Mwanzo 17
17
Okhiriya alama ya wahati
1Wakathi Eburamu afiiyeevo nyaakha tiisiini na tiisiya, Nnyizinku anteeliye khusala amuuza araka: “Miiyo ki Nluku Nwahi zooshi. Weettettele mwentto kintakhaaye miiyo, wiiye ntthu nkemaani, 2yoori kirette wahati miiyo na weeyo, na kinteela owinkha ojama wa waatta.”
3Aphano Eburamu khukokhora khulawa sijita, Nluku khusala anttakhulana ye araka: 4“Wahati opu kinrettanaaye weeyo, phantte yaka kiniwaahiti yoori onteela wiiya paapa wa khapila za waatta. 5Waaza leelo nzina lawo khahiyo Eburamu, ila Eburahiima#17:5 Nzina ntthi la Eburamu khwa luuka ya Meepereewu lina maana a paapa woottitthimisiwa. Nzina ntthi la Eburahiima lina maana a paapa wa atthu a waatta. ti linttelaaye wiiya nzina lawo, mwaasa yoori kinttela wuuretta opaapa wa khapila za waatta. 6Kinteela waattisa channu ojama awo, khwa weeyo kinretta khapila za waatta, akinoko aya anteela wiiya afwalume. 7Wahati opu kinrettaaye khwa weeyo na ojama awo, onttela wiiya wa mileele. Miiyo ki Nluku awo na wa ojama awo. 8Kinteela owinkha tuniya eti oniikhalaaye, weeyaru pure mmalapo. Tuniya yooshi ya Kanaani kinteela winkha ojama awo mileele, na miiyo kinteela wiiya Nluku aya.”
9Nluku khurutela omuuza yoori: “Phantte yawo ona yooshututela wahati aka, weeyo na ojama awo mileele. 10Wahati aka, linttelaaye oshuka, miiyo na weeyo na ojama awo pi opu: wakhula mwaana wanlume ona yookhiriyisiwa. 11Okhiriya waya opo, alama ya wahati aka miiyo na mweeyo. 12Wakhula mwaana anvokoliwaaye wanlume vakatthi wa ojama awo, noofiya siikhu yanaane ona yookhiriyisiwa, hatha nkhama karumeya woovokoliwa vaje vawo, mpakha amwiitthwaana amalapo a wuuzanyiwa na apale ohiiyi a ojama awo. 13Hatha nkhama pi apa oovokoliwa vaje vawo mpakha apa a wuuzanyiwa ana yookhiriyisiwa. Alama eti yookhiriya vamwiili venu, enthoonyeza wahati aka na mweeyo khwa mileele. 14Otule ahinttelaaye okhiriya eekariwevo vakatthi venu, mwaasa yoori akattha wahati aka.”
15Nluku khumuuza Eburahiima theenya yoori: “Muukhaawo khanteela wiitthiwa theenya Suhuriiya, ila nka eetthiwaka Suhura. 16Kinteela omparikhiya na kimwinkhe mwaana wawo; khweele, miiyo kinimparikhiya na onteela wiiya maama wa khapila za waatta, afwalume anteela opuwa khwa ye.”
17Aphano Eburahiima khukokhora khusijiti, ila khusala ajitheyela nroho mwawe ajuuzelaka toono: “Nlume wa nyaakha miiya eeyane mwaana? Khi Suhura ariina nyaakha tiisiini ate ampatthe mwaana?” 18Eburahiima khumuuza Nluku: “Omwinkhe ruhusa Esumayila, yoori eeye namarithi aka.”
19Ila Nluku khunjipu: “Miiyo kiniwuuza khweele yoori, muukhaawo Suhura onteela ompattha mwaana, ontthaje nzina la Esiyaakha#17:19 Nzina ntthi la Esiyaakha lina maana a ye atheya.. Kinteela oshuka wahati aka na ye, na ojama awe ontaaye khwa mileele. 20Kasiila oveka wawo khwa Esumayila. Kinteela omparikhiya na kinteela omwinkha ojama wa waatta. Ye onteela wiiya paapa wa Afwalume khumi na awiri, khwa ye enteela opuwa theenya khapila ya waatta. 21Ila wahati aka kinteela oshuka mmakhono wa Esiyaakha, otu anttelaaye ovokoliwa ti Suhura wakathi otthuupu wa mwaakhani.” 22Nawiisha ottakhula na Eburahiima, Nluku khulawa.
23Siikhu ethiitile, Eburahiima khunthuula mwanawe Esumayila na ooshi aavokoliweeyo vaje vawe na apale aawuuzanyiyeeyo aalume. Khulawa owaakhiriyisa, nkhama etthiipo Nluku aamuuziyeezo. 24Wakathi aakhiriyaziyeevo, Eburahiima aarettiye arina nyaakha tiisiini na tiisiya, 25na mwanawe Esumayila aari oretta arina nyaakha khumi na mittatthu. 26Eburahiima na mwanawe aakhiriyiye siikhu moote, 27vamote na Eburahiima akhiriyisiwe apale aavokoliweeyo owawe, mpakha amalapo apale a wuuzanyiwa.
© 2020, Wycliffe Bible Translators, Inc. All rights reserved.