Génesis 35
35
Bet-elchö Jacobta Tayta Dios bendisanqan
1Tsaypitanam Jacobta Tayta Dios nirqan: <<Imaykaykita apakurkur Bet-elchö tänaykipä aywakuy. Wawqiki Esaúpita qeshpir aywakuptiki yuripunqä#Gén. 28.10-22. Bet-elman chaykur altarta pirqanki adoramänaykipä>>.
2Tayta Dios tsaynö niptinmi tsurinkunata, warminkunata y sirviqninkunatapis Jacob nirqan: <<Ima dioskunatapis tsarararqa llapanta jitariyay. Tsaynölla purificakurnin bäñakuskir röpaykikunata trocakuyay. 3Kananqa Bet-elmannam aywakushun. Tsaychönam altarta pirqashä imaypis yanapamaq Tayta Diosta adoranapä. Paymi pasaypa ñakar maypa puriptïpis yanapamashqa>>.
4Tsaynö niptinmi tsararäyanqan ïdulukunata y arëtikunata#35.4 Tsay arëtikunaqa rikatsikuyänanpä y ïdulukunata adorayänanpämi karqan. Tsaymi Jacob munarqantsu pipis tsararänanta. jipiskir Jacobta entregayarqan. Tsaykunatam Siquem cercanchö kaykaq encina jacha chakinman pamparqan.
5Taykäyanqanpita aywakuyaptinmi tsay partichö täraq runakunapa shonqunkunata Tayta Dios mantsaritsirqan mana qatipäyänanpä. 6Tsaymi Jacobwan aywaqkuna llapanpis chäyarqan Canaánchö kaykaq Luz markaman. Tsay markapa jukaq jutinmi Bet-el. 7Tsaychö altarta Jacob pirqaskirmi jutinta churarqan El-Bet-el#35.7 El-Bet-el ninanqa Bet-elchö yuripunqan Dios ninanmi. jutin kananpä. Tsaynö jutinta churarqan wawqinpita qeshpir aywakuykaptin Tayta Dios tsaychö yuripunqanpitam.
8Bet-elchö Jacob kaykaptinmi Débora wanurqan. Rebecataqa Déboram pishinpita shakshatsirqan. Wanuykuptinnam pampayarqan Bet-el marka cercanchö encina jacha chakinman. Tsay partipa jutintam churarqan Alón-bacut.#35.8 Alón-bacut ninanqa waqay encina ninanmi.
9Padan-arampita kutiykämuptinmi Jacobta Tayta Dios yapay yuripuskir bendisar nirqan: 10<<Kananpitaqa mananam Jacobnatsu jutiki kanqa, sinöqa Israelnam>>.#Gén. 32.28. Tsaynö nirmi jutinta trocatsirqan.
11Mastam Tayta Dios nirqan: <<Noqam kä El-Shaddai.#35.11 El-Shaddai ninanqa llapanpä poderyuq Dios ninanmi. Qampita miraqkuna atskaman mirayätsun. Paykunamanmi bendicionnïta churashä tsaytsikaman mirar atska nacionkuna kayänanpä. Paykunapitam reykunapis kayanqa. 12Abrahamta Isaacta rikatsinqä jallqakunata y raqrakunatam qamta entregashayki. Wanuptikipis qampita miraqkunatam entregashä>>.#Gén. 17.4-8.
13Jacobwan parlaskirnam Tayta Dios aywakurqan.
14Jacobnam Tayta Dioswan parlanqan kaqchö juytu rumita jawirqan. Tsaypitam Tayta Diosta adorar tsay rumi jananman vïnutawan aceitita wiñarqan. 15Tayta Dioswan parlanqanpitam tsay partipa jutinta Jacob churarqan Bet-el#35.15 Bet-el ninanqa Diospa wayin ninanmi. kananpä.#Gén. 28.19.
Raquel wanunqan
16Bet-elchö taykanqanpitam Efrataman Jacob aywakurqan. Efrataman manarä chäyaptinmi Raquelpa killan tinkushqana kaptin qeshyakunanpä nanay tsarirqan. Qeshyakuyta mana puëdirmi pasaypa ñakarqan.
17Tsaynö ñakaptinmi Raquelta partëra nirqan: <<Valorta tsariy. Kanan yuriq wamraykipis ollqum>>.
18Wanukunanpä antsa kaykarnam Raquel nirqan: <<Benoni#35.18a Benoni ninanqa ñakarrä qeshyakunqä wamrä ninanmi. kay wamräpa jutin katsun>>. Papäninnam tsay tsurinpa jutinta churarqan Benjamínta#35.18b Benjamín ninanqa kuyay tsurin ninanmi.. 19Pasaypa ñakar qeshyakuskirmi Raquelqa wanurqan. Wanuykuptinnam Efrataman aywaq näni lädunman pampayarqan. Tsay partitam kananqa Belén niyan. 20Raquelta pampayanqan jananmanmi señal kananpä juytu rumita Jacob jawirqan. Tsay rumim kananyaqpis musyatsimantsik mayninchö Raquel pamparanqanta.
Rubén jutsata ruranqan
21Raquelta pampanqan kaqpita aywakurmi Israel#35.21 Israelqa Jacobpa jukaq jutinmi karqan. patsakurqan Edar törri washa lädunman. 22Tsaychö taykaptinmi Jacobpa tsurin Rubén papäninpa concubïnan Bilhawan punurqan. Tsurin tsaynö ruranqanta musyaykurmi papänin pasaypa rabyakurqan.
Jacobpa tsurinkuna
1 Crónicas 2.1-2
Israelpa ollqu tsurinkuna chunka ishkaymi kayarqan.
23Leapa mayor wamranmi karqan Rubén.
Paypa qepanman yuriqkunam kayarqan Simeón, Leví, Judá, Isacar y Zabulón.
24Raquelpa wamrankunanam kayarqan José y Benjamín.
25Raquelpa sirviqnin Bilhapa wamrankunanam kayarqan Dan y Neftalí.
26Leapa sirviqnin Zilpapa wamrankunanam kayarqan Gad y Aser.
Jacobpa llapan tsurinkunam Padan-aramchö yuriyarqan.
Isaac wanunqan
27Tsaypitanam Mamre partiman Jacob aywarqan papänin Isaacta watukaq. Mamriqa karqan Arba cercanchömi. Arbapa jukaq jutinmi Hebrón. Tsaychömi Abrahampis unay täkurqan.#Gén. 13.18. 28Pachak puwaq chunka (180) watam Isaac kawarqan. 29Pasaypa rukuyashqa wanuskirnam unay castankunawan tinkuq aywakurqan. Ayantanam Esaúwan Jacob pampayarqan.
© 2002, 2008, Wycliffe Bible Translators, Inc. All rights reserved.