Hezrón y Carmi;
10Simeónpa tsurinkuna Jemuel, Jamín, Ohad, Jaquín, Zohar y Saúl (Saúlqa cananea warmipa wamranmi karqan);
11Levípa tsurinkuna Gersón, Coat y Merari;
12Judápa tsurinkuna Er, Onán, Sela, Fares y Zara (Erwan Onánqa Canaánllachönam wanuyarqan);
Farespa tsurinkuna Hezrónwan Hamul;
13Isacarpa tsurinkuna Tola, Fúa, Job y Simrón;
14Zabulónpa tsurinkuna Sered, Elón y Jahleel.
15Paykunam kayarqan Jacobpa warmin Leapa wamrankunawan willkankuna. Leapa ollqu wamrankunaqa Padan-aramchömi yuriyarqan. Tsaynöllam wamran Dinapis tsaychö yurirqan. Leapa wamrankuna y willkankunam kimsa chunka kimsa (33) warmipis ollqupis kayarqan.
16Tsaynöllam Egiptuman aywayarqan Gadpa tsurinkuna Zifión, Hagui, Suni, Ezbón, Eri, Arodi y Areli;
17Aserpa tsurinkuna Imna, Isúa, Isúi y Bería (paykunapa paninmi karqan Sera);
Beríapa tsurinkuna Heberwan Malquiel.
18Paykunam kayarqan Zilpapa wamrankuna y willkankuna. Zilpam karqan Leapa sirviqninpä papänin Labán qaranqan. Zilpapa wamrankuna y willkankunam chunka joqta warmipis ollqupis kayarqan.
19Tsaynöllam Egiptuman aywayarqan Jacobpa warmin Raquelpa wamran José y Benjamín.
20Warmin Asenatchömi Josépa tsurinkuna Manasés y Efraín kayarqan.#Gén. 41.50-52. Paykunam Egiptuchö yuriyarqan. Asenatqa karqan On markachö täraq sacerdöti Potiferapa tsurinmi.
21Benjamínpa tsurinkunam kayarqan Bela, Bequer, Asbel, Gera, Naamán, Ehi, Ros, Mupim, Hupim y Ard.
22Paykunam Jacobpa warmin Raquelpa wamrankuna y willkankuna kayarqan. Paykunaqa chunka chuskum kayarqan.
23Tsaynöllam Egiptuman aywayarqan Danpa tsurin Husim;
24Neftalípa tsurinkuna Jahzeel, Guni, Jezer y Silem.
25Paykunam Bilhapa wamrankuna y willkankuna kayarqan. Bilhaqa Raquelpa sirviqninpä papänin Labán entreganqanmi karqan. Tsay warmipa wamrankuna y willkankunam qanchis kayarqan.
26Egiptuman Jacobwan chaqkunam kayarqan tsurinkuna y willkankuna joqta chunka joqta (66). Paykunawanmi tsurinkunapa warminkunapis aywayarqan. 27Josépa tsurinkunam Egiptuchö ishkay yuriyarqan. Paykunatawan yupayaptinmi Egiptuchö Israel runakuna qanchis chunka (70) kayarqan.#46.27 Septuaginta niyanqan unay griego traduccionchömi qanchis chunka pitsqa (75) kanqanta nin. Tsaynöllam Hech. 7.14 nin.
Gosénman Jacob chanqan
28Gosénman chaykarnam tsurin Judáta Jacob mandarqan Joséta willananpä: <<Papänintsikwan tinkuqshi aywanki>>.
Tsaypitanam Gosénman Jacob charqan. 29Josénam caballunwan qarachäna carrëtanta alistarkatsir papäninwan tinkuq aywarqan. Papäninwan tinkuskirnam makallanakurkur waqayarqan. 30Tsaymi Joséta Israel nirqan: <<Kanan kawaykaqwan tinkunqächönaqa jina wanukushäpis>>.
31Tsaypitanam wawqinkunata y wakin castankunata José nirqan: <<Chäyämunqaykita willanäpä aywä Faraón kaqman. Paytam nishä: <Canaánpitam papänïwan wawqïkuna y wakin castäkunapis chäyämushqa. Paykuna shayämushqa cercachö täyänanpämi. 32Tsaymi llapan imaykankunatapis apakurkur üshankunatawan cabrankunata y wäkankunata qatikurkur chäyämushqa. Paykunaqa ashma mitsikuyllatam yachayan>. 33Faraónta willaptïmi qamkunata qayaykur imachö aruyanqaykitapis tapuyäshuptiki 34niyanki: <Noqakunaqa unay castäkunanömi wamra kayanqäpita ashma mitsikuyllata yachayä>. Tsaynö willayaptikim üsha mitsiq runakunata Egipto runakuna melanäyaptin Gosén partichö shuyni täyänaykipä niyäshunki>>.
© 2002, 2008, Wycliffe Bible Translators, Inc. All rights reserved.