Matius 7
7
O nyawaka upa pasisala
(Lukas 6:37-38,41-42)
1“Upa o nyawa niasisala, la ma ngale ngini masirete lo o Gikimoi lo asa upa winisisala kali. 2Sababu o duduga kiaka ngini o nyawa niasituga, maro komagena lo asa o Gikimoi winituga nginika. Gena ma ngale ma lamo ngini niasisala o nyawaka, done asa ma lamo maro komagena o Gikimoi lo ngini winisisala kali.
3Ce! To ngini nia dodiao manga sala daceke maro o gaapo manga lakoka magena aku niakelelo, duma niakelelowa kanaga nia sala ilalamo maro o ifa moi yodebesu nia lako masireteka. 4Idodooha so ngini nitemo nia dodiaoka, ‘Nahino la ngohi o gaapo ani lakono tosisupu,’ duma kanaga lo maro o ifa moi yodebesu to ngini nia lako masireteka. 5He! Ngini manena nikokulai! Ma nonomaka ngini bilasu o ifa moi yodebesu to ngini nia lako masireteka nisisupu kasi. Dabolo la nia lako datebika, de asa idadi so o gaapo nia dodiao manga lakoka gena aku niakelelo so nisisupu kali.”
O Gikimoi Awi habari daloloha upa posihabari o nyawa ihoholuka
6“O kia naga to Gikimoi gena upa ngini nionghike o kasoka, upa sidago maena imakiliho de ka ngini nigoli. De lo o kia naga ma ija ihahali gena upa nisitopo o titika, sababu done maena asa ka isidodipitoku de yadohaka.”
Pogolo o Gikimoika
(Lukas 11:9-13)
7“Hika ngini nigolo o Gikimoika, de Una asa winihike nginika. Ma ngale nia kurangi gena o Gikimoika niasari bai! Niasari de ngini asa niamake. De lo o ngora ma duduno nioaso-aso, de o Gikimoi asa o ngora magena wapelenga de winisimaha so ngini niwosa. 8Sababu nagoona yogolo, igogou ona magena asa wahike. Nagoona yasari, igogou ona magena asa yamake. De lo nagoona o ngora ma duduno yoaso, igogou asa o ngora gena wapelenga de wasimaha ona magena yowosa.
9Ngini o dodihimo, nakoso nia ngopa kanaga o ino yogolo, de idadiwa ka o teto niahike onaka. 10Eko lo nakoso kanaga o nao yogolo, de idadiwa ka o ngihia niahike. Komagenawa bai! 11So ngini o nyawa, ngaroko nia sininga itiai waasi, duma kanaga o kia naga daloha niahike nia ngopaka. Nako komagena niaaka, de ka igogou o loha lo nia Baba o sorogaka asa wahike nakoso o nyawa nagoona igolo Unaka.”
O ngeko itotiai
(Lukas 6:31, 13:24)
12“Komagena lo o gogoho kia ngini niodupa la o nyawa yaaka nginika, maro komagena lo ngini bilasu niaaka onaka. Gena naga maro o Gikimoi Awi bobita dangodu idomaka o Musa de o bi nabi isilelefo manga bukuka.
13Nitagi niakahika o ngora ipopenetoka niwosa, sababu o ngora de o ngeko ikokahika o narakaka magena ingoha, de kanaga yadadala lo o ngeko magenaka yakahika. 14Duma o ngora de o ngeko ikokahika o oho ikokakalika magena daceke de isusa niakahika, de kanaga yadalawa o ngeko magena yamake.”
Ma ngale manga gogoho so panako nagoona o nabi ikokulai
(Lukas 6:43-44, 13:25-27)
15“Nimasidodiahi, sababu o bi nabi ikokulai. Ona magena imatero maro kanaga o nyawa o Gikimoi iwipipiricaya duma ona ikokulai, so manga edekati datorou la o nyawa manga piricaya gena yasisa. 16Ngini asa nianako ona manga gulai, hitilahi to ona manga manara ma sopo gena nianano. Idadiwa o ngangaru datotopoka ma sopo o anggur, eko pamake ma sopo o ara. 17Komagena lo o bi gota daloloha gena ma sopo lo daloha. De lo o bi gota datotorou gena ma sopo lo datorou. 18So idadiwa o gota daloloha gena ma sopo datorou, de lo o gota datotorou gena ma sopo daloha. 19O bi gota la ma sopo datotorou gena igogou done asa yatoda de yaumo o uku isosora-sora ma rabaku. So komagena lo igogou o Gikimoi asa o bi nabi ikokulai gena wasangisara. 20So nakoso ngini nianako to ona manga gulai hitilahi to ona manga manara ma sopo gena nianano.
21O bi nyawa yadala Ngohi iaso ‘Jou! Jou!’ duma yangoduwa idadi Ai Baba o sorogaka Awi nyawa Awi pareta ma rabaka. Cawali o bi nyawa la kanaga o bi moi-moi Una wodudupa gena yaaka, ka ona magena asa idadi to Una Awi nyawa. 22Ma wange Una wositatapuka, de done o bi nyawa yadala asa itemo Ngohika, ‘Jou! Jou! Ngona nanako igogou ngomi gena o Gikimoi Awi demo misingangasu de Ani ronga. De yakokitoka manga toka miodusu de Ani rongali. De lo o bi nonako ihahairani gena idala miaaka de Ani rongali.’
23So Ngohi asa tosango totemo onaka, ‘Ngini gena Ngohi tinidodoohawa. Nitagi kasi, ngini de nia gogoho ma dorou imatero maro o ngosoku ma deda.’ ”
Yococawaro de lo yofufuma o tahu yosigogoko
(Lukas 6:47-49)
24“So o nyawa la kanaga Ai demo manena yoise de lo yaaka, ona magena imatero maro o nyawa wococawaro moi la kanaga awi tahu wosigoko o teto ma dokuka. 25Ma orasi imuura, de o nguuhi, de lo o paro dasosihilo asa o tahu magena yadahe, duma maena irubawa, sababu isigoko o sosode o teto dapoputuru ma dokuka.
26De o nyawa la kanaga Ai demo manena yoise duma yamotewa de yaakawa, ona magena imatero maro o nyawa wofufuma moi la kanaga awi tahu wosigoko o dowongi ma dokuka. 27Ma orasi o muura, de o nguuhi, de lo o paro dasosihilo asa o tahu magena yadahe, de maena ka iruba de ibiau dangoduka.”
28So o bi demo moi-moi gena o Yesus wadoto dabolo, de o bi nyawa yadadala kiaka yosigogigise Awi dodoto magena ona yohairani. 29Sababu Una wodoto de o Gikimoi Awi kuasa, de imaketerowa de o Yahudika ma bi guru agama manga dodoto.
@ LAI 2002