TOWUNÖT 27
27
1Otini kiyosit Isak akiköryö konyïn tömökïsïwïyi kïgh, kïkur werïnyi Esau nyo wow akïlenchï, “Werïnyu.”
Kïlö weri, “Anyï ani.”
2Kïlenchï, “Sïwene lö, kyayositwan amonkïtönye, asis nyo omeghan. 3Nyo karam ye nyu chenga kariku, kotiku nko kwantingu aiwö wölnö le wuw isökosï panya tyonkïn. 4Aingwïn ighwanïn omisyö nyo anyïn nyo lata nyo ochöman aipï, tosoyöninyi kïtomö ameghan.”
5Kilïmöy Repeka otini kingölonchini Isak werïnyi Esau. Kïkany otini kimi wuw pö sakas, 6kïlenchï Repeka werïnyi Yakopo, “Kalïman papongu kïlenchini werïnkwa Esau, 7‘Wïyö ipunö pempö tyompö wuw aigh omisyö nyo anyïn taman tosoyönïn ompö wölo mi ECHOTYON kïtomö arapasan.’ 8Kïlenyona werïnyu, tere ngalechan airïp ngal cho omwowunyi. 9Wïyö panete wölnö le achey, airewanïn wara ngaror cho le odeny cho karamach, toghchan papongu omisyö nyo anyïn nyo lata nyo chömöy nyinte. 10Atepchinönyi papongu tökwam tökusoyöninyi kïtomö kïrapas nyinte.”
11Wölo kïlenchï Yakopo kame Repeka, “Nyini sapul werïncha Esau akwanyï melö sapul portönyan. 12Nkït ngo töptoy tötöpanïn paponyan akïsïwa lö ochan lïsin, onyorwan nyu chïpöt nyinö kötö onyoru kisoyönöt.”
13Kïlenchï kame, “Nya kïtöpö parakunyan chïpengu, werïnyu, teranyi kutinyan kïpoto, aiwö nyu irewï warechoni.” 14Kïlenyona, kïwö Yakopo akurewï warechay wölo mi kame, kwigh kame omisyö nyo anyïn nyo lata nyini chömöy paponyi. 15Atolapay kïcheng Repeka sïro pö werïnyi nyay wow le Esau cho karamach cho kimi kö akulokyï Yakopo werïnyi nyo mïnïng. 16Akïrötyï ewunechi nko katïnyi wölo kimelö sapul, sïro chay pö wara ngaror. 17Akutö kame ewuneko werïnyi Yakopo panyechoni onyïnech nko makatyan nyo kökakwigh nyinte.
18Kïlenyona, kïwö Yakopo wölo mi kwanta akïkur lö, “Papo,” kïngitön lö, “Ooy! Ichinyi ngo nya, werïnyu?”
19Kïlenchï Yakopo kwanta, “Ochan werïngu Esau nyay le poretyengu. Kaghan kïle wölaye kemwowaninyi kaykay ngeta aitöpö ngwïny atama tïkuchan chï pkono sakas atesoyönante.”
20Wölo kïtep Isak werïnyi ngat lö, “Akenyorunyi lö ne lawel nya, werïnyu?”
Kïlö, “Ompöwölo köyonwanïn ECHOTYON Tororötïngu.”
21Atolapay kïlenchï Isak Yakopo, “Kaykay nyone rikuna werïnyu atatatapïn lö eichinyi werïnyan Esau anta ewo.” 22Kïrich Yakopo wölini kimi kwanta, kïtatap atolapay kïlö, “Pö kuti Yakopo, wölo pö ewune Esau.” 23Amelö kinkïtï nyinte, ompöwölo kisöpulöch ewunechi kïle cho pö werïngwa Esau. Kïlenyona kïmach kusoyön nyinte. 24Akïtep ngat lö, “Ichinyi werïnyan Esau nyoman nya?” Kuyokyï lö, “Owöy ochan.”
25Kïlenyona kïlenchï kwanta, “Ipunö wölo omitan ataman panyechini kesökoswaninyi werïnyu tosoyönïn.” Kïlenyona kwipchï Yakopo omisyonay, kwam nyinte, kwipchï kumi sapipun tïkwïl kïgha. 26Atolapay kïlenchï Isak Yakopo, “Nyonö yi lekït werïnyu, tarokanïn.” 27Kïlenyona kïwö Yakopo kïrich kwanta akïtaroch, kïnguchï nyinte kïmïs pö sïrokachi, kusoyön nyinte kïlö,
“Lentöy ne kïmïsto werïnyan!
Lenye kïmïs pö par,
nyo kesoyön ECHOTYON!
28Nya kïkonïn Tororöt röyönto yïm
akïkonïn okwoghyo ngwïny
nko chongïn pö pagh nko dipay.*
29 #
Tow 12:3. Nya kïpöghisyewun pich
akïkïtïngchin puntonï.
Ilïkwï echotyonto werkökwa
aikany kïkïtïngchin werko yongu,
akïchïpo chi anka tïkwïl nyo chïpinyi,
ikany kusoyönö chi anka tïkwïl nyo soyöninyi!”
Kösom Esau tïkwïl kisoyönöt
30Otini lawel kiwang Isak kusoyön Yakopo, otini kitökïwegho Yakopo wölo mi kwanta, kwitï werïngwa Esau nyo kingwïno sakas. 31Kwigh Esau tïkwïl omisyö nyo anyïn akwipchï kwanta akïlenchï, “Ngeta paponyu, tyama pany cho kepunö werïngu sakas, atesoyöno!”
32Kïtep kwanta lö, “Ichinyi ngo nya?”
Kïlö, “Ochan poretyengu, Esau.”
33Kïpotan Isak akïmïgh akïlö, “Kï ngo nyu nyay kengwïna sakas akwipkanïn pany cho kaman otini kötomönye itunanyi? Akwanyï kyosoyönön nyinte, owöy akikusoyönö nyinte?”
34Nyini kilïm Esau ngaleko kwanta, kïloch ompö ngwonïn nyo wow akïlenchï kwanta, “Soyönante tïkwïl, we papo!”
35Wölo kïlenchï, “Kengwïn werïnkwa ompö lïs, akïcheng kisoyönötengu.”
36 #
Tow 25:29-34. Kïlö Esau, “Kikïmïnchï kaynenyi kuten lö Yakopo!#27:36 Yakopo: Ompö Eprania kï, “Lïsin.” Ompöwölo kalïsanïn ye kïnyïl odeny. Kisarenanïn wowïnto yiyenyu, akwanyï ye kasarenanïn kisoyönötenyan.” Atolapay kïlenchï, “Metukwanïnyinye kisoyönote nyo le kite?”
37Kuyokyï Isak lö, “Kyaghan Yakopo kïlïkwï echotyontengu tönön werkökwa lapay kïlïkwï mötworichi. Kotönön nyinte pagh nko kumi sapipun. Tökïne nyo towunyi ye nyu nya werïnyu?”
38 #
Epr 12:17. Kïlenchï Esau kwanta, “Nyo metïngetenönyinye kisoyönöt nyo le ompö akonga so papo? Soyönante tïkwïl, we paponyu!” Atolapay kutegh Esau akïrir. 39#Epr 11:20. Kuyokyï Isak lö,
“Rose, lowitu möngengu nko okwoghyo ngwïny
akïlowitunö röyön nyo ngwïno yïm.
40 #
Tow 36:8; 2Pöy 8:20. Aisöponyi chokengu,
aipöghisyechinyi werïngwo,
wölo ato lilinyi kïgh,
ityaka kegh morichi.”
41Kïwöch Esau Yakopo ompöwölo kisoyön paponyi nyinte, kïlö Esau ompö mïkulöwunyi, “Karich osiswö cho kïriröy ompö megha paponyan, ataparan nyu werïnyo Yakopo.”
42Nyini kilïm Repeka ngala poretyenyi Esau, kïyonta chi kïwö kïkur Yakopo werïnyi nyo mïnïng, otini kingwïn kïlenchï, “Ne köny, mi werïnkwa Esau kukolyönöy kegh akïmi kunonöy lö opörinyi. 43Kïlenyona werïnyu tere ngalechan, ngeta airïp wölo mi werïncha Lapan nyo möngöy wölnö le Aran. 44Aiwö itöpö wöloni nko nyinte osis cho ngörï ntökïtenö kuwonyö ngwonïnto werïnkwa. 45Otini kakuwonyeghö werïnkwa nörekyö ompö nyi, akïwutyeghö kini kighchinyi nyinte, oyokwan nyu chi kïkureninyi wöloni. Pö ne owonyeghenanïkwa kwodeny ompö asis akonga?”
Kayonta Isak Yakopo wölo mi Lapan
46Atolapay kïlenchï Repeka Isak, “Motïngetanye ngörekyö nyonikïny ompö mïkulöwunyu osiswechete ompö tipichï pö pipö Ititi. Ato töp Yakopo ntökïlö opöy työ nyo pö tipichï pö pipö Ititi chï karkegh nko tipichï pö koronï, kïtö kunyiwu ne söpontönyan nya?”
©Bible Society of Kenya, 2019